پِلاک ولوں ہارون عدیم نال ادبی بیٹھک

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ کلام شاعر بزبان شاعر پروگرام وچ ہارون عدیم دے نال اک ادبی نشست دا آہر کیتا گیا۔ ہارون عدیم نے اپنا منتخب کلام سنایا جہنوں موجود حاضرین نے بہت پسند کیتا۔ ہارون عدیم دی شاعری دے اندر اپنی دھرتی دے سارے رنگ موجود نیں۔ا یہدے وچ اوہناں قوتاں دے خلاف للکار تے نعرہ حق اے جہڑے سماج نوں مختلف ہتھکنڈیاں دے ذریعے کھوکھلا کر رہے نیں تے لوکاں دے سامنے اپنی شرافت دا لبادا وی اوڑھیا ہویا اے۔ اوہناں دی شاعری توں سانوں ایہہ سبق ملدا اے کہ حالات جنے مرضی کٹھن ہون اوہناں دا مقابلہ مردانہ وار کرنا چاہیدا اے۔ مصلحت دا شکار ہونا کسے وی اعلیٰ ظرف انسان دے شایان شان نہیں۔ اوہناں نے نظماں’ غزلاں’ تے بولیاں سنا کے سامعین نوں خوب محظوظ کیتا۔ ڈائریکٹر جنرل پلاک’ ڈاکٹر صغرا صدف نے پروہنے شاعر ہارون عدیم نوں پھل پیش کیتے تے شکریہ ادا کیتا۔