گورنمنٹ کالج طارق آباد داسالانہ مشاعرہ

بہت سارے مشاعریاں وچ رلت دا موقع ملدا رہندا اے تے اسیں خود وی بہت سارے مشاعرے کروا چکے آں لیکن گورنمنٹ کالج طارق آباد دے مشاعرے وچ رلت نال اک عجیب جئی خوشی نصیب ہوئی اے۔ ہفتے والے دن کسے نجی کم دے سلسلے وچ اسلام آباد گیا ہویا سی تے فیصل مسجد دی پوڑھیاں اتر رہیا سی کہ جیب وچ پیا فون وَجن لگا۔ ویکھیا تے گورنمنٹ کالج طارق آباد دی پرنسپل ثروت سہیل صاحبہ دا نام فون سکرین اتے جگمگا رہیا سی۔ ادب نال سلام کیتا تے فرمان لگیاں راجہ صاحب! اسیں اپنے کالج وچ بی ایس اردو شروع کر دتا اے۔طالبات نوں اردو ادب تے شاعری نال چنگی طرحاں روشناس کران لئی اسیں اپنے کالج وچ سالانہ مشاعرہ کروا رہے آں۔ ایہہ ساڈی پہلی پہلی کوشش اے ایس لئی اسیں بہت گھٹ شاعراں نوں بلاواں گے لیکن تسیں ضرور رلت کرنی اے۔
محترمہ ثروت سہیل نال ادب دا رشتہ اے تے اوہ مینوں وڈی بھین وَرگی وی لگدیاں نیں۔ جدوں سنجیدہ ہون تے لگدا اے کہ اجے ڈانٹ دین گئیاں لیکن اگلے ای لمحے اوہناں دے چہرے دی مسکراہٹ توں شفقت بھریا ہتھ سر اتے محسوس ہون لگدا اے۔ ایس لئی اسیں بڑے ادب نال اوس ادبی محفل وچ رلت دی حامی بھر لئی۔
دوپہر اسلام آباد دی سوہنیاں سڑکاں’ اُچیاں عمارتاں تے سرسبز درخت ویکھدے شام ویلے لیک ویو پارک جان دا فیصلہ ہویا۔ لیک ویو وچ لوکاں دا رش ویکھ کے خیال آیا کہ پاکستانی لوک سیروسیاحت دے کنے شوقین نیں کہ ہر پاسے ہر عمر دے لوک چہریاں اتے ہاسے سجائے چلے جا رہے سن۔ بہت سارے سکول تے کالج دے طلبا وی پارک دے مختلف حصیاں وچ خوش گپیاں وچ مشغول نظر آئے۔ تصویراں بنان والیاں دا وی خوب رش سی جہڑے اوس ویلے بہترین کوالٹی دی تصویراں معقول قیمت وچ بنا کے دے رہے سن۔ راول جھیل دا کنارا شام ویلے ایسا دلفریب منظر پیش کر رہیا سی کہ دل گنگنا ن تے مچلن لگیا۔ فیر اک پیانو والا ساڈے کول آیا تے کہن لگیا صاحب جی اک تصویر ایہدے نال تے بنوائو۔ اسیں ٹھہرے سدا دے من موجی۔ نہ صرف فوراً پیانو ہتھ چ پھڑیا تے پوز بنا کے تصویر بنوائی بلکہ اوسے ویلے سماجی رابطیاں اتے شیئر وی کردتی۔ اجے گھر نہیں پہنچیا سی کہ راحت ثمر نے مشاعرے دا کارڈ واٹس اپ کر دتا جہدے تے ساڈی اوسے شام پیانو دے نال بنی تصویر ثبت سی۔ فوری رابطہ کیتا کہ ایہہ کیہ کیتا اے لیکن اوہناں نے معصومیت نال جواب دتا راجہ صاحب! تصویر چنگی لگی تے اسیں کارڈ وچ لگوا دتی۔ ہن تبدیل نہیں ہووے گی۔
مشاعرے دی صدارت محترمہ حمیدہ شاہین دی سی تے اچیچے پروہنیاں وچ ڈاکٹر سعید اقبال سعدی،محترمہ عرفانہ امر دے نام یرے نام نال لکھے ہوئے سن جد کہ اعزازی پروہنیاں وچ وی وڈے قدآور شاعراں دے نام موجود سن۔ منگل والے دیہاڑ شدید دھند وچ گھر توں کالج ول ایس امید تے نکل پیا کہ تھوڑی دیر تک دھند ختم ہو جاوے گی۔ سورج چمکے گا تے چہرے خوشیاں نال کھل اٹھن گے۔اجے ادھا سفر ای کیتا سی کہ دھپ نکل آئی تے جدوں تک اسیں کالج پہنچدے سورج دی شدت جسم نوں راحت پہنچان دا کارن بن رہی سی۔ محترمہ ثروت سہیل تے راحت ثمر نے ہسدے چہریاں دے نال جی آیاں نوں آکھیاتے کسے نے گرم گرم چاہ ساڈے سامنے رکھی۔ مشاعرے دا پربندھ کالج دے سوہنے لان وچ کیتا گیا سی۔ ایتھے دسدا چلاں کہ ایس کالج نوں قائم ہوئے اجے اک عشرہ وی نہیں ہویا اے لیکن کالج پرنسپل ثروت سہیل نے اپنی قائدانہ صلاحیتاں نال ایہنوں اک ممتاز درسگاہ بنان دا عمل خوبصورتی نال شروع کیتا ہویا اے۔ لہور توں صدر محفل تشریف لیا چکے تے مشاعرہ گاہ ول چلن دا حکم ہویا۔ کالج دی طالبات ہتھاں وچ پھلاں دے بکے پھڑے کھلوتیاں سن۔ سامنے سوہنا پنڈال سجیا انتظامیہ دی محنت’ جذبے تے قابلیت دا ثبوت دے رہیا سی۔ بے اختیار دل پکاریا واہ بھئی! کیہ سوہنا سٹیج بنایا گیا اے۔ نیلے’ پیلے’ چٹے تے کالے دوپٹے پائے طالبات نے بڑی گرمجوشی نال پروہنیاں دا استقبال کیتا۔ راحت ثمر نے نظامت لئی مائیک سنبھال لیا تے شاعراں دے تعارف دا سلسلہ بڑے چنگے انداز وچ چلایا۔ تلاوت قرآن مگروں جدوں نعت پڑھی جا رہی سی تے ڈاکٹر سعدی میرے کن وچ بولے راجہ صاحب! کیہ سوہنی آواز اے جہڑی مناسب موقع نہ ملن تے ضائع ہو جاوے گی۔ راحت ثمر نے اپنے کلام نال مشاعرے دا باقاعدہ آغاز کیتا ۔ایہدے مگروں اوہ اک دے بعد اک شاعر نوں سٹیج اتے دعوت دیندیاں رہیاں۔بڑی خوشی ہوئی کہ طالبات دیاں اَکھاں تے چہرے دے تاثرات توں پتہ چلدا کہ اوہناں نوں ادب نال کنا لگائو اے۔ ایہدے مگروں اوہ اکٹھی تالیاں وجاندیاں تے جیویں ماحول وچ نغمگی دا احساس ہون لگدا۔ محترمہ ثروت سہیل نے اردو میری سہیلی کلام سنایا تے فیراوہدا انگریزی ترجمہ وی پڑھ دتا۔ محترمہ عرفانہ امر بے شک گوجرانوالہ دے شعرو ادب دا سرمایہ اے بلکہ میں ایہہ کہواں کہ گوجرانوالہ دے شاعراں
وچ سب توں باوقار نام عرفانہ امر دا ای اے تے بے جا نہ ہووے گا۔ تسیں جنی چنگی شاعرہ او اوہدے توں بہت چنگی انسان تے سنگی او۔ مان رکھن والی عزت دین والی’ تعریف کرن والی تے دعا دین والی ۔ڈاکٹر سعید اقبال سعدی نے اپنے کالج دور وچ کہے شعراں توں شروعات کیتی تے فیر اوہ دو دو چار چار شعر پیش کر کے ماحول گرما ندے رہے۔ صدر مشاعرہ محترمہ حمیدہ شاہین نے پہلے طالبات لئی شعر پڑھے تے فیر اپنے دُوجے شعر انج پیش کردیاں رہیاں کہ ہر کوئی واہ واہ تے مقرر مقرر کہے جاندا سی۔ مشاعرہ ویلے تے شروع ہویا تے ویلے اتے ای ختم کردتا گیا۔ گروپ فوٹو لئی کھڑے ہوئے تے جدوں پنڈال نال طعام لئی سانوں لے جایا جا رہیا سی اوہدوں وی طالبات تالیاں وجا رہیاں سن۔ بے شک گوجرانوالہ دے کسے وی کالج وچ مشاعرے دے حوالے نال منعقد ہون والی اک شاندار تے باوقار تقریب سی جہدے وچ جے صدر مشاعرہ لہور توں تشریف لیائیاں سن تے اُچیچے پروہنیاں وچ گوجرانوالہ دے ممتاز نام وی شامل کیتے گئے سن۔ دعا اے کہ ادب دے ایہہ رنگ ساڈے سارے تعلیمی اداریاں وچ پھلدے پھلدے نظر آئیں۔ ایہہ سلسلہ چلدا رہوے تے تعلیمی اداریاں توں بچے کتاب دوستی دا سبق یاد کرن تے موبائل توں نکل کے کتاباں دے ورق الٹن دی کوشش کرن۔