پنجاب ہاؤس وچ شاعرہ سیدہ ساجدہ بانو دی کتاب دا مکھ وکھالی اکٹھ

پنجابی یونین دے پربندھ ہیٹھ آئے دن وکھو وکھ تقریباں دا پربندھ پنجابی زبان و ادب دے علاوہ اردو ادب دے فروغ دے تناظر وچ وی اک نویں تریخ رقم کررہیا اے۔ ادارے دے پربندھ ہیٹھ مختلف موقعیاں دی مناسبت نال اچیچیاں تقریباں دے آہر نال جتھے شہریاں وچ ماں بولی دے حوالے نال شعور بیدار ہو رہیا اے اوتھے ای شہری وی ماں بولی ول متوجہ ہو رہے نیں جد کہ پنجابی یونین تے پنجاب ہائوس نے قومی زبان اردو دے ودھا لئی وی غیر معمولی خدمات انجام دِتیاں نیں جہناں نوں ادبی حلقیاں ولوںہمیشہ سراہیا گیا اے۔ ادارے دی صحافتی تے ادبی خدمات تے پس منظر دے پیش منظر ایہہ شہر لہور وچ اپنی نوعیت دی اک وکھری ادبی بیٹھک دے طور تے ابھریا اے۔
پنجابی یونین دے پربندھ ہیٹھ ایسے سلسلے وچ شہر بے مثل لہور دے علاقے مصطفی ٹائون وچ واقع پنجاب ہائوس وچ اردو دی منی پرمنی تے صاحب اسلوب شاعرہ سیدہ ساجدہ بانو دے شعری مجموعے دی تقریب رونمائی تے پروقار مشاعرے دا پربندھ کیتا گیا۔ تقریب دی صدارت منے پرنے کلاسیکی گلوکار استاد بدرالزمان نے کیتی جہناں دیاں کلاسیکی موسیقی دے باب وچ خدمات ناقابل فراموش نیں۔
منے پرمنے شاعرجان کاشمیری، رفیق آذر، ملک ارشاد تے اکمل حنیف تقریب وچ بطور اچیچے پروہنے شریک ہوئے۔ رضا محمد، مشتاق قمر، سید تجمل حسین تے نذیر نذر نے تقریب وچ اچیچی رلت کیتی۔ مشاعرے وچ اپنا کلام پیش کرن والے شاعراں وچ سید عابد گیلانی، لیاقت عزمی، اشرف شازی، حافظ صادق فدا، ایم آر مرزا، اظہر عباس خان، نعمان تجمل، عمران حیدر، رمضان وفا، ڈاکٹر سرجیلہ تحسین، سیدہ راشدہ صاحبہ، عارف نوناری، احمد نقشبندی، محمد احمد خالد، کاشف ندیم، سلیم اختر، زاہد ملک، محمد احمد، ندیم اقبال باہو، زنیرہ سید تے شعرائے کرام نے وڈی گنتی وچ رلت کیتی تے اپنے کالم نال تقریب نوں چار چن لا دِتے۔ تقریب دے شرکا نے سیدہ ساجدہ بانو نوں اوہناں دی کتاب دی اشاعت تے مبارکباد دین دے علاوہ اوہناں دی شاعری دے فنی محاسن نوں وی سراہیا تے اوہناں دی ایس کاوش نوں اردو ادب وچ اک عمدہ وادھا قرار دتا۔ پنجاب دے مختلف شہراں توں آئے شعرائے کرام نے مشاعرے وچ اپنا کلام سنا کے حاضرین کولوں خوب داد وصول کیتی۔
ندیم اقبال باہو تے استاد بدرالزمان صاحب نے اپنی سحر انگیز آواز وچ شاعرہ دا کلام گا کے سامعین تے حاضرین دے دل موہ لیتے تے تقریب دے شرکا اتے ایسا سحر طاری کیتا جہڑا مدتاں یاد رکھیا جاوے گا۔ ست سراں تے شاعری نال آراستہ ایس تقریب دی کامیابی درحقیقت ایہہ ثابت کردی اے کہ ادب دے فروغ لئی فعال اداریاں دے قیام دے ذریعے قومی تے علاقائی زباناں نوں فروغ دتا جا سکدا اے۔
تقریب دے شرکا تے پروہنیاں نے مدثر اقبال بٹ صاحب نوں ایس تقریب دے کامیاب پربندھ تے اوہناں دی پنجابی تے اردوادب دے فروغ لئی بے لوث ادبی خدمات اتے خراج تحسین پیش کیتا تے اوہناں لئی صحت تے سلامتی دی دعا وی کیتی۔
تقریب دے اخیر وچ ساجدہ صاحبہ نے اپنی کتاب رموز عشق سارے شرکائے محفل وچ ونڈی تے حاضرین دی ایس تقریب وچ رلت تے اوہناں دا شکریہ ادا کیتا تے تقریب دے کامیاب پربندھ تے مدثر اقبال بٹ تے بلال مدثر بٹ دا تہہ دل توں شکریہ ادا کیتا۔
یو جے ایف پی تے بزم برائے فروغ ادب ولوں تقریب دے میزبان تے پنجابی میڈیا گروپ دے وائس چیئرمین مدثر بٹ تے اوہناں دی ٹیم نوں ایس شاندار پروگرام دے کامیاب پربندھ تے مبارکباد پیش کرن دے علاوہ اوہناں نوں شاندار ادبی خدمات انجام دین تے خراج تحسین ایوارڈ وی پیش کیتا گیا۔ پروگرام دی نظامت دے فرائض منے پرمنے ریڈیو کمپیئر ممتاز ملک نے ادا کیتے۔
تقریب دے شرکا نے بجا طور تے ایہہ کہیا کہ: ایس تقریب دے کامیاب پربندھ نے اک واری فیر ایہہ ثابت کیتا اے کہ پنجابی یونین اگرچہ مادری زبان دے فروغ لئی سرگرم اے تاہم ایس ادارے نے ادبی خدمات دے فروغ وچ کدی لسانی تعصب نوں آڑے نہیں آن دتا۔ ایس تناظر وچ قومی زبان دے نوآموز شاعراں دے اعزاز وچ مختلف تقریباں دا پربندھ ایہہ ثابت کردا اے کہ پنجابی یونین ادب دے فروغ دے حوالے نال اپنے نصب العین وچ بڑی حد تک کامیاب رہی اے جہدے تے مدثر اقبال بٹ تے پنجاب ہائوس دی پوری ٹیم مبارکباد دی مستحق اے۔