موروثی سیاست دے نتیجے تے قومی ذمہ داریاں

میاں نوازشریف مسلم لیگ (ن) تے بدستور مضبوط گرفت رکھدے نیں حالاں کہ اوہناں دے کول ایس پارٹی دا کوئی عہدہ نہیں۔ اج تک دی قنونی پوزیشن ایہہ وے کہ اوہ مسلم لیگ دے صدر بن سکدے نیں تے نہ ای انتخابات وچ حصہ لے سکدے نیں ایس لئی اوہ وزیراعظم وی نہیں بن سکدے پر اوہ بادشاہ گر ضرور نیں جہنوں چاہن وزیراعظم بنوا دین جہنوں چاہن وزیر مشیر تے پارٹی عہدہ صدارت سمیت دے دین۔ کل ای مریم نوازشریف صاحبہ نوں مسلم لیگ ن دے نائب صدر توں سینئر نائب صدر بنا دتا گیا اے۔ پارٹی نوں آرگنائز کرن دی ذمہ داری وی اوہناں نوں دتی گئی اے۔ جس طرح مریم نواز نوں پارٹی وچ پروموٹ کیتا گیا اے انج ای دوجی پارٹیاں وچ وی خاندان دے زیراثر رکھن دی روایت اے۔ ایہنوں موروثیت کہیا جاندا اے۔ میں ذاتی طور تے سمجھنا واں کہ جے سیاستدان دی اولاد واقعی اہلیت تے قابلیت رکھدی اے تے اوہنوں سیاست وچ ضرور آنا چاہیدا اے۔ امریکہ وچ وی اک صدر دا بیٹا صدر بن جاندا اے پر ہر صدر دا بیٹا نہ تے سیاستدان ہوندا اے نہ ای صدر بن سکدا اے۔ ساڈے ایتھے ہر سیاستدان دی اولاد دے گلے وچ سیاست دا ڈھول پانا لازم ہو چکیا اے۔ کوئی بینظیر بھٹو وانگوں لائق تے ہونہار ہووے یاں فیر اج دی بہت ساری وگڑی اولاداں وانگوں کھلنڈرا’ نابکار تے نالائق ہووے۔ کجھ تے صرف دولت دے ڈھیر لان لئی سیاستدان بن جاندے نیں۔ موروثیت کس پارٹی وچ نہیں؟ پیپلزپارٹی’ ن لیگ’ اے این پی’ بی این پی’ جے یو آئی’ جمہوری وطن پارٹی’ پختونخوا ملی عوامی پارٹی’ مسلم لیگ ق وغیرہ وغیرہ جے کوئی پارٹی موروثیت توں ہن تک محفوظ اے تے اوہ جماعت اسلامی’ پی ٹی آئی’ پاکستان عوامی پارٹی تے پنجاب نیشنل پارٹی اے۔
عموماً کہیا جاندا اے کہ ڈاکٹر دا بیٹا ڈاکٹر’ انجینئر دا بیٹا انجینئر’ سائنسدان دا بیٹا سائنسدان’ پائلٹ دا بیٹا پائلٹ’ ٹیچر دا بیٹا ٹیچر’ تاجر دا بیٹا تاجر بن سکدا اے تے سیاستدان دا بیٹا سیاستدان کیوں نہیں بن سکدا۔ کجھ لوک تے کہندے نیں کہ جنرل دا بیٹا جنرل بن سکدا اے تے سیاستدان دا بیٹا یاں بیٹی سیاستدان وی بن سکدے نیں۔ ڈاکٹر’ انجینئر’ ٹیچر بنن لئی اک تعلیمی معیار تے کرائیٹیریا اے۔ جنرل دا بیٹا ڈائریکٹ جنرل نہیں بن سکدا۔ اوہنوں گریجویشن دے بعد اوکھے ٹیسٹاں چوں گزرنا پیندا اے فیر کئی ورھے دی ٹریننگ اے تے جنرل بنن تک کئی دہائیاں لگدیاں نیں۔ ڈاکٹر’ انجینئر’ سائنس دان تے ٹیچر بنن لئی وی تعلیمی معیار مقرر اے پر سیاستدان بنن لئی کیہ معیار اے’ کیہ کوالیفکیشن اے۔ پکوڑے بنان والا’ ڈھابا چلان والا سیاست وچ آ سکدا اے۔ ساڈے وڈے سیاستداناں دی اولاد دی تے تعلیم وی ادھوری رہ جاندی اے۔
پاکستان ترقی دیاں منزلاں صرف ایس لئی ای طے نہیں کر پا رہیا کہ جمہوریت وچ شفافیت نہیں۔ پڑھے لکھے لوکاں دی سیاست وچ حوصلہ افزائی نہیں کیتی جاندی۔ جنرل مشرف دے دور وچ بھاویں اسمبلی وچ جان دا اک تعلیمی معیار نیک نیتی نال مقرر نہیں کیتا گیا سی پر اک معیار تے مقرر کر دتا گیا سی۔ مشرف نے ایہ معیار نوابزادہ نصراللہ خان نوں اسمبلی توں باہر رکھن لئی مقرر کیتا سی۔ اوہ گریجویٹ نہیں سن۔ بہرحال قومی تے صوبائی اسمبلی دا الیکشن لڑن لئی تعلیم نوں ضروری قرار دتا گیا تے ایہدے نال پڑھے لکھے لوکاں دے سیاست وچ آن دی امید پیدا ہوئی پر ایس معاملے وچ وی دھوکھا ہون لگ پیا۔ جعلسازاں دی کھیپ جعلی ڈگریاں بنوا کے اسمبلیاں وچ آن لگی پر ایہ وی حقیقت اے کہ پڑھے لکھے لوکاں دے اسمبلیاں وچ جان دا رجحان تے ودھیا سی پر ایہ وی قابل قبول نہ ٹھہریا۔ مشرف قنون تے ایہ وی بنا گئے سن کہ وزیراعظم صرف دو واری ای کوئی بندہ بن سکدا اے۔ ایس قنون دے تحت میاں نوازشریف تریجی واری وزیراعظم نہیں سن بن سکدے۔ زرداری صاحب دی گریجویشن نہیں سی ایس لئی دوہاں نے اک دوجے تے احسان کیتا’ گریجویشن تے تریجی واری وزیراعظم نہ بنن دے قنون نوں 18 ویں ترمیم راہیں ختم کر دتا گیا۔
دوستو! جنرل مشرف دی نیت تے شک تے کیتا جا سکدا اے پر اوہناں نے پارٹی وچ خاندانی تے موروثی سیاست نوں جدوں ختم کرنا چاہیا تے ان گنت لوک جہناں نوں میں آپ بڑا پڑھا لکھا سمجھدا سی اوہ ننگے ہو گئے۔ خاص طور تے جنوبی پنجاب تے سندھ دے ان گنت امرائ’ مخدوم’ لغاری’ مزاری’ تالپور تے ان گنت چوہدری وی ایس قنون دی زد وچ آ گئے۔ جہناں وچ نہ صرف نوابزادہ نصراللہ خان سگوں حامدناصر چٹھہ’ غلام مصطفی کھر تے بیگم عابدہ حسین دے بارے بھید کھلیا کہ ایہ لوک انگلینڈ دے سکول وچ پڑھے تے ضرور نیں پر ایہناں دی گریجویشن مکمل نہیں تے اوس ویلے دے سروے دے مطابق پاکستان وچ گریجویٹس دی گنتی صرف 1.3فیصد سی یعنی سو وچوں صرف ڈیڑھ فیصد لوک گریجوایٹس سن تے مشرف دور وچ ہون والے دوویں الیکشن وچ ایہ طبقہ الیکشن وچ حصہ نہ لے کے سیاست وچ بڑا پچھے رہ گیا تے مجبوراً ایہناں نوں اپنیاں اولاداں تے قریبی رشتے داراں نوں اگے لیانا پے گیا تے ایہناں نابلداں دے سیاست وچ آن نال پاکستان دی مجموعی سیاست’ معیشت تے اخلاقیات تے ان گنت منفی اثرات پئے۔ دوستو ایہناں سارے حالات تے واقعات نوں سامنے رکھدے ہوئے ایہ گل حتمی طور تے کہی جا سکدی اے کہ جدوں تک پاکستان دے لوکاں نوں ایجوکیٹ نہیں کیتا جاوے گا نہ تے عمران خان یاں کوئی ہور سیاسی پہلوان ایہ معاشرہ سدھار سکدا اے تے نہ ای ایہناں نوں بہتر قوم بنا سکدا اے کیوں جے اک بہتر قوم بنن لئی معاشرے دے ہر بندے دا پڑھا لکھا تے باشعور ہونا لازمی اے۔٭