پنجابی زبان دی پڑھائی ویلے دی لوڑ اے

ساری دنیا اپنے بالاں نوں اپنی مادری زبان وچ سکھیا دے رہی اے پر ساڈے پنجاب دے بالاں نال دنیا توں وَکھرا سلوک اَج وی جاری اے۔ جے سکول وڑدیاں ای اوہناں دی مادری زبان پنجابی کھوہ کے انگریزی تے اردو دا قاعدہ اوہناں دے ہتھ وچ تھمادِ تا جاندا اے۔جویں کنک گندم تے چونا’ چاول تے کھوہ’ کنواں بن جاندا اے بچے استاد دی زبان وچوں نکلے اکھر سن سن پریشان ہو جاندے نیں تے اخیر سکولوں نس جاون دا فیصلہ کر لیندے نیں۔اج ساڈے ڈھائی کروڑ بچے سکولوں باہر نیں پر ماہر تعلیم کدی سنجیدہ ہو کے سوچدے ای نہیں پئی ایس طراں کیوں وے (لٹریسی ریٹ) شرح خواندگی سو فیصد کیویں کیتی جا سکدی اے۔
مہاراجے رنجیت سنگھ ویلے لٹریسی ریٹ 85فیصد سی۔ راجہ تے وچارا ان پڑھ سن۔ اوس سرکاری چلدی گڈی نوں فارسی تے ای چلائی رکھیا۔کاش اوس نے پنجاب دی سرکاری زبان پنجابی کیتی ہوندی تے اج تعلیمی صورتحال گھمبیر نہ ہوندی۔
ساڈی بدقسمتی اے جے ونڈ ویلے پنجاب دی ز بان کھوہ کے اردو لاگو کیتی گئی۔ دفتری تے سرکاری زبان انگریزی ای رہی۔ اردو نوں بیوروکریسی دفتراں دا بوہا اسی لنگھن دتا۔ تعلیمی میدان وچ تجربے کردیاں اساں چار نسلاں ویران کر چھڈیاں نیں۔ پنجابی زبان نال کیتا گیا ظلم تے پنجابیاں دے حقاں نوں کدی تسلیم ای نہیں کیتا گیا۔ سوال تے ایہہ وے جے پنجاب اسمبلی وچ پنجابی زبان وچ ممبراں نہیں بول سکدے میں پچھنی آں کیوں؟ ایہہ اسمبلی پنجاب دے عوام دے پیسے نال نہیں چلدی؟۔ ممبرعوام دے ووٹ لے کے اوہناں دے حقاں دی حفاطت دا ذمہ لے کے نہیں آئے۔
اٹھارویں ترمیم مگروں تے صوبے مکمل آزاد نیں۔ اپنی تعلیمی پالیسی بارے خود فیصلے کرن۔2019فروری وچ لاہور ہائیکورٹ وچ فیصلہ ہو گیا۔ اپنی زبان پنجابی نوں لاگو کرن دا۔
پنجاب سرکار دی خاص توجہ طلب مسئلہ
صورتحال وچوں اک معاملہ ایہہ وی اے جو میں جناب (چیف منسٹر) وزیراعلیٰ دے گوش گزار کر رہی آں۔ میں اک پنجابی زبان دی نکی جئی سیوک 2019توں پنجابی زبان دی سکولاں وچ پڑھائی لئی استاداں دی تقرری لئی کوششاں کر رہی آں۔ میں اک استاد آں تے چنگی طراں جانوں آں جے ایہہ مسئلہ کیویں حل کیتا جا سکدا اے۔
پنجاب دے ہائی تے ہائر سیکنڈری سکولاں وچ اج ہزاراں تے لکھاں طالبعلم بے یارومددگار 12th, 11th, 10th, 9th جماعت دا پنجابی زبان دا امتحان اپنی مدد آپ یا کج پنجابی پیارے استاداں دی مدد نال 90فیصد تے 100فیصد نمبراں نال پاس کر رہے نیں۔ سوال ایتھے ایہہ وے جے سرکاری سکولاں اندر اوہناں نوں استاد کس مہیا کرنے نیں؟ پنجاب سرکار نیں۔
سیکرٹری سکولز نوں پنجابی ادبی بورڈ دے تعاون نال اک ڈیٹا دفتر (ثانوی تعلیمی بورڈز) داخل کیتا گیا۔ جیہدے اتے اوہناں خوب غور کرن مگروں پنجاب دے چھتی ڈسٹرکٹ وچ ٹوریا تے واپس S.N.E دے نال ہزاراں استاداں دی تقرری دی پنجاب سرکاری توں منگ کیتی گئی۔پہلے مرحلے وچ سولہ ڈسٹرکٹ دے S.N.Eنال کاغذات مکمل کر کے سیکرٹری سکولز ولوں (1948) پوسٹاں بنائیاں گئیاں۔ فیر فائل منظور لئی فنانس دے سیکرٹری وَل کیس گھلیا گیا۔ اوہناں حسب عادت اعتراضات لا کے واپس کردتا۔ جہڑے محکمہ تعلیم دے سیکرٹری نے دور کردِتے۔ ہن معاملے نوں فائلاں دی نذر ہوون توں تسی بچا سکدے او۔ پنجاب دے لاوارث طالبعلماں نوں استاد مہیا کر کے شکریہ دا موقع دیو۔ زبان بچائو پچھان بچائو ۔
تھرو (SNE) (1948) کل پوسٹاں دی تعداد 16′ ڈسٹرکٹ دی سطح اتے سی ای او نے و د اخراجات سرٹیفکیٹ سیکرٹری سکولز پنجاب نوں گھلیاں نیں۔
(1) راولپنڈی10۔(2) بہاولنگر 002۔ (3)پاکپتن 0/7۔ (4) منڈی بہائوالدین 009′(5) سرگودھا 0/2۔ (6) بہاوپور128۔ (7) اوکاڑہ 520۔ (8) شیخوپورہ 113+113۔(9) گوجرانوالہ 089۔(10) اٹک 001′ (11) خانیوال 016۔(12) فیصل آباد 025۔(13) رحیم یار خان 306۔ (14) مظفر گڑھ 386۔ (15) لاہور 182۔ (16) گجرات 019 (1250) (698) 1948ٹوٹل
ٹوٹل پوسٹاں تعداد 1948
نوٹ: پنجاب دے سرکاری ہائی تے ہائر سیکنڈری سکولاں وچ پنجابی زبان دے ماہر استاداں دی تقرری دا عمل شروع ہو چکیا اے۔
پنجاب دے محکمہ تعلیم سکولز دے سیکرٹری صاحب نے بوہت محنت کیتی اے۔ باقاعدہ SNEدے تھرو پنجاب دے سولہ ضلعیاں دے کاغذات مکمل کر کے 1948سیٹاں بنا دتیاں نیں۔ ہن سیکرٹری فنانس نے حتمی منظوری دینی اے۔ باقی ضلعیاں دے پیپرز تے کم ہو رہیا اے۔ پہلے مرحلے دی فائل تہاڈی مدد دی منتظر اے۔ امید اے جے تسی ساڈی مدد کرو گے تے اسی اپنی مادری زبان نوں ماہرا ستاد دیون وچ جناب پرویزالٰہی صاحب نوں خاص مہربانی دی امید رکھنے آں۔ گلوبل ولیج وچ پنجابی زبان تے پنجابی ثقافت ای ساڈا مستقبل اے۔
نوٹ: ایہہ سارا کم پچھلے تن ورھیاں دی محنت دا نتیجا اے۔ 2022وچ سبھ توں پہلاں فیصل آباد تے دُوجے سیالکوٹ تے ہن لہور ٹھوکر دے اَپ گریڈ ہوون والے سکول نوں گریڈ سولہ دی پورٹ دے دتی گئی اے۔ سرکاری نوٹیفکیشن جاری کردتے گئے نیں۔