سیاست دی بساط تے نویں چال

شام فراق یار نے ہم کو اداس کر دیا
ہجر نے اپنے عشق کو حسرت ویاس کر دیا
اپنی تو بات بات سے آتی ہے یوں مہک کہ بس
ہم کو تو جیسے یار نے پھولوں کی باس کر دیا
صحبت دا رنگ تے چڑھدا اے۔ ایہ انفرادی سطح تے وی ہوندا اے تے اجتماعی طور تے وی۔ سیاست وچ ایہ گل زیادہ نمایاں ہو کے سامنے آندی اے تے خاص طور تے جتھے موروثی سیاست ہووے فیر تے خاندان دے کملے وی سیانے ہو جاندے نیں۔ وڈے وڈے جگادری انکل وی ہتھ بنھے شیرخوار رہنما نوں لوری دیندے نظر آندے نیں۔ اجہے کئی مناظر اسیں ویکھے۔ ہاسا وی آیا اے تے غصہ وی۔ ساڈی سیاست وچ پارٹی سربراہ نہ وی چاہے تے اوہدے منن والے چاہندے نیں کہ اوہ اوہدی اولاد نوں کھلا کے مرتبہ پان۔ طاقت دی اپنی زبان تے شہرت دی اپنی شان ہوندی اے۔ گل تے میں ایہ کرنا چاہندا سی کہ موروثیت دے آن وچ دیر نہیں لگدی۔ ایہ تے مولانا فضل الرحمن ورگے عالم دین دے ہاں وی پوری آب و تاب نال موجود اے۔ انج مولانا وی مزے دے آدمی نیں۔ کنی سنجیدگی نال اوہ اپنے راہ پدھرے کردے جاندے نیں۔ سمدھی تک وی فیض یاب ہو گئے۔ کسے نے مولانا اگے سوال کیتا سی کہ اوہ اقتدار توں محروم کدی نہیں رہندے۔ مولانا نے کہیا کہ ہر سیاستدان اقتدار لئی وی سیاست کردا اے۔ ایہ گل ضمناً آ گئی اصل وچ اج میں عمران خان دے اچانک اسمبلیاں تحلیل کرن دی گل کیتی تے اسیں سر پھڑ کے بہہ گئے آں کہ ایہ کمند کتھے آ کے ٹُٹ گئی۔ دو چار ہاتھ جب کہ لب بام رہ گیا تھا۔ اسیں تے سمجھدے سی کہ اسلام آباد ایس جم غفیر دے سامنے کیہ اے ایس ریلے وچ سب کجھ رڑھ جاوے گا پر دیکھئے ہم بھی گئے تھے یہ تماشا نہ ہوا۔ ظہور نظر یاد آئے:
رات بھر اک چاپ سی پھرتی رہی چاروں طرف
جان لیوا خوف تھا لیکن ہوا کچھ بھی نہیں
کجھ دوست خان صاحب دی ایس چال نوں سیاست دی بساط تے کھیڈی گئی اک چنگی چال سمجھ رہے نیں۔ پریشر ککر نے سیٹیاں وجانیاں شروع کر دتیاں سن۔ جو وی اے ایہ فیصلہ دانشمندانہ ای کہلائے گا ہن تے اوہناں دے رتن وی ایہ کہہ رہے نیں کہ کوئی زبردستی کسے نوں حکومت چوں نہیں کڈھ سکدا۔ ایہ تے اک پریشر ودھانا ہوندا اے نہیں تے کرنا اوہو ہوندا اے جو آئین تے قنون دے دائرے وچ ہووے۔ اسیں تے ویکھ رہے سی کہ سونامی ساحلاں نال ٹکرائے گا۔ پہلے پہل تے فواد چوہدری آن والی حکومت نو ںصرف 48گھنٹے دی مہمان کر رہے سن حالاں کہ اوہ جاندے سن کہ نویں مہمان وی آئے نہیں لیائے گئے نیں۔ وجہ صاف ظاہر سی کہ آمدن ودھانی ضروری سی کہ رسد تے طلب خراب ہو چکی سی۔ لوکاں دیاں بددعاواں لین والا کون ہو سکدا سی۔ ن لیگ نے بھاری پتر چک تے لیا سی ہن اوہ اوہنوں لاہن دا سوچ رہی اے۔ حالات ن لیگ والے اوہدے حق وچ ہرگز نہیں۔ پیپلزپارٹی تے مولانا فضل الرحمن تے اپنی اپنی تھاں سیاست تے اقتدار توں لطف اندوز ہو رہے نیں۔
نوازشریف دے کول کھوہن نوں پورا پنجاب اے خطرہ ودھدا چلا جا رہیا اے۔ سب توں وڈی رکاوٹ نوازشریف دی بزدلی اے۔ اتفاق نال مینوں کھاریاں جان ہویا تے اوتھے اسیں ڈاکٹر عبدالستار دے مہمان سی اوہناں دے بڑے قریبی دوست حکیم عرفان اللہ مرزا تے ڈاکٹر محمد حفیظ الحق وی موجود سن۔ ایس محفل وچ ڈاکٹر حیدرعلی وی موجود سن۔ سیاست تے گل بات ہوئی تے میں حیران رہ گیا کہ ہن وی عمران خان اکثریت دے پسندیدہ ٹھہرے۔ خاص طور تے ڈاکٹر عبدالستار جہڑے جماعت دے نامی گرامی رہنما وی نیں اپنی رائے دین لگے کہ ایہناں سیاستداناں توں کروڑ درجے بہتر اے۔ کجھ نوجوان مینوں ملے تے اوہ اک لمحے لئی نہیں منے کہ گھڑی ویچی گئی اے۔ ایس حوالے نال خان خوش قسمت نیں کہ اوہناں نوں اجہے منن والے کثرت نال دستیاب نیں۔ میں چشتیاں گیا تے میرا چھوٹا بھائی ثناء اللہ شاہ تے اوہدا بیٹا علی شاہ سارے خان دے مداح خواں نکلے۔ نتیجہ وی چشتیاں دا تہاڈے سامنے اے۔ کہن دا مطلب ایہہ وے کہ خان صاحب جلدی انتخاب ایسے لئی چاہندے نیں کہ اوہناں نوں سب کجھ نظر آ رہیا اے۔
ن لیگ شوق شوق وچ خوب استعمال ہوئی۔ ایسے نکامی دے ڈر توں نوازشریف آن لئی ہچکچا رہے نیں۔ ایہ ٹھیک کہ آن والیاں نے اپنے کیس وغیرہ تے صاف کر لئے تے کجھ مراعات لے لئیاں پر مستقبل اوہناں دا دباء تے لگا ہویا اے ہور تے ہور ایہناں نوں لیان پاروں کہ جس انداز نال ڈار صاحب آئے ادارے وی ایکسپوز ہو گئے نیں۔ اک ہور طرح دی ہوا سگوں آندھی چل پئی اے کہ ہر چھوٹا وڈا ایہ سوال کر رہیا اے کہ آخر پاکستان نوں کیوں لٹیا گیا تے لوٹیا وی بڑی بے دردی نال گیا۔ بھٹو دے بعد ہن دی واری زیادہ شعور لوکاں وچ آ گیا اے۔ ایہ اوہ جو طاقتور اسامیاں تے نیں اوہ ارباں روپیے کیویں بنا لیندے نیں تے فیر ریٹائرمنٹ دے بعد اپنے وطن وچ رہنا وی پسند نہیں کردے۔ لوکاں دیاں زباناں بڑیاں تلخ ہوندیاں جا رہیاں نیں کہ اوہناں دے اختیار وچ ہووے تے اوہ ایہناں دے چہرے نوچ لین جہناں نے ایس ملک نوں کھادا تے چبایا اے۔ انقلاب ایسے طرح آندے نیں۔ ایہدے تے سارے لوک متفق نیں کہ لوکاں دا 75 ورھیاں توں استحصال کیتا جا رہیا اے اوہ تے کیہ اوہناں دے لیاندے ہوئے نمائندے وی سارے غلام نیں۔ اوہ لوکاں دی تھاں اقتدار دی بھیک منگدے نیں۔ حالات بدل رہے نیں لوکاں دے پریشر نے اسٹیبلشمنٹ نوں وی نیوٹرل کر دتا اے تے ہن اپنے اپنے سر تے ای الیکشن لڑنا ہووے گا۔ مہنگائی نے لوکاں دیاں تنخواہواں ادھیاں کر دتیاں نیں۔ آخری گل ایہ کہ پچھلے مشاعرہ کالم وچ ساڈی بڑی خوبصورت شاعرہ حمیدشاہین دے شعر رہ گئے سن اوہناں دے شعر:
حبس نکلے دل مضطر سے وبائیں جائیں
کھڑکیاں کھول مدینے کی ہوائیں آئیں
ابر رحمت کی طرح ان پہ جوانی آئے
لوریاں جن کو درودوں کی سنائیں مائیں