ایٹم بم

اقتدار جاوید

وفاقی وزیر خزانہ اسحاق ڈار پچھلے ویہہ پنجی ورھیاں توں یعنی مسلم لیگ ن دے حیاء توں لے کے ہن تک ایس جماعت دا اصل چہرہ نیں۔ ایہ اوہ طوطا اے جہدے وچ بہت ساریاں دی جان بند اے۔ مسلم لیگ دے کارنامے تے کامیابیاں دا سہرا وی اوہناں دے سر تے مسلم لیگ ن دے مسئلے تے اوکڑاں دی وجہ وی ایہو نیں۔ جیویں دھوم دھڑکے نال ڈار آئے تے لیائے گئے اوہناں دی جماعت دے لیڈراں نے ہمیشہ ایسے طرح دھوم دھڑکا کردے قوم تے تن چار عشرے گزار لئے۔ موجودہ حکومت نوں آئے چھ مہینے توں ودھ دا عرصہ ہو چکیا اے۔ ریاست نہیں سیاست بچان دا دھوم دھڑکا ختم ہو گیا۔ ملکی خزانہ دن بدن ودھدا گیا۔ رکے ہوئے کھوہ چوں کنی دیر پانی مل سکدا سی۔ ایہ کہانی بڑی لمی اے آپ ساڈے دفتر وچ عورتاں دا اک ہجوم سی جو اپنی کل پونجی قرض لاہن تے ملک سنوارن دے خوش کن اعلان ویلے نثار کرن نوں بے چین سن۔ ہن ایس واقعے نوں اک ربع صدی ہو چکی اے۔ قرض پنجاہ ہزار ارب تک اپڑ چکیا اے پر ہن وی اوہ قوم نوں کہہ رہے نیں کہ ایہو ڈار ملک دی ترقی دے ضامن نیں۔ ہن تے ملک دی اکانومی ٹائم بمب بن چکی اے۔ ٹک ٹک جاری اے تے سارے ساہ روکے دھماکے توں بچن دا آہر کر رہے نیں۔ ہن حالات ایس نہج تے اپڑ چکے نیں کہ اطلاع اے کہ آصف زرداری بذات خود وزیراعظم دے کول چینی دی برآمد کرن لئی اوہناں نوں تیار کرن گئے سن پر جان دے بجھدے کسے طرح وی چینی برآمد کرن دی اجازت دین تے راضی نہیں سن۔ وزیرخزانہ مفتاح اسماعیل اوتھے موجود سن۔ وزیراعظم اچانک پنج دس منٹ دے بعد اوتھوں اٹھے تے آصف زرداری نے مفتاح اسماعیل نوں کہیا کہ تہانوں معاملے دی سنگینی دا احساس ہے تسیں اوہناں نوں سمجھائو۔ مفتاح نے جواباً کہیا کہ میرے ہتھ تے بنھے ہوئے نیں پر میں تے اوہناں دے سامنے رکھ دینا واں۔ ایہو گل اوہناں نے ہور الفاظ وچ اپنے آرٹیکل وچ لکھ دتی۔
Up until the 1980s, Pakistan was ahead of India in most economic indicators. Then, in the early 1990s, India dismantled its licence raj and shot past Pakistan.
تے بنگلہ دیش دے بارے اوہناں نے کسے لگی لپٹی رکھے بناں اپنی رائے دا اظہار کیتا تے کہیا کہ
income, exports, education, population control, life expectancy in fact in almost all economic and social indicators.
ہن نوٹ کرن والی ایہو گل اے کہ ایہو عشرہ اوہناں دی ممدوح ن لیگ پارٹی دے سربراہ خاندان دا ان ہون دا وی اے۔ زرمبادلہ کتھوں آندا سی۔ اوورسیز نے اپنا ہتھ روک لیا۔ امریکہ وچ رہندے پاکستانی جہناں نوں اوتھے قیام نوں پنجاہ ورھے دا عرصہ ہو چکیا اے تے اینے ای عرصے تو ںاوہ کسے پارٹی نال اپنا تعلق وی استوار کر چکے نیں اوہ بلااستثنیٰ ری پبلکن ہون یاں ڈیموکریٹس اپنی پارٹی توں ودھ عمران خان دے گرویدہ نیں۔ اوہ ایس لئی کہ باہر رہندا پڑھیا لکھیا طبقہ ایس ڈھول ڈھمکے تے دھوم دھڑکے نوں کافی دیر توں جان چکیا سی۔ ہر واری قوم دی تقدیر بدلن دا کہہ کے ہن بزبان آپ اقرار کر رہے نیں کہ پچھتر ورھیاں وچ اسیں کجھ نہیں کر سکے۔ کجھ دن پہلاں کینیڈا دی اک کمپنی آرٹن کیسپٹل نے اپنا نواں پاسپورٹ انڈیکس جاری کر دتا اے جہدے وچ پاکستانی سپورٹ نوں 94 ویں درجے تے رکھیا گیا اے۔ نویں انڈیکس دے مطابق سبز پاسپورٹ رکھن والے پاکستانی شہریاں نوں دنیا دے 44 ملکاں وچ ویزا آن ارائیول دی سہولت حاصل اے ایہناں چوتالی ملکاں دے ناں سن کے ای اندازہ ہو جاندا اے کہ ساڈے وزیراعظم سچ کہہ رہے نیں ایہناں وچ برونڈی’ کیپٹ ورڈے’ کوموروس’ گنی بسائو’ مڈغاسکر’ مالدیپ’ موریطانیہ’ نیپال’ پلائو’ وانڈا’ سمووا’ سیرالیون ورگے ملک شامل نیں۔ ایہناں ملکاں دا تے کسے نے ناں تک نہیں سنیا۔ رکو کجھ ہور ملک وی نیں جتھے پاکستانیاں نوں ویزہ دی لوڑ نہیں اوہناں وچ بارباڈوس، ڈومینیکا، گمبیا، ہیٹی، مائیکرونیشیا، سینٹ وینسینٹ و گریناڈائنزاتے ٹرینڈاڈ اینڈ ٹوباگو شامل نیں جد کہ باقی ڈیڑھ سو ملکاں وچ داخلے ویلے جو غیرانسانی سلوک ہوندا اے اوہدے اسیں سارے گواہ آں۔
نوجوان نسل ساڈے توں پچھدی اے کہ 71ء وچ کیویں پوری قوم دھوکھا گئی۔ کیہ کوئی اجیہا لیڈر نہیں سی جو حالات نوں کنٹرول کردا تے ایس سانحے توں ملک و قوم نوں بچاندا۔ جہدا حق سی آخر اوہنوں حق کیوں نہ دتا گیا۔ ایہو کجھ اوس ویلے وی ہو رہیا سی نہ آئین نہ آئین دی پاسداری۔ عقل کل ہون دا زعم سی کہ اتردا ای نہیں سی۔ سکندر مرزا دے کول رات نوں چار جرنیل آئے سن۔ تن تے واپس چلے گئے میجر جنرل شیربہادر اوتھے ایوان اقتدار وچ رک گئے۔ اک گھنٹے دے بعد جنرل اوہناں نوں ناہیدمرزا دے نال لے کے کیماڑی دے ہوائی اڈے تے اپڑیا۔ کیہ طاقت سی کہ دوہاں نوں پاکستان بدر ہون توں پہلاں بلوچستان وچ اک گورنمنٹ افسر دے گھر کئی دن قیام کروایا گیا۔ ہن وی کئی کہانیاں زبان زدعام نیں۔ نہ اسیں اوس ویلے کجھ کر سکے سی نہ نویں نسل دے وَس وچ کجھ ہے۔ زرمبادلہ دے ذخائر نہ ہون دے برابر پر انداز حکمرانی توں پتہ چلدا اے کہ کوئی فکر نہیں۔ ٹائی ٹینک ڈبن والیاں نوں وی اپنی قسمت دا اندازہ کیہ یقین ہو گیا سی۔ ٹائم بمب نے اپنا وقت مقرر کر رکھیا اے۔ ایہ قیامت وانگوں اٹل اے۔ ایہدی ٹک ٹک موت دی ٹک ٹک اے جو لحظہ بہ لحظہ نیڑے توں نیڑے آ رہیا اے۔ ایہدی ٹک ٹک دا اک ای پیغام اے جو لوک کہندے نیں اوہو حق اے۔ ایہو تریخ دا سبق اے پر ایہ سبق لین والا وی تے کوئی ہووے۔ معاشی ماہرین کہہ رہے نیں کہ ایس ٹائم بمب نوں نکارہ بنان دا واحد طریقہ فوری تے منصفانہ الیکشن نیں۔٭