سردار قاسم سلیمانی شہید، اک عہد ساز کمانڈر

سردار قاسم سلیمانی شہید صرف 19سال دی عمر وچ دُوجے بہت سارے نوجواناں وانگوں ‘ انقلابیاں تے سپاہ وَل راغب ہوئے تے فوج وچ اوہناں دا داخلہ اوہناں دی شہرت تے ترقی دی پہلی سیڑھی سی۔ اوہناں دی زندگی دا پہلا مشن کرمان وچ مقیم طیاریاں دی حفاظت کرنا سی۔ مگروں اوہ تربیتی بیرکاں دے کمانڈر بنے تے اوسے سال ایران عراق جنگ وچ رلت کیتی۔ ایران عراق جنگ دے پہلے مشن وچ اوہناں نوں ثاراللہ فوج دی کمانڈ سونپی گئی جہڑی اک اہم فوج بن گئی تے جنگ دے خاتمے تے اوہدے کمانڈر قاسم سلیمانی سن۔ پچھلے کمانڈر محمد علی جعفری دے مطابق آغاز وچ اوہ بوہتے معروف نہیں سن۔ تاہم جنگ دے اختتام تک اوہ اک اعلیٰ درجے دے کمانڈر بن چکے سن۔ جنگ مگروں 8سال تک اوہناں نے انسداد منشیات مشن دی سربراہی کیتی مگر سب توں اہم مشن جہڑااوہناں دی زندگی دے اخیر تک جاری رہیا۔ رہبر معظم دے فرمان دے مطابق اوہناں نوں قدس فورس دا کمانڈر مقرر کیتاگیا۔
قدس فورس سپاہ دی بیرون ملک شاخ سی’ جہڑی قاسم سلیمانی دے دور وچ اک بہت وڈی سکیورٹی’ قافتی تے اقتصادی فوجی تنظیم بن گئی۔ جہدے تحت شام’ عراق’ لبنان’ یمن’ افغانستان تے فلسطین وچ درجناں ملیشیا گروپ بنے۔ پچھلی دہائی وچ قدس فورس دی سرگرمیاں دا سب توں اہم پہلو سیاسی سرگرمیاں سن۔ قاسم سلیمانی دی ترقی تے شہرت اوہناں دے کردار تے بین الاقوامی میڈیا دی توجہ دا نتیجہ سی۔
مشرق وسطیٰ وچ سیاسی کشیدگی تے شام وچ وڈی علاقائی جنگ دے دوران قاسم سلیمانی نوں خطے وچ آیت اللہ خامنہ ای دے وزیر خارجہ دے طور تے جانیا جان لگیا۔ قدس فورس دے کمانڈر قاسم سلیمانی نے خود نوں دنیا وچ اسرائیل دے نمبر اک دشمن دے طور تے متعارف کرایا۔ ایرانی سپاہ دی قدس فورس دے کمانڈر دی حیثیت نال امریکی حکومت دے خلاف اپنے طنز دا دائرہ ودھا دتا۔ اوہ شام تے عراق دی جنگاں وچ ایران دے پہلے کمانڈر سن۔ اوہناں نے داعش دے کیس نوں ہینڈ ل کیتا تے اوہناں دا خاتمہ کیتا۔ عراق وچ اماماں دے مزارات دی تعمیر نو دی صورت وچ عراق تے ایران وچ ارباں ڈالر دے وڈے اقتصادی تے تعمیراتی منصوبیاں اتے کم کیتا۔ عراق دے بحران نوں حل کرن والے نظام وچ اہم ذمہ داری ادا کیتی۔کردستان دی آزادی ہووے’ عراقی وزرائے اعظم دی تقرری تے خطے دے دوجے بہت سارے اہم واقعات تے فیصلے’ ایہہ سب اوہناں دے نام نال جڑے ہوئے سن تے اوہناں ساری چیزاں دی وجہ نال اوہ پچھلے 40 سالاں وچ ایرانی فورس دے سب توں اہم کمانڈر بن چکے سن تے اوہناں نوں اسلامی جمہوریہ ایران دے اعلیٰ ترین فوجی اعزاز ”ذوالفقار” نال نوازیا گیا۔ ایران دے اسلامی انقلاب مگروں جنرل سلیمانی پہلے شخص نیں جہناں نے ایہہ اعزاز حاصل کیتا اے۔
قاسم سلیمانی نوں بین الاقوامی شہرت دین والے کردار نے اوہناں نوں اک کرشماتی شخصیت بنا دتا سی۔ قاسم سلیمانی دی تصویر ٹی شرٹس توں لے کے کمپیوٹر گیمز تک سب اتے سی تے ایرانی فورس دے سب توں مقبول چہرے دے طور تے اوہناں دا نام سرفہرست سی۔
سپاہ قدس دے کمانڈر افغانستان وچ وی فعال سن۔ بعض مجاہدین دے بقول ‘ اوہ بارہا طالبان تے القاعدہ نال جنگ دے سلسلہ وچ افغانستان دا سفر کردے سن۔ ایسے طرحاں اوہناں نے داخلی جنگ مگروں افغانستان دی باز سازی دے سلسلہ وچ بہت سارے اقدام انجام دتے نیں۔
افغان فوجیاں دے مطابق اوہناں دی شخصیت وچ اک اپنا پن سی۔ اوہ افغان اتحادیاں دے نال احترام نال پیش آندے سن تے بلا تکلف اوہناں دے دستر خوان اتے بیٹھ جاندے سن۔ا وہناں نوں کردستان دی داخلی جنگ’ ایران عراق جنگ تے ایران تے افغان سرحداں اتے منشیات دی اسمگلنگ کرن والے گروہواں نال مقابلے دا وَڈا تجربہ سی۔
اسرائیل دے لبنان اتے حملے تے 33روزہ جنگ دے دوران قاسم سلیمانی بیروت وچ حزب اللہ دے مرکزی کمانڈ دے طور تے کنٹرول روم وچ موجود رہے۔ قاسم سلیمانی عراق تے شام وچ داعش دے خلاف برسر پیکار رہے۔ ایران نے مشرق وسطیٰ وچ امن وامان دی بحالی لئی ایس گروہ دے نال مقابلہ شروع کیتا تے داعش نوں عراق توں کڈ باہر کرن وچ اہم کردار ادا کیتا۔ 21نومبر سنہ 2017 نوں جنرل قاسم سلیمانی نے خط وچ آیت اللہ خامنہ ای دی خدمت وچ داعش دی نابودی دا اعلان کیتا جہڑا اوہناں دا اک بہت وڈا کارنامہ سی۔
2019 وچ امریکی اخبار
فارین پالیسی نے اپنے اک خصوصی شمارے وچ جہدے وچ اوہ ہر سال دنیا بھر دے 100بہترین دانشمنداں دے نام تعارف دے طور تے شائع کردا اے’ جنرل قاسم سلیمانی دا نام دنیا دے 10منتخب دفاعی امنیتی مفکراں وچ شامل کیتا۔
قاسم سلیمانی دے اتے کئی واری جان لیوا حملے کیتے گئے۔ پہلی واری 1982 وچ اک ڈاکٹر نے مشہد شہر وچ اوہناں اتے جان لیواحملہ کیتا۔ ایسے طرحاں کرمان شہر وچ قاسم سلیمانی نوں قتل کرن دا منصوبہ بنان والے افراد نوں گرفتار کیتا گیا۔
بالآخر جنرل قاسم سلیمانی نے 3جنوری 2020نوں اک ات گردانہ امریکی ڈرون حملے وچ شہادت پائی۔ ایہہ حملہ اوہناں دی گڈی اتے اوس ویلے کیتا گیا جدوں اوہ بغداد ائیرپورٹ توں نکل رہے سن۔ ایس حملے وچ اوہناں دے نال عراق دے رضاکار فورس دے نائب ابو مہدی المہندس سنے بعض دوجے افراد وی شہید ہوئے۔ ایس حملے دے کجھ دیگر مگروں امریکی وزارت دفاع نے اک بیان جاری کردیاں ہوئیاں اعلان کیتا کہ قاسم سلیمانی دی گڈی اتے حملہ امریکی صدر ڈونلڈ ٹرمپ دے حکم تے کیتا گیا اے۔
تہاڈی شہادت تے دنیا دے مسلمان سراپا احتجاج بن گئے۔ مختلف ملکاں وچ مظاہرے تے احتجاج ہوئے تے اوہناں دی یاد تے تعزیت وچ ایران دے علاوہ پوری دنیا وچ پروگرام تے تعزیتی جلسے منعقد ہوئے۔ مختلف ملکاں دی سیاسی تے مذہبی شخصیات نے اوہناں دی شہادت اتے ردعمل دا اظہار کردیاں ہوئیاں تعزیتی پیغامات دتے۔ ایران دے سپریم لیڈر آیت اللہ خامنہ ای نے اپنے تعزیتی پیغام وچ تہانوں مقاومتی بلاک دی بین الاقوامی شخصیت قرار دتا تے شہادت دی مناسبت نال ایران وچ تن دن سوگ دا اعلان کیتا۔
ایسے طرحاں مختلف ملکاں دے وزرائے خارجہ نے وی ہمدردی دا اظہار کردیاں امریکہ دے ایس اقدام نوں محکوم کیتا اے۔ ایسے طرحاں اقوام متحدہ دے خصوصی رپورٹر’ اگنیس کالامرڈ نے قاسم سلیمانی دے ابو مہدی دے قتل نوں غیر قنونی تے بین الاقوامی قنون دی خلاف ورزی قرار دتا۔ امریکہ دے مورخ ایروندا ابراہمیان نے کہیا کہ ایس سانہے نال پہلے ایرانی ‘ امریکہ نوں اک سازش کار حکومت سمجھدے سن ایس حادثے مگروں اک دہشتگرد حکومت وی سمجھن گے۔
قاسم سلیمانی دی شہادت دے نتیجے وچ بعض اثرات و نتائج پیش آئے:
قاسم سلیمانی تے ابو مہدی المہندس دی شہادت مگروں عراق دی سیاسی پارٹیاں تے عوام نے امریکہ دی فوج نوں عراق توں کڈن دامطالبہ کر دتا تے عراقی پارلیمنٹ نے 5جنوری 2020وچ اک فوری جلسہ بلایا تے اوہدے وچ عراق توں امریکہ دی فوج دے انخلا دا بل پاس کیتا۔
8جنوری 2020نوں ایران دے سپاہ پاسداران انقلاب اسلامی نے قاسم سلیمانی دے قتل دے بدلے امریکی فوج دے عراق وچ عین الاسد ائیر بیس اتے میزائلاں نال حملہ کیتا تے امریکہ دے سپر پاور دے دعوے نوں ایران نے چکنا چوری کردتا جدوں اوہدے جدید ترین آلات ایرانی میزائل توں بے خبر تے اوہناں دی نشاندہی کرن وچ وی نکام رہ گئے سن جہدے تے پوری دنیا وچ امریکہ دی خوب جگ ہنسائی ہوئی۔
جمہوری اسلامی ایران دے کیلنڈر وچ ایس دن نوں روز جہانی مقاومت دے عنوان نال ثبت کیتا گیا اے۔قاسم سلیمانی’ ابو مہدی الہمندس تے اوہناں دے ساتھیاں دی تریخی تشیع جنازہ عراق دی سیاسی تے مذہبی شخصیات تے عوام دی موجودگی وچ عراق دے شہر بغداد’ کربلا تے نجف وچ ہوئی۔ ایہدے مگروں شہدا دے جنازے ایران منتقل ہوئے تے اہواز’ مشہد’ تہران تے رقم وچ تشیع جنازہ ہوئی۔
تہران وچ ایرانی سپریم لیڈر آیت اللہ خامنہ ای نے قاسم سلیمانی’ابو مہدی المہندس تے دوجے شہدا دے جنازے اتے نماز جنازہ پڑھائی تے قاسم سلیمانی شہید دے تشیع جنازہ نوںامام خمینی مگروں تریخ دا سب توں وڈا تشیع جنازہ قرار دتا۔ سپاہ پاسدار انقلاب اسلامی دے ترجمان دے مطابق 25 ملین لوکاں نے تشیع جنازہ وچ رلت کیتی۔ انج شہید سردار قاسم سلیمانی دے نال اک مسلسل جدوجہد دا عہد تمام ہویا لیکن اوہناں دا کردار ہمیشہ لئی زندہ رہ گیا اے۔
میرے خیال وچ اوہ جے زندہ رہندے تے جہڑا اک کم باقی رہ گیا سی اوہ وی پورا ہو جانا سی تے اوہ سی قدس دی آزادی۔ خدا نوں ایہو منظور سی لیکن بحیثیت مسلمان میرا ایہہ عقیدہ اے کہ قدس دی آزادی لئی انشاء اللہ اوہ کسے ہور سلیمانی نوں چھیتی ای بھیج دیوے گا۔ قدس فورس دے کمانڈر قاسم سلیمانی نے خود نوں دنیا وچ اسرائیل دے نمبر اک دشمن دے طور تے متعارف کرایا۔ ایرانی سپاہ دی قدس فورس دے کمانڈر دی حیثیت نال امریکی حکومت دے خلاف اپنے طنز دا دائرہ ودھا دتا۔ اوہ شام تے عراق دی جنگاں وچ ایران دے پہلے کمانڈر سن۔ اوہناں نے داعش دے کیس نوں ہینڈ ل کیتا تے اوہناں دا خاتمہ کیتا۔ عراق وچ اماماں دے مزارات دی تعمیر نو دی صورت وچ عراق تے ایران وچ ارباں ڈالر دے وڈے اقتصادی تے تعمیراتی منصوبیاں اتے کم کیتا۔ عراق دے بحران نوں حل کرن والے نظام وچ اہم ذمہ داری ادا کیتی۔کردستان دی آزادی ہووے’ عراقی وزرائے اعظم دی تقرری تے خطے دے دوجے بہت سارے اہم واقعات تے فیصلے’ ایہہ سب اوہناں دے نام نال جڑے ہوئے سن تے اوہناں ساری چیزاں دی وجہ نال اوہ پچھلے 40 سالاں وچ ایرانی فورس دے سب توں اہم کمانڈر بن چکے سن تے اوہناں نوں اسلامی جمہوریہ ایران دے اعلیٰ ترین فوجی اعزاز ”ذوالفقار” نال نوازیا گیا۔ ایران دے اسلامی انقلاب مگروں جنرل سلیمانی پہلے شخص نیں جہناں نے ایہہ اعزاز حاصل کیتا اے۔
قاسم سلیمانی اک ایسا نڈر مسلمان مجاہد لیڈر سی جہدے نام توں دشمن اسلام لرز اٹھدا سی۔ عالم اسلام دے دشمناں نے اوہنوں ات گرد قرار دتا لیکن اوہ عالم اسلام دا حقیقی شہید تے ہیرو سی۔ اج دشمن اوہناں دے نام والی پوسٹ نوں سوشل میڈیا توں تے ہٹا سکدا اے بلاک کر سکدا اے لیکن قاسم سلیمانی دے کردار تے شخصیت نے عالم اسلام دے دِلاں وچ جہڑا گھر بنایا اے اوہنوں کدی وی نہیں مٹا سکدا۔ کدی وی نہیں۔