گھٹن زدہ ماحول تے اخترلاوا دی انٹری

سیاسی ماحول کناں آسیب زدہ اے۔ پاکستانی گھٹن تے حبس محسوس کردے نیں۔ مہنگائی دے طوفان دے تھپیڑے جیندے جی مار رہے نیں۔ ایس ماحول وچ وی جے تفریح دے موقعے ملدے نیںتے لوک زندہ دلی دا مظاہرہ کردہ ہوئے ایہناں نوں انجوائے کردے نیں۔ اج کل لہور دا پاوا اختر لاوا کردار بڑا شہرت پا رہیا اے۔ لہوریئے خاص کر ایس بحرین پلٹ لہوریئے دی مزاحیہ بڑھکاں نوںانجوائے کردے نیں۔ اخترلاوا دیاں بڑھکاں اوہدی نیک نامی وچ وادھا تے نہیں کر رہیاں پر لوکاں لئی کسے حد تک تفریح دا اوہدے وچ سامان ضرور موجود اے۔ ایہدا سوشل میڈیا تے زیادہ ای چرچا اے ایہدے انٹرویوز چل رہے نیں جہناں وچ اوہ خواتین حراسگی تے بحرین توں کڈھے جان دا اعتراف وی کردا اے۔ اجہے لوکاں لئی پاکستان دی سرزمین زیادہ ای زرخیز ثابت ہوئی اے۔ اوہنوں شاید کوئی پارٹی سیاست وچ وی استعمال کر رہی اے۔ اوہ برملا اک سیاسی پارٹی نال وابستگی دا اظہار کردا اے۔ کسے دور وچ لہور وچ ای سلیم کرلا نامی سیاستدان نے وی شہرت پائی سی۔ اوہ وی انج دا ای کردار سی۔ اوہنوں پاکستان دے سٹار کرکٹر سرفراز نواز دے مقابلے وچ ٹکٹ دے کے انتخابی میدان وچ اتاریا گیا سی۔ سلیم کرلا نے اپنے ناں پاروں شہرت پائی سی۔
اک ہور سیاست وچ وڈا ناں بنان والا بندہ امبرشہزادہ اے۔ اوہ اپنے کردار تے عمل توں ایہ ظاہر کرن دی کوشش کردا رہیا کہ ساڈا نظام کناں مضحکہ خیز اے۔ جدوں وی صدارتی انتخاب ہوندے نیں اوہ وی میدان وچ آ جاندا اے۔ اوہنے اک فرضی پارٹی آپ سرکار پارٹی بنا رکھی اے۔ پورا ناں نواب ڈاکٹر امبر شہزادہ دسدا اے۔ انتخابات وچ حصہ لین دا اعلان کردا اے۔ انتخابی مہم چلاندا تے منشور دا وی اعلان کردا اے۔ ساڈی سیاست تے معاشرے تے خوبصورت طنز اوہدی پچھان بن گئے نیں۔ اوہدے ایس طرح دے پوسٹر ہوندے نیں۔ تھوڑی رشوت کم زیادہ’ وزیراعظم امبر شہزادہ۔ اوہ 42 واری الیکشن ہر چکیا اے۔ جت اوہدا مقصد ای نہیں اوہ جہڑی گل کرنا تے لوکاں تک اپڑانا چاہندا اے اوہ اپڑ جاندی اے۔ اوہ کہندا اے عوام کا چمچہ اور نیم کرپٹ شخص متبادل وزیراعظم۔ نیم کرپٹ آوے گا ملک ترقی پاوے گا۔ اوہدا انتخابی نشان وی چمچہ’ کدی لوٹا ہوندا اے۔ ایہ کیو ںجے الیکشن کمیشن دی لسٹ وچ موجود نہیں نہیں تے اوہ تابوت’ قبر تے کفن وی انتخابی نشان منتخب کر لیندا۔ انتخابی مہم دوران میڈیا تے عام مجلساں وچ امبرشہزادہ دے چرچے چلدے رہندے نیں۔ لوک اوہدی شخصیت’ اوہدے روپ دھارن’ اوہدے پوسٹرز تے تقریراں توں واقعی لطف اٹھاندے نیں۔ اوہ ساڈے سیاسی کلچر دی جو عملاً سیاست وچ ہوندا اے اوہدی صحیح عکاسی کردا اے۔
دوستو! اک واری عام انتخابات دا چرچہ سی تے امبرشہزادہ صاحب اوہدے وچ وزیراعظم دے امیدوار وی سن تے میرے اک دوست امبرشہزادہ صاحب نوں لے کے میرے کول آئے اسیں اکٹھے لنچ کیتا تے ملک دی سیاسی صورتحال تے غیرحقیقت پسندانہ تبصرہ وی اوس محفل دا حصہ بنیا۔ اجہے کرداراں دی اج دے گھٹن زدہ ماحول وچ زیادہ ضرورت اے۔ خاص طور تے اٹھ نو مہینے وچ جو کجھ ہو رہیا اے۔ اوہنے افراتفری وچ ہور وادھا کر دتا اے۔ بریکنگ نیوز تے بریکنگ نیوز’ طوفانی خبراں’ کجھ لمحیاں وچ بدلدی صورتحال نے اک ہیجان برپا کر رکھیا اے۔ ستیاں پیاں اکھ کھل جاندی اے’ ہڑبڑا کے لوک موبائل آن کردے نیں یاں ٹی وی چلاندے نیں کہ ہن دی بریکنگ نیوز کیہ اے۔ عام لوک تے خاص طور تے سیاستدان’ دوجے شعبیاں دے اکابرین دی سیاست نوں لے کے ڈپریشن دا شکار نیں۔ مہنگائی ن ے کیہ حالت کر دتی اے۔ پٹرول دنیا وچ سستا ترین اے ساڈے ایتھے کوئی ریلیف نہیں دتا جا رہیا۔ حکومت کرن دا شوق سی’ کہندے نیں ریاست بچان آئے سن’ معیشت چلان آئے سن’ ریاست کتھے جا رہی سی’ معیشت ہور ڈب گئی۔ مولانا فضل الرحمن فرماندے نیں معیشت ڈب چکی اے۔ سیاسی بحران گھمبیر ہوندا جا رہیا اے جہدے چوں نکلن دا اکو حل اے کہ لوکاں دے کول نویں مینڈیٹ لئی جایا جاوے۔ پر حکومتی پارٹیاں ایہ رسک لین لئی تیار نہیں۔ عمران خان مقبولیت دا جن اوہناں نوں انتخابی عمل توں دور نسا رہیا اے۔
آزادکشمیر وچ ہون والے بلدیاتی الیکشن وی حیران کن رہے۔ اوتھے ہمیشہ اوہو پارٹی جتدی رہی اے جو مرکز وچ حکمران ہووے۔ اوہدا اوتھے امور کشمیر دا وزیر ہوندا اے پر ایس واری تریجے مرحلے وچ وی پی ٹی آئی کامیاب ٹھہری اے۔ عمران خان نوں کانٹر کرن دا ہر حربہ بیکار نظر آندا اے جدوں حکمران اتحاد مشکل وچ ہوندا اے یاں کسے معاملے توں دھیان ہٹانا چاہندا ہووے تے توشہ خانہ تے گھڑی تے نویں مہرے سامنے لیائے جاندے نیں۔ گھڑی کنی مہنگی ہووے گی’ اوہدے توں عمران خان نے کناں کمایا ہووے گا؟ ایہدے وچ چوری کیسی؟
دوستو! اخترلاوا’ سلیم کرلا تے ڈاکٹر امبرشہزادہ ورگے لوک گھٹن دے ماحول وچ ساڈے چہریاں تے تھوڑی دیر لئی ای سہی پر خوشیاں بکھیردے نیں۔ ایہناں کرداراں دی ایس کاوش نوں سلام پیش کرنے آں۔ حضرت علی ہوراں دا قول تے ساریاں نوں یاد اے۔ کفر دا نظام تے چل سکدا اے پر ظلم دا نہیں۔٭