باغ اجڑ رہیا اے

مظہر برلاس

ایہ دسمبر 2000ء دی اک رات سی ایسے رات شریف خاندان اک معاہدے دے تحت سعودی عرب گیا۔ ایس روانگی توں پہلاں کئی صحافیاں دی موجودگی وچ مرحومہ بیگم کلثوم نواز نے اک مصرعہ پڑھیا۔ وقت رخصت’ ایس مصرعے دی ادائیگی دے نال ای اوہ رنجیدہ ہوئیاں تے فیر چل پئیاں۔ شریف خاندان جلاوطن ہو گیا۔ ایس توں پہلاں بھٹو خاندان وی جلاوطن ہویا سی۔ پاکستان وچ جلاوطنی دی ابتدا سکندرمرزا دی جلاوطنی توں ہوئی سی فیر ایہدے بعد کئی سیاستداناں تے حکمراناں نوں جلاوطنیاں سہنیاں پئیاں۔ جے اسیں 1980ء دے بعد دا جائزہ لیے تے ایس سلسلے وچ بھٹو خاندان دی جلاوطنی نظر آندی اے۔ 1986ء وچ بینظیر بھٹو جلاوطنی ختم کرکے پاکستان پرتیاں۔ محترمہ بینظیر بھٹو شہید نوں دوجی واری جلاوطنی اوس ویلے اختیار کرنی پئی جدوں 1997ء وچ اقتدار وچ آندے ای نوازشریف حکومت نے بینظیر بھٹو تے عرصہ حیات تنگ کیتا۔ آصف علی زرداری جیل وچ سن تے نوازشریف دے پسندیدہ سینیٹر سیف الرحمن نے بھٹو دی دھی تے زمین تنگ کر دتی اوہ مجبوراً ملک چھڈ گئیاں۔ ایس دوران پاکستانی قوم نوں آصف علی زرداری تے بینظیر بھٹو دی کرپشن دے قصے سنائے گئے۔ اوہناں دا خوب میڈیا ٹرائل ہویا۔ حکومت ہر ویلے ایہ ثابت کرن تے لگی رہندی کہ پاکستان تے حکومت کرن والے ایس خاندان نے بڑی کرپشن کیتی اے ایس سلسلے وچ ان گنت مقدمے بنائے گئے۔
وقت نے انگڑائی لئی تے پرویزمشرف اقتدار تے قابض ہو گئے۔ باراں اکتوبر 1999ء دے فوراً بعد بینظیر بھٹو نے چوہدری شہبازحسین دے توسط نال پرویزمشرف نال رابطہ کیتا پر پرویزمشرف نے پیپلزپارٹی نوں راہ دین تو ںانکار کر دتا۔ ہن احتساب دا نواں کھیڈ شروع ہویا۔ پہلا ورھا تے بڑا کامیاب رہیا پر فیر مصلحتاں کم آن لگیاں تے جنرل امجد احتساب توں وکھ ہو گئے۔ ایہدے بعد پلی بار گین دے راہ کھولن لئی اک چنیوٹی نوں چیئرمین نیب بنایا گیا پر ایس دوران پاکستانی قوم نوں ایہ دسیا جا رہیا کہ دوہاں خانداناں نے ملک لٹیا اے۔ دوہاں نے کرپشن کیتی اے’ جدوں دوہاں نوں کرپٹ کہیا گیا تے فیر دوویں میثاق جمہوریت دے ناں تے اک سیاسی اتحاد وچ اکٹھے ہو گئے۔ ایس اتحاد نے آمریت دے خلاف جدوجہد کیتی۔ سیاسی محنت رنگ لیائی تے مشرف مجبور ہو گئے۔ مجبوریاں دے ایس سفر وچ اوہناں نے دوہاں نوں این آر او دے دتا۔ جدوجہد دے دیہاڑیاں وچ دوہاں نے میثاق جمہوریت کیتا سی پر اقتدار وچ واپسی تے اوہنوں بھلا دتا۔
ہن نویں سرے توں واریاں لگ گئیاں۔ ہن لٹ مار دے نال منی لانڈرنگ دا گھنائونا کم وی ہون لگ اے۔ تریجی قوت دے طور تے عمران خان نے کرپشن دے خلاف نعرہ بلند کیتا۔ اوہناں نے ایس شدت نال نعرہ لایا کہ قوم ایس نعرے دے پچھے لگ گئی۔ ایہو نعرہ اوہناں نوں 2018ء وچ اقتدار وچ لے آیا۔ ہن فیر توں قوم نوں ایہ دسیا جان لگا کہ ایہناں دوہاں خانداناں نے اقتدار دیاں واریاں لئیاں نیں ایس دوران اوہناں نے لٹ مار دا بازار گرم کیتی رکھیا۔ اک واری فیر توں احتساب دھڑلے نال شروع ہو گیا۔ میڈیا ٹرائل وی ہویا پر نتیجہ صفر رہیا۔ ہن اقتدار توں علیحدگی دے بعد عمران خان دا موقف اے کہ اک بندے نے احتساب نہیں ہون دتا۔ ایسے بندے نے ایس ورھے دے شروع وچ این آر او ٹو دتا۔ عمران خان داخیال اے کہ پہلا این آر او دے کے پرویزمشرف نے ظلم کیتا سی تے ہن حال ای وچ ریٹائر ہون والے اک جرنیل نے ایسے ورھے دوجا این آر او دے کے بہت وڈا ظلم کیتا۔
عمران خان ہن وی کرپشن دے خلاف آواز بلند کر رہے نیں پر ایتھے ایہ سوال پیدا ہوندا ے کہ پچھلے چالھی ورھیاں وچ پاکستانی لوکاں نوں کیہ ملیا؟ اوہ لوک جہڑے اسی دی دہائی وچ چنگی بھلی حیاتی گزاردے سن ہن اوہناں لئی زندگی نال رشتہ قائم رکھنا وی اوکھا ہو گیا اے۔ رجیم چینج اپریشن دے بعد موجودہ حکومت نے مہنگائی نوں عروج دتا۔ روپے دی قدر وچ بڑی کمی ہوئی۔ ملکی معیشت تنزلی دا شکار اے۔ ایس دوران فیکٹریاں بند ہوئیاں’ بیروزگاری پھیلن لگی’ اج حالت ایہہ وے کہ لوکاں نوں تنخواہواں نہیں مل رہیاں فیکٹری دا مالک وی پریشان اے تے مزدور وی۔ پریشانی دے ایس عالم وچ دوہاں دے کول پیسے نہیں۔ بجلی تے گیس دی لوڈشیڈنگ اک پاسے ایہ مہنگی وی کر دتی گئی اے پٹرول مہنگا’آٹا مہنگا’ قصر مختصر کہ ہر چیز مہنگی ہو گئی اے۔ شاید ایہناں دیہاڑیاں لئی سرورارمان نے ایہ غزل کہی سی:
روشنی سے تیرگی تعبیر کر دی جائے گی
رنگ سے محروم ہر تصویر کر دی جائے گی
عدل کے معیار میں آ جائیں گی تبدیلیاں
بے گناہی لائقِ تعزیر کر دی جائے گی
ہر نظر کو آرزوئوں کا سمندر بخش کر
ہر زباں پر تشنگی تحریر کر دی جائے گی
دب کے رہ جائیں گے جذبوں کے اجالے ایک دن
ظلمتِ افلاس عالمگیر کر دی جائے گی
ہر کلائی ہر تمنا ہر حقیقت ہر وفا
آشنائے حلقہ زنجیر کر دی جائے گی
بانجھ ہو کر رہ گیا جس وقت دھرتی کا بدن
تب ہمارے نام یہ جاگیر کردی جائے گی
دفن کرکے اس کی بنیادوں میں انسانوں کے سر
اک مہذب شہر کی تعمیر کردی جائے گی