ہُن کیہ ہووے گا؟

لوک پچھدے نیں کہ ہن کیہ ہووے گا؟ہن جے سیاستداناں دا رویہ ویکھیے تے اوہناں لئی صرف تے صرف اقتدار اہم اے لیکن جے ملک دی بہتری کسے نوں مقصود اے تے اوہدے لئی ایہہ ضروری اے کہ تن سال لئی کجھ ایسے صاحبان عقل و دانش نوں حکومت سونپ دتی جاوے جہناں دے بچے’ کاروبار تے دولت پاکستان وچ ای اے۔ جو جے ممکن ہووے تے ریاست کولوں تنخواہ وی نہ لین۔تن سال جے اوہناں سیاست داناں نوں ملن والیاں مراعات ای بچا لتیاں جان تے ملکی معیشت مضبوط ہو سکدی اے۔ جناب عمران خان دا تازہ بیان نظراں توںنگھیا اے۔ اوہ کہندے نیں کہ اسٹیبلشمنٹ اجے تک نیوٹرل نہیں ہوئی اے۔ نال ای بیان سی کہ اجے تک اوہناں دی نویں آرمی چیف نال کوئی ملاقات نہیں ہوئی اے یعنی جے نواں آرمی چیف خان صاحب نال ملاقات کرے تے پہلاں وانگوں اوہناں دی راہ توں سارے کنڈے ہٹوان وچ معاون ہون دا اعلان کرے فیر ای اسٹیبلشمنٹ نیوٹرل ہووے گی۔ ہن اک پاسے عمران خان نویں انتخابات چاہندے نیں تے دُوجے پاسے اوہناں نوں کسے وی قومی ادارے تے محکمے اتے اوس ویلے تک اعتبار نہیں اے جدوں تک اوہ کھل کے اوہناں دی حمایت وچ سامنے نہ آ جاوے۔ کراچی تے سندھ وچ بلدیاتی انتخابات وچ شکست مگروں ہونا تے ایہہ چاہیدا سی کہ تحریک انصاف اپنی کمزوریاں ول توجہ کردی لیکن اوہناں نے اپنے کپتان دے رویے نوں سامنے رکھدیاں ہوئیاں کراچی انتخابات وچ شدید دھاندلی دا شور شروع کیتا ہویا اے۔ یعنی ہن ایہہ طے اے کہ جتھے جتھے تحریک انصاف نوں شکست ہووے گی اوتھے اوتھے اوہ دھاندلی تے نیوٹرل جئی گلاں کردیاں ہوئیاں احتجاج دا وطیرہ اپنان گے۔
جناب عمران خان نوں جدوں پہلی واری کے پی کے وچ حکومت بنان دا موقع ملیا تے حکومت دے آخری سال جناب نے فرمایا سی کہ چونکہ اوہناں نوں پہلی واری حکومت ملی اے ایس لئی اوہناں نوں ٹھیک طرح معاملات چلان دی سمجھ ای نہیں آئی اے یعنی جہڑا بندا اک مدت توں ملک وچ تبدیلی دے نام تے لوکاں نوں خاص کر نوجوان نسل نوں تیار کر رہیا سی اوہنوں ایہہ ای پتہ نہیں سی کہ اقتدار مل جاوے تے ذمہ واریاں کیویں ادا کیتیاں جاندیاں نیں فیر جدوں اوہناں نوں مرکزی حکومت توں جمہوری طریقے نال رخصت کیتا گیا تے جناب نے نواں بیانیہ دینا شروع کردتا کہ اوہناں دے خلاف عالمی سازش ہوئی اے۔ اوہناں نوں ہٹان وچ جنرل قمر باجوہ تے امریکہ تے مغرب دا ہتھ اے۔ اسیں اوہناں دے ایس بیانیے نوں تسلیم کر لیندے نیں ایہدی وجہ ایہہ اے کہ بدقسمتی نال پاکستان وچ ایہہ کم اک مدت توں ہو رہیا اے حکومتاں دی تبدیلی دے پچھے بلکہ کئی واری ظاہری طور تے امریکہ دا ہتھ نظر آندا رہیا اے۔
جناب عمران خان نے دو صوبائی اسمبلیاں توڑ دتیاں نیں لیکن ہن جدوں اوہناں نے قومی اسمبلی وچ جان دا فیصلہ کیتا تے حکمران جماعت نے اوہناں نوں سرپرائز دیندے ہوئے کئی مہینیاںتوں پئے اوہناں دی جماعت دے استعفے تھوک دے حساب نال قبول کر رہی اے۔ کیہ ای چنگا ہوندا حکومت کھوہ جان مگروں جناب عمران خان جمہوری انداز اپناندے ہوئے اسمبلی وچ رہندے ہوئے عوام دا مقدمہ لڑن دی کوشش کردے لیکن اوہناں نے انج نہیں کیتا۔ اوہناں نے انج نہیں کیتا تے ہن اوہناں دے ہتھوں سب کجھ نکلدا چلیا جا رہیا اے۔ خان صاحب تواتر دے نال ایہہ تے دسدے نیں کہ اوہناں نوں حکومت توں کڈن وچ جنرل قمر باجوہ دا ہتھ اے لیکن اوہناں نوں عوام نوں ایہہ وی دسنا چاہیدا اے کہ اوہناں نوں اقتدار تک پہنچان وچ وی جنرل صاحب دی محنتاں دا بہت وڈا ہتھ سی۔ سچ بولنا اے تے پورا بولو نہیں تے چپ بہت سارے مسئلیاں تے کمزوریاں اتے پردہ پا لیندی اے۔ سیاستدان اوہو ہوندا اے جہڑا حالات تے مقابل نوں ویکھدے ہوئے اپنی بساط وچھان دی کوشش کردا اے۔جناب عمران حکومت وچ رہندے ہوئے وی پچھلے حکمراناں دے خلاف کجھ ثابت نہیں کر سکے لیکن اوہناں دی ہن وی ایہہ خواہش اے کہ پچھلے حکمراناں نوں چور منیا جاوے تے اوہناں نوں پابند سلاسل کیتا جاوے۔ کاش حکومت وچ رہندے ہوئے جناب عمران خان نظام دی بہتری لئی کوشش کردے۔ کاش جناب عمران خان جنرل قمر باجوہ نوں مدت ملازمت مکمل کرن مگروں دوبارہ نوکری وچ توسیع نہیں دیندے لیکن اوہ انج نہ کر سکے۔
ہن کیہ ہووے گا؟ لگدا اے عمران خان دے موکل اج کل اوہناں نوں صحیح خبراں نہیں پہنچا رہے نیں۔ جے اوہ اپنی حکومت ختم ہوندے ویلے اکٹھا ای ساریاں اسمبلیاں توں نکل جاندے تے شاید ایس ویلے حکمران طبقے دیاں لتاں کنب جاندیاں۔ لیکن ہن پی ڈی ایم خود نوں اسٹیبلشمنٹ دے بوہتے قریب سمجھدی اے۔ ہن حکمراناں دے انداز توں لگدا اے کہ ملک وچ چاہے کجھ وی ہووے اوہ نہ صرف حکومت دی آئینی مدت پوری کرن بلکہ کجھ مہینے مردم شماری تے دوجی اصلاحات دے نام تے ہور لے لین۔
پی ڈی ایم نوں جدوں اقتدار ملیا تے اوہناں نے بڑے زوروشور نال دسنا شروع کیتا کہ ملک دی معیشت بڑی کمزور اے فیر کافی مہنگائی کر لین مگروں وزیراعظم شہباز شریف نے ایہہ خبر دتی کہ وزیر خزانہ مفتاح اسماعیل دیاں کوششاں نال معیشت دی حالت بہتر ہو رہی اے۔ جیویں ای شہباز دی حکومت نے پیر کجھ مضبوط کیتے تے ن لیگ دے قائد جناب نواز شریف نوں یاد آیا کہ اوہناں دے سمدھی توں ودھ بہتر خزانے اتے بیٹھن والا ہور کوئی بندا نہیں اے۔ اک وزیراعظم دے جہاز وچ بیٹھ کے ملک توں باہر جان والے تے دوجے وزیراعظم دے جہاز وچ بیٹھ کے ملک تشریف لیان والے اسحاق ڈار نوں وطن واپس لیا کے وزیر خزانہ دے منصب اتے بٹھا دتا گیا۔ ڈار صاحب نے پہلی ترجیع دے طور تے اپنے خلاف مقدمات ختم کروائے اپنی املاک اتے واپس قبضہ حاصل کرنا شروع کیتا تے ملک دی صورتحال نازک دا ذمہ پچھلے حکمراناں نوں قرار دینا شروع کردتا۔
صاحبو!ساڈی ایہہ بدقسمتی اے کہ جمہوریت دے نام اتے حاصل کیتے گئے ملک وچ کدی جمہوریت پنپ نہیں سکی اے۔ ایہدی وجہ بار بار لگن والے مارشل لا وی قرار دتے جا سکدے نیں لیکن اوہدی وڈی وجہ اک ایہہ وی اے کہ ساڈے رہنماواں نوں کدی سیاست کرنی آئی ای نہیں اے۔ ساری دنیا وچ فوج اک مضبوط محکمہ سمجھیا جاندا اے۔ ہر ملک دی فوج کسی نہ کسی طرحاں ملکی معاملیاں وچ کردار ادا کردی رہندی اے۔ لیکن پاکستان وچ ہن ویلا بدل چکیا اے۔ ہن تے اک مدت توں ملک وچ جمہوری نظام چل رہیا اے لیکن ساڈے بونے سیاستدان ہن وی حکومت حاصل کرن اوہنوں چلان لئی اسٹیبلشمنٹ دے موہنڈھے تلاش کردے رہندے نیں۔ ایہدی صرف اک ای وجہ دسنی کافی اے اوہ ایہہ کہ ساڈے سیاسی رہنماواں ملکی مفاد توں ودھ اپنے مفادات تے اناواں نوں سامنے رکھدے نیں۔ ملک وچ جمہوری نظام اوسے ویلے مضبوط ہووے گا جدوں سیاسی جماعتاں وچ وی جمہوری روش اپنائی جاوے گی۔ ذوالفقار بھٹو مگروں بے نظیر’ بے نظیر مگروں بلاول ‘ نواز شریف مگروں پہلے شہباز شریف تے ہن مریم نوں جماعت دی قیادت سونپی جا رہی اے تے دوجے پاسے سٹھ ورھیاں توں ودھ عمر والے نواز شریف دے داماد مریم دے شوہر جناب صفدر صاحب نوں نوجواناں دا قائد بنایا ہویا اے یعنی ساڈی سیاسی جماعتاں نے ایہہ طے کر لیتا ہویا اے کہ پارٹی قیادت توں لے کے وزیراعظم’ وزیراعلیٰ سنے کوئی وی اہم عہدہ اپنی جماعت دے کسی دوجے بندے نوں نہیں دتاجاوے گا۔ ہن ایہہ وی ہونا چاہیدا اے کہ جیویں زنانیاں نوں اسمبلیاں وچ پہچان لئی قنون بنیا ہویا اے بالکل ایسے طرحاں اک قنون ایہہ وی بنا دتا جاوے کہ سیاسی جماعتاں وچ پارٹی دے اہم عہدے اک گھر دے دو بندیاں نوں نہیں دتے جا سکدے۔