پِلاک ولوں نویکلے شاعر منیر نیازی دے کُل پنجابی کلام دی مکھ وکھالی تے مشاعرہ

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ اردو تے پنجابی دے نامور شاعر منیر نیازی دی 16ویں برسی دے موقعے تے پلاک ولوں شائع کردہ اوہناں دے کل پنجابی کلام اتے مشتمل کتاب ”کِناں ٹُرئیے ہور” دی تقریب رونمائی تے مشاعرے داآہر کیتا گیا۔ ایہہ کتاب ڈاکٹر صغرا صدف ڈی جی پلاک نے مرتب کیتی۔ تقریب دے اُچیچے پروہنے بابا محمد یحییٰ خان سن جد کہ صدارت غلام حسین ساجد نے کیتی۔ دانشوراں’ ادیباں تے شاعراں نے رلت کیتی۔ اظہار خیال کرن والیاں وچ بابا محمد یحییٰ خان’ غلام حسین ساجد’ ڈاکٹر اعجاز انور’ ثروت محی الدین تے مجاہد نوشاہی شامل سن۔
مقررین نے کہیا کہ ڈاکٹر صغرا صدف نے منیر نیازی دا کلام مرتب کر کے قابل قدر کم کیتا اے۔ ایہہ کلام اغلاط توں پاک تے حروف تہجی دے حساب نال مرتب کیتا گیا اے تاں جے قارئین نوں کسے قسم دی دشواری دا سامنا نہ ہووے۔ غلام حسین ساجد نے کہیا منیر نیازی اعلیٰ پائے دے شاعر سن۔ کسے وی شاعر لئی چنگا ہونا اوکھا نہیں جنا کہ اوہدے لئی منفرد ہونا اوکھا اے۔ اوہناں دا لکھن دا اک اپنا اسلوب سی۔ اوہناں دیاں چھوٹیاں چھوٹیاں نظماں وچ بہت وڈیاں گلاں لکیاں نیں۔
بابا محمد یحییٰ خان نے کہیا جہڑے معاشرے توں ادبی روایتاں ختم ہو جاندیاں نیں اوہ معاشرہ زوال پذیر ہو جاندا اے۔ لہور نے وڈے وڈے ادیباں تے شاعراں نوں پیدا کیتا جہدا مقابلہ لکھنو’ دہلی تے آگرہ وی نہیں کر سکدے سن۔ڈاکٹر صغرا صدف نے کہیا کہ منیر نیازی بالاں وانگوں معصوم تے ہرقسم دے تصنع توں پاک سن۔ کسی دی وی بے جا تعریف کرن دے قائل نہیں سن۔ ہمیشہ حق تے سچ دی گل کیتی۔ اوہناں دی شاعری ساڈے معاشرے دا اوہ آئینہ اے جہنوں اسیں ویکھنا نہیں چاہندے۔ جے ویکھ وی لوئیے تے نظرانداز کر دینے آں۔ اوہناں نے اپنے اندر دے بچے نوں کدی مرن نہیں دتا ایہو چیز اوہناں دی شاعری نوں دُوجیاں توں ممتاز کردی اے۔تقریب وچ بابامحمد یحییٰ خان، ڈاکٹر اعجاز انور، نور الحسن، غلام حسین ساجد، صوفیہ بیدار، نصیر احمد، سرفراز صفی، آغا محمود حسن لودھی، ڈاکٹر ایم ابرار، محمد عمران، فراست بخاری، توقیر، مسرت بٹ، اعجاز، ڈاکٹر صغرا صدف تے ڈاکٹر خاقان حیدر غازی رلتی سن۔