اک تماشا جیہا لگا اے

سعد اللہ شاہ

سحر بن کے آنکھیں کھلیں تو
حقیقت کا پورا سبق داستاں ہو گیا
یہ کیا ہے محبت میں اک شخص کی
اپنا سارا سفر رائیگاں ہو گیا
کہاں تک سنو گے زمیں سے زمیں تک
مری داستان کمال و عروج
میں پہلے حصار بدن میں رہا
پھر اسیر زماں و مکاں ہو گیا
کیہ کراں گل ای اجہی اے کہ بحرلمی ہو گئی کہ دم پر جہدا دارومدار اے کدی کدی تھوڑا جیہا تردد وی کرنا چاہیدا اے۔ تسیں خیال وچ لیائو کہ سفر بڑا لماں سی اسیں کیویں کیویں حکمراناں دا کشت کٹیا۔ اک لماں انتظار پر ہویا کیہ’ سخن دی روش نوں چھڈ کے اوہ گل کہ جہڑی ساڈے موضوع نال تعلق رکھدی اے۔ منیرنیازی نے اک ڈرامہ لکھیا سی ”قصہ دو بھراواں دا” اوہدے وچ اک بندہ کسے پنڈ دا قصد کردا اے اوہ سائیکل تے ہوندا اے راہ وچ اوہنوں اک بندہ الٹے پیراں والا نظر آندا اے جہنوں ویکھ کے اوہ سائیکل نسا دیندا اے اوہنوں نہر کنڈھے اک بندہ نظر آندا اے اوہ اوہنوں اپنے خوف دی وجہ دسدا اے اوہ بندہ اوہدے سائیکل دے پچھے بہہ جاندا اے سائیکل سوار محسوس کردا اے کہ پچھے بھار ودھ گیا اے اوہ مڑ کے ویکھدا اے تے اوہ بندہ جو پچھے بیٹھا سی اوہدیاں لماں لمیاں ہو کے پچھے جار رہیاں سن۔ سائیکل والا ڈر کے ڈگ پیندا اے تے نس جاندا اے۔ پنڈ اپڑ کے اوہ اک بندے نوں ساری واردات دسدا اے کہ کس طرح اوہنوں پہلے الٹے پیراں والا بندہ ملیا سی ایس بپتا نوں سنن والا مخاطب اپنے پیراں ول اشارا کر کے پچھدا اے کدھرے اوہدے پیر انج تے نہیں سن؟ سائیکل والا اوہدے پیر ویکھ کے بیہوش ہو جاندا اے۔
میرے پیارے قارئین کیسا لگا ایہ منیرنیازی دا ڈرامہ۔ اصل وچ ایہ چھلیڈون دا پنڈ سی تسیں پچھو گے ایہ چھیلڈ کیہ ہوندا اے؟ جناب چھیلڈ اوہ ہوندا اے جو اپنی ہیت بدل سکدا اے۔ یقینا تسیں ہن تسیں سمجھ گئے ہوو گے کہ سانوں تے 75 سالہ سفر وچ اکثر چھیلڈے ای ملے۔ مختصر ایہ کہ اک تماشا لگا ہویا اے لگدا اے جیویں سارے اکو جہے نیں یاں سارے آپس وچ مل گئے نیں۔ اوہ جو منیرنیازی نے کہیا اک دوجے دے خوف نال جڑے ہوئے نیں شہر دے مکان جو بدلنے آئے تھے اوہ آپ کیویں بدل گئے جو احتساب کرن آئے سن آپ احتساب دے قابل ہو گئے۔ مزے دی گل ایہ کہ جوکم کرن والے نیں اوہ عدالت دے حکم دے باوجود وی نہیں ہو رہے اوہو کہ توشہ خانہ دا ریکارڈ 1947ء توں منگیا گیا سی۔ پر کابینہ ڈویژن دا توشہ خانہ دا دس سالہ ریکارڈ دین توں انکار’ پتہ لگا کہ معاملہ حساس قرار دے دتا گیا۔ حساس تے ایہہ وے کہ ایہدے وچ کہڑے کہڑے پردہ نشیناں دے ناں آن گے سب کجھ تے نیلام ہو چکیا۔ زحمت وچ رحمت ایہ ہوئی کہ عمران خان دی دشمنی وچ اوہ لوک وی زیردام آئے جو ورھیاں توں تمغے اڑاندے رہے تے کھاندے رہے اوہو کہ چراغ سب کے بجھیں گے ہوا کسے کی نہیں۔ سراج الحق دی آواز تے سچ مچ نگارخانے وچ طوطی دی آواز وانگوں اے ایہدے وچ کیہ شک اے کہ ویڈیو لیکس نوں ملا کے ویکھو تے اسیں معاشی معاشرتی تے اخلاقی طور تے دیوالیہ ہو چکے۔ لطف دی گل ایہ کہ وزیراعظم دے نا ل رہن والا افسر وی لنکا ڈھان والا نکلیا۔ پر ایس افسر دی کیہ جرأت کہ اپنے آپ ایناں وڈا اقدم اٹھائے کہ پوری سیاسی برادری نوں ذلیل کرکے رکھ دیوے ایہ اداریاں دی جنگ سی اجے قیوم نظامی صاحب پچھ رہے سن کہ سیاسی میٹنگاں وچ اک فوجی ہوندا اے پر فوجیاں دی میٹنگ وچ سویلین کیوں نہیں۔ ہے معصومانہ سوال خیرخان صاحب نے اوہناں دے نال قربت کجھ زیادہ ای رکھی۔ مینوں باقی صدیقی دا شعر یاد آ رہیا اے:
اور جا جا کے تم ملو اس سے
لو سلام و پیام سے بھی گئے
سارے اپنی اپنی زندگیاں وچ لطف اٹھا رہے نیں۔ کوئی پچھن والا نہیں کہ کنہے کنہوں این آر او دتا راز افشا کرن والے اپنے پروفیشن وچ وی حقہ پانی بند کروا بیٹھے۔ نوازشریف وی باہر بیٹھے نیں اینی دلیری اوہناں وچ وی نہیں کہ آ کے وضاحت کر سکن اوہ وی این آر او نال ای آن گے۔ جہانگیر ترین قربانی دا بکرا بنا دتے گئے۔ وقت گزرن دے نال نال میڈیا نے سارا کچا چٹھا کھول کے رکھ دتا اے اک لمحے لئی ایہناں لوکاں دے کردار نوں تسیں ویکھو مثلاً نوازشریف صاحب فرما رہے نیں کہ جنیوا وچ سیلاب زدگان دی پکار پوری دنیا تک اپڑاواں گے۔ اک لمحے لئی کیہ اسیں سوچنے آں کہ محترم شہبازشریف نے اپنی جیب چوں کنی امداد دا اعلان کیتا اوہ تے کیہ کسے نے وی کوئی اقدام نہیں کیتا سگوں اوہناں دے ناں تے ارباں ڈالر اکٹھے کرن دے دعوے دار عملی طور تے کجھ وی نہیں کر سکے۔ اوتھے اوہو الخدمت ورگے ادارے’ آخری گل اوہی کہ جو سراج الحق صاحب نے کہی اے کہ ایس شدید بحران چوں نکلن دا حل صرف انتخابات ای نیں پر ایس توں پہلاں الیکشن ریفارمز ضروری نیں ٹیکنوکریٹ دی حکومت دا شوشہ کوئی حل نہیں۔ مصیبت ایہہ وے کہ پی ڈی ایم تے خاص طور تے ن لیگ نوں ہن سنبھلن لئی کجھ ویلا چاہیدا اے تے ایس توں وی وڈی مصیبت کہ جے وقت ملدا وی اے تے اوہ زیادہ برا وقت ہووے گا تے برے وقت نوں زیادہ دیر تک ٹالیا نہیں جا سکدا۔ ایہ جو قومی سلامتی دا اجلاس سدیا اے اوہ اصل وچ اپنی سلامتی دا یقین لین لئی اے۔ بس اک بے برکتی اے ایتھے دل کردا اے کہ حضرت علی دا اک قول نقل کر دیواں کہ دنیا دا آخری دور اجیہا آوے گا جدوں اسلام دا لبادہ پا لیا جاوے گا۔ کم ظرف تے کمینے عزتاں اچھالن نوں فخر دا باعث سمجھن گے ایس مقصد لئی ہزاراں لوک بھرتی کیتے گئے نیں جہناںنے گند اچھالن نوں اک مقصدبنا رکھیا اے۔ ٹرینڈ بنائے جاندے نیں تے فیر نیوٹن دے کلیے دے تحت ردعمل وی لیاندے نیں جیویں ایہ گند نال ہولی کھیڈدے نیں ہولی میں ایس لئی کہیا کہ ایہ ہولی مسلماناں دا کھیڈ نہیں۔ شہزاداحمد دا اک شعر:
ذرا سا غم ہوا اور رو دیے ہم
بڑی نازک طبیعت ہو گئی ہے