نویںصوبے ضرورت،شرارت یا سازش؟

نواں سال شروع ہو چکیا اے۔ دعا اے کہ ایہہ سال دنیا بھر دے لوکاں لئی خوشحالی لے کے آوے۔ لنگھے سال جہناں مسئلیاں دا پاکستانیاں نوں سامنا کرنا پیا اے اوہناں کولوں نجات مل جاوے۔ ایہہ سال نویں انتخابات دا وی اے جیویں برسات وچ ڈَڈُو پانی دے کنڈیاں کول غوں غوں کردیاں سنے ویکھے جاندے نیں بالکل انج ای ساڈے سیاستدان انتخابات توں پہلاں کدی چھوٹے صوبیاں دی محرومی تے کدی جنوبی پنجاب نوں نواں صوبہ بنان دا چورن ویچن نکل پئے نیں۔ پچھلے وزیراعظم پاکستان تے موجودہ سپیکر قومی اسمبلی راجہ پرویز اشرف نے ملک وچ نویں صوبیاں دے حوالے نال اک کمیٹی قائم کر کے اک ہور پینڈورا بکس کھول دتا اے۔ ایہہ کمیٹی دراصل پچھلے صدر پاکستان آصف علی زرداری دے اوس سفنے دی تعبیر لئی بنائی گئی جہڑی اوہ اک مدت توں جنوبی پنجاب صوبہ بنان دے حوالے نال ویکھ رہے نیں۔ ایہہ اج دی گل نہیں اک مدت توں جدوں وی الیکشن کول آندے نیں جنوبی پنجاب نوں وکھرا صوبہ بنان والے اپنا چورن لے کے سامنے آجاندے نیں۔ کدی جنوبی پنجاب دے جاگیردار’ وڈیرے’ گدی نشین تے تخت پنجاب تے پاکستان اتے حکومت کرن والے جنوبی پنجاب وچ وسائل دی کمی دا سیاپا شروع کر دیندے نیں تے کدی بلاول تے آصف زرداری جنوبی پنجاب دے لوکاں نوں نواں صوبہ دین دا نعرہ بلند کردیندے نیں۔ ٹھیک اے جے ملک وچ نویں صوبے بنانا ضروری اے تے سب توں پہلاں دانشوراںدا اک تھنک ٹینک بنایا جاوے جہڑا ایس گل دا جائزہ لے کے ملک دے کیہڑے کیہڑے صوبے بنیادی سہولتاں وچ پچھے نیں’ کہناں صوبیاں دے لوک پسماندگی دی زندگی گزارن تے مجبور نیں۔ جے لوکاں دا معیار زندگی بلند کرنا مقصد اے’ تعلیم و صحت دی سہولتاں عوام نوں فراہم کرنا ترجیح اے تے ایہہ سب پنجاب وچ سندھ’ بلوچستان تے کے پی کے توں بوہت
زیادہ بہتر انداز وچ موجود نیں۔ 20,15 دانشوراں نوں ملتان تے فیر لاڑکانہ دی سیر لئی نال لے لوو تے فیر فیصلہ کر لوو جنوبی پنجاب دا ملتان ترقی یافتہ اے یا پیپلز پارٹی دا گڑھ لاڑکانہ کھنڈر تے محرومیاں وچ اگے اے۔ سنیا اے لاڑکانہ وچ اک وڈی سڑک دا ٹھیکہ پچھلے کئی سالاں توں دتا جا رہیا اے لیکن اوہ سڑک پختہ کرن دی لوڑ کدی محسوس نہیں کیتی گئی۔جے دوری مسئلیاں دی وجہ بندی اے تے ملتان دا فاصلہ لہور توں 340 کلومیٹر جد کہ کراچی توں لاڑکانہ دا فاصلہ 455 کلومیٹر اے۔
ہن جے ایہہ کہیا سمجھیا جاندا اے کہ پنجاب دی آبادی بوہتی اے تے ایہہ وی تے سوچنا اے کہ کے پی کے بلوچستان تے سندھ توں لوک نقل مکانی کر کے
پنجاب کیوں آ رہے نیں۔ کیوں پہاڑاں دے بہادر پترپنجاب وچ مزدوری لئے آندے نیں تے ایتھے وَس جاندے نیں؟۔ جے بلوچستان کے پی کے ،سندھ دے وڈیرے’ سردار تے جاگیردار اپنے علاقیاں وچ ترقیاتی کم کرواندے تے اج ایہناں صوبیاں دے عوام وچ احساس محرومی نہ ہوندا۔ بلکہ اوہ اپنے گھراں دے کول اعلیٰ تعلیم حاصل کردے تے فیر چنگے روزگار نال جڑ کے خوشگوار زندگی گزارن دے قابل ہوندے۔ جدوں بندے دے کول وسائل ہون اوہ اپنے اہل و عیال نوں ضروریات زندگی آسانی نال مہیا کر سکدا ہووے تے اوہ نہ تنگ نظر ہوندا اے نہ اوہدے اندر احساس محرومی پیدا ہوندا اے بلکہ اوہ اپنے رشتے داراں’ برادری دے لوکاں تے معاشرے وچ قریب وسن والیاں لئی خیر منگدا اے۔
اج کہیا جاندا اے کہ کراچی پاکستان دا معاشی گڑھ اے تے ایہدی وڈی وجہ ملک دے بینکاں دے ہیڈ آفسز’ سٹاک ایکسچینج کراچی وچ موجود ہونا اے۔ کیہ کسے نوں یاد اے کہ کراچی نوں روشنیاں دا شہر بنان لئی کیویں اک خوشحال ریاست خیرپور دی صنعت نوں تباہ کیتا گیا تے کیویں خیر پور دی ساری مشینری کراچی منتقل ہوئی۔
جناب عالی قدر! جے نویں صوبے بنانے ای نیں تے ایہدی شروعات سندھ توں کرو۔ جیویں دِلی اک صوبہ اے انج ای کراچی نوں وی اک وکھرا صوبے دا درجہ دین لئی کمیٹی بنائو۔ فیر ریاست خیرپور نوں وی اک وکھرے صوبے دا درجہ دِتا جا سکدا اے۔فیر ایس توں بعد پنجاب جیہڑا ہر لحاظ نال دُوجیاں توں خوشحال صوبہ اے اوہدے وَل اَکھ چکنا۔ لیکن ایس سب دے باوجود سیاستداناں نوں اپنے علاقیاں وچ ای مستقل رہائش رکھن لئی وی کمیٹی بنائی جائے۔ جنوبی پنجاب توں ہزاراں نہیں لکھاں لوک لہور وچ گھر بنا رہے نیں۔
اک پاسے بلوچستان توں پنجابیاں دیاں لاشاں آ رہیاں نیں تے دُوجے پاسے تھاں تھاں بلوچ پنجاب وچ چاہ خانے کھول رہے نیں۔سانوں بلوچی لوکاں دے پنجاب وچ کاروبار کرن نال کوئی مسئلہ نہیں لیکن بلوچستان جہڑا رقبے دے لحاظ نال ملک دا سب توں وڈا صوبہ ا ے اوتھے لوکاں نوں اوہناں گھراں دے نزدیک اعلیٰ تعلیم تے روزگار دی سہولتاں مہیا نہ کرن دا دکھ ضرور اے۔ قائد مسلم لیگ ن میاں نواز شریف تن واری اقتدار وچ رہن تے بے شمار ترقیاتی کم کروان دے باوجود ملک توں دور رہن تے مجبور نیں ایس لئی ایہہ پریشان کن امر اے کہ میاں نواز شریف آصف زرداری دے بہلاوے وچ آ کے یا مستقبل وچ سیاسی منظرنامے وچ مضبوط کردار ملن دی امید تے پنجاب دی تقسیم لئی حامی بھر لین۔ ہن پنجابیاں نے احساس محرومی دا نعرہ لان والیاں نوں جواب دینا شروع کردتا اے۔ ہن پنجاب بولے گا’ پنجاب دے دانشور تے صحافی بولن گے کہ وَڈا بھرا کہہ کہہ کے کیویں پنجاب دے وسائل تے پنجاب دی زمین ختم کیتی جا رہی اے۔ پنجابیاں نوں جاگنا ہووے گا تے صرف پنجاب تقسیم دی گل کرن والیاں نوں ہر سطح اتے ننگا کرنا ہووے گا۔