زندگی دی چند روزہ داستان

طلعت عباس خان

ایمان دی کمزوری دی اک وجہ ایہ وے کہ سانوں کجھ گلاں دا پتہ اے پراسیں یقین اوس ویلے کرنے آں جدوں پانی سروں لنگھ جاندا اے مثلاً سارے جان دے نیں کہ موت دا ذائقہ چکھنا اے پر مردے دم تک ایہدے لئی تیار نہیں ہوندے۔ امام علی فرماندے نیں انسان اپنی پوری زندگی دی منصوبہ بندی وچ موت شامل نہیں کردا جے سانوں موت تے یقین ہوندا تے اسیں ہر برے کم’ کرپشن’ لٹ مار’ حق تلفی دے نال اپنے بھائیاں نوں دھوکھا نہ دیندے۔ اسیں ہن اپنی گل کرنے آں! کہنے آں کہ بنچ تے بار گڈی دے دو پہیے نیں پر ایس فارمولے نوں بنچ من دا اے بار… اکثر اوقات ایس گڈی وچ اک پہیہ ٹریکٹر تے دوجا سکوٹر دا لا کے ویلا ٹپانا پیندا اے تے اسیں سارے صرف تماشائی بنے ہونے آں۔ جے گڈی انج ای چلدی اے تے ایہدے وچ نقصان عام شہریاں’ وکیلاں تے عدالت دا ہوندا اے پر گڈی وچ سوار عام مسافر خوار ہوندے نیں اوہناں نوں انصاف نہیں ملدا’ وکیل عدالتاں وچ جان توں رک جاندذے نیں’ ہڑتالاں ہو جاندیاں نیں۔ عدلیہ دا کم ٹھپ ہو جاندا اے۔ انج کرن نال دوہاں دی ساکھ نوں نقصان تے ہوندا ای اے پر وکیل تے سائلین نوں مالی نقصان برداشت کرنا پیندا اے۔
جس ملک وچ انصاف تے پہلے توں انگلیاں اٹھ رہیاں ہون۔ کدی ججاں دی گنتی تے’ کدی انصاف دی سست رفتاری’ کدی وکیلاں دیاں ہڑتالاں دا رونا رویا جاندا اے۔ ایس طرح انصاف دے متلاشی خوار ہوندے نیں۔ ایہناں حالات وچ فراڈیے خوشیاں مناندے نیں جتھے ورھیاں توں کیساں دے فیصلے نہیں ہوندے۔ جے ہوندے نیں تے انصاف ہوندا ہویا وکھائی نہیں دیندا۔ ایہناں حالات نوں برے حالات کہیا جاوے تے غلط نہیں ہووے گا۔ سمجھ نہیں آندی کہ ایہناں حالات نوں کون ٹھیک تے کیویں کرے گا؟ اج حالت ایہ وے کہ اک پریشانی ختم نہیں ہوندی تے دوجی کھڑی ہو جاندی اے۔ بڑے گھٹ ملک اجہے نیں جتھے وکیل تالہ بندیاں کردے نیں۔ بار ایسوسی ایشنز تے بار کونسلاں دے نمائندے وکیلاں لئی اسانیاں پیدا کرن’ بنچ تے بار دے تعلقات مضبوط بنان’ وکیلاں نوں عزت و توقیر لئی وجود وچ آندے سن پر ساڈے ایتھے اکبر بار نمائندے اپنے ساتھی وکیلاں دی راہ وچ رکاوٹاں کھڑیاں کردے نیں۔ اوہناں نوں بے عزت کردے نیں’ اجہے کجھ عناصر اپنی بھکھ کڈھن لئی سامنے آندے نیں۔
اک تاثر اے کہ سپریم کورٹ بار دے وفد وچ اجہے لوکاں نوں ساتھ لے جان دا سلسلہ شروع کر رکھیا اے اوہناں دے ویزے لاندے نیں۔ انج کرن نال کجھ وکیل نمائندے پیسے تے بنا لیندے نیں پر مقدس پیشے نوں رسوا کر جاندے نیں۔ اجیہا ای حال اوہناں دا اے جو انصاف دین آندے نیں۔ کدی کدی ایہ آپ وی انصاف لین والیاں دی لائن وچ کھڑے نظر آندے نیں۔ اپنے ساتھی ججاں توں انصاف نہیں ملدا۔ وکیل تے ججاں دا کم وکھرا وکھرا اے۔ وکیل ججاں دی مدد کرن آندے نیں تاں جے قنون تے انصاف دا بول بالا تے لوکاں نوں ریلیف ملے۔ کیس سن دے ہوئے اکثر اوقات وکیل تے جج اپنی اناء دا مسئلہ بنا کے لڑ پیندے نیں۔ کیس اوتھے دا اوتھے ای پیا رہندا اے۔ نویں کیس شروع ہو جاندے نیں’ انج ساڈے توں علاوہ دنیا وچ کدھرے نہیں ہوندا۔ دوجے ملکاں وچ جدوں کوئی کسے نال ناانصافی کردا اے تے اوہنوں کہیا جاندا اے میں تینوں کورٹ لے جاواں گا۔ ایتھے صورتحال کجھ الٹی اے’ انج دیاں نوں اگلے جہان وچ اللہ ای پچھے گا۔ ایس ویلے لہور ہائیکورٹ تے وکیلاں دی وجہ نال گڈی نوں چلن وچ دشواری دکھائی دے رہی اے۔
قصہ کجھ ایس طرح دسیا جا رہیا اے۔ پنجاب بار دے اک ممبر اپنے کیس دے سلسلے وچ معزز جج دی عدالت وچ اپنی واری دا انتظار کر رہے سن۔ اک جونیئر وکیل نے بار دے اوس ممبر نوں کہیا مینوں گان لانا یاد نہیں رہیا میرا نمبر آن والا اے تسیں اپنا گان مینوں دے دیو۔ اوس ممبر نے عدالت وچ اپنا گان لاہ کے جونیئر وکیل نوں دتا۔ کہیا جاندا اے کہ جج صاحب نوں انج عدالت وچ گان بدلنا چنگا نہ لگا۔ جدوں سینئر اپنے کیس وچ کھڑا ہویا تے جج صاحب نے انج کرن تے عدالت توں اوہنوں باہر نکل جان نوں کہیا جہدے تے ایہ ممبر کمرہ عدالت توں باہر چلا گیا فیر جدوں اوہدا کیس بلایا گیا تے پیش ہویا۔ پچھیا مینوں کیوں کڈھیا گیا؟ گل گرماگرمی وچ بدل گئی۔ جج صاحب نے اوہناں نوں نوٹس تے قید دی سزا سنا دتی جہدے تے اک نویں جنگ نے جنم لیا۔ اکثر وکیل دو تن دھڑیاں وچ تقسیم رہندے نیں۔ بار وچ گروپ بندیاں تے ہوندیاں ای نیں پر ایہناں وچ وکیل بھُل جاندے نیں کہ ایہناں حالات وچ کہدے نال کھڑا ہونا بہتر اے۔ کجھ تے دوجیاں دی کندھ ڈھا دیندے نیں بھاویں اوہ آپ وی تھلے آ جان۔ سپریم کورٹ وچ ممبر بار دے کیس دی اپیل دائر سی جہنوں چیمبر وچ سنیا گیا۔ جج صاحب نے اپیل خارج کر دتی۔ کہیا جاندا اے ایہ معاملہ راولپنڈی بار دے جج دے درمیان سی جے ایہ اپیل کسے اجہے جج دے کول لائی جاندی جو کسے دوجے صوبے توں ہوندا تے رزلٹ وکھرا ہوندا۔ ہن اپیل رد ہون تے کہیا جا رہیا اے کہ دوستیاں نبھائیاں گئیاں نیں۔
جسٹس شہزاد گھیبہ صاحب دا تعلق راولپنڈی بار نال اے۔ اک زمانے وچ جدوں ایہ صدارتی امیدوار سن تے راقم سیکرٹری بار دے عہدے تے سی۔ ایس عرصے وچ کدھرے وی بدمزگی ویکھن وچ نہیں آئی۔ یقین نہیں آ رہیا کہ گان بدلن تے اوہناں نے برا منایا ہووے گا۔ کہیا ایہ جا رہیا اے کجھ مخالف قوتاں نہیں چاہندیاں کہ اوہناں نوں ترقی دتی جاوے پر ماحول نوں خراب نہ ہون دینا بنچ تے بار دوہاں دی ذمہ داری اے۔ معافی تلافی ول جاندے تے بہتر ہوندا۔ ساڈے سیاسی معاشی عدالتی مسئلیاں توں ہر کوئی پریشان اے۔ یاد رہوے نشہ ذائقہ جے چکھنا اے تے موت دا وی ذائقہ چکھنا پوے گا۔ کاش کوئی ایہ دس دیوے کہ بار الیکشن تے ججاں دی سلیکشن کیسی ہوندی اے۔ ایسے طرح ماضی دے حکمرن روز جلسیاں وچ دسدے نیں اوہناں دی حکومت کیویں گرائی گئی؟ کاش ایہ وی دس دین کہ اوہناں دی حکومت کیویں بنائی گئی؟۔٭