دیال سنگھ ریسرچ اینڈ کلچرل فورم ولوںانسانی یکجہتی دے عالمی دن دے موقع تےانٹرنیشنل ویبینار

لہور پاکستان وچ قائم ”دیال سنگھ ریسرچ اینڈ کلچرل فورم” نے انسانی یکجہتی دے عالمی دن دے موقعے تے اک انٹرنیشنل ویبینار دا پربندھ کیتا۔ پروفیسر (ر) ڈاکٹر عبدالرزاق شاہد نے شرکا نوں ویبینار دے ایجنڈے بارے آگاہ کیتا۔ اوہناں نے کہیا کہ پاکستان اک مقدس سرزمین اے کیوں جے باباگرونانک دیوجی پاکستان وچ پیدا ہوئے تے روشن ہوئے۔ اوہناں نے فقیر خانہ میوزیم’ قلعہ لہور وچ سکھ لائبریری تے سکھ برادری توں متعلق بہت کجھ نوادرات بارے دسیا۔ اوہناں نے کہیا کہ پاکستان ہمیشہ اقلیتاں دی پناہ گاہ اے تے اقلیتاں دے مذہبی مقاماں دی حفاظت کردا اے۔اوہناں نے باقی شرکا دا اک دُوجے نال تعارف کرایا۔ پروفیسر ڈاکٹر سریش کمار شرما’ محکمہ پبلک ایڈمنسٹریشن’ گورنمنٹ مہندرا کالج’ پٹیالہ’ انڈیا نے کہیا کہ اقوام متحدہ نے 20دسمبر نوں دنیا بھر وچ انسانی یکجہتی دا عالمی دن قرار دتا اے۔ اوہناں نے کہیا کہ سانوں معاشرے لئی انساناں دے اجتماعی اتحاد دی گل کرنی چاہیدی اے۔ اوہناں نے کہیا کہ اسیں اپنے سنگیاں دے نال رل کے کم کرنے آں’ سانوں ایہہ دن اوہناں دے نال منانا چاہیدا اے۔ اوہناں نے شرکا نوں ہور دسیا کہ سارے ملک ایس دن نوں قومی سطح اتے یوم یکجہتی دے طور تے مناندے نیں۔ ڈاکٹر ڈی پی سنگھ’ ڈائریکٹر ‘ سنٹر فار انڈر سٹینڈنگ سکھ ازم’ مسی ساگا’ اونٹاریو’ کینیڈا نے ”بین الاقوامی انسانی اتحاد۔ سری گرو گونتھ صاحب سے ایک نقہ نظر” اتے اک جامع تحقیقی مقالہ پیش کیتا۔ڈاکٹر N.S. گپال سنگھ بھارت نے کہیا کہ اتحاد دا عالمی دن قومی تے بین الاقوامی تے علاقائی سطح اتے منایا جانا چاہیدا اے۔ اوہناں نے کہیا کہ زبان دوجی کمیونیٹیاں دے نال رابطے وچ سب توں وڈی رکاوٹ اے۔ اوہناں نے کہیا کہ مادری زبان رابطے دا بنیادی ذریعہ اے۔ اوہناں نے کہیا کہ پنجابی زبان اوہ زبان اے جہڑی 1947 مگروں خاص طور تے بھارتی پنجاب وچ متاثر ہوئی اے۔ اوہناں نے کہیا کہ لوک گیت پنجابی ورثے ‘ ثقافت تے زبان دا خزانہ نیں۔ HKمیئر’ کینیڈا نے کہیا کہ حکومت پاکستان تے بھارت نوں کھلے دل نال اپنی سرحداں کھولن لئی پہل کرنی چاہیدی اے۔ اوہناں نے کہیا کہ انسانی اتحاد دا دن ہر ملک وچ بغیر کسی تعصب دے منایا جاندا اے۔ سویندریکھی’ انڈیا نے کہیا کہ گرو گرنتھ صاحب انسان نوں سچائی تے محبت دی تعلیم دین والے عالمگیر صحیفے دی بہترین مثال اے۔ اوہناں نے کہیا کہ گروگرنتھ صاحب نے وی دسیا اے کہ سارے انسان برابر نیں تے اوہناں وچ ذات پات’ نسل تے مذہب دی کوئی تفریق نہیں اے۔ اوہناں نے کہیا کہ قدیم زمانے وچ بہت ساری محبتاں سن جدوں لوک بلا لحاظ مذہب اک دوجے نال محبت کردے سن۔ بھارت دے ڈاکٹر جگجیت سنگھ نے کہیا کہ انسانی حقوق دی خلاف ورزیاں ہمیشہ ترقی پذیر ملکاں وچ ہوندیاں نیں جتھے اعلیٰ ترین حکام تک کسی دی رسائی نہیں ہوندی۔ اوہناں نے کہیا کہ سانوں ملک وچ مسابقتی صورتحال پیدا کرنی چاہیدی اے جتھے ہرکوئی اپنے حقوق لئی اعلیٰ حکام نال رجوع کرے۔ اوہناں نے کہیا کہ کرپشن دا مطلب طاقت دے ذریعے کسی دا حق کھونا اے۔ اوہناں نے کہیا کہ برصغیر وچ لوکاں وچ تعلیم تے آگاہی ویلے دی اہم لوڑ اے۔ ڈاکٹر سرجیت سنگھ بھٹی’ پروفیسر (ر) شعبہ پنجابی’ پنجابی یونیورسٹی’ پٹیالہ’ انڈیا نے کہیا کہ مذہب ہر اک لئی تحریک دا ذریعہ اے۔ ہر مذہب انسانیت دے نال حسن سلوک دا سبق دیندا اے۔ اوہناں نے کہیا کہ سکھ مذہب انسانیت اتے مبنی اے تے انسانیت دی خدمت کردا اے۔ گرونانک دیوجی نے انسانیت نال پیار کرن دا سبق دتا تے ہر ممکن حد تک محبت دی تبلیغ کیتی۔ اوہناں نے کہیا کہ سری گرونانک دیوجی نے اپنی زندگی وچ کدی کسی نوں تکلیف نہیں دتی۔اوہناں نے کہیا کہ کوئی وی انسان صرف اوسے صورت خود نوں انسان کہندا اے جدوں اوہنوں انسانیت نال پیارہووے۔ اوہناں نے کہیا کہد یال سنگھ ریسرچ اینڈ کلچرل فورم نے بغیر کسی امتیاز دے انسانیت دی بنیاد اتے ویبنرز دا سلسلہ شروع کرن دا اک وڈا قدم چکیا اے۔ انجینئر چاہل سنگھ’ انڈیا نے ڈائریکٹر دیال سنگھ ریسرچ اینڈ کلچرل فورم دا شکریہ ادا کیتا کہ اوہناں نے ایس موقع تے گل کرن دا موقع دتا۔ اوہناں نے کہیا کہ ا سیں بیان بازی بہت کیتی لیکن عملی طور تے کجھ نہیں ہویا۔ اقوام متحدہ نے انسانی ہمدردی دے حوالے نال مختلف قرارداداں وی منظور کیتیاں لیکن بدقسمتی نال اوہ اوہناں قرارداداں نوں کسی وی ملک اتے نافذ کرن وچ نکام رہے۔ ویبی نار دے اختتام تے ڈاکٹر رزاق شاہد نے بطور میزبان سارے شرکا دا شکریہ ادا کیتا تے اوہناں نوں آئندہ تعاون جاری رکھن دی درخواست کیتی۔