قیصرمحمود گورایہ دا نویکلاغزل پراگا
”لُوں لُوں رچیاں پیڑاں” قیصر محمود گورایہ ہوراں دا غزل پراگا اے جہڑا ایہناں دیاں دوجیاں کتاباں توں وکھ اندازِ اسلوب رکھدا اے۔ جہدے وچ طرزِ احساس علامتی مزاج رکھدا اے۔ اشارے کنائے نال وی گل کیتی اے تے کدھرے کُھل کے اپنی فکر تے خیال نوں ایس دور دے تقاضیاں نوں پورا کر دیاں ہویاں اپنے مشاہدے تے تجربیاں راہیں شعراں وچ نویں نویں مضمون پیش کرکے ایس دور چ اپنا ناں وڈے لکھاریاں چ لکھوان لئی فکری تے فنی پختگی دا ثبوت دتا اے۔ اوہ جاندے نے جدت پسندی لفظاں نوں توڑموڑ کے پیش کرن دا ناں نہیں بلکہ اپنی ذات چوں باہر نکل کے اردگرددے ماحو ل نوں
دردمندی دے احساس نال اجاگر کرن دا ناں اے۔ جدوں پیڑاں ایہناں دے لُوں لُوں وچ رچ گئیاں تے فیر قیصرہوراں کول چپ نئیں رہیا گیا تے ایہناں زمانے دی ستم گری نوں مایوسی دے شکار ہون توں بچان واسطے اپنی تخلیقی توانائی استعمال کردیاں ہویاں ایس عہد دے منفی رویاں دی نشاندہی کیتی تے نالے مسلیاں دے حل دے لئی باشعور ذہناں دی ہمت نوں ودھان لئی نویاں راہواں دی جان کاری دتی۔ امن و امان دی خاطر استحصالی قوتاں دے خلاف ڈٹ جان دا چارہ کیتا۔
قیصر ہوراں نوں انسانی نفسیات دی رمز شناسی تے خواہشاں دا ادراک اے تاں ای تے شعراں وچ لطیف جذبے مہیا کرکے انسانی معاملات نوں زاویاں تے جہتاں نال ویکھ کے اکھراں نوں بڑی خوبصورتی نال شعراں وچ ڈھال کے دلکش انداز نال پیش کیتا۔
قیصرمحمودگورایہ ہوراں دے کئی شعر پڑھیار نوں پڑھدے ای یاد ہون والے نیں تے کئی غزلاں زندہ رہن والیاں نے۔ ”لوں لوں رچیاں پیڑاں” ایہناں دا اوہ خواب اے جہڑا حقیقت دے رستے نوں آشنا کردا وکھالی دیندا تے منزل دے قریب کردیندا اے۔ قیصر ہوراں نے سچائی نوں اپنایا تے ذہنی تے قلبی کیفیات دا معیار بلند کیتا، ایہو سچائی دا جذبہ اس کتاب چ اپنے اسلوب دی پہنچان دیندا اے ۔ایہناں دی کتاب چ محاورے تے زبان اس دور دے رجحانات دی نمائندگی کردی نظری آئوندی اے۔ ایہناں دی شاعری اقتصادی تے سماجی رویاں دے حوالے نال وکھ اضافہ کردی اے۔
مجموعی طور تے قیصر ہوراں دی شاعری اک بھرپور تاثر چھڈ دی اے تے آن والیاں نسلاں لئی مشعلِ راہ وی اے۔ ایہ کتاب پنجابی ادب وچ اک خوبصورت اضافہ اے۔ کیوں جے ایہ جذبیاں دی عکاسی کردی وکھالی دیندی اے۔ ”لوں لوں رچیاں پیڑاں” دا شاعر سچا کھرا انسان اے تے شاعری وی کھری تے سچی وکھالی دیندی اے۔ ایہوقیصر ہوراں دی کامیابی دا راز اے۔ مینوں بڑی امید اے پئی ایہناں دی ایہ کتاب قاری دے دل تے اثر کرے گی۔
