مہنگائی تے بہانے

سعد اللہ شاہ

صد حیف سب سحاب بھی ثابت ہوئے سراب
پلکوں پہ دھل کے آ گئے سارے ہمارے خواب
ہم کتنے خوش گمان تھے آ جا کے یہ کھلا
گلدان میں تھے آپ کے سب کاغذی گلاب
ساریاں کول بس دعوے تے وعدے ای نیں کارکردگی تے ہن وی کدھرے نظرنہیں آ رہی حیرت اے ایس بیان تے کہ کوئی ایہ کہوے کہ مہنگائی مہنگائی دا رولا پا کے کوئی اپنے کرتوت نہیں چھپا سکدا۔ میں کسے دے کرتوت نوں ڈیفنڈ نہیں کر رہیا پر ایہ جو مہنگائی اے کیہ ایہ معاشی قتل نہیں۔ پی ڈی ایم دی حکومت ایسے مہنگائی نوں ختم کرن لئی آئی سی۔ اوہناں نوں نو دس مہینے گزارن دے بعد اجے ایناں ای پتہ لگا اے کہ مہنگائی اپنے عروج اُتے اے۔ سیلاب دے حوالے نال وی اوہناں نوں ہن پتہ لگ رہیا اے کہ بحالی لئی کئی سو ارب چاہیدے نیں۔ ہر کسے نوں حکومت وچ آ کے ای پتہ لگدا اے کہ حالات بڑے ماڑے نیں۔ ہمیشہ جان والے آن والیاں لئی مسئلے پیدا کر کے ای جاندے نیں۔ وزیراعظم فرماندے نیں کہ اوہناں نوں سوچ سوچ کے رات نوں نیندر نہیں آندی۔ انج وی اوہناں نوں نیندر نہیں آندی۔ مشہور اے کہ اوہ نہ سوندے نیں نہ سون دیندے نیں۔ چلو چنگا اے کہ اوہ جنیوا وچ ڈونر کانفرنس چیئر کرن جا رہے نیں۔ دوجے پاسے مینوں اک معاملے تے ہر صورت گل کرنی ہووے گی کہ سوشل میڈیا تے پھیلائے گئے گند نوں صاف کرنا ہووے گا۔
ناکردہ گناہوں کی بھی حسرت کی ملے داد
یا رباگر ان کردہ گناہوں کی سزا ہے
ہن آنے آں فیر مہنگائی ول کہ شہبازشریف سون یاں نہ سون سونا ضرور مہنگا ہو رہیا اے تے لوکاں دا سونا اوکھا ہو گیا اے۔ چلو سونے نوں چھڈو کہ ایہ عام لوکاں دا مسئلہ ای نہیں کہ اوہناں نوں تے آٹے دال دے لالے پئے ہوئے نیں۔ تسیں مرغی ویکھ لوو کہ پنج سو روپیے فی کلو توں ودھ گئی اے تے ایس مہنگائی دا حل ایس حکومت دے کول وی اوہو جو پہلے حکومت دے کول سی۔ وزیر خوراک فرماندے نیں کہ برائلر کھانا چھڈ دیو پچھلے وی ایہو کہندے سن دو روٹی دی تھاں اک کھائو۔ چینی چھڈ دیو کہ شوگر کردی اے فیر ایہناں برائلر دی فیڈ دے حوالے نال لیکچر دتے یاں دلائے جا رہے نیں کہ اوہ مرغیاں زہر کھاندیاں نیں جہدے اثرات کھان والیاں وچ وی آن گے۔ دالاں وی تے بڑیاں مہنگیاں نیں ہاں سبزیاں اوہ وی کجھ سستیاں نیں تے صحت مند رہن لئی سبزیاں ابال کے کھان دی عادت پائی جاوے ایہ مسالہ جات تے گھیو تے دل لئی مضر رساں نیں۔ حکومت نوں چاہیدا اے کہ ایہدے تے سیمینار کرے تے پی ٹی وی تے سرکاری پروگرام کروائے پر پی ٹی وی تے کوئی ویکھدا نہیں چینی دے خلاف وی ڈاکٹراں توں پروگرام کروائے جا سکدے نیں پر ذرا گھٹ کہ کدھرے چینی ناراض نہ ہو جان جہڑے سی پیک دے حوالے نال پہلے ای ناراض نیں۔ انج کھانے لئی صرف ہوا ای بچدی اے تے اوہ وی صاف نہیں۔ آئو ذرا تازہ ہوا کھائیے:
ہے ہوا میں شراب کی تاثیر
بادہ نوشی ہے بادہ پیمائی
سبزہ و گل کے دیکھنے کے لئے
چشم نرگس کو دی ہے بینائی
جو وی راہ کدھرے گواچ گیا اے منزل دا تے تذکرہ ای نہیں اُتوں دھند اجہی اتری ہوئی اے کہ بس راہ وکھان والے آپ ای کھو چکے نیں۔ ایویں ای بلھے شاہ دا شعر سامنے آ گیا۔
ملاں تے مسالچی دوویں اکو چت
لوکاں کردے چاننا آپ ہنیرے نت
پر اوہ جہڑے مسالچی وی نہیں تے رہنما وی نہیں۔ اوہناں دے سامنے کمائی دا اک اڈا ا اے اوہو اوہناں دی منزل اے ایہ چور ڈاکو تے حرص و ہوس دے مارے ہوئے واری واری آندے نیں۔ خزانہ خالی کردے نیں فیر چلے جاندے نیں۔ خزانہ غریب لوکاں دی کمائی نال تے بیرونی قرضیاں نال بھریا جاندا اے۔ ریاض روبی دا شعر:
اپنی گٹھڑی خود اٹھانا ہے اسے بھاری نہ کر
ہم نفس بازار سے اتنی خریداری نہ کر
صورتحال بڑی چنتاجوگ اے۔ دو وڈے پہلوان اکھاڑے وچ اترے ہوئے نیں ایہ وکھری گل کہ دوویں ایس ویلے اقتدار وچ نہیں باقی پہلوان ایس لڑائی تے خوش نیں عوام تے جیویں لاتعلق ہو چکے نیں کہ اوہ کیہ کرن اوہ تے شاید ددھ وی چھڈ چکے پہلاں تے ملدا ای نہیں کہ سب کیمیکل دے کمالات نیں جے تسیں تردد کرو تے آپ کاوش کرو تے دو سو روپیے کلو اے ہن تے گوالا آپ پچھدا اے کہ پانی والا چاہیدا اے یاں خالص۔ واقعتاً اوہ کناں ایماندار ہو گیا اے دس کے ددھ ویچدا اے گلیاں وچ تے چھ سو روپیے کلو مکھن تے گھیو وی وکدا اے۔ پتہ نہیں اوہ کیہ ویچ رہے نیں ایتھے تے سب کجھ وکدا اے وفاداریاں تک وکدیاں نیں انج کیسے مزے دی گل اے کہ جو وفادار نہیں ہوندا وفا وی اوہدی وکدی اے وفادار تے تے کوئی لائن وی نہیں ماردا۔ اج کل تے متحدہ والے وی لکڑیاں دے گٹھڑ وانگوں اکٹھے ہو رہے نیں کہ ناانصافی نال اوہ کوڑی دے نہیں رہ گئے متحد ہون دا تذکرہ نہیں متحدہ بنن تے زور اے۔ انج تے پی ڈی ایم وی اک متحدہ ای اے کہ کنیاں پارٹیاں اک دوجے دے مفادات دا تحفظ کر رہیاں نیں کہ ونڈ کے کھائو تے مل کے کھائو۔ ایہناں ساریاں دے کول برباد کرن لئی اپنا علاقہ اے غور کرو تے اوہو انگریزاں والا نظام کہ لڑائی ختم کرن لئی لوکاں چوں غدار لبھ لئے جان تے اوہناں نوں اپنا آلہ کار بنا لیا جاوے۔ ہن وی طاقت دے مرکز کدھرے ہور نیں۔ ایہو وجہ اے کہ نوازشریف سیر کر رہے نیں واپس نہیں آ رہے۔ اک واری اک کڑی پلاسٹک دے سپ نوں چھوندے ہوئے ڈر رہی سی تے کہندی جاندی سی مینوں پتہ اے ایہ سپ پلاسٹک دا اے پر فیر وی کیہ پتہ ہوندا اے اپنی حکومت وچ وی اوہ نہیں آ سکے دوجیاں دی حکومت وچ کیویں رہ سکدے سن۔ پتہ نہیں شہبازشریف تے ایس مصرع دی تفسیر نیں۔
ملو جو ہم سے تو مل لو کہ ہم بہ نوک گیاہ
مثال قطرہ شبنم رہے رہے نہ رہے