ڈولی چڑھدیاں ماریاں ہیر چیکاں

وارث شاہ دی ہیر وچ ایہ حصا اللہ دتہ ترگڑ والے دے سودھے ہوئے نسخا قِصا ہیر رانجھا دے علاوہ کسے ہور نسخے وچ نہیں ملدا یا ںکم توں کم مینوں نہیں ملیا یا ںمیری نظر توں نہیں گزریا ۔ پہلی وار فلم ہیر رانجھا وچ نور جہان دی واج وچ جدوں ایہ بول سنے تے دل وچ کھب گئے پر اودوں میں چھیویں جماعتے پڑھدا ساں تے حالے میرا کسے ہیر نال واہ نہیں پیا سی فیر جدوں کجھ وڈیرا ہویا تے پنجابی ادبی بورڈ توں ڈاکٹر باقر ہوراں دی سودھیا ہیر رانجھا دا نسخا ویکھیا تے ایہ بیت نہ لبھے تے میں حریانی نال زاہد حسن تے بعد وچ ڈاکٹر ریاض شاہد ہوراں کولوں پچھیا پئی ایہ حصا ہیر رانجھے وچ کیوں نہیں تے اوہناں دسیا پئی وارث شاہ دی ہیر وچ کئی الحاقی شعر وی نیں جہڑے اوہناں نال منسوب نیں تے میں ایس گل دا ہور وی قائل ہو گیا پئی وڈے شاعراں دے رنگ وچ جو وی لکھیا جاوے گا اوہ اوہناں دے ناں لگن دے ڈھیر امکان نیں ۔ انج ای جویں صادق سیالکوٹی دا شعر
تندیِ بادِ مخالف سے نہ گھبرا اے عقاب
یہ تو چلتی ہے تجھے اونچا اڑانے کے لیے
ایہ شعر تے کئی ہور غلط طور تے اقبال نال منسوب ہو گئے نیں ۔
پنجابی وچ وارث شاہ ، بلھے شاہ ، شاہ حسین ، خواجا فرید تے کئی ہور وڈے شاعراں نال وی انج ہویا اے تے کئی شعر اوہناں نال منسوب کیتے گئے نیں ۔ وارث شاہ دے ایہ شعر بعد وچ پتا چلیا پئی اللہ دتہ ترگڑ آلے دی سودھی ہیر وچ ملدے نیں ۔ خیر ہن تے وارث شاہ نال منسوب اجہے الحاقی اشعار بارے تحقیق سٹے ساہنمے آ چکے نیں پر ایہ شعر مینوں عام طور تے پاکستان وچ شادیاں دے موسم وچ بہت یاد آندے نیں ۔ اوہ اس لئی پئی جدوں شادیاں دا سیزن آندا اے تے مہندی یاں بارات دا ویلا آندا اے تے ہر پاسے فائرنگ ، آتش بازی تے پٹاخے انج چلدے نیں جویں کوئی دھاڑوی کسے ملک یا علاقے نوں فتح کرن آیا اے یا ں کوئی جنگ دا میدان اے جتھے اسلحے تے ہتھیاراں نال لڑائی ہو رہی اے یا فیر کوئی ظالم کھیڑا کسے رانجھے دی ہیر نوں طاقت تے ظلم دے زور نال دھک دھگانے کھوہ کے لے جا رہیا اے ۔ممکن اے ایہ میرا وہم ہووے پر تسیں آپے سوچو پئی جے تسیں سبھ دے ساہمنے گھر آلیاں دی مرضی نال کسے دی دھی بھین نوں ویاہ کے لے جا رہے او تے فیر ایہ تڑ تڑ فائرنگ تے گولا باری دا کیہ تک بندا اے ۔ اتوں جدوں آل دو آلے وچ لوکی ستے ہون یا کوئی بیمار شیمار ہووے یا کوئی پڑھاکو پڑھ رہیا ہووے تے اچانچک گولا باری شروع ہو جاوے تے ایہدا کیہ مطلب ہو سکدا اے ؟ اتوں ڈیک یا لاڈ اسپیکر تے اچی واج وچ ادھی ادھی رات تیک گان وجان دا کیہ تک بندا اے ۔ اپنی چار دیواری وچ بھاویں جو کرو پر آل دو آلے نوں تے شور دی آلودگی تے فائرنگ تے شرلیاں پٹاخیاں نال ذلیل نہ کرو ۔ شادی ویاہ دے موقعے تے ہوائی فائرنگ نال کئی وار قیمتی جاناں ضائع ہوئیاں نیں تے کئی لوکی زخمی یاں عمر بھر لئی معذور ہوئے نیں پر اسیں فیر وی اس کم توں باز نہیں آندے ۔ جم جم شادی ویاہ کرو ، خشیاں منا پر ایہ نمایشی فائرنگ تے شور شرابا تے نہ کرو ۔ اتوں جدوں دنیا بھکھ نال تے کرونا نال مردی مردی پئی اے تسیں دیگاں چاڑھ کے تے گلی محلے وچ تنبو تان کے بازار بند کر کے ساری ساری رات ڈراما لا کے دنیا توں کیہ سنیہا دینا چاہندے او ؟ ایہو ای نہ کہ اسیں اک غیر ذمے دار ، نمائش پسند تے فضول خرچ قوم ہاں نہ کرو خدا دا ناں جے انج نہ کرو نمایش تے پیسے لاون اڈاون دی بجائے کسے ضرورت مند ضرورت پوری کرن دا سوچو تے شرلیاں پٹاخیاں تے فائرنگ دے بارود تے دھوں وچ پیسے ساڑن دی بجائے کسے چنگے کم وچ حصا پا کے اللہ تے اللہ دی مخلوق نوں راضی کر لو ۔ رب کرے اسیں قومی پدھر تے اس شعور نوں عام کرن تے اس تے عمل کرن دے قابل ہو جائیے ۔ انج کریے تے شاید کوئی وی ہیر ڈولی چڑھدیاں چیکاں نہ مارے تے کھیڑیاں دے بجائے اپنے رانجھن گھر جاندیاں ہوئیاں زور دھگانے اسلحے دی نمائش نال جاون دی بجائے عزت تے احترام نال خش خش جاون جوگی ہو جاوے ۔٭