ارشد شریف دی یاد وچ تقریب

غلام شبیر عاصم

منے پرمنے صحافی،تجزیہ کار تے ٹی وی اینکر ارشد شریف نوں پِچھلے دِنیں ملکوں باہر پردیس وچ قتل کردتا گیا۔ارشد شریف دی موت بارے ہر تجزیہ کار،گوہ گویڑی تے عام بندہ اپنی اپنی عقل مطابق اپنا اپنا تبصرہ کررہیا اے۔ایس مسئلے تے اِک دھڑا ڈونگھا سوچ وی رہیا اے،تے اک دھڑا ایس مسئلے نوں سیاست دی نذر کرکے بجائے ایہدے حل دے ایہنوں کِھچ دھرو وی رہیا اے۔ارشد شریف دا قتل کیس آخرکِیہ رخ اختیار کرے گا،ایہ اک وکھری جہئی بحث اے۔جہدے اتے ایتھے گل کرنا ضروری نہیں۔اک اچے سچے انسان تے حق سچ دے کھوجی تے پرچارک ٹی وی اینکرنوں جسراں قتل کردتا گیااک بھارے دکھ دی گل اے۔ارشد شریف دی شہادت دی خبر نے لوکاں دے دِلاں دماغاں نوں چیر کے رکھ دتا۔قتل دی خبر کِھلرن نال لوکاں دے اندر بینظیر بھٹو دے قتل والی ہمدردی تے دکھ ویکھن وچ آیا۔ کئی مانواں،کئی بہناں ارشد شریف دی موت دے دکھ وچ پریشان نظر آئیاں۔ارشد شریف دا نظریہ،اوہدی سوچ تے فکر اج وی ناڑاں وچ نٹھدے ہوئے لہو دی طرحاں حق پرستاں دِیاں قلماں اندر ساہ لیندی ہوئی لفظاں دا روپ دھار کے کسے ”روح” دی طرحاں امبراں توں کاغذ تے اتردی ہوئی محسوس ہورہی اے۔ ارشد شریف مر تے گیا، پراوہدی فکر اج وی زندہ اے،ہونی ورت گئی،اوہدے اتے مناں مونہی مِٹی تے پے گئی پر اوہدی فِکر تے ”کدے مٹی نئیں پے سکے گی” اوہدے قلم قبیلے دے لوک اوہدی فِکر نوں اگے ٹورن گے، اوہدی قبر تے بلدے چراغاں توں کئی چراغ بلن گے۔ تاریخ گواہ اے جِنہاں دیاں قبراں دے چراغ بلدے نیں، اوہ مِٹی ہیٹھاں وی ستے اپنی فکر راہیں لوکاں نوں جگائی رکھن دا چارا کردے تے نہیریاں چوں چانن اگاون دیاں کرامتاں وکھاوندے رہندے نیں۔ تے اوہناں دے بلدے چراغاں دی پرچم وانگ ہِلدی لہراوندی لاٹ دشمناں دے دِلاں نوں توِیتاں دی اگ طرحاں کاہلی تے سیک پاوندی رہندی اے تے محبت کرن والے لوکاں دے دِلاں نوں ایتھوں جِیون دے احساس دا سیک مِلدا رہندا اے۔ ارشد شریف دی فکر تے اوہدی قبر دے نظریاتی مجاور کرامت علی بھٹی دے دل اندر ایہ سیک ایس طرحاں لہو نوں گرماون دا کم وی کررہیا اے تے جیویں بدلے دی اگ طرحاں غصے دا روپ دھار کے اوہنوں ساڑ وی رہیا اے۔
ارشد شریف دی موت بارے صرف پاکستان دے ای نہیں پوری دنیا دے حقیقت پسند تے سچ دے چاہیوان لوکاں نے ایس قتل تے اپنے اپنے رنگ نال سوگ منایا۔ ارشد شریف دی تھاں تھاں تے غائبانہ نماز جنازہ ادا کیتی گئی۔ارشد شریف نوں لوک کِنا کو چاہندے تے پسند کردے نیں، ایہ اوہناں دے شہید ہون تے پتہ لگا۔ ملک بھردے صحافی حلقیاں نے ریلیاں، جلوساں تے تقریباں دا پربندھ کرکے ارشد شریف دی صحافتی خدمت تے اوہناں دی دلیری نوں خوب سلاہیا، تے اوہناں دے قتل دی ٹھیک طرحاں تفتیش کرکے قاتلاں دی ٹوہ لاون دی بینتی کیتی۔ پورے ملک دی طرحاں مریدکے وچ وی کچھ دن پہلے شاعر،سینئر صحافی،سماج سیوک، پارکھ تے پڑچولی جناب کرامت علی بھٹی نے ارشد شریف نال محبت دا ثبوت دیندے ہوئے ”ارشد شریف شہید پریس کلب مریدکے” دی بنیاد رکھی تے اک وڈی تقریب دا پربندھ کیتا جس وچ اچیچے پروہنے ظفر اقبال میو کانسٹیبل (ہچڑ پِنڈ وچ بے قصور 8بندیاں دے قاتل نوں بڑی دلیری نال گرفتار کیتا) تے پرنسپل چاند باغ چودھری محد افضل سن۔ ایس موقعے تے ارشد شریف دی صحافتی خدمتاں تے شہادت بارے مقرراں اپنے اپنے وچارپیش کیتے۔ مریدکے دیاں منیاں پرمنیاں تے سِرکڈھویاں کاروباری، دینی، سماجی، تعلیمی، ادبی تے طبی شخصیتاں نے بھرپور رلت کیتی۔ ست کتاباں دے لکھاری کیمیکل انجینئر سعید اختر، اہلسنت پنجاب دے رہنما حافظ احمد عبدالستار نوشاہی۔ پرنسپل گورنمنٹ علی عباس ہائیر سیکنڈری سکول مریدکے افتخار احمد تے ہور کئیاں لوکاں رلت کیتی۔ ایس تقریب دے آخر تے موقعے اتے موجود لوکاں ظفر اقبال میو ہوراں نوں اوہناں دی بہادری تے فرض شناسی پاروں ملک اعجاز احمد،میاں محمد نعمان خالد،ڈاکٹر سہیل عابد، ملک ندیم مجید، شیراز احمد، طاہر اکرام، جماعت بنونِ اسلام دے سابق صدر رانا جاوید اقبال،صدر فٹبال اکیڈمی، مریدکے حاجی غلام محی الدین، کیمسٹ اینڈ ڈرگسٹ ایسوسی ایشن تحصیل مریدکے دے صدرچودھری نصیر احمد کمبوہ نے ظفر اقبال کمبوہ نوں تحفے پیش کیتے لکھاری نے ظفراقبال کمبوہ تے پرنسپل چاندباغ محمد افضل ہوراں نوں اپنی کتاب جیون تنداں پیش کیتی تے شہید ارشد شریف دے آدر وچ نظم وی پیش کیتی۔
آخروچ ارشد شریف شہید پریس کلب مریدکے دے کنوینئر کرامت علی بھٹی، سرپرست اعلی زاہد حسین گیلانی نے پروہنیاں دا شکریہ ادا کیتا تے چاء پکوڑے، پیسٹیاں، تِکے تے کباباں نال پروہنیاں دی خدمت کیتی۔ جناب کرامت علی بھٹی نے پریس کلب دا ممبر بنن لئی معیاری تے وکھرا جہیا حلف نامہ سنا کے ”ارشد شریف شہید پریس کلب” توں معیاری تے صاف ستھری صحافت نوں عام کرن دے جذبے دے چانن نال سامنے بیٹھے ہوئے لوکاں دیاں اکھاں وچ اک چمک تے حیرانی جہئی بھر دتی تے لوکاں کولوں مِلن والی داد کرامت بھٹی دی جھولیوں ڈلھ ڈلھ باہر پے رہی سی۔ کرامت بھٹی ہوراں کہیا کہ مریدکے دے سب پی ایچ ڈی کرن کر چکے لوک،کتاباں دے مصنف تے خالص لکھاری ارشد شہید پریس کلب دے ممبر ہون گے۔ کرامت علی بھٹی نے رپورٹنگ دے وی سب ضابطے،طور طریقے تے پکھ کھول کے بیان کردتے۔ میرے خیال مطابق اوہناں نے پریس کلب دی شکل وچ اک اکیڈمی دی بنیاد رکھ دِتی اے،جِتھے نویں صحافی پیدا کرنا تے اِک پاسے، بلکہ پہلے توں موجود صحافیاں نوں وی چھان چھٹ کے تے چھانگ چنڈ کے ”صحافی” بنایا جائے گا۔ کرامت علی بھٹی ارادہ رکھدے نیں کہ صحافت دے مونہہ تے ملی ہوئی کالخ تے بدنامی دے داغاں نوں صاف کرکے عوام سامنے اصل صحافت دا عملی طور تے وکھالا کیتا جاوے۔ تاں جے ارشد شریف شہید دی روح نوں ہمیشہ ای ایتھوں ثواب اپڑدا رہوے۔٭