نواں سال ،نواں دور۔۔۔۔بدل رہیااے لہور

وزیراعلیٰ پنجاب چودھری پرویزالٰہی نے ہمیشہ مثبت تے تعمیری سیاست کیتی تے جدوں وی اوہناں نوں اقتدار ملیا اوہناں نے صوبے دے امن’ ترقی تے خوشحالی لئی بھرویں اقدامات کیتے۔ کسے نے کیہ سوہنا جملہ کہیا اے کہ مثبت تے توانا سوچ انسان نوں عروج تے منفی سوچ اوہنوں زوال ول لے جاندی اے۔ چودھری پرویزالٰہی دے ویژن تے اوہناںدی مثبت سوچ دا کمال اے کہ تعمیرو ترقی دے حوالے نال اوہناں دا حالیہ دور حکومت بے مثال نظر آندا اے تے لہور سنے پورا پنجاب خوشحالی دی راہ اتے گامزن اے۔ وزیراعلیٰ دی قیادت وچ دوجے صوبائی محکمہ جات دے نال نال لہور ڈویلپمنٹ اتھارٹی وی لہور نوں ترقی دا مرکز تے محور بنان لئی کوشاں اے۔ وزیراعلیٰ پنجاب چودھری پرویزالٰہی’ وائس چیئرمین ایل ڈی اے میاں اسلم اقبال دی زیر قیادت تے ڈائریکٹر جنرل عامر احمد خان دی زیر نگرانی ایل ڈی اے ولوں شہر دے مختلف مقامات اتے ارباں روپے دے ترقیاتی منصوبیاں اتے کم جاری اے۔ سال 2023دے شروع وچ اہم میگا پراجیکٹس شروع کیتے گئے نیں جہڑے بڑی چھیتی پایہ تکمیل تک پہنچن گے۔ 10جنوری2023نوں وزیراعلیٰ پنجاب چودھری پرویزالٰہی نے ارباں روپے دی مالیت دے تن نویں منصوبیاں دا سنگ بنیاد رکھیا۔ ایہناں منصوبیاں وچ 2ارب 33کروڑ روپے دی لاگت نال تعمیر کیتا جان والا سمن آباد موڑ انڈرپاس’66کروڑ روپے دی لاگت نال تعمیر کیتا جان والا سمن آباد کرکٹ سٹیڈیم تے 4ارب 84 کروڑ روپے دی لاگت نال تعمیر کیتا جان والا گلشن راوی ٹی جنکشن انڈر پاس تے بند روڈ بحالی جئے میگا پراجیکٹس شامل نیں۔ ایس دے علاوہ 4ارب 51کروڑ روپے دی لاگت نال مکمل ہون والے منصوبے سگیاں روڈ تا شرقپور روڈ دا چھیتی افتتاح کیتا جاوے گا تے 8 ارب 90کروڑ روپے دی لاگت نال شاہدرہ موڑ دے مقام تے ملٹی لیول فلائی اوور دا سنگ بنیاد بڑی چھیتی رکھیا جاوے گا۔ ملتان روڈ سمن آباد موڑ اتے انڈر پاس دی تعمیر اتے کل 2ارب 33کروڑ روپے دی لاگت آ رہی اے تے ایہہ چھ مہینیاں وچ پورا کیتا جاوے گا۔ انڈر پاس دی کل لمائی 400میٹر تے چوڑائی 13.2میٹر ہوویگی۔ سمن آباد موڑ ملتان روڈ دا اک بڑا مصروف ترین علاقہ اے تے ایتھے 24 گھنٹے ہلکی تے بھاری ٹریفک چلدی رہندی اے۔ ایہہ علاقہ کئی سالاں توں نظرانداز سی۔ ایتھوں لنگھن والی ٹریفک نوں لما انتظار’ لائناں تے ٹریفک جام جئے مسئلیاں دا سامنا کرنا پیندا سی۔ آلودگی’ گردوغبار دی وجہ نال صحت دے مسئلے وی پیدا ہو رہے سن۔ چنانچہ ایل ڈی اے نے ایہناں مسئلیاں دے حل لئی ایتھوں انڈر پاس تعمیر کرن دا منصوبہ بنایا۔ منصوبے توں سمن آباد’ گلشن راوی’ توحید پارک’ ملتان روڈ’ چوبرجی’ چوک یتیم خانہ تے نال جڑی دوجی آبادیاں’ تعلیمی ادارے’ ہسپتال تے صنعتاں بھرپور مستفید ہون گئیاں۔ سمن آباد کرکٹ سٹیڈیم 66کروڑ روپے دی لاگت نال تعمیر کیتا جا رہیا اے۔ ایہہ منصوبہ 6مہینیاں دی قلیل مدت وچ پورا کیتا جاوے گا۔ نوجواناں وچ کھیڈاں دا فروغ بڑا ضروری اے۔ ایس شاندار منصوبے نال کھیڈاں تے دوجی صحت مند سرگرمیاں نوں بھرواںفروغ ملے گا۔ بند روڈ دا علاقہ وی لمے عرصے توں نظرانداز سی تے ایتھوں بوہتی بھاری ٹریفک چلدی اے جہدی وجہ نال ٹریفک دے بے پناہ مسئلے نیں۔ ایہناں مسئلیاں دے حل لئی گلشن راوی ٹی جنکشن تے بند روڈ دی بحالی اتے کم شروع کیتا گیا اے۔ منصوبے اتے کل 4ارب 84 کروڑ روپے لاگت آ رہی اے تے ایہہ اٹھ مہینیاں دی مدت وچ مکمل کیتا جاوے گا۔ ایل ڈی اے ولوں چوبرجی توں سکیم موڑ تک’ ایل او ایس توں ملتان روڈ’ پونچھ روڈ’ غزالی روڈ’ قرطبہ چوک’ بابو صابو چوک تے بند روڈ تے ایہدے نال جڑی سڑکاں تے سیوریج دی توسیع تے مرمت دا کم وی تیزی نال جاری اے۔ ایہناں منصوبیاں توں شہریاں دے قیمتی وقت تے ایندھن دی بچت ہووے گی۔ایہہ ماحول دوست منصوبے وی نیں۔ ایہناں توں سموگ’شور تے آلودگی وچ وی کمی واقع ہووے گی۔ سمن آباد انڈر پاس’ سمن آباد کرکٹ سٹیڈیم تے گلشن راوی ٹی جنکشن انڈر پاس تے بند روڈ بحالی منصوبے دے سنگ بنیاد دی تقریب وچ وزیراعلیٰ پنجاب چودھری پرویزالٰہی دے نال پچھلے وفاقی وزیر حماد اظہر’ سینئر صوبائی وزیر تے وائس چیئرمین ایل ڈی اے میاں اسلم اقبال’ سیکرٹری تعمیرات و مواصلات’ سیکرٹری اطلاعات’ کمشنر لہور ڈویژن’ ڈائریکٹر جنرل ایل دی اے عامر احمد خان تے دوجے اعلیٰ حکام وی موجود سن۔ ایس موقع تے وزیراعلیٰ پنجاب چودھری پرویزالٰہی نے گل بات کردیاں کہیا کہ سمن آباد اک گنجان آباد علاقہ اے۔ لہور نوں تعمیرو ترقی دا محور تے عالمی معیار دا ترقی یافتہ شہر بنان لئی ساڈی پیش رفت جاری اے۔ لہور ڈویلپمنٹ اتھارٹی ایس سلسلے وچ شاندار خدمات سرانجام دے رہی اے۔ اوہناں نے لہور دے ماسٹر پلان دا ذکر کردیاں کہیا کہ ماسٹر پلان 2050 دے تحت لہور ڈویژن وچ مستقبل وچ تعمیراتی سرگرمیاں دا تعین ہووے گا۔ اوہناں نے کہیا کہ ماسٹر پلان 2050آن والی تن دہائیاں لئی لاہور ڈویژن دی تعمیرو ترقی دا اک روڈ میپ مہیا کرے گا۔ ماضی وچ لہور دے حقیقی مسئلے حل کرن تے توجہ نہیں دتی گئی لیکن ہن نہ صرف زیر تکمیل پراجیکٹ مکمل کیتے جا رہے نیںبلکہ 20ارب روپے دے ترقیاتی منصوبے شروع کیتے جا رہے نیں۔ وزیراعلیٰ پنجاب نے کہیا کہ سمن آباد موڑ انڈر پاس تعمیر کیتا جا رہیا اے۔ گلشن راوی ٹی جنکشن انڈر پاس تے بند روڈ دی بحالی دا کم شروع کیتا جا رہیا اے تے سمن آباد کرکٹ سٹیڈیم تعمیر کیتا جا رہیا اے تے اج ایہدا باضابطہ سنگ بنیاد رکھ دتا گیا اے۔ اوہناں نے آکھیا کہ سمن آباد ملتان روڈ دا نہایت مصروف ترین علاقہ اے تے ایتھے 24گھنٹے ہر قسم دی تریفک چالوں رہندی اے۔ افسوس دی گل ایہہ اے کہ شہر دا گنجان آباد علاقہ ہون دے باوجود ایہنوں نظرانداز کیتا گیا۔ ایتھے عوام نوں لمے انتظار تے ٹریفک جام جئے مسئلیاں دا سامنا کرنا پیندا سی جہدے توں ماحولیاتی آلودگی تے دوجے مسئلے وی پیدا ہو رہے سن۔ ایسے لئی ایتھے انڈرپاس تعمیر کیتا جا رہیا اے۔ سمن آباد انڈرپاس دو ارب تن کروڑ روپے دی لاگت نال چھ مہینیاں وچ پورا کیتا جاوے گا۔ا یس انڈرپاس نال علاقے دی محرومیاں دا خاتمہ ہووے گا تے ٹریفک دے مسئلے حل ہون گے۔ میں ایتھے نوجواناں خاص طور تے کرکٹراں نوں ایہہ خوشخبری وی سنانا چاہنا واں کہ اوہناں لئی سن آباد کرکٹ سٹیڈیم 66کروڑ روپے نال تعمیر کیتا جا رہیا اے۔
ایہہ منصوبہ چھ مہینیاں وچ پورا کیتا جاوے گا۔ کرٹ گرائونڈ بنن نال نوجوان کھیڈاریاں نوں اپنے ٹیلنٹ دے اظہار دا بھرواں موقع ملے گا۔ اوہناں نے کہیا کہ ایہہ امر قابل ذکر اے کہ بند روڈ لہور دی مصروف ترین شاہراہ اے۔ سامان دی نقل و حمل لئی ایتھے بوہتی بھاری ٹریفک لنگھدی اے۔ اسیں ایہناں ٹریفک دے دیرینہ مسئلیاں دے حل لئی گلشن راوی ٹی جنکشن تے بند روڈ دی بحالی اتے کم شروع کیتا اے۔ ایس منصوبے اتے کل چار ارب 84 کروڑ روپے لاگت آوے گی تے ایہنوں اسیں اٹھ مہینیاں دی دمت وچ مکمل کر لوواں گے۔ شہر لہور دے حقیقی مسئلے حل کرن لئی ایہناں تن ڈویلپمنٹ پراجیکٹ دی تکمیل نال نہ صرف شہریاں دا قیمتی وقت بچے گا بلکہ ایندھن دی بچت وی ہووے گی۔ ہور میں ایہہ دسدا چلاں کہ حال ای وچ اسیں لہور شہر وچ شیرانوالہ فلائی اوور’ گلاب دیوی انڈر پاس تے شاہکام فلائی اوور جئے میگا پراجیکٹس ارباں روپے دی لاگت نال مکمل کیتے نیں جہڑا کہ ساڈی کارکردگی دا منہ بولدا ثبوت نیں۔ میں ایہہ وی دسنا ضروری سمجھنا واں کہ لہور وچ انڈر گرائونڈ بلیو لائن تے پرپل لائن’ ماس ٹرانزٹ پراجیکٹ نوں سالانہ ترقیاتی پروگرام وچ شامل کرن دی منظوری دی جا چکی اے جہدے توں داتا دربار تے دوجی گنجان آبادیاں نوں ائیرپورٹ نال جڑیا جاوے گا۔ میں ایہناں منصوبیاں دا آغاز کرن تے ایل ڈی اے دے ڈائریکٹر جنرل عامر احمد خان تے اوہناں دی ٹیم نوں مبارکباد پیش کرنا واں تے اوہناں دی کامیابیاں لئی دعاگو واں۔ واضح رہووے کہ کجھ مہینیاں پہلاں وزیراعلیٰ پنجاب نے ارباں روپے دی لاگت نال تعمیر ہون والے شاہکام فلائی اوور تے پاجیاں بائی پاس پراجیکٹ دا وی افتتاح کیتا سی۔