بھولے دا امریکہ

احمد وقاص ریاض

استاد جی بھولا بول رہیا واں۔ اک مانوس آواز فون تے ورھیاں بعد سنائی دتی۔ تہاڈی امریکہ آمد دے بارے اخبار وچ پڑھیا تے بڑی مشکل نال تہاڈا نمبر لبھ کے تہانوں کال کر رہیا واں۔ میں مڈویسٹ وچ کاروبار کر رہیا واں اللہ دا شکر اے بڑا اچھا کم چل رہیا اے۔ تسیں ایس واری ضرور میرے گھر آئو’ جے چاہو تے میں ٹکٹ گھل دینا واں۔ اوہ بڑی محبت تے لجاجت نال مینوں اپنے کول آن دی دعوت دے رہیا سی۔ بھولے دی فون کال مینوں ماضی وچ لے گئی جدوں میں تعلیم دی غرض نال نیویارک وچ رہندا سی۔ اک ویک اینڈ تے کدھرے جان لئی مقامی ریڈیو ٹیکسی کال کیتی تے کجھ منٹاں وچ ٹیکسی کیب بوہے تے موجود سی تے ڈرائیونگ سیٹ تے گندمی رنگت دا اک دیسی نوجوان بیٹھا سی۔ تعارف ہویا تے موصوف لہور وچ ساڈے قریبی علاقے دے رہائشی نکلے تے فیر دوران سفر اوہ نوجوان اپنی روداد سنان لگا’ کہڑیاں مشکلات نال اوہ نیویارک اپڑیا تے فیر کس طرح لائسنس بنوا کے لوکل ٹیکسی چلان لگا۔ اوس ویلے ورک پرمٹ تے گرین کارڈ دا حصول بھولے تے ایہدے ورگے غیرقنونی تارکین وطن دا سب توں وڈا مسئلہ سی۔ بھولے دی صاف گوئی’ شرافت تے سادگی نے بڑی چھیتی سانوں گرویدہ بنا لیا تے اسیں دوستاں نے اوہنوں اپنے فلیٹ وچ اک کمرہ دے دتا۔
بھولا زیادہ پڑھیا لکھیا نہیں سی ساڈے نال رہ کے بڑی چھیتی اوہ مقامی رسم و رواج تے انگریزی زبان سکھ گیا۔ گرمیاں دیاں چھٹیاں وچ وطن روانگی لئی اوہ مینوں ایئرپورٹ چھڈن جاندا تے اپنی قومی ایئرلائن پی آئی اے دے جہاز نوں ویکھ کے اوہنوں اپنا وطن تے اپنے گھر والے یادآنا شروع ہو جاندے۔ اوہدیاں اکھاں نم ہو جاندیاں تے اوہ اداس ہو جاندا۔ مجبوری سی اوہ گرین کارڈ نہ ہون دی وجہ نال پاکستان نہیں سی جا سکدا۔ اک دن اوہدی گڈی دا ایکسیڈنٹ ہویا تے اوہ ڈاڈھا زخمی ہو گیا پر مفت بہترین علاج معالجے نال کجھ ہفتیاں وچ اوہ ٹرن پھرن دے قابل ہو گیا۔ ایس واقعے وچ اوہدا لائسنس معطل ہو گیا ہن اوہ ٹیکسی نہیں سی چلا سکدا۔ بڑیاں مشکلاں نال اوہنوں نیویارک سٹی دے خطرناک علاقے وچ پٹرول پمپ تے رات دی شفٹ وچ نوکری ملی کیوں جے اوہدے والدین تے بھین بھراواں دا انحصار اوہدے گھلے ہوئے ڈالراں تے سی ایس لئی بھولے نے جان خطرے وچ پا کے اوہ نوکری کر لئی۔ ڈاڈھی سردی وچ پٹرول پمپ تے کم کردے ہوئے اوہدے ہتھ برف ہو جاندے پر ایہ سب کم کرنا اوہدی مجبوری سی۔ کجھ عرصے بعد امریکی حکومت نے غیرملکی تارکین وطن لئی ایمنسٹی دا اعلان کیتا تے بھولے سنے ہزاراں غیرقنونی پاکستانیاں نوں وی گرین کارڈ مل گئے جہدے بعد اوہناں نوں ملازمتاں تے سفری دستاویزات وچ سہولت مل گئی۔
کئی ورھیاں توں امریکہ وچ رکے لوک اپنے پیاریاں نوں ملن وطن اپڑ گئے تے اپنے بیوی بچیاں نوں سپانسرشپ دے تحت امریکہ لے آئے جد کہ بھولے سنے ان گنت بندیاں نے انتظار کردیاں منگیتراں دے نال ویاہ رچائے تے مدت مکمل ہون تے اوہ وی امریکہ اپڑ گئیاں۔ پاکستان واپسی دے کجھ ورھے بعد تک میرا بھولے نال رابطہ رہیا۔ اوہ جدوں وی اپنے وطن آندا مینوں ملن آندا ہن اوہ آسودہ حال ہو چکیا سی تے نیویارک توں دور اک ریاست وچ اپنے سٹور تے پٹرول پمپ چلاندا سی جد کہ اوہدے بچے اعلیٰ تعلیم حاصل کر رہے سن۔ والدین دی وفات دے بعد کاروباری تے بچیاں دی مصروفیات تے امریکی سسٹم نے بظاہر اوہنوں پاکستان توں لاتعلق کر دتا پر وطن دی مٹی نال محبت اوہدے دل چوں کدی نہ نکل سکی۔
بھولا فون تے مسلسل بول رہیا سی استاد جی تسیں مشکل وقت وچ میری مدد تے رہنمائی کیتی۔ اج میں اپنے ٹائون دا کامیاب بزنس مین آں تے اپنی آمدنی دا اک حصہ نہ صرف مقامی چیرٹی سگوں پاکستان وچ مستحق لوکاں تے وی خرچ کرنا واں تے اوہ ہور وی دس رہیا سی کہ گھٹ پڑھا لکھا ہون دے باوجود اوہنے اپنے بچیاں نوں اعلیٰ تعلیم دلوائی اج اوہ بہترین شعبیاں وچ چنگے عہدیاں تے فائز نیں تے حلال حرام دی تمیز رکھدے ہوئے رواداری تے برداشت رکھن والے معاشرے وچ اپنا کردار ادا کر رہے نیں۔
ایہ اک بھولے دی کہانی نہیں ان گنت بھولے چنگے مستقبل لئی انجانے دیساں تے اجنبی لوکاں وچ اپنیاں توں ہزاراں میل دور اپڑے۔ ایہناں وچوں کجھ راہ وچ گواچ گئے تے کجھ اپنی منزل تے اپڑ کے گواچ گئے پر غالب اکثریت اجہے لوکاں دی سی جہناں نے مشکل تے سخت حالات دا ہمت نال مقابلہ کیتا تے کامیابی حاصل کیتی ایس کامیابی لئی کجھ نوں اپنے بیوی بچیاں توں ورھیاں دور رہنا پیا تے والاں وچ سفیدی لے کے اوہ لوک اپنی وفاشعار بیویاں تے بچیاں دے کول اپڑے تے بچے اپنے باپ دی آواز تے پچھاندے سن پر چہریاں توں نامانوس سن۔
پاکستان توں ہجرت کرکے امریکہ تے دوجے ملک آن والیاں دی اکثریت نے اپنے وطن وچ محنت مزدوری یاں سخت کم کدے نہیں سن کیتے پر بیرون ملک آ کے اوہناں نوں اندازا ہویا کہ کم کرکے ای اوہ ایس مسابقتی معاشرے وچ سروائیو کر سکدے نیں۔ اپنا وجود برقرار رکھ سکدے نیں۔ وطن عزیز دے ماڑے معاشی حالات تے دوجے عوامل دی وجہ نال ملکی ترقی دے پہیے دی رفتار بڑی گھٹ ہو گئی اے ایس صورتحال وچ بیرون ملک توں گھلی جان والی رقم ساڈی لائف لائن اے۔ ساڈے سیاستداناں دی ترجیحات وچ دنیا بھر دے ملکاں نال چنگے تعلقات تے بیرون ملک رہندے پاکستانیاں دیاں قربانیاں تے خدمات دا اعتراف ضرور ہونا چاہیدا اے۔٭