اک بیلی سی چڑھدے پنجاب توں

آرٹ دا پودا دھرتی توں جم لیندا اے اتے آرٹسٹ دے پیر چوکھی مضبوطی نال دھرتی نال جڑے ہوندے نیں آرٹسٹ کسے وی قوم دا سبھ توں وڈا سرمایا ہوندا اے،میں سدھو موسے والے نوں چوکھے چر توں جان دا ہاں،میں اوہناں دے گیتاں وچ موجو ہتھیاراں دے ذکر نوں لے کے اپنے لیکھاں وچ تنقید وی کردا رہیاں ۔اک دن چڑھدے پنجاب فاضل کا دے اک بیلی ببو براڑ گھڑیانہ راہیں موسے والے دے باپ بلکار انکل نال گل کرن دا موقع بنیا اوہناں نال میں کھلھ کے دل دیاں گلاں کیتیاں اوہناں نال سانجھ پائی پئی اج دے سمے اندر موسے والا سب توں وڈا پنجابی گائیک ہے پر اوہدی لیکھنی وچ موجود ہتھیاراں دا ذکر وڈیاں وڈیاں گڈیاں دا ذکر ساڈی آون والی نویں پنجابی پیڑھی نوں لہا دا پاندھی بنا رہیا اے۔ساڈی نویں نسل نوں فکری پکھوں اغوا کر لتا گیا اے۔ کجھ دناں بعد بلکار انکل نے میری سدھو موسے والے نال گل کرائی اوہناں دے وچار سن کے میں حیران ساں پئی میں موسی والا نوں نرا اک گائیک سمجھداں ساں ایہہ توں اک ودوان وی ہے۔اپنی قوم دی گل پنجاب اتے پنجابی دی گل دھرتی دی گل دھرتی دے پتراں دی گل موسے والا بارے میرے وچار اوس لمی وٹس اپ کال توں بعد بدل گئے سن ،ہتھیاراں والی گل دا بڑا سوہنا جواب دیندیاں موسے والا نے کہیا سی ڈاکٹر صاحب جان بجھ کے پنجابی قوم دا مزاج بزدلاں والا بنا دتاگیا اے۔ اج ساڈی ایہہ مندی حالت ہتھیاراں توں دور ہون دی وجھا توں اے۔ہتھیار مرد دا زیور ہوندا اے۔ضروری نہیں اسیں ہتھیاراں راہیں ڈران دھمکان دا کم لوئی یاں کسے نال زور دھکا کرئیے اپنے بچا لئی اپنی حفاظت لئی ساہنوں ہتھیاراں نال تعلق رکھنا ات لوڑیدا ہے۔
ایس دے نال نال فکری پکھوں اپنے وچاراں نوں محفوظ رکھن لئی وی اپنے پنجابی ہیرواں دی حیاتی بارے مڈھلی جانکاری وی ہر پنجابی لئی ات ضروری ہے۔ایس توں مگروںموسے والے نال میرے گوڑھے سمبندھ بن گئے پنج ستاں دناں بعد پنجابی ،پنجاب اتے پنجابیت بارے گل بات ہوندی رہندی۔الیکشن دے دناں وچ موسے والا جو کہ مانسہ توں کانگریس ولوں الیکشن لڑ رہیا سی میں
ایس دوران اوہناں دے لائیو پرچار سندا رہیا اوہناں دے ہر پرچار وچ پنجابی قوم نوں جگان پنجابیت نال جوڑن اپنے حقاں لئی کھلوجان دا ہوکا ہندا سی،میں لہندے پنجاب وچ بیٹھ کے مانسے والے حلقے اپر ڈوہنگھی نگاہ رکھی سی کدی کدی فون تے موسے والا نال ہیلو ہائے وی ہو جاندی سی تے مینوں ہمیش ای اندازہ ہوندا سی پئی اوہ بوہت پازیٹو رزلٹ ای امید رکھد ااے۔اوہدے جلسیاں اندر ہزاراں دی گنتی وچ لوک رلتی کردے سن پر چوناں دے نتیجے موسے والے دے حق وچ چنگے نہیں سن آئے ۔چوناں دے رزلٹ آن بعد اک دن جدوں میری موسے والے نال گل
ہو رہی سی تاں اوہ ذرا جناں وی پریشان نہیں سی میں اوہدیاں گلاں توں ایہہ گوہ لا رہیا ں سی پئی پنجابیاں لئی درد رکھن والا ایہہ نوجوان سچے اتے سچے معنیاں وچ جتیاہویا اے۔
پر اک دن اوہ حیاتی دی کھیڈ وچ ہار گیا مئی نوں شامیں پنج وجے موسے والے نوں مانسے لاگے جواہر کے پنڈ وچ گولیاںمارکے قتل کر دتا گیا،پنجابی قوم اک گائیک ،اک ودوان ،اک ودھیاسیاستدان،قوم دا دکھ درد رکھن والے نوجوان توں محروم ہوگئی۔نقصان پنجابیاں دا ہویا پنجابیاں دی اک بھرویں واج دا سنگھ گھٹ دتا گیا۔پنجابی بڑے بھولے نیں سدھے معصوم بالکل نہیں جان دے اوہناں نال کی بھانا ورت چکا اے۔ پنجابیاں دی ہر اوہ واج دبان دا جتن کیتا گیا جیہڑی قوم لئی اُچی ہوئی بھاویں اوہ دیپ سدھو ہووئے یاں موسے والا۔اوہدے پنڈے وچ لگن والی اک اک گولی جتھے موسی والے نوں مار گئی اوتھے اوہناں گولیاں نیں پنجابی گائیکی آرٹ دا سینہ وی ونھ کے رکھ دتا۔ مانسے دی دھرتی اپر ہون والی موسے والی دی موت نری موسی والے دی موت نہیں سگوں پنجابی آرٹ دی موت اے۔آرٹ توں جے ہٹ کے گل کرئیے تاں ساہنوں ایہہ وی سمجھ آوندی اے پئی بھارتی پنجاب وچ جو وی دلی دی سرکار اگے پنجاب دے حقاں دی گل کرے گا اوس داسنگھ ایسراں ای گھٹیا جاوئے گا ۔چڑھدے پنجاب وچوںاک بیلی دا جنازہ اُٹھ گیا ۔رب کرے پنجابی پنجاب اتے پنجابیت نوں کدی تتی وا نہ لگے ۔آمین