چارے کوٹاں موت نے ملیاں

اقتدار جاوید

اک: عمران خان نے حکومت چوں نکل کے حکومت نوں اک دن سکون دا ساہ نہیں لین دتا۔ جونیجو’ بینظیر’ نوازشریف دی حکومتاں نوں برطرف کیتا گیا۔ شوکت عزیز’ ظفراللہ جمالی نوں باہر کڈھیا گیا۔ کدھروں احتجاج نہ ہویا’ نوازشریف نوں 2017ء وچ کئی الزامات دے تحت نااہل کیتا گیا تے کئی خوش نما نعریاں دے باوجود لوکاں وچ اوہناں نوں پذیرائی نہ مل سکی جہدی اوہ توقع کیتی بیٹھے سن۔ ووٹ نوں عزت دیو دا نعرہ بلند کیتا تے مقتدرہ نوں چیلنج کیتا۔ کجھ لوک سمجھے ایہ والا اک نواں نوازشریف اے۔ کالے صفحیاں تے صفحے گواہ نیں کوئی ایہنوں نویں آواز سمجھن لگ گیا۔ نوازشریف نے سمجھیا جیویں اسحاق خان توں اپنی حکومت نوں برطرف کروا کے ڈکٹیشن نہ لین دا اعلان کیتا سی۔ ہن دے ووٹ نوں عزت دیو جی ٹی روڈ دا روٹ تے مقتدرہ نوں چیلنج کرنا سودمند ہووے گا۔ اک گروہ نے تے ن لیگ دے دو گروپ بنان تے نوازشریف نوں نظریاتی پارٹی دی سربراہی تے فائز کرن دی تجویز وی دے دتی۔ اوہناں نوں پارٹی وچ کسے عہدے یاں صدارت توں بلند چیز بنا کے پیش کیتا۔ ساڈے زمانے وچ کیسے کیسے نابغے نیں’ جہناںنے ایہ باور کرایا کہ اک نویں عہد دا آغاز ہو چکیا۔ ایہنوں نظریات دا منبع بنایا تے سمجھیا تے پروپوگیٹ کیتا۔ کوئی اوہناں دے پچھلے دور نوں ویکھ کے کیویں یقین کر لیندا اے کہ اوہناں دے وجود دے خاکستر وچ کوئی چنگاری اے۔
دو: نوازشریف 93ء وچ اپنی حکومت ختم کروا کے تے اک خاص قسم دے متنازعہ ججاں توں اسمبلی بحال کروا کے وی اپنے مقصد وچ نکام رہے۔ اوہناں دے دوبارہ ظہور دی وجہ وی مقتدرہ ای بنی کہ بینظیر دے مقابلے وہ اک تے صوبہ پنجاب نال تعلق رکھدے سن۔ دوجا اجے پیپلزپارٹی وچ زرداری فکر دا احیا نہیں سی ہویا۔ جدوں پیپلزپارٹی وچ زرداری انداز فکر دی حکمرانی ہو گئی تے مقتدرہ لئی بینظیر گھٹ تے زرداری زیادہ قابل قبول ہو گئے۔ ایہ سب کجھ ساڈی ماضی قریب دی تریخ اے کوئی عقدہ کشائی نہیں۔ جونیجو’ شوکت عزیز یاں ظفراللہ جمالی وچ کتھے بساط سی کہ کوئی آواز کڈھدے۔ ایہ اوسے فکر دے نمائندے سن جہدی اج کل پرویزالٰہی نمائندگی کردے نیں۔
تن: ایہ سب کجھ عمران خان لئی 2022ء وچ دستیاب نہیں سی۔ اک پاسے مقتدرہ تے دوجے پاسے تیراں چوداں جماعتاں دا اکٹھ سی تے اک پاسے اکلا عمران خان’ عمران خان نے جدوں اقتدار توں باہر آ کے مقتدرہ دے اقدام نوں ہدف تنقید بنایا تے خلاف توقع اوہناں نوں پذیرائی ملی جہدی اوہ آپ شاید توقع تے امید نہیں سن کررہے۔ پی ڈی ایم نے جس طرح وی حکومت سنبھالی ہن اوہناں دے کول اوہ سب ذرائع موجود سن جہناں دی مدد نال اوہ عمران نوں بیک فٹ تے لے جا سکدے سن۔ سب توں پہلاں ایہناں چوداں جماعتاں دی حمایت یاں عمران دی مخالفت وچ ادھی رات نوں بوہا کھلوا کے اک خاص قسم دا پیغام وی گھلیا گیا۔ اوہنے اسمبلی تحلیل کرن دی تجویز وی صدر مملکت نوں گھلی سی۔ صدر نے ایس ایڈوائس تے اسمبلی تحلیل وی کر دتی۔ سپریم کورٹ نے قاسم خان سوری دا آرڈر وی خلاف آئین قرار دتا۔ پی ڈی ایم دے اٹھن لئی ایہ کافی سی۔ ایہناں حالات وچ سرکاری میڈیا وی ایس حکومت دے کول سن تے ہور وی بہت سارے میڈیا ہائوسز اوہناں دی کھلے عام مدد کر رہے سن۔ حکومت آپ جس الزام دی زد وچ سی تے جہدی وجہ نال اوہناں دے گھٹو گھٹ سارے لیڈر آئے دن پیشیاں بھگتدے سن اوہو طریقہ ازمان دا فیصلہ کیتا۔ عمران خان دی بیگم تے اوہدی اک دوست فرح دا ایس طرح ناں لیا جان لگا جیویں لوک ایہ باور کر لین گے کہ اوہو کرپشن والا کم ایس حکومت نے وی کیتا اے۔ بڑے دن تک ایہ دھوڑ اڈدی رہی۔ لوکاں نے ویکھیا کہ دھوڑ ہولی ہولی بہہ رہی اے۔ اودوں اوہناں نے عمران نوں دوجے طریقے نال زیر کرن دی کوشش کیتی۔ فارن فنڈنگ دا کیس انج پیش کیتا کہ ایہو پٹاری اے جہدے چوں ہن کجھ برآمد ہووے گا۔ پیشیاں ہوئیاں تے بالآخر اوہنوں الیکشن کمیشن نے آرٹیکل 63 ون پی دے تحت توشہ خانہ کیس وچ نااہل کر دتا۔ جدوں نااہلی ہو گئی تے ہونا تے ایہ چاہیدا سی کہ حکومت چین نال بہہ جاندی ایتھے گھڑی دے اوہ قصے بیان کیتے گئے کہ فرح گوگی توں جے کجھ حاصل نہیں ہو سکیا تے ایس کیس وچ اوہنوں لوکاں دی نظراں توں گرا دتا جاوے گا۔ ایہدے علی الرغم عمران اپنی بیلٹ کس کے میدان وچ اتر آیا۔ نہ الیکشن کمیشن نہ مقتدرہ سب کجھ جیویں اوہدی نوک تے سی۔ نو سیٹاں دا جوأ حکومت لئی کسے تازیانے توں گھٹ نہیں سی سگوں آپ عمران دا ہر سیٹ تے الیکشن لڑنا اجیہا وار سی جہنوں حکومت برداشت نہ کر سکی۔ انج نہ کدی پہلے ہویا سی نہ کوئی ایہدی توقع کردا سی۔ اک پاسے اوہدا جادو سر چڑھ کے بول رہیا سی دوجا مقتدرہ بیک فٹ تے آ کے اوہ کہہ رہی سی جو نہیں سی کہنا چاہیدا تے جو اج تک نہیں سی کہیا گیا۔ اوہ اپنی صفائی دین لئی صحافیاں دی محتاج ہو گئی۔ اوہدی باڈی لینگوئج وی چغلی کھا رہی سی کہ سب اچھا نہیں۔ایہدے تے مستزاد عمرن نے سائفر نوں بنیاد بنا کے امریکہ مخالف ایجنڈا ترتیب دتا تے مقتدرہ نوں مخاطب کرکے بہت کجھ کہنا شروع کر دتا۔
داور ِ حشر مرا نامہ ِاعمال نہ دیکھ
اس میں کچھ پردہ نشینوں کے بھی نام آتے ہیں
والی کہانی پرانی ہو چکی سی۔ ہن پچھلے ست مہینے گواہ نیں کہ اوہ سب کجھ ڈنکے دی چوٹ تے کہہ رہیا اے۔ کوئی لگی لپٹی نہیں علانیہ اک جنگ اے۔ ایہدے وچ کوئی شک نہیں کہ عمران نے مقتدرہ دے گھر سنھ لائی اے۔ عمران دے خلاف پراپیگنڈا ہوا وچ اڈ جاندا اے۔
چار: انتہا تے ایہہ وے کہ جدوں مولانا فضل الرحمن توں ایہ پچھیا گیا کہ عمران تے کوئی مالی بے ضابطگی دا الزام اے یاں اوہ مالی طور تے کسے بددیانتی وچ ملوث پایا گیا اے تے فضل الرحمن دے کول ایہدی تصدیق توں علاوہ کوئی چارا نہیں سی۔
اچے ٹبے شیراں ملّے جل ملّے مرغائیاں
چارے کوٹاں موت نے ملیاں فضل کریں رب سائیاں