ہردن نوں شاہکار بناؤ

قاسم علی شاہ

اوہ جادوگر دے نام توں مشہور سی۔ اوہ باسکٹ بال دا گرو سی۔ اوہ گرائونڈ وچ کھیڈ دے دوران ایسی خودکش چھالاں لاندا کہ حریف ٹیم سر پھڑ کے بیٹھ جاندی۔ اوہدے کھیڈ دے انداز وچ ایسی پھرتی تے ذہانت ہوندی سی کہ سامنے والے دی نظراں دے سامنے توں بال اچک لیندا تے پلک جھکدے وچ باسکٹ گول وچ پا دیندا۔ اپنے کیرئیر وچ اوہنے بہت ساری کامیابیاں حاصل کیتیاں تے ایسے وجہ نال اوہدا شمار امریکہ دے دس وڈے کھیڈاریاں وچ ہون لگا۔1932 وچ اوہنے کوچنگ شروع کیتی تے ایس میدان وچ وی اوہدا جادو سر چڑھ کے بولن لگا۔
نویں سال لئی کجھ بہترین اصول نویں سال وچ اپنی صحت نوں پہلی ترجیح بنائو۔ اپنی خوراک دا معیار چیک کرو تے ناقص شیواں بالکل وی نہ کھائو۔ ایہدے نال نال روزانہ دی بنیاد تے ورزش لئی ویلا کڈو تے کوئی نہ کوئی جسمانی سرگرمی ضرور کرو۔
اوہ اوکلا بروئنیز باسکٹ بال ٹیم دی کوچنگ کرن لگا تے اگلے دس ورھیاں وچ اوہنے اپنی ٹیم نوں دس واری NCCAچیمپئن شپ وچ کامیابی نال ہمکنار کرایا تے اوہدے مگروں اوہدی ٹیم نے باسکٹ بال کھیڈ وچ تقریباً 88ریکارڈ قائم کیتے۔
ایہہ باسکٹ بال دی تریخ دا سب توں معزز کوچ جان ووڈن سی جہدی شاندار کوچنگ صلاحیتاں پاروں اوہنوں ست واری National Coach of the Year دا ایوارڈ جد کہ پنج واری APایوارڈ نال نوازیا گیا۔ اوہ کلا انسان سی جہنوں بحیثیت کھیڈاری تے کوچ دے ہال آف فی وچ وی جگہ ملی۔ اوہ کھیڈاری توں ودھ کوچ دی حیثیت نال مشہور ہویا کیوں جے اوہ اپنی ٹیم دے سامنے کھیڈ دی تکنیک بیان کرن دے نال نال ایسے جوشیلے فقرے وی بول دیندا جہدے پاروں کھیڈاری جت لئی جان دی بازی لا دیندے۔ اپنے 29سالہ کوچنگ کیرئیر دا نچوڑ اوہنے اپنے فلسفے The Pyramid of Success وچ واضح کیتا اے۔ ایہہ انسانی رویاں تے عادتاں دا اک فریم ورک اے جہدے پاروں کامیابی یقینی ہو جاندی اے۔ ایسے فریم ورک تے اوہ اپنی ٹیم دی کوچنگ کردا تے ایسے بنیاد تے اوہ لگاتار کامیابی حاصل کردا گیا۔ کامیابی دے متعلق اوہدے فلسفے تے نظریات توں نہ صرف کھیڈ بلکہ بزنسPersonal Success تے لیڈرشپ دے میدان وچ وی بھرواں استفادہ کیتا جا رہیا اے لیکن باسکٹ بال دے ایس جادوگر تے کامیابی دے موضوع تے شاندار مہارت رکھن والے انسان دے سارے وزدم دا خلاصہ اک جملے وچ سی۔ اوہ کہندا اے جدوں میں چھوٹا سی تے مینوں میرے پیو نے کہیا سی Make each day your masterpiece اپنے ہر دن نوں شاہکار بنا دیو۔
ہر دن نوں شاہکار بنان دا فلسفہ ایس قدر کارآمد اے کہ ایہہ انسان دی ساری حیاتی نوں شاہکار بنا دیندا اے۔ ایس گل نوں ایتھے روک کے اسیں 2023ول ودھنے آں۔
تہانوں نواں سال مبارک ہووے۔ نواں سال کجھ دناں پہلاں شروع ہو چکیا تے پچھلی واری دی طرحاں ایس واری وی تسیں کجھ ارادے’ کجھ سفنے تے کجھ عزائم مقرر کر لیتے ہون گے۔ تہاڈے دل وچ ایہہ خواہش ہووے گی کہ آن والا سال میری زندگی دا اک بہترین سال تے پچھلے سالاں توں کجھ ہٹ کے ہووے۔ تہانوں مبارک ہووے کہ تسیں اک بہترین فیصلہ کیتا اے۔ ہن تسیں اگلا سال کیویں ترتیب دینا اے۔ ایہدے متعلق اج دی تحڑیر وچ کجھ اہم گلاں پیش خدمت نیں۔
تسیں جنگل تے ویکھیا ہووے گا’ نہ وی ویکھیا ہووے تے تصویر وغیرہ ویکھی ہووے گی۔ تسیں جنگل نوں ویکھو تے اوتھے ہر پاسے تہانوں ہرے بھرے تے تازگی نال بھرواں درخت ملن گے۔ جنگل وچ ایہہ سدا بہار ہریالی کیویں ہوندی اے؟ دراصل جنگل دے درختاں نوں اپنی زندگی وچ بار بار اک امتحان توں لنگھنا پیندا اے۔ ایہہ امتحان طوفانی ہواواں’ بھڑکدی اگ’ کیڑے مکوڑیاں تے دوجے خطریاں دی صورت وچ ہوندا اے۔ کدی کدھار ایسی خوفناک تے تیز ہواواں چلدیاں نیں کہ درختاں نوں اکھاڑ کے رکھ دیندیاں نیں۔ ہن جہناں درختاں دی عمر پوری ہو چکی ہوندی اے’ اوہ ڈگ جاندے نیں۔ جہناں درختاں دی شاخاں سکھ جاندیاں نیں اوہ ٹٹ جاندیاں نیں۔ ایسے طرحاں کئی واری درختاں نوں کوئی مرض لاحق ہو جاندا اے اوہناں نوں ایسا کیڑا لگ جاندا اے جہڑا اوہناں دی شاخاں نوں کھوکھلا کر دیندا اے۔ کھوکھلی شاخاں کجھ ای دناں وچ ٹٹ کے درخت توں وکھری ہو جاندیاں نیں تے ایس ساری مرحلے مگروں درخت اک نویں روپ وچ نکل آندے نیں۔ اوہ پہلے توں ودھ توانا’ خوبصورت تے ہریالی نال بھرجاندے نیں۔ جے درخت دی زندگی وچ ایہہ آزمائش تے بحران نہ ہووے تے اوہ کمزور شاخاں تے کھوکھلے تنے دے نال زندگی نہیں لنگھا سکدا۔ ایہہ قدرت دا اصول اے کہ جہڑی شے نے وی نویں روپ وچ آنا اے اوہنوں پرانا روپ چھڈنا پووے گا۔
بنیادی چیز:نویں سال لئی شارٹ ٹرم تے لانگ ٹرم گولز تیار کرن دے نال نال اک بنیادی چیز زہن وچ رکھو۔ تسیں خود نوں تبدیل کرنا اے کیوں جے اصل مقصد ای تبدیلی اے۔ تسیں پچھلے توں بہتر اوہدوں ہوو گے جدوں تسیں تبدیل ہو جائو گے۔ انقلابی تبدیلی لئی ایہہ گل لازمی اے کہ تسیں اپنے پرانے روپ نوں چھڈ دیو۔ ایہہ عمل تہانوں مشقت وچ پا سکدا اے لیکن جنگل والی مثال ذہن وچ رکھو کہ آزمائش دا مطلب ذات دا نکھار ہوندا اے۔
کتھے تبدیلی؟ تبدیلی دے متعلق تہاڈے ذہن وچ سوال ہووے گا کہ اسیں کتھے کتھے خود نوں تبدیل کریے؟ انسان دی زندگی وچ چار ایسے بنیادی ہدف نیں جہناں لئی اوہ شعوری یا لاشعوری طور تے محنت کردا اے تے دراصل ایہو اوہ اہم شیواں نیں جہڑی درست ہو جان تے انسان اپنے آپ نوں کامیاب کہلوان دا حق رکھدا اے۔
صحت:
صحت اک ایسی بے مثال نعمت اے جہڑی اک اوری رٹھ جاوے تے اوہنوں دوبارہ حاصل کرن لئی انسان وڈی توں وڈی قیمت چکان نوں وی تیار ہوندا اے۔ اسیںجے اپنی روزمرہ زندگی اتے نظر پائیے تے ساڈے کھان پین دی روٹین تے خوراک بڑی ناقص اے۔ ساڈے وچوں اکثر لوک جنک فوڈ دے شوقین نیں جہڑے کہ بذات خود کسی بیماری توں گھٹ نہیں۔ دوجی عادت حد توں ودھ کھان دی اے۔ اسیں ڈھڈ بھرن توں ودھ صرف زبان دے ذائقے تے منہ دے چٹخارے لئی کھاندے نیں۔ سانوں صحت مند خوراک تے ناقص خوراک دا پتہ نہیں تے نہ ای ایہہ پتہ اے کہ کدوں’ کیہڑے ویلے تے کنا کھانا اے۔ چنانچہ اج تہانوں نان چنے’حلیم’ سموسے تے پکوڑیاں دی دکان اتے لمی لائناں نظر آن گئیاں جد کہ جاگنگ ٹریکس خالی وکھائی دین گے۔ ایہہ اوہ عوامل اے جہڑے براہ راست ساڈی صحت اتے اثرانداز ہو رہے نیں تے ایسے وجہ نال ہر گھر وچ کوئی نہ کوئی فرد مستقل بیمار موجود اے۔ ہر کمان والے انسان دی کمائی دا اک حصہ دوائیاں اتے خرچ ہو جاندا اے لہٰذا نویں سال وچ اپنی صحت نوں ترجیح بنائو۔ اپنی خوراک دا معیار چیک کرو تے ناقص چیزاں بالکل نہ کھائو۔ اوہدے نال نال روزانہ دی بنیاد تے ورزش لئی ویلا کڈو تے کوئی نہ کوئی جسمانی سرگرمی ضرور کرو۔
معاش:
بچپن توں ای والدین بالاں دی تعلیم دی فکر شروع کر دیندے نیں۔ اوہ اپنے بالاں نوں معیاری تعلیم دواناچاہندے نیں تے ایس مقصد لئی اکثر ویلے بھاری بھرکم فیساں دی صورت وچ اپنی استطاعت توں ودھ بوجھ وی چک لیندے نیں۔ مقصد ایہو ہوندااے کہ بالاں دے نمبرز چنگے آ جان۔ اوہ اعلیٰ ڈگری حاصل کرن تے اوہدے مگروں اک شاندار نوکری۔ جد کہ زمینی حقائق دسدے نیں کہ اج ہزارراں پی ایچ ڈیز بے روزگار پھر رہے نیں۔ کیہ مطلب اے ایہدا؟ ایہدا مطلب ایہہ اے کہ والدین تے اج دی نسل ٹرینڈ دے پچھے نس رہی اے۔ جتھے لکھاں لوک پہلاں توں ای موجود ہون تے اوتھے مقابلہ وی بڑا سخت ہووے گا تے موقع ملن دا امکان وی نہ ہون دے برابر۔
نویں سال وچ ایس چیز دا عہد کرن کہ اپنے لئی نویں میدان دریافت کرنے نیں۔ اپنی قابلیت تے صلاحیت نوں نکھارنا اے۔انٹرنیٹ اتے قابل تے باصلاحیت انسان لئی رزق کمان دے ہزاراں رستے موجود نیں۔ اوہناں نوں تلاش کرو تے اپنی قابلیت دے بل بوتے اتے چنگا ذریعہ معاش اپنائو۔
تعلق/رشتے:
انسان دی زندگی وچ جے مخلص تے خیال رکھن والے لوک نہ ہون تے ہر طرحاں دی سہولتاں تے تعیشات دے باوجود اوہدی زندگی بے رونق ہووے گی۔ انسان’ انساناں دے دم نال ای زندہ اے۔ ہر انسان اک ایسے شخص دی آرزو کردا اے جہڑا اوہنوں سنے’ اوہدے نال گلاں کرے تے اوہدی خوشی غمی وچ شریک ہووے لیکن اج کل دی مصروف ترین زندگی تے سوشل میڈیا دے بے ہنگم استعمال نے رشتیاں نوں کمزور کرنا شروع کردتا اے۔ہن اک گھر وچ رہن والے لوک وی بظاہر قریب ہوندے نیں لیکن دلی طور تے اک دوجے توں کافی دور جا چکے ہوندے نیںتے ایہہ رجحان تیزی نال ودھ رہیا اے۔
نویں سال وچ کوشش کرو کہ اپنے رشتیاں نوں مضبوط بنائو جہڑاتعلق کمزور ہو چکیا اے یا کجھ مخلص لوک تہاڈے توں دور چلے گئے نیں اوہناں نوں دوبارہ اپنی زندگی وچ شامل کر لوو کیوں جے ایہو رشتے تے انسان کل تہاڈے کم آن گے تے تہانوں جذباتی طور تے مضبوط کرن گے۔
دلی سکون:
ساڈا مسئلہ ایہہ اے کہ اسیں خود نوں مادی طور تے کامیاب کرنا چاہندے نیں تے سمجھدے نیں کہ اگر ساڈے کول بہت سارا پیسہ ہووے’ قیمتی گڈی تے گھر ہووے تے اوہناں پاروں سانوں خوشی تے سکون مل جاوے گا جد کہ ایہہ ساڈی وڈی غلط فہمی ہوندی اے کیوں جے زندگی بھر دی محنت مگروں جدوں اسیں اپنی خواہش دے مطابق چیزاں حاصل کر لینے آں تے اوہدے مگروں وی اسیں خوش نہیں ہوندے۔ سب کجھ ہون دے باوجود وی لگدا اے کہ کجھ کمی اے۔ اوہدی کیہ وجہ اے؟ دراصل اسیں جے ایس ویلے زندہ واں تے اوہ روح پاروں نیں تے جدوں اسیں مادیت دے پچھے نسدے نسدے روح نوں بالکل ای نظرانداز کر دینے آں تے اوہ کمزور ہونا شروع ہو جاندی اے۔ جیویں جیویں زوہ کمزور ہوندی اے انج انج ساڈے اندر بے چینی وی ودھدی جاندی اے۔ اسیں بے سکونی تے اضطراب دا شکار ہو جانے آں تے فیر ساڈے کول مادی شیواں کنی ای بوہتی کیوں نہ ہون’ ایہہ سانوں سکون نہیں دے سکدیاں۔ ایس لئی روح نوں خوراک دینا بہت ضروری اے تے ایہدی خوراک اللہ دا ذکر تے خواہشاں نوں گھٹ کرنا اے۔ ایس نویں سال وچ اپنے رب دے نال اپنا تعلق مضبوط کرو۔ خود نوں روحانی طور تے طاقتور بنائو۔ تسیں روحانی طور تے جے مضبوط ہوو گے تے فیر زندگی وچ جنی وی وڈی آزمائش تے بحران آ جاوے تہاڈے پیر نہیں ڈگمگان گے۔ تسیں ہر حالت وچ پرسکون تے مطمئن رہوو گے۔
استقامت:
یاد رکھو کہ تبدیلی لئی استقامت بڑی ضروری اے۔ تحقیق دسدی اے کہ نویں سال دی آمد تے لوک بڑے جوش و جذبے دے نال پلاننگ کر لیندے نیں لیکن 90توں 95فیصد لوک 15جنوری مگروں واپس اپنی پرانی ڈگر اتے آ جاندے نیں۔ ہن سوال ایہہ اے کہ اپنے اندر استقامت کیویں پیدا کیتی جاوے تاں جے اسیں اپنے لئی جہڑی پلاننگ کیتی اوہدے اتے لگاتار عمل کریے تے خود نوں بہتر بنائیے۔
تحریر دے شروع وچ جان ووڈن دا اک جملہ نقل کیتا سی کہ اپنے ہر دن نوں شاہکار بنانا اے۔ ایسے سوچ نون ہر پل ذہن وچ رکھو۔ ایہہ تہاڈے جذبیاں نوں تحریک دیوے گی۔ ایہہ تہانوں موٹیویٹ کرے گی تے تہانوں سوچن تے مجبور کرے گی کہ اپنے ہر دن نوں کیویں اک شاہکار دن بنانا اے۔ تہاڈا اک دن جے ٹھیک ہوندا اے تے ایس طرحاں کردے کردے اک ہفتہ ٹھیک ہو جاوے گا۔ ایسے طرحاں اک مہینہ’ اک سال تے اوہدے مگروں پوری زندگی شاہکار بن جاوے گی۔ استقامت لئی دوجی ٹپ ایہہ اے کہ جو وی کم کرو اوہدیوچ اپنی ساری توانائیاں صرف کر دیو۔ اوہنوں اپنا دی بیسٹ دے دیو تے ایس انداز وچ پوری کرو کہ کم نوں فخر ہووے کہ تسیں اوہنوں پورا کیتا اے۔ تیجی ٹپ ایہہ اے کہ اپنے کم وچ معاوضے توں ودھ محنت کرو۔
تہاڈا نفس تہانوں ورغلا سکدا اے کہ جدوں اک چیز دا معاوضہ ای نہیں مل رہیا تے فیر اینی خواری دی لوڑ کیہ اے لیکن تسیں ایہدے اتے دھیان نہیں دینا تے ایہہ گل ذہن وچ رکھنی اے کہ تسیں جہڑی محنت کر رہے او اوہدا صلہ مستقبل وچ ضرور تہانوں ملن والا اے۔ جدوں تسیں اپنے ہر کم وچ دی بیسٹ دیو گے تے اوہدے پاروں تہانوں کم کرن دا مزہ آوے گا تے تہاڈے لئی ترقی دے رستے کھلدے جان گے۔