اک ترمیم دا سوال اے بابا!

خالدمسعود خاں

جمہوری ملک وچ جمہوریت ہووے یاں نہ ہووے پر ایس خوش کن نظام پاروں اختلافات دا حق بہرحال ساریاں نوں حاصل ہوندا اے تے تسیں لوک وی ایسے حق نوں استعمال کردے ہوئے میرے خیال نال اختلاف کر سکدے او پر جمہوریت جتھے تہانوں اختلاف دا حق دیندی اے اوتھے مینوں وی خیال دی آزادی دیندی اے ایس لئی ایسے حق دے تحت میں اپنے خیال دا اظہار کر رہیا واں۔
میرے خیال وچ ہن ویلا آ گیا اے کہ اسیں لوک کسے وڈے حادثے توں پہلاں پہلاں ملک دے آئین وچ ترمیم کردے ہوئے ملک وچ لاگو حقیقی طبقاتی ونڈ نوں من دے ہوئے ایہنوں قنونی تے آئینی تحفظ دے دیئے تاں جے ہر طبقے نوں اپنی طاقت’ مجبوری’ اوقات’ دائرہ کار تے آئندہ زندگی گزارن دے طریقہ کار دا حقیقی علم ہو جاوے تاں جے اوہ خواب و خیال تے تصوراتی زندگی توں باہر نکل کے ایس ملک وچ عملی طور تے حیاتی گزارن دا ہنر سکھ سکیے۔ میرے خیال وچ ساڈے عوامی نمائندیاں نوں جو اجے تک اپنی ذمہ داری صرف ایہو سمجھدے نیں کہ اوہناں نے ترقیاتی فنڈز وٹنے نیں’ نالیاں توں پیسے بنانے نیں’ سڑکاں تے گلیاں دے ٹھیکیاں وچوں اپنا حصہ وصول کرنا اے’ گٹر بنواندے ہوئے ایہدے وچ ہتھ مار کے اپنا کمیشن کڈھنا اے تے ودھ توں ودھ ایہ کرنا اے کہ ایس اسمبلی وچ بہہ کے اپنی مراعات تے سہولتاں وچ اپنے آپ وادھا کرنا اے تے اوہ ایہ سب کجھ بے شک کردے رہن پر بہرحال اوہ اک قنون ساز ادارے دے رکن نیں تے ایس حیثیت نال اوہ ہور کجھ نہ وی کرن تے گھٹو گھٹ اک قنون ضرور پاس کروا لین تے ملک وچ لاگو طبقاتی ونڈ نوں قنونی تحفظ دیندے ہوئے باقاعدہ دو قسماں دے قنون’ دو قسم دا نظام عدل تے دو طبقاتی سہولتاں تے مراعات دی غرض نال آئین وچ ترمیم فرما دین تاں جے ساڈے ورگے بے حیثیت تے بے وقعت لوکاں نوں آئین وچ دتی گئی برابر دے شہری ہون دی ضمانت دی خوش کن غلط فہمی تے ایہدے نتیجے وچ روز روز دی پیدا ہون والی فرسٹریشن توں نجات مل جاوے تے اسیں لوک اپنی اوس اوقات وچ آ جائیے جو سانوں حقیقی طور تے حاصل اے۔
ٹیکس چوراں’ رشوت خوراں’ ڈنڈے برداراں’ منصفاں’ زورآوراں’ سیاستداناں’ حکمراناں تے مقدس گاواں نوں اے کیٹگری تے ملک دی باقی بچ جان والی بے حیثیت عوام نوں بی کیٹگری دا شہری قرار دے کے اوہناں دے معاملیاں نوں دو طبقاتی نظام دے تحت چلایا جاوے جیویںکہ تقسیم توں پہلاں انگریز حکمران طبقے تے برصغیر دے محکوم مقامی لوکاں لئی دو قسم دے قنون سن جے دوبارہ اوسے طبقاتی تقسیم نوں قنونی تحفظ دے دتا جاوے تے فیر گھٹو گھٹ ساڈے ورگے لوکاں دے دماغ چوں برابر دا شہری ہون دا فتور تے خناس نکل جاوے گا تے اسیں لوک اپنے آپ نوں برصغیر وچ اسلام دی آمد توں پہلاں والے ہندو سماج دا حصہ سمجھ لواں گے جہدے وچ ساڈے اے کیٹگری نوں برہمن دا تے ساڈے ورگے بے حیثیت تے بے اوقات لوکاں نوں شودر دا درجہ حاصل ہو جاوے گا۔
ایہ ساریاں گلاں اصل وچ مینوں ایس لئی یاد آ رہیاں نیں کہ پچھلے کجھ عرصے وچ ہیٹھ اُتے انج ہوئی جا رہیا اے کہ ہن میری برابر دا شہری ہون دی خوش فہمی مکمل طور تے ختم ہو کے رہ گئی اے مثلاً جے میں سزایافتہ واں تے میرے ڈاکٹر عدالت وچ ایہ ثابت کر دین کہ میری زندگی نوں خطرہ اے تے کیہ عدالت مینوں جیل چوں کڈھ کے بیرون ملک گھلدے ہوئے مدعی مقدمہ توں میری زندگی دی ضمانت منگے گی؟ تے زندگی دی ضمانت نہ ملن تے مینوں پنجاہ روپیے دے اشٹام پیپر تے ضمانت دے کے بیرون ملک گھل دیوے گی؟ کیہ میرے چھ ہفتیاں دے اندر اندر ملک واپس آن دی گارنٹی دین والے بندے نوں چھ ہفتے چھڈ کے تن ورھے تک میری واپسی نہ ہون دے باوجود میرے کسے عام تام قسم دے ضمانتی نوں اک واری فیر عدالت وچ سد کے ایہ نہیں پچھے گی کہ ضمانتی صاحب! تہاڈے چھ ہفتے وچ واپس آن دے پابند بھائی جان کتھے نیں؟۔ مینوں دس دتا جاوے کہ ایس ملک دے وسیلے وغیرہ نامی چیز نال میرا تے میرے ورگے دوجے کروڑاں لوکاں دا کوئی تعلق نہیں۔ پہلے دسے گئے اعلیٰ طبقے یعنی اے کیٹگری دے لوکاں نوں سارے حکومتی وسیلے تے اوہناں نال وابستہ کلہم مفادات از قسم پلاٹ’ مفت سفر’ بیرون ملک مفت علاج’ وظیفے’ ٹیکس وچ سہولت’ قرضیاں دی معافی’ اپنی تنخواہ تے مراعات وچ اپنے آپ وادھے دا اختیار تے سرکاری زمیناں دی الاٹمنٹ توں علاوہ دوجیاں سہولتاں وغیرہ دے واحد حق دار قرار دین دا بل اسمبلی توں منظور کروا کے نام نہاد آئینی برابری دے جھوٹ تے فریب نوں اک ای بار دفن کر دتا جاوے۔ ایہدے نال ساڈے حالات وچ تے فرق نہیں پوے گا پر سانوں ساڈی اوقات دا پتہ لگ جاوے گا تے اسیں لوک اپنی باقی دی زندگی برابری دے ایس جعلی آئینی خمار چوں باہر نکل کے کسے قسم دے احساس محرومی دے بناں جی سکاں گے۔
کیہ مزے دار قوم اے تے ایہدے کیہ شاندار لیڈر نیں۔ غریب نوں ٹیکساں توں لے کے بل تک کسے چیز وچ رعایت نہیں تے اودھر اپنی تنخواہواں وچ ازخود وادھا کرن تے اپنے الائونسز نوں زمین توں اسمان تے لے جان والے ایہناں اراکین اسمبلی نوں موٹروے دے ٹال ٹیکس توں مستثنیٰ قرار دے دتا اے جو الیکشن تے کروڑاں روپیے خرچ کرکے اسمبلیاں وچ جاندے نیں تے اوہناںنوں سفر لئی الائونس وی سرکار توں ملدا اے۔ میری تے صرف اینی درخواست اے کہ سانوں بنیادی ضرورتاں دے کے جو بچدا اے سارا لے لوو پر آئین وچ اک ہور ترمیم کر دیو۔ بس اک سرمیم دا سوال اے بابا۔٭