نویں ورھے نال جڑیاں امیداں

ڈاکٹر صغرا صدف

ذاتی تے اجتماعی حوالے نال پچھلا ورھا اک ڈرائونے خواب ورگا سی۔ اک اجیہا خواب جنہوں ویکھدے ہوئے دل ڈب جیہا گیا تے جاگن تے اکھاں نوں تعبیر دے کنڈے چننے پئے۔ جدوں دن رات اکو جہے انھیرے اوڑھ لین تے امید دا ٹمٹماندا ڈیوا وی تھک کے کسے کونے وچ بہہ جاندا اے۔ کنہوں پتہ سی 2022ء ایناں خوفناک ورھا ہووے گا جو ساڈے ورھیاں دے فخر و انبساط تے چین و قرار نوں تباہ کر کے رکھ دیوے گا۔ اسیں جو سمجھدے سی کہ اینے وسیلے’ افرادی قوت’ سونا اگلدی زمین’ معدنیات نال بھرے پہاڑ’ بل کھاندے دریا’ زرخیز زمین’ لہلہاندے کھیت تے خزانیاں نال بھرے وسیع سمندر دا مالک ملک ترقی پذیر دے حلقے چوں نکل کے ترقی یافتہ دا رتبہ کیوں حاصل نہیں کر پا رہیا۔ سانوں کیہ پتہ سی کہ ایس طرح جان دے لالے پے جان گے کہ پوری دنیا وچ ساڈے دیوالیہ ہون تے نہ ہون دے تذکرے گونجن لگن گے۔ ساڈی ہر صبح دی جبین عالمی بینک دے اگے قرضیاں دے ترلے دی ٹرے لے کے جھکی کھڑی ہووے گی۔ ساڈی ترقی پذیر معیشت مصنوعی تنفس دیاں نالیاں تے زندہ ہووے گی۔
پوری دنیا وچ پچھلے کئی ورھے کرونا دی اذیت ناک وحشتاں نال سہمے گزرے تے معاشی ابتری نے ہر ملک دے صحن وچ سنھ لائی پر ساڈے ورگے ملک زیادہ متاثر ہوئے۔ ذاتی حوالے نال 2022ء میرے لئی زندگی دا مشکل ترین ورھا سی جدوں اک انہونی بیماری یعنی آٹوامیون ہیپاٹائٹس پاروں میں 90فیصد موت دی تحویل وچ جا چکی سی۔ پر مینوں فیر واپس گھلیا گیا کجھ نامکمل تے ادھورے منصوبے مکمل کرن دا ویلا دے کے آزمائش دے اک سفر تے ٹور دتا گیا پر بیماری دوران جو بے بسی تے اذیت میرے حساس وچ رچی اوہنوں کھرچ کے کڈھنا ممکن نہیں۔ زخم بھر وی جائے تے احساس وچ ٹیساں ابھردیاں رہندیاں نیں۔ میں ایس ورھے نوں خوفناک خواب سمجھ کے بھُل جانا چاہنی آں۔ کاش میں انج کر سکاں! نویں ورھے توں بہت ساریاں توقعات بنھیاں نیں۔ اسیں اپنے آپ نوں روشنی وچ لیان لئی ملکی سطح تے اجالے دا انتظام کرنا اے۔ ہر بندے نوں اپنے حصے دا ڈیوا بالنا تے امکانات دا بوہا کھڑکانا اے۔ اسیں اشتیاق ظاہر کراں گے تے تقدیر آپ مہربان ہووے گی۔ سب توں وڈا چیلنج برآمدات ودھانا اے۔ اپنے ہنرمنداں نوں ٹاسک دینا اے۔ تعمیری تے تخلیقی راہگزر نوں آباد کرنا اے۔ ایہ کوئی بڑا اوکھا کم نہیں صرف منصوبہ بندی تے کمٹمنٹ دی ضرورت اے۔
آئو نویں ورھے دا آغاز ایس مثبت سوچ تے عمل نال کریئے کہ ساڈی ذات توں کسے نوں نقصان تے تکلیف نہ اپڑے۔ اسیں دکھ دور کرن تے سکھ دا کارن بنن والے بنیے’ ملک نوں درپیش چیلنجاں دا سامنا کرن لئی اجتماعی کاوشاں دی ضرورت اے۔ موجودہ حکومتاں جیویں تے جس طرح وی بنیاں ایہ اک وکھری بحث اے پر ایس ویلے سارے بیٹھیے تے فیصلہ کریئے کہ ایہناں نوں چلانا اے یاں نویں انتخاب وچ جانا اے۔ سیاسی استحکام ای معاشی استحکام دا ضامن ہو سکدا اے۔ اسمبلیاں وچ اک مضبوط حکومت ای اک پکی پیڈی ترقی دا زینہ ہو سکدی اے نہیں تے ایس نظام نوں کسے دی بری نظر وی لگ سکدی اے تے فیر سارے بہہ کے روندے رہن گے۔
یاد رہوے’ ایہ ملک ساڈی پچھان دا سنہری سکہ اے ایہدے بناں ساڈا تعارف مٹی ورگا اے۔ ایہدی مضبوط چھتری ساڈے سر تے سائبان بنی رہنی چاہیدی اے۔ اسیں بڑیاں قربانیاں دے چکے’ بہت کجھ برداشت کر چکے ہن سانوں تھوڑے جہے شعور نوں عمل وچ لیانا اے۔ تھوڑی سمجھداری دا مظاہرہ کرنا اے۔ ایس ورھے سانوں ہور بجلی بنان دے نال بجلی دی بچت تے وی دھیان دینا اے۔ قدرتی روشنی نال زندگی نوں جوڑنا اے۔ دھپ دیاں کرناں نوں استعمال وچ لیانا اے۔ نواں ورھا نویں امکانات تے نویاں امیداں لے کے آیا اے آئو ایہناں امیداں نوں چراغ بنا کے ترقی تے خودمختاری دے سفر دا مڈھ بنھیے۔ دوجیاں دے اگے ہتھ پھیلان دی تھاں اپنے وسیلیاں نوں استعمال وچ لیان دا آہر کریئے۔ نویں نسل دے سامنے چیلنجز رکھیے تے اوہناں نوں مقصد دے حصول دا ٹارگٹ دیئے۔ یاد رہوے نوجواناں دے کول مقصد نہ ہون تے اوہناں دی سوچ انتشار دا شکارہو کے معاشرے وچ وگاڑ پیدا کردی اے۔ عمل دی سڑک ساڈی منتظر اے آئو ترقی دے سفر دا مڈھ بنھیے’ نویں ورھے نوں سلام کریئے۔٭