2022ء دا کامیاب ترین نوجوان پنجابی شاعرمحمد نوید قلندری

محمد نوید قلندری 2 جون1992ء نوں سمن آباد لاہور وچ پیدا ہوئے۔ایہناں دے والددا ناں محمد شریف اے تے ایہناں دے استاد ملک دے نامورشاعر و ثناخوان الحاج محمد اکرم قلندری نیں۔ایہناں نے میٹرک تک تعلیم گورنمنٹ اسلامیہ ہائی سکول سمن آباد توں حاصل کیتی۔ گورنمنٹ اسلامیہ کالج سول لائنز لاہور توں ایف اے دا امتحان پاس کیتا تے گریجوایشن دی ڈگری پرائیویٹ طورتے امتحان دے کے حاصل کیتی۔ گورنمنٹ ایم اے او کالج لاہور توں 2015 ء وچ ریگولر ایم اے اردو کیتاتے 2019 وچ پنجاب یونیورسٹی توں پرائیویٹ طورتے ایم اے پنجابی کیتا۔ ایہناں نے اِک کمپیوٹر ڈپلومہ وی کیتا ہویا اے تے گورمکھی سمیت تِن چار زباناںدے بہترین کمپوزروی نیں۔ اس وقت پنجاب آئی بورڈ دے اِک پراجیکٹ وچ اپنی ڈیوٹی سرانجام دے رہے نیں۔
ایہناں نے اپنی شاعری دا آغاز پنجابی نعتیہ کلام توں کیتا تے فیر پنجابی تے اردو دونواں زباناں وچ حمد، نعت، منقبت، مدح، نظم، غزل،گیت، مسدس، رباعی وغیرہ وچ طبع ازمائی کیتی۔2021ء وچ ایہناں دی پہلی پنجابی شاعری دی کتاب ”پیار دی کھیڈ” منظر عام تے آئی۔ایہہ نظماں، غزلاں تے چومصرعیاں تے مشتمل 160 صفحیاں دی کتاب اے۔
”پیار دی کھیڈ” کتاب دا دیباچہ نوید قلندری دے اُستاد محمد اکرم قلندری ہوراں لکھیا۔ ڈاکٹر ایم ابرار ہوراں ”منزلاں دا شاعر” دے سرناویں توں مضمون لکھیا تے زاہد بخاری ہوراںنیں وی کتاب بارے بڑی بھرویں گل کیتی۔ کتاب دے فلیپ مہان پنجابی شخصیات ڈاکٹر محمدیونس احقر تے پروفیسر عاشق راحیل ہوراںلکھے۔ ایس توں علاوہ ڈاکٹر محمد ایوب، ڈاکٹر اکبر علی غازی، ڈاکٹر احسان اللہ طاہر، ڈاکٹرمشرف حسین انجم تے عقیل شافی ہوراں نیں کتاب بارے اپنے سوہنے وچار سانجھے کیتے۔ڈاکٹر احسان اللہ طاہر کتاب دا موضوعاتی ویروا کردیاں ہوئیاں انج آکھدے نیں:
”نوید قلندری ہوراں نظماں توں اڈ جیہڑیاں غزلاں تے کجھ گیت لکھے نیں اوہناں وچ اوہدا انداز اِک نویں شاعر تے منڈیاں والا نہیں سگو اِک سیانے بیانے تے حیاتی نوں سمجھن تے جانن والے شاعر والا اے۔ اوہدی پہلی کتاب پنجابی زبان وچ آئی اے۔ اوہنوںپنجابی نال عشق اے تے اوہ ایس زبان دی سیوا کرن دا جذبہ لے کے ایس میدانے آیا اے۔ اوہ کھل کے آکھدا اے کہ:
کسے نوں چنگی لگے نہ پر
میں تے بولاں گا پنجابی
ایسے طرحاںفیصل آباد دی معروف ادبی شخصیت ڈاکٹر محمد ایوب ہوراںوی ”دھرتی نال سانجھ دسن والا شاعر” دے سرناویں توںکتاب بارے اپنے وچار سانجھے کیتے۔ ڈاکٹر صاحب آکھدے نیں کہ محمد نوید قلندری نے کوتا کوئی منورنجن لئی ای نہیں لکھی سگوں ایس راہیں لوکائی نوں مت دیاں گلاں دس کے اوہناں دے جیون نوں سوکھا بناون دا جتن وی کیتا اے۔ ایہہ کم اوہو کرسکدا اے جو حساس سوچ دا مالک تے اپنے من اندر سماج دھاردا جذبہ رکھدا ہوئے۔
”پیاردی کھیڈ”کتاب نوں منظرعام تے آئوندے نال ای کارِ خیر ادبی تنظیم گوجرانوالہ ولوں کل پاکستان کتب مقابلے وچ سلور میڈل تے سند امتیازنال نوازیا گیا۔نوید قلندری دی پہلی
کتاب نے پہلا انعام ای اُچ کوٹی دا حاصل کر کے ادب دے میدان وچ بڑی پذیرائی حاصل کیتی۔ ایس توں بعدنوید قلندری نے 2022 دے آغاز وچ
پنجابی دا اِک بہت وڈا ایوارڈ سائیں حیات پسروری ایوارڈ حاصل کیتا۔ایس نوجوان دے کم نوں ایناں سراہیا گیا کہ پنجاب دے ہر شہر چوں ایس نوں ایوارڈ دی واج پین لگ پئی۔ بلکہ ایس نے اِک دن وچ دو ادبی ایوارڈساہیوال توں مہکاں ادبی ایوارڈ تے سیالکوٹ توں سردار ادبی ایوارڈ حاصل کرکے ریکارڈ وی قائم کیتا۔باباگورونانک دی دھرتی ننکانہ شہر چوں بھیل انٹرنیشنل ادبی ایوارڈ حاصل کیتاتے جنوبی پنجاب دے شہر حاصل پور توں الوکیل کتاب ایوارڈلے کے آئے۔ بزمِ مولا شاہ ولوں مولا شاہ ایوارڈ قائدِ پنجابی تحریک الیاس گھمن ، پنجاب ہائوس دے چیئرمین مدثر اقبال بٹ تے ڈاکٹر میاں ظفرمقبول ہوراں کولوں وصول کیتا۔لاہور توں اِک ہور ایوارڈ ایف جے رائٹرز ایوارڈوی اپنے ناویں کیتا۔ گجرات دی بڑی معروف پنجابی ادبی تنظیم دل دریا پاکستان ولوں دل دریا پاکستان ایوارڈحاصل کیتا۔ شہرِ اقتدار اسلام آباد چوںانٹرنیشنل رائٹرفورم پاکستان ولوں ادب، سماج، انسانیت ایوارڈ تے ارمغانِ ادب ایوارڈ وصول کیتے۔محمد نوید قلندری نے 2022 دا آخری ایوارڈ نقیبی کاروانِ ادب فیصل آباد ولوں خدمت ایوارڈ ڈاکٹرریاض مجید تے ڈاکٹرشبیر قادری ہوراں دے مبارک ہتھاں توں وصول کیتا۔ ایہناں ایوارڈاں دے نال نال نوید قلندری نوںبہت ساریاں اعزازی سنداں نال وی نوازیا گیاجیہڑی بڑے مان دی گل اے۔عقیل شافی ہوراں کتاب بارے تبصرہ کردیاں ہوئیاں آکھیا کہ میرے خیال مطابق نوید قلندری دا پہلا شعری پراگا محمود غزنوی دے ستارویں حملے وانگ اے جنہے آئوندیاں ای ڈھیرے سارے ایوارڈ حاصل کرکے کامیابیاں دے جھنڈے گڈ دِتے نیں۔
نوید قلندری ہوریںمختلف بحراں وچ نویکلے سرناویاں راہیں شاعری کردے نیں، روایت تے جدت نوں نال نال رکھ کے بڑا سوہنا کلام لکھدے نیں۔نوید قلندری ہوراں”پیار دی کھیڈ” دے ناں توں اِک یوٹیوب چینل تے فیس بُک پیج وی بنا یا ہویااے جس تے اوہ اپنی شاعری دے نال نال مشاعریاں وچ پڑھن والے دوجے شاعراں دا کلام وی ریکارڈ کرکے چڑھا رہے نیں۔ ایہناں دا ادبی سفر صرف ”پیار دی کھیڈ” تے ای نہیں رُکیا بلکہ 2022ء وچ ایہناں دی دوجی پنجابی چومصرعیاں دی کتاب ”رنگ رنگ دے لوک” منظرعام تے آگئی اے جہدے وچ ایس گل دا وادھا اے کہ ایہہ کتاب شاہ مکھی دے نال نال گورمکھی وچ وی اے تے ایس دا گورمکھی لپی انتر محمد نوید قلندری ہوراںآپ کیتا اے۔دعا اے کہ رب سوہنا ایس نوجوان دی قلم وچ ہور زور عطا فرمائے تے ایس نوںسدا کامیابیاں نال نوازدا رہوے۔ آمین!