پی ایچ اے سرگودھا میلہ 2022

میلے ٹھیلے زندہ قوماں دی پہچان تے شناخت ہوندے نیں تے ایس سرزمین دی زرخیزی تے تخلیق نوں دنیائے عالم وچ نمایاں مقام دوان وچ سنہری موقعے فراہم کردے نیں تاں جے عوام الناس دی پچھلی تے آن والیاں نسلاں نوں ویلے تے روک کے اک پلیٹ اتے لیا کھڑا کیتا جاوے تے ثقافت دے رنگاں توں بے رنگ چلن وچ رنگ بھریا جا سکے مگر ایہدے لئی دوراندیش تے ہر طرحاںدی آزمائشاں نال نبردآزما ہون لئی نڈر’ باصلاحیت تے ویلے تے فیصلے لین والے قیادت دے زیرسرپرستی فعال دستے دی ذہنی ہم آہنگی ہمیشہ کلیدی کردار ادا کردی اے۔ ایہو سوچ تے طرزعمل پارکس اینڈ ہارٹیکلچر اتھارٹی سرگودھا دے پربندھ ہیٹھ پنجاب کونسل آف دی آرٹس سرگودھا ڈویژن تے خواتین چیمبر آف کامرس اینڈ انڈسٹری دے اشتراک نال ست دن جاری رہن والے لوک میلہ 2022وچ مکمل طور تے وکھائی دتا۔ سرگودھا وچ کدی میلے ہویا کردے سن مگر ویلے دے نال نال تے حالات دی بے رحمانہ چال نے ایس قیمتی سرمائے نوں ایس سرزمین توں دور کر دتا۔ ایہدے علاوہ پچھلے دو ورھیاں توں کورونا وائرس دے پیش نظر وڈے پیمانے تے ہرقسم دی ثقافتی سرگرمی نوں روکے رکھیا تے لوکاں لئی تفریح دا سامان مکمل طور تے ناپید ہو کے رہ گیا۔
ہن جدوں حالات سازگار ہوئے تے بلی دے گلے وچ گھنٹی کون بنھے گا دے مترادف صورتحال نے جنم لیا۔ایس چیز نوں مدنظر رکھدے ہوئے موجودہ ڈائریکٹر جنرل پی ایچ اے سرگودھا سید توقیر حیدر کاظمی نے میلے دا سفنا ویکھیا تے ایہنوں شرمندہ تعبیر کرن لئی متنوع اذہان نوں وقتاً فوقتاً مدعو کیتا جاندا رہیا تاں جے لوکاں نوں ایسی معیاری تفریح جہڑی ورھیاں یاد رہوے ‘ مہیا کیویں کیتی جاوے تے ادارہ کیویں دوجے اداریاں تے دوجی تخلیقی شخصیات نوں ایس کارخیر دھارے وچ شامل کرے۔ شب و روز دی تگ و دو تے انتھک محنت دی موسلا دھار بارش مگروں ابھرن والے سورج نے ایہناں بارش دے قطریاں اتے چانن پایا تے ست دن ست رنگاں دی دھنک وچ ڈھلدے نظر آندے گئے جہڑے سرگودھا دی سردھرتی لئی کسے نعمت توں گھٹ ثابت نہیں ہوئے۔ ایس سلسلے وچ ایگزیکٹو ڈائریکٹر پنجاب آرٹس کونسل ابرار عالم دی سربراہی وچ کم کردیاں ہوئیاں پنجاب کونسل آف دی آرٹس سرگودھا ڈویژن دے ڈائریکٹر زاہد اقبال نے ادارے دے اسسٹنٹ ڈائریکٹر عدنان خالق بھٹی دے نال اپنی پیشہ وارانہ خدمات وی پیش کر دتیاں تاں جے ایس میلے نوں یادگار بنان لئی آرٹس کونسل دے فعال کردار دی معاونت نال سرگودھا دے باسیاں نوں خوشگوار احساس دواندے ہوئے اعلیٰ معیاری تفریح نال محظوظ کیتا جاوے۔ ڈی جی پی ایچ اے نے ایس آفر نوں کھلے دل نال قبول کر کے اشتراک دی اک نویں سوچ دتی تے اعتماد بخشیا۔ پنجاب کونسل آف دی آرٹس سرگودھا ڈویژن دی دو رکنی ٹیم نے سٹیج دی تزئین و آرائش’ ملکی فنکاراں دی آمد’ اوہناں دی خاطر تواضع’ مقامی فنکاراں دی حوصلہ افزائی’ مسحور کن استقبال’ سکیورٹی تے دُوجے انتظامی امور وچ نہ صرف اپنی ماہرانہ رائے دتی بلکہ عملی جامہ پہنان وچ وی ودھ چڑھ کے حصہ لیتا جہدا اعتراف ہر سطح اتے نمایاں لفظاں وچ کیتا گیا۔
ایس میلے وچ چیئرمین پی ایچ اے شفیق سندھو دی ذاتی دلچسپی تے محبت نے ست دن لوکاں دے چہریاں اتے ہاسے بکھیرے۔ میلے وچ پاکستان دے چاراں صوبیاں دے بوہے نصب کیتے گئے جہڑے اپنے اپنے علاقیاں دی روایتاں دی عکاسی کردے نظر آئے۔ ایہدے نال نال مختلف سرکاری غیر سرکاری اداریاں نال رل کے سٹال وی لائے گئے جہناں وچ خواتین چیمبر آف کامرس اینڈ انڈسٹری نے ہر اول دستے دا کردار نبھاندے ہوئے عوام الناس نوں سرگودھا دی خواتین دا کاروباری دنیا وچ معیشت دی نمو وچ حصے توں متعارف کروایا گیا جہڑی ایس میلے دی سب توں منفرد سرگرمی سی۔ ایس سلسلے وچ رکن پنجاب اسمبلی شمیم آفتاب نے اپنی لگن’ محنت تے ولولہ انگیز قیادت نال خواتین نوں اک نواں حوصلہ فراہم کیتا۔ چیمبر دے سٹالاں وچ کپڑے’ چادراں’ کشیدہ کاری تے کرافٹ دی شیواں موجود سن۔ محکمہ سوشل ویلفیئر دے زیر نگرانی صنعت زار وچ خواتین دے ہتھوں تخلیق کردہ کپڑیاں دے ڈیزائن’ کرافٹ’انٹیرئیر تے دُوجیاں منفرد شیواں دی نمائش لائی گئی۔ ایہدے وچ ڈویژنل ڈائریکٹر شاکرہ نورین نے ذاتی دلچسپی لیتی۔ ایہدے علاوہ یونیورسٹی آف سرگودھا دے انسٹیٹیوٹ آف آرٹ اینڈ ڈیزائن دے استاد تے طلبا و طالبات دے فن پارے وی رکھے گئے تے مقامی مصوراں دے خطاطی تے مصوری دے شاہکار شامل سن جہناں دی جاذبیت نے لوکاں نوں اپنے حصار وچ جکڑے رکھیا۔ یونیورسٹی دے زرعی کالج دی ٹیم نے زرعی ماڈل’ مشینری’ جدید مہارتاں نال تخلیق کردہ پودیاں دے وی سٹال لائے۔ اوہناں دے نال محکمہ زراعت توسیعی نے وی مختلف پودیاں دے بیج اوہناں دی بوائی تے ماڈلاں دے ذریعے لوکاں نوں معلومات فراہم کرن دا پربندھ کیتے رکھیا۔ سرگودھا دی پہچان سلانوالی کرافٹ دے خصوصی مراکز وی قائم کیتے گئے جہدے وچ مقامی لوکاں دی صدیاں اتے محیط کاریگری نوں مندوبین نال متعارف کروایا گیا۔
ہلال احمر’ ریسکیو 1122′ پنجاب پولیس تے دوجے محکمیاں دے بوتھ وی بنائے گئے تاں جے ہنگامی صورتحال نال نبڑن لئی ویلے تے اقدامات کیتے جا سکن۔ پی ایچ اے ولوں عمارت نوں برقی قمقمیاں تے رستیاں نوں پھلاں نال سجایا گیا۔ منفرد آتش بازی نے میلے دی رونق نوں چار چن لا دتے۔ راویتی کھانیاں دے بغیر میلے پھکے رہندے نیں ۔ایس گل نوں مدنظر رکھدے ہوئے مختلف قسماں دے چٹ پٹے تے مٹھے کھانے’ مشروبات تے دُوجیاں کھان دیاں شیواں دے باقاعدہ کائونٹر لائے گئے جہناں اتے رش ای رش نظر آیا۔ ست دن رہن والے میلے وچ بالاں لئی جھولے لوائے گئے تے جادوگر عدنان کمال’ بلند قامت کارٹون کردار’کراچی توں خاص طور تے بلائے جان والی آتشی رقص دی حسین دی پارٹی نے بچے وڈے ساریاں نوں اپنے فن دی گرفت وچ رکھیا تے بے مثال داد حاصل کیتی۔ میلے وچ صوبائی وزیر برائے لیبر عنصر مجید نیازی’ اراکین پارلیمان افتخار گوندل ، شمیم آفتاب ، چیئرمین سرگودھا ڈیویلپمنٹ اتھارٹی ممتاز کاہلوں ، ڈپٹی کمشنر سرگودھا کیپٹن ریٹائرڈ ندیم ناصر ، ڈسٹرکٹ پولیس آفیسر طارق عزیز ، ڈائریکٹر انٹی کرپشن عاصمہ اعجاز چیمہ تے دوجے معززین گاہے بگاہے بطور اچیچے پروہنے رلت کردے رہے۔ ایہناں استقبال نوں منفرد بنان لئی گلدستے پیش کرن دے عالوہ روایتی پگڑیاں تے چدراں دے نال نال ڈھول دی تھاپ اتے روایتی رقص وچ بگھی دا پربندھ وی کیتا گیا۔
موسیقی کسے وی میلے دی جان سمجھی جاندی اے۔ ایس سلسلے وچ ست دن ملک دے منے پرمنے گلوکار تے قوال بلائے گئے جہناں وچ پٹیالہ گھرانے دے چشم و چراغ استاد گائیک حامد علی خان’ ملکو’ مشتاق چھینہ’ غلام عباس’ فراست’ معظم رضوان تے اعجاز شیر علی نے سرگودھا دی تریخ وچ اک نویں داستان رقم کردتی۔ تسیں خود ایس احساس نوں محسوس کرو کہ جہناں آوازاں نوں ٹیلی ویژن تے آڈیو کیسٹ وچ سنیا ہووے اوہ جدوں تہاڈی اکھاں دے سامنے اپنے فن دا مظاہرہ کرن تے اندرونی تے بیرونی کیفیت کیہ ہووے گی تے یقین دی ناقابل تسخیر منزلاں طے ہو رہیاں ہون تے ایس صورتحال نوں قلم تحریر کرن توں وی قاصر نظر آندا اے۔ میلے وکھن والے رقص دا ضرور پچھن گے تے ایس سلسلے وچ فیاض دی ٹیم لہور توں آئی جہنے پنجابی’ سندھی’ بلوچی’ پختون’ کشمیری تے بلتی روایتی رقص روایتی لباس وچ ملبوس پیش کیتا تے لوکاں نوں ورطہ حیرت وچ پاندے ہوئے سرگودھا دی فضا وچ رنگ بکھیر دتے تے اک نویں امید صبح دوا دتی۔
ادب توں متعلق مشاعرے دا پربندھ وی کیتا گیا جہدے وچ ملک دے مشہور شاعراں دے نال نال مقامی شاعراں نے وی اردو تے پنجابی وچ اپنا اپنا کلام پیش کیتا۔ شاعراں وچ ڈاکٹر طاہر شہیر ، علی ڈار، یوسف خالد ، فرح شاہ ، طارق حبیب ، ڈاکٹر مرتضی حسن شیرازی ، مومن ہاشمی ، کاوش تمیمی ، فرخ اعجاز نصیر سیال ، زاہد اقبال ، اعجاز راج ،عاشق راہی تے دوجیاں نے بعوض اپنے کلام خوب داد سمیٹی۔ میلے وچ مقامی فنکاراں وچ مسکان جاوید، کاشف علی کیکے، جاوید علی دیسی منڈا، ثاقب علی شیر ، اور میوزیشنز میں بنارس، افضل جمی تے دوجیاں دی پرفارمنس نوں عوام نے سراہیا۔ ایس دے علاوہ پنجاب کونسل آف دی آرٹس سرگودھا ڈویژن تے سکس فورم دے اشتراک نال سوہنے سیٹ تے ڈرامہ بے چارے لوگ پیش کیتا گیا ۔ ملک دے منے پرمنے تیلی ویژن ڈرامہ نویس مہر آصف حنیف دے تحریر کردہ ایس ناٹک وچ قاسم علی’ اکرم انجم’ شاہد بخاری’ ارشد شاہین تے ارشد شیخ سنے دوجی کاسٹ نے اپنی صلاحیتاں نال لوکاں نوں محظوظ کیتا۔
میلے دی کامیابی وچ ڈائریکٹر جنرل پی ایچ اے سید توقیر حیدر کاظمی، ڈائریکٹر کونسل زاہد اقبال، ڈپٹی ڈائریکٹر شفیق الرحمن نیازی، اسسٹنٹ ڈائریکٹر عدنان خالق بھٹی، پی ایچ اے میڈیا کوآرڈینیٹر شفقت اعوان تے جملہ افسران تے سٹاف نے دن رات محنت کیتی تے اوہناں دی حوصلہ افزائی لئی تے پروہنیاں نوں یادگاری تے تعریفی شیلڈ نال نوازیا گیا۔ ایس میلے وچ میڈیا سوشل میڈیا تے نامور فوٹو گرافر حسن چدھڑ تے فصیح شاہ دی کارکردگی وی قابل ستائش رہی جہناں نوں مختلف ویب لنکس اتے ویکھیا وی جا سکدا اے۔ لوڑ ایس امر دی اے کہ میلیاں دے منعقد کروان دا سلسلہ برقرار رکھیا جاوے تے اداریاں وچ اشتراک نوں ہور تقویت دیندے ہوئے سرگودھا وچ ہور تخلیقی تے تفریحی موقعے فراہم کیتے جانے چاہیدے نیں تاں جے گھٹن زدہ’پریشانیاں وچ گھرے تے نامساعد حالات وچ جین والیاں دا جین دا پربندھ ہو سکے جہڑا ذہنی زرخیزی نوں وسعت دین دے نال نال پاکستان دا اصل تشخص دنیا تک پہنچا سکے۔