میں سویا نہیں آں

احمد وقاص ریاض

تریخ وچ ظلم و جبر دیاں بہت ساریاں مثالاں نیں’ عالمی جنگاں تے آپسی جھگڑیاں وچ لکھاں’ کروڑاں بندے لقمہ اجل بن گئے۔ ہٹلر نے نسلی برتری تے دنیا تے تسلط قائم کرن لئی کروڑاں بندیاں نوں جنگ دی بھٹھی وچ سٹ دتا۔ جہدے نتیجے وچ ہون والی خونریزی تے ان گنت موتاں دیاں کہانیاں تے نشانیاں دنیا دے ہر کونے وچ کھلریاں پئیاں نیں جتھے وکھووکھ قومیتاں دے لوک اپنے مرے ہوئے تے زندہ بچ جان والے وارہیروز نوں خراج تحسین پیش کردے نیں۔ اج دے ایس مہذب معاشرے تے ترقی یافتہ دور وچ وی ذاتی یاں اجتماعی خواہشاں’ قومی تے علاقائی مفادات’ انتہاپسندی دے فروغ تے وسیلیاں تے قبضے لئی جنگ وجدل دا سلسلہ جاری اے۔ دوجی جنگ عظیم دے خاتمے مگروں دو سپرطاقتاں روس تے امریکہ دے وچکار اک نویں سردجنگ دا آغاز ہویا جہدے وچ میدان جنگ دنیا دے دوجے ملک سن۔ کئی دہائیاں تک جاری رہن والی سرد جنگ نے آپسی جھگڑیاں تے نفرتاں نوں فروغ دتا۔ غریب ملکاں وچ انسانی ترقی دی رفتار گھٹ ہوئی تے بھکھ و افلاس وچ وادھا ہویا۔
سرد جنگ دوران تن وڈیاں جنگاں ہوئیاں۔ پہلا میدان جنگ کوریا سی جتھے لکھاں لوکاں دی موت ہوئی تے کوریا دو حصیاں نارتھ تے سائوتھ وچ تقسیم ہو گیا تے ایہ تنازعہ اجے تک جاری اے۔ ویت نام دی جنگ وچ امریکہ نوں شکست ہوئی جہدا بدلہ امریکہ نے کجھ ورھے بعد افغانستان وچ روس نوں ہرا کے چکا دتا۔ امریکہ دی مالی امداد’ پاکستانی خفیہ اداریاں دی حکمت عملی تے افغان مجاہداں دیاں قربانیاں نال افغانستان وچ کامیاب ہویا۔ روس نوں ذلت آمیز شکست ہوئی تے فیر دنیا دی دوجی سپرپاور سوویت یونین دا شیرازہ بکھر گیا تے روس ٹوٹیاں وچ تقسیم ہو گیا۔ افغانستان وچ روس دی شکست مگروں بظاہر سردجنگ دا خاتمہ ہو یا پر ایس خطے وچ امن دا اک خواب بن کے رہ گیا۔ افغانستان وچ مذہب تے کلچر دی حفاظت لئی جہاد کرن والے مجاہدین عظمت رفتہ دی بحالی لئی دریائے آمو پار کرن دی تھاں بحراوقیانوس پار کرکے اپنے پرانے محسناں دے ملک امریکہ تے حملہ آور ہو گئے۔ ایس طرح دنیا وچ اک نویں جنگ دا آغاز ہو گیا جہنوں دہشت گردی دے خلاف جنگ دا ناں دتا گیا۔
پاکستان جو مذہبی جذبات ابھار کے انتہاپسندی دے جن نوں بوتل چوں کڈھن وچ امریکہ دا شریک کار سی ہن ایس بنیادپرستی تے انتہاپسندی دے جن نوں دوبارہ بوتل وچ بند کرن لئی اپنیاں مجبوریاں تے ضرورتاں پاروں امریکہ تے مغرب دی معاونت لئی تیار تے ہو گیا پر پوری طرح کامیاب نہ ہو سکیا۔ امریکہ نے تقریباً ویہہ ورھے افغانستان وچ جنگ لڑی جہدے اثرات توں پاکستان متاثر ہوئے بناں نہ رہ سکیا۔ پاکستان دی فوج نے دہشت گردی خلاف جنگ وچ اپنے ملک تے لوکاں نوں بچان لئی ان گنت قربانیاں دتیاں تے ہزاراں جاناں دا نذرانہ پیش کیتا جہدے پاروں ساڈے ملک دے افغانستان نال جڑے صوبیاں وچ امن قائم ہویا۔ دہشت گردی تے انتہاپسندی دے خلاف جنگ دوران سولاں دسمبر 2014ء نوں اک اندوہناک واقعہ پشاور وچ پیش آیا جدوں کجھ شقی القلب دہشت گرداں نے آرمی پبلک سکول وچ وڑ کے تقریباً ڈیڑھ سو معصوم طالب علماں نوں اوہناں دے کلاس رومز وچ شہید کر دتا جد کہ سکول پرنسپل تے دوجیاں ٹیچراں اوہناں بچیاں نوں بچان دی کوشش وچ آپ وی جان توں ہتھ دھو بیٹھیاں۔ ایس دل دہلا دین والے واقعے نال پورے ملک وچ صف ماتم وِچھ گئی۔ اینے ورھے گزرن دے باوجود ایہناں بچیاں دی موت دا غم تے اوہناں دے والدین دی اکھاں دے اتھرو لوکاں دے دلاں تے نقش نیں تے ہر ورھے سولاں دسمبر دا دن شہید بچیاں دی یاد وچ بلیک ڈے دے طور تے یاد رکھیا جاندا اے۔ ایس سوگوار دن دی مناسبت نال مینوں میری الزبتھ فرائی دی نظم یاد آ رہی اے جہدا عنوان اے ”میری قبر پر کھڑے ہو کر مت رو” جہدے وچ الزبتھ فرائی اوہناں لوکاں نوں تسلی دیندی نظر آندی اے جو اپنے پیاریاں دے انتقال تے افسردہ نیں۔ ایس نظم وچ اوہ موت نوں زندگی دے اختتام دی تھاں اک نویں زندگی دا آغاز قرار دیندی اے۔
نظم دا ترجمہ:
میری قبر پر کھڑے ہوکر مت رو
میں وہاں نہیں ہوں، میں سویا نہیں ہوں
میں چلتی ہزاروں ہواوں میں ہوں
میں برف پر چمچماتا ہیرا ہوں
میں پکے ہوئے خوشہ گندم پر
سورج کی کرن ہوں
میں خزاں کی نرم بارش ہوں
جب آپ صبح کی خاموشی کے ساتھ جاگتے ہیں
میں خاموش پرندوں کی
دائرے میں اڑتی پروازمیں ہوں
میں دن اور رات کی حدود سے بالاتر ہوں
میری قبر پر کھڑے ہوکر مت رو
میں وہاں نہیں ہوں، مجھے موت نہیں آئی