پِلاک ولوں منے پرمنے دانشور عکسی مفتی دی کتاب محمد اِن ماڈرن ٹائمز دا مکھ وکھالی اکٹھ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ منے پرمنے دانشور عکسی مفتی دی کتاب ”محمد ان ماڈرن ٹائمز” دی مکھ وکھالی ہوئی جہدے وچ دانشوراں’ ادیباں تے صحافیاں نے بھرویں رلت کیتی۔ اظہار خیال کرن والیاں وچ بینا جواد، پروفیسر سید احمد سعید ہمدانی، سارہ شہاب، بابا محمد یحییٰ خان، ثروت محی الدین، کامل خان ممتاز تے ڈاکٹر صغرا صدف شامل سن۔
مقررین نے کہیا کہ عکسی مفتی دی کتاب انگریزی وچ اے۔ ایہدے وچ جدیدد ور وچ اسلام تے پیغمبر اسلامۖ اتے کیتے جان والے سارے سوالاں دے جواب موجود نیں۔ ایہہ کتاب مغربی دنیا وچ اسلام دے خلاف پروپیگنڈا کرن والے نام نہاد سکالراں دے اسلام اتے لائے جان والے الزاماں دے نہایت تسلی بخش جواب نیں۔ اسلام محبت’ امن تے رواداری دا سبق دیندا اے۔ اسلام دی نظر وچ سارے انسان برابر نیں۔ کسے نوں کسے اتے کوئی فوقیت نہیں سوائے تقویٰ دے۔ زمانہ جاہلیت وچ زنانی نال کیتے جان والے ظلم توں اسلام نے نہ صرف نجات دوائی بلکہ اوہنوں اوہ مقام تے مرتبہ عطا کیتا جہدا کدی کسے نے سوچیا وی نہیں سی۔ موجودہ دور وچ بطور مسلمان ساڈی ذمہ واری اے کہ اسیں اپنے اخلاق تے کردار نال لوکاں نوں اسلام وَل راغب کریے۔ اسلام مکمل ضابطہ حیات اے ایہدے اتے عمل کر کے نہ صرف اسیں آخرت وچ انعامات دے مستحق ٹھہراں گے بلکہ ساڈی دنیاوی زندگی وچ وی توازن تے سکون پیدا ہووے گا۔
عکسی مفتی نے اپنی کتاب دے حوالے نال تبصرہ کردیاں کہیا کہ میں کوئی مذہبی سکالر نہیں واں نہ ای ایسی کتاب لکھن دا میرا کوئی ارادہ سی۔ انٹرنیٹ اتے میں اسلام تے حضورۖ دے خلاف مغربی دانشوراں دے نظریاں دا مطالعہ کیتا تے میں حیران رہ گیا کہ کیویں دانستہ طور تے اسلام نوں بدنام کرن دی کوشش کیتی جا رہی اے۔ بہت عرصہ انتظار کیتا کہ کوئی تے ہووے جہڑا ایہناں الزاماں دا جواب دیوے لیکن انج نہیں ہویا۔ پس پردہ کوئی طاقت سی جہڑی مینوں مجبور کررہی سی کہ ایہناں الزاماں تے سوالاں دا جواب تسیں دے سکدے او۔ اللہ دے فضل و کرم نال میں ایس کم دا بیڑہ چکیا تے ایہہ مقدسہ فریضہ پایہ تکمیل تک پہنچ گیا۔
ڈاکٹر صغریٰ صدف نے کہیا کہ ایس توں پہلاں عکسی مفتی نے کتاب ”اللہ” دی تقریب رونمائی وی پلاک وچ ای کیتی سی۔ اوہناں نے کہیا کہ اللہ تعالیٰ نے انسان نوںصرف اپنی عبادت لئی پیدا نہیں کیتا اوہدی عبادت لئی فرشتے کافی سن۔ انسان دی تخلیق دا مقصد انسانیت دی بھلائی اے جو اللہ تعالیٰ تک پہنچن لئی مخلوق خدا دا رستہ اپنادندا اے اوہ بڑی چھیتی اپنی منزل نوں پا لیندا اے۔ ساڈے پیغمبرۖ نے کہیا کہ ایس دنیا دی تن شیواں مینوں محبوب نیں :خشبو’ نماز تے عورت’ کوئی وی شخص اوس ویلے تک کامل مسلمان نہیں ہو سکدا جدوں تک اوہ اپنے گھر والیاں تے مخلوق خدا لئی چنگا نہ ہووے۔