تریخ وچ دنیادی سب توں گھٹ عمر تے عالم اسلام دی پہلی زنانی وزیر اعظم بے نظیربھٹو شہید

بے نظیر بھٹو 21جون 1953 نوں کراچی وچ مشہور سیاسی بھٹو خاندان وچ پیدا ہوئیاں۔ بچپن وچ پنکی دے نام توں پکاریا جاندا سی۔ والد دا نام ذوالفقار علی بھٹو’ والدہ نصرت بھٹو سی۔ بے نظیر بھٹو نے شروع دی تعلیم لیڈی جیننگز نرسری سکول تے کونونٹ آف جیسز اینڈ میری کراچی دے علاوہ دو سال راولپنڈی پریزنٹیشن کوکونٹ وچ حاصل کیتی۔15ورھے دی عمر وچ او لیول دا امتحان پاس کیتا۔ ایہدے مگروں ہارورڈ یونیورسٹی توں 1973 وچ پولیٹیکل سائنس وچ گریجوایشن کیتا۔ آکسفورڈ یونیورسٹی وچ داخلہ لیتا جتھوں اوہناں نے فلسفہ’ معاشیات تے سیاسیات وچ ایم اے کیتا۔ بے نظیر بھٹو برطانیہ توں تعلیم حاصل کرن مگروں جون 1977 وچ وطن واپس آئیاں۔
ایہناں دناں بے نظیر بھٹو دے والد ذوالفقار علی بھٹو ملک دے وزیراعظم سن۔ وطن واپس آن دے دو ہفتے مگروں ای اوہناں دے والد دی حکومت دا تختہ الٹ دتا گیا تے جنرل ضیاء الحق نے ملک وچ مارشل لاء لا دتا تے نال ای بے نظیر بھٹو نوں وی گھر دے اندر نظربند کردتا گیا۔ اوہناں دے والد
ذوالفقار علی بھٹو نوں 4اپریل 1979 نوں پھائے چڑھا دتا گیا۔ جیل دے ریکارڈ وچ بھٹو دی آخری ملاقات بے نظیر نال درج اے۔ ذوالفقار بھٹو دا کہنا سی کہ اوہناں نوں اپنی دھی نال بہت محبت سی۔
بھٹو نال آخری ملاقات بے نظیر بھٹو تے نصرت بھٹو دی 3اپریل 1979 نوں ہوئی تے دوجے دن 4اپریل 1979 نوں قائد عوام نوں پھانسی دی سزا سنا دتی گئی۔ بھٹو دی عوام وچ بے پناہ مقبولیت دی وجہ نال اوہناں نوں قائد عوام کہیا
جاندا سی۔ بھٹو دی ای مقبولیت دے کارن بے نظیر بھٹو دو واری ملک دی وزیراعظم بنیاں تے اک واری اوہناں دے شوہر آصف علی زرداری وی پنج سال حکومت کر چکے نیں۔
اج وی بلاول زرداری بھٹو اپنے نانا دی عوام دے دلاں وچ جہڑی بے پناہ عقیدت اے’ ایہدے بل تے سیاست دے میدان وچ اترے نیں تے وزیراعظم بننا چاہندے نیں۔ والد ذوالفقار علی بھٹو دی پھانسی مگروں بے نظیر بھٹو ملک توں باہر چلی گئیاں سن۔ یعنی خود ساختہ جلا وطنی اختیار کر لیتی سی۔
بے نظیر بھٹو دی پاکستان وچ سیاست دا آغاز اوس ویلے ہویا جدوں 1986 وچ جلاوطنی مگروں وطن واپسی تے اوہناں دا شاندار استقبال ہویا۔ عوام بے نظیر بھٹو دے روپ وچ ذوالفقار علی بھٹو نوں ویکھ رہے سن۔ 18دسمبر 1987 بے نظیر بھٹو دی آصف علی زرداری نال ویاہ ہویا۔ ہولی ہولی بے نظیر ملک دی مقبول ترین لیڈر دے طور تے پاکستان دی سیاست وچ ابھری تے اگست 1988 وچ پیپلز پارٹی نے عام انتخاباں وچ اکثریت حاصل کر لیتی۔
2دسمبر 1988 نوں محترمہ بے نظیر بھٹو نے تریخ دی سب توں گھٹ عمر تے عالم اسلام دی پہلی زنانی وزیراعظم دی حیثیت نال حلف چکیا۔ ایہدے 20مہینے مگروں 6 اگست 1990 صدر غلام اسحاق خان نے بے نظیر بھٹو دی منتخب حکومت نوں بدعنوانی دے الزام وچ اپنے خصوصی اختیارات نوں استعمال کردیاں ہوئیاں برطرف کردتا۔
10اکتوبر 1990آصف علی زرداری نوں گرفتار کر لیتا گیا۔ اکتوبر 1993 وچ پیپلز پارٹی دوبارہ انتخابات وچ کامیاب ہوئی۔ بے نظیر دوبارہ وزیراعظم منتخب ہوئیاں۔ 1996 تک وزارت عظمیٰ دے عہدے اتے قائم رہیاں۔ 1996 کرپشن دے الزاماں اتے بے نظیر بھٹو دی حکومت دوبارہ برطرف کر دتی گئی۔ 1997 دے الیکشن مگروں اوہناں نوں اپنے بالاں دے نال جلاوطنی اختیار کرنا پئی۔ ایسے دوران اوہناں نے لندن تے دبئی وچ رہندے ہوئے سیاسی سرگرمیاں جاری رکھیاں۔ ایسے دوران بے نظیر ‘نواز شریف تے دوجیاں پارٹیاں دے سربراہواں نے رل کے لندن وچ اے آر ڈی دی بنیاد پائی تے ملک وچ جنرل پرویز مشرف دی حکومت دے خلاف بھرویں مزاحمت دا اعلان کیتا۔
14مئی 2006 وچ لندن وچ نواز شریف تے بے نظیر وچ میثاق جمہوریت اتے دستخط کر کے جمہوریت نوں بحال کرن اتے اک دوجے دے خلاف استعمال نہ ہون دا فیصلہ کیتا۔اکتوبر 2007 وچ بینظیر نے امریکی امداد نال پرویز مشرف دی حکومت نال سازباز دے نتیجے وچ اپنے خلاف مالی بدعنوانی دے سارے مقدمات ختم کروان وچ کامیاب ہو گئی۔ 18اکتوبر 2007 نوں وطن واپسی اتے اک واری فیر اوہناں دا شاندار استقبال ہویا۔
ملک واپس پہنچن دے کجھ ای گھنٹیاں مگروں کراچی ائیرپورٹ توں بلاول ہائوس جاندے ہوئے بی بی بے نظیر بھٹو دے استقبال لئی آن والی ریلی وچ بم دھماکے دی وجہ نال درجناں افراد ہلاک تے سینکڑاں پھٹڑ ہوئے۔ ایہدے اک مہینے 9دن مگروں 27دسمبر 2007 نوں جدوں بے نظیر لیاقت باغ وچ عوامی جلسے نال خطاب کرن مگروں اپنی گڈی وچ بیٹھ کے اسلام آباد آ رہیاں سن کہ لیاقت باغ دے مرکزی بوہے اتے جدوں اوہ پارٹی کارکناں دے نال اظہار یکجہتی لئی گڈی دی چھت اتے باہر نکل رہیاں سن کہ نامعلوم شخص نے اوہناں اتے فائرنگ کردتی۔
ایہدے مگروں بے نظیر دی گڈی توں کجھ فاصلے تے اک زوردار دھماکہ ہویا جہدے وچ اک خودکش حملہ آور جہنے دھماکہ خیز مواد نال بھری بیلٹ پا رکھی سی خود نوں دھماکے نال اُڈا دتا۔ ایس دھماکے وچ بینظیر بھٹو جہڑی گڈی وچ سوار سن’ اوہنوں وی شدید نقصان پہنچیا۔ ڈرائیور اوسے حالت وچ گڈی نوں نسا کے راولپنڈی جنرل ہسپتال لے گیا جتھے اوہ زخماں دی تاب نہ لیاندے ہوئے اپنے خالق حقیقی نال جا ملیاں۔
بے نظیر بھٹو دے قتل دا مقام راولپنڈی دا اوہو بدنصیب کمپنی باغ اے جتھے پاکستان دے پہلے وزیراعظم لیاقت علی خان نوں سید اکبر نامی اک شخص نے ہلاک کیتا سی۔ ایہہ کمپنی باغ مگروں مقتول وزیراعظم دے نام تے لیاقت باغ قرار دے دتا گیا سی۔
جدوں 2007 وچ محترمہ بے نظیر بھٹو نوں شہید کردتا گیا تے اوس ویلے اوہناں دی عمر کم و بیش54ورھے سی۔ اج تک اوہناں دے قاتلاں دا کجھ پتہ نہ چل سکیا۔ اج تک ایس تکلیف دہ سوال دا جواب کسے دے کول نہیں کہ محترمہ بے نظیر بھٹو نوں کہڑے شقی القلب شخص دے کہن تے قتل کیتا گیا کیوں جے ات گرداں دا کوئی دین’ مذہب یا سیاسی جماعت نہیں ہوندی۔ اوہ کسے نظریے دے پیروکار نہیں ہوندے بلکہ اوہناں نوں روپے پیسے دے عوض خریدیا تے ویچیا جا سکدا اے۔
دوجے پاسے شہادت توں قطع نظر محترمہ بے نظیر بھٹو بے شمار اعزازات نال نوازیاں گئیاں۔ اوہناں نوں ملکی تے بین الاقوامی سطح تے خود اوہناں دے کردار ‘ شخصیت’ قابلیت تے صلاحیتاں دی بنیاد تے بہت سراہیا گیا جد کہ والد شہید ذوالفقار علی بھٹو ولوں ملن والی سیاسی نیک نامی نے اوہناں نوں ملک دی پہلی زنانی وزیراعظم بنن وچ کسی نہ کسی حد تک مدد وی کیتی۔ تریخ وچ دنیا دی سب توں گھٹ عمر اسلام دی پہلی زنانی وزیراعظم منتخب
ہون دا اعزاز وی حاصل رہیا۔
دختر مشرق ‘ شہید جمہوریت محترمہ بے نظیر بھٹو نوں اپنی قوم توں جدا ہوئے 15ورھے لنگھ گئے نیں۔ راولپنڈی دے تریخی جلسہ لیاقت باغ وچ محترمہ بے نظیر بھٹو نے کہیا سی ”آپ دا تے میرا ملک خطرے وچ اے’ سوہنی دھرتی مینوں پکار رہی اے’ پاکستان لئی میرے والد نوں شہید کردتا گیا’ میرے دو جوان بھرا مار دتے گئے’ شوہر نوں لمے عرصے تک جیل وچ رکھیا گیا’ میری ماں نوں سڑکاں اتے لاٹھیاں ماریاں گئیاں’ مینوں جیل وچ رکھیا گیا لیکن اسیں موت کولوں نہیں ڈردے”۔
بے نظیر بھٹو دی وصیت دے مطابق پیپلز پارٹی دی قیادت اوہناں دے پتر بلاول زرداری بھٹو نوں وراثت وچ سپرد کردتی گئی لیکن پچھلے صدر آصف زرداری پارٹی دے نگران چیئرمین بنے تے مفاہمت دی سیاست نوں فروغ دتا۔ ایسے پالیسی اتے کاربند رہندے ہوئے پنج سال ملک دے صدر رہے۔ اج کل بے نظیر بھٹو دا پتر بلاول زرداری بھٹو سیاست وچ اپنے نانا دی پارٹی دی باگ دوڑ سنبھالے ہوئے اے جد کہ بے نظیر بھٹو دی چھوٹی دھی آصفہ نے وی سیاسی میدان وچ قدم رکھ لیتا اے۔
27دسمبر نوں شہید بے نظیر بھٹو دی 15ویں برسی منائی جا رہی اے۔ ملک بھر دی پسی ہوئی عوام’ زنانیاں’ مزدور تے اوہ سارے انسان جہناں نوں شہید محترمہ بینظیر بھٹو دے دوراقتدار توں کسی نہ کسی صورت وچ فیدہ پہنچیا ہووے’ اج اوہناں نوں یاد کر کے اوہناں دی روح دے ایصال ثواب لئی دعاگو نیں۔