محکمہ تعلقات عامہ دے ملازماںلئی 100 فیصد الائونس دا اعلان

وزیراعلیٰ پنجاب چودھری پرویزالٰہی دا جہڑے سیاسی خاندان تے جہڑے دریا دل علاقے نال تعلق اے اوہ دونویں اپنی وضع داری ‘ غریب پروری تے عطا لئی معروف نیں۔ چودھری پرویزالٰہی نوں جے محسن پنجاب کہیا جاوے تے بے جا نہ ہووے گا کیوں جے اوہناں نے اپنے اقتدار دے عرصے وچ ماضی تے حال وچ ایسے شاندار عوام دوست’ وسیع تے دوررس نتائج دے حامل منصوبے تے فیصلے متعارف کرائے نیں کہ عوام گڈ گورننس’ تجربہ کار والیاں دی کارکردگی نوں چودھری صاحب دی کارکردگی دا پرکاہ وی نہیں سمجھدے۔ ایہہ حقیقت اے کہ اللہ تعالیٰ نے چودھری پرویزالٰہی نوں جہڑے سیاسی بصیرت’ سوجھ بوجھ تے عوامی خدمت دا بے پناہ جذبہ ودیعت کیتا اے اوہ وطن عزیز دے کسے ہور لیڈر دے حصے وچ نہیں آیا۔ویسے تے چودھری پرویزالٰہی معاشرے دے ہر طبقے دی ترقی تے خوشحالی لئی نویاں نویاں سکیماں تے ترقیاتی منصوبیاں دے اجرا اتے پنجاب دے طول و عرض وچ اپنی وَکھری شناخت رکھدے نیں لیکن صحافت دے پیشے نال جڑے بندیاں لئی چودھری پرویزالٰہی نے بحیثیت وزیراعلیٰ جہڑے تریخی فلاحی کم کیتے نیں اوہناں توں میڈیا نال تعلق رکھن والے طبقے وچ چودھری صاحب دی قدرومنزلت وچ بے حد وادھا ہو گیا اے۔ صحافت دے شعبے نال جڑیا ہویا سرکاری محکمہ ڈی جی پی آر وی پچھلے دناں وزیراعلیٰ چودھری پرویزالٰہی دی بے پایاں نوازشاں تے مہربانی پاروں کئی عشریاں دی محرومیاں تے مالی مشکلاں دے گرداب توں نکل کے بالآخر دُوجے محکمیاں وانگوں ماہانہ الائونس دا حقدار بن گیا اے۔میڈیا چاہے پرائیویٹ ہووے یا سرکاری’ چودھری پرویزالٰہی صاحب پہلے دن توں اوہدی اہمیت تے معاشرے دے سدھار وچ ایس فعال کردار دے قائل نیں۔ ایہو وجہ اے کہ اوہناں نے اپنی وزارت اعلیٰ دے پہلے دور وچ صوبے دے سارے وڈے شہراں وچ صحافیاں لئی صحافی کالونیاں دے قیام دا اعلان کیتا تے ڈی جی پی آر دے افسراں تے اہلکاراں لئی وی پلاٹاں دا کوٹہ مخصوص کر دِتا۔ لہور دی صحافی کالونی وچ لہور دے صحافیاں تے ڈی جی پی آر دے افسراں نوں پچھلے 17 ورھیاں توں بی بلاک وچ پلاٹاں دے مالکانہ حقوق توں متعلق مسئلیاں دا سامنا سی۔ ایہہ اعزاز وی ساڈے مرد درویش وزیراعلیٰ دے حصے وچ آیا اے کہ متاثرہ افراد دی شنوائی اک واری فیر اوہناں دے دست مبارک توں ہوئی۔ پچھلے دناں وزیراعلیٰ ہائوس وچ ہون والی اک تقریب وچ وزیراعلیٰ پرویزالٰہی نے نہ صرف بی بلاک دے متاثرین نوں متبادل پلاٹس عطا کر دتے بلکہ ایس موقع تے ڈی جی پی آر دے افسر تے ملازماں لئی 150 فیصد خصوصی الائونس دا وی تریخی اعلان کر دتا۔ ایس اعلان دے پس منظر وچ وزیراعلیٰ دے سیکرٹری چودھری اقبال احمد’ صدر لہور پریس کلب اعظم چودھری تے ترجمان وزیراعلیٰ مسرت جمشید چیمہ دی کاوشاں تے کوششاں دا پورا پورا دخل سی۔ ایس کشتی نوں کنڈے لان وچ جتھے ڈائریکٹر جنرل پبلک ریلیشنز رائو پرویز اختر تے سیکرٹری انفارمیشن تے کلچر آصف بلال لودھی نے مرکزی کردار ادا کیتا اوتھے ای ایڈوائزر ٹو سی ایم جناب عمر سرفراز چیمہ نے وی ہر سطح تے محکمے دی آواز بلند کیتی تے متعلقہ بیورو کریسی تے وزیراعلیٰ پرویزالٰہی نوں محکمے دے افسر تے اہلکاراں دے اوس حقیقی مسئلہ توں روشناس کرایا۔ سارے افسر اپنے محسناں دیاں ایہناں کاوشاں اتے اوہناں نوں سلام پیش کردے نیں۔ پنجاب کابینہ دے اجلاس دے موقع تے وزیراعلیٰ نے پی آر الائونس وچ 150 دے بجائے 100 فیصد وادھا دی منظوری دے دِتی۔ تاہم عشریاں توں اپنیاں تنخواہاں اتے کسے قسم دے وادھے تے خصوصی الائونس نوں ترسدے ہوئے ڈی جی پی آر دے افسران تے دُوجے عملے لئی ایہہ وادھا وی خوشی تے مسرت دا پیغام بن گیا اے۔ صحافیاں تے ڈی جی پی آر دے افسراں دے رہائشی مسئلیاں دے حل دے حوالے نال ایوان وزیراعلیٰ وچ ہون والی تقریب وچ وزیراعلیٰ چودھری پرویزالٰہی نے بی بلاک دے 84 متاثرین نوں متبادل پلاٹس دے الاٹمنٹ لیٹرز دتے۔ وزیراعلیٰ نے تقریب نال خطاب کردیاں ہوئیاں کہیا کہ پہلے مرحلے وچ ایسے متاثرین نوں جہناں دے پلاٹس اتے تعمیرات ہو چکیاں سن اوہناں نوں صحافی کالونی وچ پلاٹس دتے گئے نیں۔ بی بلاک متاثرین نوں صحافی کالونی وچ قرعہ اندازی دے ذریعے پلاٹس الاٹ کیتے گئے نیں تے بی بلاک دے متاثرین دا 17 سالہ دیرینہ مسئلہ حل کر دتا اے۔ بی بلاک دے دُوجے متاثرین نوں اگلے مرحلے وچ صحافی کالونی وچ موجود جگہ اتے ای پلاٹس دِتے جان گے۔ وزیراعلیٰ چودھری پرویزالٰہی نے کہیا کہ میرا وعدہ اے کہ بی بلاک دے ہر متاثرہ الاٹی نوں پلاٹس دتے جان گے۔ بی بلاک دے ایسے متاثرین جہناں دے پلاٹس کلیئر نیں اوہ فوری طور تے اپنے گھر بنا سکدے نیں۔ صحافی کالونی وچ کسے قسم دے قبضہ مافیا دی کوئی گنجائش نہیں۔ صحافی کالونی وچ پلس چوکی وی بنائی جاوے گی۔ اوہناں نے کہیا کہ ا یف بلاک دے پلاٹس دا قبضہ وی مالکان نوں دِتا جا چکیا اے۔ وزیراعلیٰ نے کہیا کہ صحافی کالونی فیز ٹو دی منظوری ہو چکی اے تے دُوجے صحافی وی اپنا گھر بنا سکن گے۔فیز ٹو دے ممبراں نوں نہ صرف 700کنال اراضی دِتی بلکہ اوہدے اتے ہن ترقیاتی کم وی شروع کر رہے نیں۔ فیزٹو لئی روڈ تے ایل ڈی اے نوں ہدایات جاری کر دتیاں نیں۔فیز2وچ سارے صحافیاں نوں 5-5مرلے دے پلاٹس دِتے جان گے۔اوہناں نے کہیا کہ پریس کلب دی ممبر شپ نہ رکھن والے بیمار تے معذور صحافیاں نوں وی پلاٹس دین گے۔ وزیراعلیٰ چودھری پرویزالٰہی نے ڈی جی پی آر دے افسراں تے ملازماں لئی 100فیصد خصوصی الائونس دین تے پنجاب جرنلسٹ ہائوسنگ فائونڈیشن دے ملازماں لئی دو مہینے دی تنخواہ بطور اعزازیہ دین دا اعلان وی کیتا۔ پاکستان تحریک انصاف دی حکومت دے انتخابی منشور دا اک اہم نعرہ انصاف دی فراہمی اے۔ پارٹی دے چیئرمین عمران خان نے ایس جماعت دی بنیاد ای ایس لئی رکھی کیوں جے اوہناں دے نزدیک پاکستان وچ محض اشرافیہ یا مراعات یافتہ طبقے نوں ای ترجیحی سلوک دا مستحق سمجھیا گیا جد کہ عام بندے نوں اپنا حق حاصل کرن لئی وَڈے وڈے بیلنے پیندے نیں۔ بدقسمتی نال ویلا لنگھن دے نال معاشرے وچ تفاوت دی ایہو بیماری سرکاری شعبے وچ وی سرایت کردی چلی گئی۔ جے پنجاب دے مختلف سرکاری محکمیاں تے اداریاں دا جائزہ لیتا جاوے تے پتہ چلے گا کہ بعض محکمیاں نوں مختلف عذرہائے دی آڑ وچ پے در پے خصوصی مراعات تے لاائونسز دتے گئے جد کہ باقی محکمیاں نوں بری طرح نظرانداز کیتا گیا۔ ایہہ فرق اینا ودھ چکیا سی کہ پنجاب دے باقی محکمیاں وچ مایوسی تے بے چینی آخری حداں نوں چھون لگی سی۔ ایس توں وی ودھ کے ایہہ گل کہ اوہناں محروم محکمیاں ولوں احتجاج مگروں الائونس دی ہر تحریک نوں مراعات یافتہ محکمیاں نے فائلاں وچ دبا دتا۔ ایہہ سلسلہ پچھلیاں کئی حکومتاں توں جاری سی۔ عام طور تے ایہہ موقف اختیار کیتا گیا کہ محروم محکمیاں دے ملازمین کوئی کم نہیں کردے تے سارا بوجھ مراعات یافتہ محکمیاں نے چکیا اے جد کہ حقیقت ایہدے الٹ اے۔ ہر محکمے وچ سزا تے جزا دا باقاعدہ نظام موجود اے۔ کورونا دی وبا دے دوران ویکھو تے ہر محکمے دے افسر تے اہلکار فرنٹ لائن ا تے رہ کے عوام دی خدمت دا کم کردے رہے۔ کئی ملازمین اپنی جان وی گنوا بیٹھے ایس لئی ایہہ کہنا زیادتی ہووے گی کہ سرکاری ملازمین اپنی ذمہ داریاں پوری نہیں کر رہے۔
وزیراعلیٰ پنجاب چودھری پرویزالٰہی نے اقتدار وچ آندے ای سرکاری شعبے وچ ایس واضح ناانصافی نوں محسوس کیتا تے سرکاری ملازمین نال اِکو جیا سلوک دی پالیسی اپنان دا عزم کیتا۔ پنجاب بھر دے ڈی جی پی آر دے محروم ملازماں وچ ایس اعلان تے خوشی دی لہر دوڑگئی۔ عام طور تے انج دے فیصلے بجٹ وچ کیتے جاندے نیں لیکن لکھاں ملازماں دی مالی مشکلاں دا احساس کردیاں ہوئیاں وزیراعلیٰ
نے بجٹ دا وی انتظار نہیں کیتا تے ڈی جی پی آر دے ملازماں دیاں مشکلاں نوں محسوس کردیاں ہوئیاں اوہناں لئی فوری طور تے 100فیصد الائونس ریلیف دین دا اعلان کر دتا۔ وزیراعلیٰ چودھری پرویزالٰہی دے ایس اقدام توں نہ صرف محکمہ تعلقات عامہ دے ملازماں وچ کئی سالاں توں پائی جان والی بے چینی تے پریشانی دور ہووے گی بلکہ ہن اوہ پورے انہماک نال اپنی توجہ اپنے سرکاری فرائض دی انجام دہی اتے مرکوز کر سکن گے۔ ایہہ حقیقت اے کہ ڈی جی پی آر 24 گھنٹے کم کرن تے ہمیشہ ڈیوٹی اتے موجود رہن والا اک ایسا ادارہ اے جہدے افسران تے اہلکاران موسم دی خرابی ‘ ایمرجنسی’ سیلاب’ زلزلے وسائل دی کمیابی تے ہر طرحاں دی مشکلاں دے باوجود ہر قسم دے سردگرم توں بے نیاز ہو کے ڈیوٹی دیندے نیں۔ پرنٹ میڈیا دا سامنہ آسان سی مگر ہن الیکٹرانک میڈیا تے سوشل میڈیا دے چیلنجز درپیش نیں۔ ماڈرن میڈیا دی آمد نے ڈی جی پی آر دے ملازماں دے انداز فرائض دہی اتے وی اثرات مرتب کیتے نیں۔ نویں میڈیا دا ایہہ اعجاز اے کہ رات یا دن دا کوئی پہر ہووے کسے وی انتظامی سیاسی یا ایمرجنسی دی صورتحال اتے پی آر او نوں فوری طور تے اپنے کمفرٹ زون توں نکل کے اپنے محکمے اپنے وزیر’ اپنے سیکرٹری یا ادارے دے امیج لئی نسنا پیندا اے۔ ایہو صورتحال پنجاب بھر دے اضلاع وچ پھیلے ڈی جی پی آر دے فیلڈ آفسز وچ وی درپیش آندی اے۔ ایہو وجہ سی کہ محکمے دے افسران تے اہلکاران دا دیرینہ مطالبہ سی کہ 1122 ‘ پلس’ ڈاکٹرز تے دوجے فوری ایکشن اتے مامور محکمیاں وانگوں ڈی جی پی آرلئی خصوصی الائونس مقرر کیتا جاوے کیوں جے خوفناک مہنگائی’ افراط زار تے مالی مشکلاں نے اوہناں دا لک توڑ دتا اے۔ وزیراعلیٰ چودھری پرویزالٰہی نے محکمے دا ایہو دیرینہ مطالبہ پورا کر کے ملازماں دے دل جت لیتے نیں۔