گورنمنٹ سکولاں دے وِیران پئے گرائونڈ

کھلی گرائونڈ وچ بچیاں ٹیبلو پیش کر رہیاں سن۔ پرفارمنس ایکٹ پورا ہوندے ای ساریاں اک ترتیب نال واپس پرت گئیاں۔ گرائونڈ وچ کالے کپڑیاں تے رنگ برنگے پراں والیاں تتلیاں اتر آئیاں۔ تتلیاں صرف اڑدے ویکھنا کافی نہیں’ پھُل دے دوالے ایہ دیوانہ وار چکر لاندیاں نیں’ اُتے جاندیاں نیں’ پر کدی پورے کھولدی تے کدی ادھی حرکت نال ہلاندیاں نیں۔ چوہدری رحمت علی میموریل گرلز ہائی سکول ٹائون شپ دا سپورٹس ڈے سی۔ برادرم خالد رسول نے سدیا۔ سٹیج تے پاکستان ہاکی ٹیم دے سابق کپتان شہباز احمد سینئر’ ٹیبل ٹینس دے سابق قومی کھڈاری عرفان خان تے پاکستان ویمن کرکٹ ٹیم دی خوبرو آل رائونڈ عالیہ ریاض مہمان سن۔ چوہدری رحمت علی ٹرسٹ دے صدر ڈاکٹر عثمان واسطی پرنسپل تے بورڈ دے دوجے اراکین چاہندے نیں کہ ادارہ ای نہیں ایتھے پڑھدے بچے وی کامیاب کہلان۔ اسیں سٹیج تے سی تے ساڈے سامنے وقفے وقفے نال بچیاں دی پرفارمنس نویں رنگ وچ آ رہی سی۔ جمناسٹک اک مشکل کھیڈ اے۔ جسم مطلوبہ حرکات لئی لچک دا ی مطالبہ نہیں کردا طاقت وی چاہیدی ہوندی اے۔ تیراں چوداں ورھے دیاں بچیاں جے موڈھے تے دوجی بچی نوں چک لین اک دے اُتے دوجی’ دوجی اُتے تیجی تے فیر چوتھی بچی جھنڈا لے کے اُتے کھڑی ہو سکے تے ایہ قابل داد اے۔ بچیاں نے علاقائی کپڑیاں وچ ثقافتی رقص پیش کیتا۔ کجھ چھوٹیاں بچیاں تے اینے والہانہ انداز وچ شریک سن کہ اوہناں تے ٹُٹ کے پیار آ رہیا سی۔
دوڑ دے مقابلے ہوئے دماغی طور تے کمزور سپیشل بچیاں لئی اک دوڑ رکھی گئی۔ اک بچہ جو سب توں پچھے رہ گیا سی اوہ کمزور لتاں تے بڑی مشکل نال نس رہیا سی۔ میں اوہنوں سب توں ودھ خوش ویکھیا۔ میں شہبازشریف توں پچھیا ہاکی زوال دا شکار کیوں اے؟ بولے کارپوریٹ سیکٹر دی سرپرستی نہ ملن پاروں لوک ہن ہاکی کھیڈن نوں تیار نہیں۔ میں پچھیا ہاکی دے سینئر کھڈاری اپنے طور تے بچیاں دا ہتھ کیوں نہیں پھڑدے۔ اوہناں نے جواب دتا: حسد ایس کھیڈ نوں کھا گیا اے۔ کوئی دوجے دے ٹیلنٹ تے کامیابی نوں برداشت نہیں کردا۔ شہبازاحمد سینئر دس رہے سن کہ گوجرہ وچ کڑیاں ہاکی کھیڈن آندیاں نیں پر کیوں جے گرائونڈ دے نال ہاسٹل دا انتظام نہیں ایس لئی اوہناں نوں شام ہوندیاں ای اپنے گھر جانا پیندا اے۔ ایس وجہ نال گرئاونڈ دی دستیاب سہولت توں اوہ فائدہ نہیں چکیا جا رہیا جو لیا جا سکدا اے۔ میں پچھیا اپنے بچیاں نوں ہاکی سکھائی؟ سابق کپتان تے ورلڈ چیمپئن نے کہیا: بالکل نہیں’ دھی دی شادی ہو گئی اے’ بیٹا انجینئر بن کے بیرون ملک کم کر رہیا اے۔ ساڈے نال بیٹھے عرفان خان نے دسیا کہ عالیہ ریاض دی قامت تے صلاحیت بے مثال اے۔ عالیہ اک محنت کرن والے ماڑے خاندان چوں اے۔ بھرپور محنت پاروں اوہ قومی کرکٹ ٹیم وچ اپنی تھاں بنا چکی اے۔ عثمان بزدار صاحب جدوں پنجاب دے وزیراعلیٰ سن تے میں اوہناں دا دھیان چھوٹی عمر دی بچیاں لئی کھیڈ دی نکافی سہولتاں ول کران دی کوشش کیتی سی۔ عمران خان لئی قدرے نرم گوشہ رکھن دے باوجود بطور کھڈاری میری رائے وچ تحریک انصاف دی حکومت نے کھیڈاں نوں بری طرح نظرانداز کیتا۔ میں تجویز دتی سی کہ کڑیاں دے سرکاری سکولاں تے کالجاں وچ گرائونڈ دی سہولت تقریباً ہر تھاں ہے جے شام دے اوقات وچ اوتھے اک کوچ دا انتظام کرکے آل دوالے دی آبادیاں دیاں بچیاں نوں کھیڈاں دی تربیت دتی جاوے تے اگلے کجھ ورھیاں وچ پاکستان کھیڈاں وچ ناں پیدا کر سکدا اے۔
برادرم خالد رسول چوہدری رحمت علی ٹرسٹ دے سیکرٹری نیں۔ ایس ٹرسٹ دی چھترچھاویں وسیع رقبے تے ہسپتال’ جامع مسجد’ مدرسہ’ چھوٹے بچیاں دا سکول’ کڑیاں تے منڈیاں دا ہائی سکول چل رہے نیں۔ ادارے دے کول اینے کھلے میدان نیں کہ ٹائون شپ تے گرین ٹائون دیاں بچیاں ایتھے دوڑ’ ہاکی تے لانگ جمپ’ کراٹے’ کرکٹ’ ٹینس’ ٹیبل ٹینس تے بیڈمنٹن دی تربیت لے سکن۔ خالدرسول تے ٹرسٹ دے صدر ڈاکٹر عثمان واسطی اگے گزارش کیتی اے کہ جے اوہ اپنے ادارے وچ آئوٹ سائیڈز بچیاں لئی کھیڈ دی سہولت دین تے میں مناہل نوں ایتھے ضرور گھلاں گا۔ کھیڈ جسمانی’ ذہنی تے جذباتی توازن پیدا کردے نیں۔ کھڈاریاں دے وچکار اک تعلق بن دا اے اوہ زندگی وچ اک دوجے دا ساتھ دینا سکھدے نیں۔ صحت مند مقابلیاں دا رجحان فروغ پاندا اے۔ بچے نوں سکول’ گھر تے سماج دے نال معاملات کرن دا ہنر آ جاندا اے۔ کھیڈ بچیاں وچ قائدانہ صلاحیت پیدا کردے نیں’ زندگی دی اونچ نیچ جو جذباتی دھچکے دیندی اے کھیڈ اوہناں توں بہادری نال مقابلہ کرن دی ہمت دیندے نیں۔ کھیڈاں بچیاں نوں منظم سرگرمی انجام دینا سکھاندے نیں۔ ٹیم بنانا تے سماجی اقدار دا احترام سکھادے نیں۔
پاکستان وچ پچھلے تریہہ پینتی ورھیاں دوران کھیڈ دے میدان تقریباً ختم ہو گئے نیں جہڑے ہے نیں اوہ سرکار دی سرپرستی توں محروم نیں۔ عرفان خان صاحب نے چنگی تجویز دتی اے کہ بچیاں نوں اوہناں کھیڈاں دی تربیت دتی جاوے جو عالمی سطح تے مالی فائدے دیندی اے۔ میرا تجربہ اے کہ پروفیشنل کھیڈاں لئی غریب تے ماڑے گھرانیاں دے بچے شاندار ٹیلنٹ رکھدے نیں۔ ساڈے کول جم وچ اکثر اجہے لڑکے بہترین باڈی بلڈر بن دے جہناں دے کول خوراک لئی پیسے نہ ہوندے۔ اجہے بچے تے بچیاں ہر تھاں موجود نیں جہناں نوں کھیڈ دا میدان تے تھوڑی جہی سرپرستی چاہیدی اے۔ چوہدری رحمت علی میموریل سکول اپنی گنجائش دے مطابق ایہ خدمت نبھا رہیا اے پر اوہدے سامنے سڑک پار گورنمنٹ گرلز ہائی سکول تے گورنمنٹ گرلز کالج ٹائون شپ دے کھلے میدان سارا دن ویران پئے رہندے نیں۔ انج ہر شہر وچ ہو رہیا اے۔ بدقسمت بچے بچیاں دا ٹیلنٹ ضائع کر دتا جاندا اے۔٭