اُمید تے اپنی دنیا قائم کرو

پچھلے کجھ ہفتیاں وچ پاکستانیاں دی مایوسی وچ وادھا ہویا اے۔ کاروبار بند ہوئے نیں گل بات تلخ ہوئی اے تے ملک دے حالات بہتر ہون دی امید مسلسل گھٹ ہوئی اے۔ شہریاں دی امید زندہ رکھن دی ذمہ داری قنون لاگو کرن والے اداریاں’ معاشی پالیسیاں تے سیاسی تدبر تے ہوندی اے۔ اہل پاکستان بڑے بدقسمت واقع ہوئے نیں کہ قنون لاگو کرن والے’ پالیسیاں بنان والے تے سیاسی دانشوراں وچوں کوئی اپنی ذمہ داری نبھان نوں تیار نہیں۔ میرے دوست بیرون ملک رہندے نیں۔ چنگا کاروبار اے’ اٹھ ورھے پہلاں وڈی ہائوسنگ سکیم دے اسلام آباد وچ اک منصوبے وچ سرمایہ کاری کیتی۔ ہائوسنگ فرم ہن نہ قبضہ دیندی اے نہ قیمت واپس کردی اے۔ کہیا جاندا اے کہ رقم 20فیصد کٹوتی دے بعد واپس ملے گی۔ ہائوسنگ فرم وچ اعلیٰ عدلیہ تے افواج پاکستان توں ریٹائرڈ سینئر افسر کم کردے نیں۔ دھونس توں کم لیا جاندا اے۔ اوہنے فیصلہ کیتا اے کہ لہور وچ موجود چار پنج پلاٹ ویچ دیوے تے دنیا دے کسے محفوظ تے قنون پسند معاشرے وچ کاروبار جمائے۔
اک ملن والے لہور دے آسودہ آدمی نیں۔ پچھلے ست مہینے توں ملکی حالات توں دلبرداشتہ نیں۔ عمران خان دے بڑے ناقد نیں پر اوہناں نوں ایہ سمجھ نہیں آ رہی کہ سیاسی کھچاء نوں ایناں کیوں ودھایا جا رہیا اے کہ اثرات کاروبار تے منفی انداز وچ پین لگ پین۔ اوہ جدوں آصف علی زرداری’ شہبازشریف تے مولانا نوں اہم قومی امور تے مشاورت کردے ویکھدے نیں تے ایہ سوال ضرور کردے نیں کہ پاکستان نوں بحران دا شکار کرن والے آخر آپس وچ کس گل تے مشورہ کردے ہون گے۔ اوہناں دا خیال اے کہ عمران دے دھرنے تے مارچ مسلسل معیشت تے ضرب لا رہے نیں۔ اوہ ہور وی اہم لوکاں دی کارکردگی تے سوال اٹھاندے نیں۔ اوہناں دی بے اطمینانی اوس ویلے دونی ہو جاندی اے جدوں اوہناں دے غیرملکی کاروباری دوست اپنے ملکاں دے سیاسی استحکام دیاں کہانیاں سناندے نیں۔ دبئی وچ اک دوست نے کہانی سنائی کہ حکمران بناں پروٹوکول گھمدے نیں۔ کسے سڑک تے گڈی چلاندے ہوئے اوہناں نوں احساس ہووے کہ سڑک تے ٹریفک زیادہ تے گنجائش تنگ اے تے کنارے تے موجود عمارتاں ڈھان دا حکم دے دیندے نیں۔ بلڈنگ دے مالک تے مکیناں نوں کجھ مہلت دتی جاندی اے۔ سارے خوشی خوشی عمارت خالی کر دیندے نیں کیوں جے اوہناں نوں مارکیٹ قیمت توں ودھ ادائیگی کر دتی جاندی اے۔ساڈے کلمہ چوک لہور دے کونے تے اک کثیرالمنزلہ پلازہ کھڑا اے۔ شریف خاندان نے سیاسی انتقام وچ ملک احد خاندان نوں تباہ کر دتا۔ ویہہ ورھے توں ودھ عرصہ ہو گیا ایہ پلازہ اجے تک ویران اے۔ پتہ نہیں کنے لوکاں دی عمربھر دی پونجی ایہدے وچ ڈب گئی۔ زندگی ساڈے سامنے کئی اوکڑاں کھڑی کردی اے۔ ایہ اوکڑاں اکثر اوقات سانوں اپنی ہمت تے برداشت توں ودھ معلوم ہوندیاں نیں تے اسیں ناامید ہون لگدے آں۔ امید اگے ودھن لئی توانائی عطا کردی اے جد کہ مایوسی حوصلے دی طاقت نچوڑ لیندی اے سیانے کہندے نیں ایہناں چیزاں نو ںکنٹرول کرن دی کوشش نہ کرو جو تہاڈے اختیار وچ نہیں۔
اک مشہور کہانی اے جو ساڈے سارے شکستہ دل پاکستانیاں نوں ضرور پڑھنی چاہیدی اے۔ اک کاروباری بندہ سی۔ اوہنوں تجارت وچ بڑا گھاٹا پیا۔ نقصان دی وجہ نال اوہنوں اپنی جائیداد تے کار ویچنی پئی۔ حالات نوں ماڑا ویکھ کے اوہدے پُتر نے کہیا کہ اباجان! جدوں کاروبار نقصان وچ جا رہیا اے تے تسیں ایہنوں جاری رکھن دی کوشش کیوں نہیں کر رہے ایہنوں بند کیوں نہیں کر دیندے؟ باپ نے جواب دتا بیٹا زندگی چیلنجاں نال بھری ہوئی اے تے سانوں ایہدے نال نبڑن لئی امید نوں زندہ رکھنا ہوندا اے۔ باپ اگلے دن بیٹے نوں اک کھوہ تے لے گیا تے چھال مارن دا حکم دتا۔ بیٹا ششدر رہ گیا۔ بولیا کہ مینوں ترنا نہیں آندا ایس لئی چھال نہیں مار سکدا۔ باپ نے بیٹے نوں دھکا دے دتا تے آپ اک تھاں چھپ گیا۔ لڑکا اپنے طور تے بچن لئی ہتھ پیر ماردا رہیا۔ اوہ پنج منٹ تک جدوجہد کردا رہیا باپ نے جدوں ویکھیا کہ بیٹا ہن لاچار ہو گیا اے تے اوہنے لڑکے نوں باہر کڈھ لیا۔ اگلے دن فیر بیٹے نوں کھوہ تے لیا گیا تے اوسے طرح کھوہ وچ چھال مارن نوں کہیا’ لڑکا پہلے ہچکچایا فیر چھال لا دتی۔ ایس واری لڑکا پندراں منٹ تک ہتھ پیر ماردا رہیا۔ فیر باپ نے اوہنوں بے حال ہون توں پہلے باہر کڈھ لیا۔ ہن باپ نے سوال کیتا کہ اج توں کل توں زیادہ دیر تک کیوں بچن دی کوشش کردا رہیا ایں۔ بیٹے نے جواب دتا کہ کل جدوں تسیں مینوں کھوہ وچ سٹیا تے مینوں نہیں سی پتہ کہ کیویں بچاں’ ڈر پاروں پہلے میں ڈبن والا سی پر اج مینوں پتہ سی کہ تسیں مدد نوں آ ائو گے تے ڈبن نہیں دیو گے۔ سبق ایہ ملیا کہ ساڈے آل دوالے قابل اعتبار تے بھروسے والے لوک ہون تے اسیں ہر مشکل وچ اپنی امید زندہ رکھ سکنے آں۔
اک ہور کہانی اے۔ اک چھوٹی ریاست نوں گوانڈھی دی کئی گنا وڈی فوج نال جنگ دا سامنا سی۔ چھوٹی ریاست دی فوج گنتی وچ گھٹ تے ڈری ہوئی سی۔ سپہ سالار نے اپنے معتمد نوں سدیا تے اگلے دن وڈی فوج تے حملے دی تیاری دا حکم دتا۔ صبح جدوں سارے فوجی اکٹھے ہو گئے تے سپہ سالار نے دعا کیتی تے اک سکہ ہتھ وچ لے کے اعلان کیتا کہ جے ہیڈ آیا تے اسیں جنگ جت جاواں گے ٹیل دی صورت وچ وڈی فوج والا دشمن کامیاب ہووے گا۔ اوہنے سکہ اچھالیا تے ہیڈ سامنے آ گیا۔ اوہدی فوج دے دلوں ہار دا ڈر نکل گیا۔ شام تک دشمن نوں شکست ہو چکی سی۔ سپہ سالار دا معتمد اوہدے کول آیا تے سکے دے ٹاس نوں باعث برکت قرار دتا۔ سپہ سالار مسکرایا’ اوہنے سکہ اپنے معتمد دے س امنے رکھ دتا جہدے دوہاں پاسے ہیڈ بنیا ہویا سی۔ سبق ملیا کہ امید تاریک دے غار دے کنڈھے تے جگمگاندی روشنی ہوندی اے۔ جے اسیں اپنے آپ تے ایس جگمگاندی روشنی تے بھروسہ کریئے تے تاریک سرنگ دا سفر اعتماد دے نال طے کر سکنے آں۔٭