قومی مسائل اتے قومی اتفاقِ رائے دی تجویز

پاکستانی فوج دے سربراہ جنرل عاصم منیر نے پاک بحریہ دی اک تقریب وچ کہیا اے کہ معیشت تے ات گردی جئے چیلنجاں نال نبڑن لئی سارے سٹیک ہولڈراں وچ قومی اتفاق رائے دی لوڑ اے۔ جنرل عاصم منیر نے کوئی اک مہینے پہلاں اپنا منصب سنبھالیا اے۔ اوہ اک عرصے توں پاک فوج دا حصہ نیں تے اعلیٰ منصب اتے فرائض منصبی ادا کردے رہے نیں۔ دفاعی مسائل دے نال نال قومی مسائل اتے وی اوہناں دی گہری نظر اے۔ خاص طور تے پچھلے اک سال توں کئی چیلنجاں نے سر چکیا اے۔ اوہناں نے خود وی اوہناں اتے خوب سوچ بچار کیتی ہووے گی تے جی ایچ کیو وچ موجود اوہناں دے دوجے ساتھیاں نوں وی اوہناں مسائل دا کماحقہ ادراک ہووے گا۔ ایس پس منظر وچ اوہناں دی تجویز اتے سانوں ضرور عمل کرنا چاہیدا ای تاں جے معیشت تے ات گردی جئے سنگین مسائل دا حل تلاش کیتا جاسکے تے اک قومی اتفاق رائے دے نال اوہناں نال نبردآزما ہویا جا سکے۔
آرمی چیف دی تجویز اتے عمل کرن لئی ساریاں قومی سیاسی پارٹیاں نوں سر جوڑ کے بیٹھنا چاہیدا اے۔ ایس ویلے ملک دی تیرہ سیاسی پارٹیاں اقتدار وچ نیں۔ ایس لئی اوہناں دے مل بیٹھن وچ کوئی رکاوٹ پیش نہیں آنی چاہیدی اے۔ اقتدار توں باہر پی ٹی آئی تے جماعت اسلامی قابل ذکر نیں۔دوجی سیاسی تے مذہبی پارٹیاں دی وی اپنی جگہ اہمیت مسلمہ اے لیکن جے کوئی شخص کوشش کرے کہ اوہناں ساری پارٹیاں نوں اک پلیٹ فارم اتے اکٹھا کیتا جاوے تے ایہہ اک ناممکن کم ہووے گا۔ ایس لئی کہ پی ٹی آئی جدوں تک حکومت وچ رہی اوہدے سربراہ تے وزیراعظم عمران خان نے کدی اپوزیشن سیاسی جماعتاں دے نال بیٹھنا پسند نہیں کیتا’ حالانکہ لنگھے سالاں وچ ملک و قوم نوں سنگین مسائل دا سامنا کرنا پیا۔ کورونا وائرس نے وی وار کیتا۔ بھارت نے وی ایس موقع تے سرجیکل وار کیتا۔ خود عمران خان نے امریکی خط نوں اک سنگین مسئلہ قرار دتا لیکن اوہ ایہدے اتے غوروخوض لئی قومی سلامتی کونسل دے اجلاس وچ شریک نہ ہوئے۔ اقتدار وچ رہندے ہوئے تے اقتدار توں باہر آ کے وی اوہناں نے مخالف سیاسی قائدین نوں چور تے ڈاکو دا خطاب دتا تے فیر اک موقع ایسا آیا جدوں اوہناں نے فوجی قیادت نوں وی نہ بخشیا۔ اوہناں نوں وی میر جعفر تے میر صادق جئے القابات نال نوازیا۔ ایس لئی کوئی طاقت وی چاہے جنی مرضی خلوص دا مظاہرہ کرے’ عمران خان نوں باقی سیاستداناں دے نال بٹھانا ناممکنات وچوں نظر آندا اے۔ پی ٹی آئی پچھلی حکمران جماعت وی اے’ ایس ویلے اک وڈی اپوزیشن طاقت وی۔ اوہنوں شامل کیتے بغیر قومی اتفاق رائے دا سفنا شرمندہ تعبیر نہیں کیتا جا سکدا۔
پچھلے کجھ عرصے توں صدر مملکت بڑی تندہی نال حکومت تے اپوزیشن وچ مذاکرات لئی کوشاں رہے نیں لیکن اوہناں دی کوششاں بے سود ثابت ہوئیاں۔ حکومت وقت نے وی کئی واری میثاق معیشت دی گل کیتی تاہم پی ٹی آئی دے کناں اتے جوں تک نہیں رینگدی۔ ہن لے دے کے فوج دی اک طاقت ایس قدر اثرو رسوخ دی حامل اے کہ اوہ ساری پارٹیاں نوں اک جگہ بٹھا سکے مگر اتفاق دی گل اے کہ فوجی قیادت اجتماعی طور تے ایہہ فیصلہ کر چکی اے کہ سیاسی معاملات وچ دخل اندازی نہیں کرے گی۔ تے سوال ایہہ اے کہ بلی دے گلے وچ گھنٹی کون بنھے۔ یا تے خود پی ٹی آئی نوں قوم دے سنگین مسائل دا احساس و ادراک ہووے تے اوہ مذاکرات اتے آمادہ ہوجاوے۔ تاہم خدشہ ایہہ اے کہ اوہ سب توں پہلے فوری الیکشن دے مطالبے دی شرط عائد کر دیوے گی جہدے لئی نہ حکومت آمادہ اے’ نہ سیلاب دی وجہ نال ملک وچ حالات سازگار نیں۔ نہ آئین دی رو نال پارلیمنٹ دی پنج سالہ ٹرم پوری ہوئی اے۔ ایہدا مطلب ایہو نکلیا کہ نہ نومن تیل ہووے گا نہ رادھا ناچے گی۔
نواز شریف دے دور حکومت وچ وی ات گردی اپنے عروج تے سی۔ دوجے پاسے پی ٹی آئی دا دھرنا وی اپنے زوراں اتے سی۔ ایس دھرنے دے کارن چینی صدر نوں وی اپنا دورہ پاکستان منسوخ کرنا پیا۔ ایس دوران حکومت تے قومی جماعتاں ات گرداں نال مذاکرات وچ مصروف سن تے ہیلی کاپٹر مذاکرات کاراں نوں لیا تے لے جا رہے سن۔ امریکہ جے بیت اللہ محسود نوں ڈرون دا نشانہ نہ بناندا تے نہ جانے کدوں تک ات گرداں نال مذاکرات دا سلسلہ جاری رہندا مگر ایس اثنا وچ اک سنگین قومی سانحہ رونما ہویاکہ ات گرداں نے پشور دے آرمی پبلک سکول وچ ڈیڑھ سو پھل جئے بالاں نوں شہید کردتا۔
ایس دلدوز سانحے نے قومی قائدین نوں اک واری تے شدت نال احساس دوایا کہ اوہ ات گردی دے خاتمے لئی اک متفقہ ایکشن پلان بنان۔ انج ریڈ زون وچ پی ٹی آئی نوں مہینیاں توں جاری دھرنا ختم کرنا پیا تے عمران خان نے پشور دے گورنر ہائوس وچ قومی تے سیاسی تے فوجی قیادت دے نال رل بیٹھن اتے اپنی آمادگی دا اظہار کر دتا۔ میرے منہ وچ خاک’ میں نہیں کہندا کہ اک واری فیر اینا وڈا المناک قومی سانحہ رونما ہووے تاں جے قوم دے سارے طبقے آپس وچ مل بیٹھن دا فیصلہ کر سکن۔ سانحے تے روز رونما ہو رہے نیں۔ ات گردی نے فیر جڑ پھڑ لیتی اے۔ ایہہ صورتحال ایس امر دی متقاضی اے کہ قومی قیادتاں اپنے سارے باہمی سیاسی اختلافات نوں بھلا کے وسیع تر قومی مفاد وچ سرجوڑ کے بیٹھے۔ آرمی چیف جنرل عاصم منیر دی اپیل تے لبیک کہندے ہوئے معیشت تے ات گردی جئے عفریت اتے قابو پان لئی اک متفقہ لائحہ عمل بنان۔ اج سانوں اک واری فیر اک متفقہ قومی ایکشن پلان دی لوڑ اے۔ اسیں کبوتر وانگوں ایس خطرے توں اکھاں بند کر کے معیشت تے قومی سلامتی نوں درپیش خطریاں نوں نہیں ٹال سکدے۔ پاکستان بنان لئی برصغیر دے مسلماناں نے اتحاد دا مظاہرہ کیتا سی۔ اج فیر ملک نوں بچان لئی ایسے ای اتحاد دی لوڑ اے۔ سارے پاکستانی شہریاں’ جماعتاں تے اداریاں نوں اپیل اے کہ خدارا! خدا خوفی دا مظاہرہ کرو’ وطن دے وجود تے آزادی دی نعمت غیر مترقبہ دی قدر کرو۔ ہے کوئی درد مند پاکستانی شہری’ میری تے آرمی چیف دی آواز اتے کن دھرن والا۔