عوام تختہ مشق نیں

گل ایہہ وے کہ پرویزالٰہی نے اعتماد دا وٹ لے لیا اے شاید ایسے خوشی وچ پنجاب اسمبلی دے اندر کرسیاں چل گئیاں بہرحال اک ہنگامے تے موقوف اے گھر دی رونق نوحہ غم ہی سہی نغمہ شادی نہ سہی۔ ایہ شعر اپوزیشن دی نمائندگی کر رہیا اے۔ رند بخشے گئے قیامت کو۔ شیخ کہتا رہا حساب حساب۔ پرویزالٰہی دی ادیبانہ گل بات وی ساریاں نے سنی کہ ن لیگ والے جنج لے کے آئے سن پر ڈولی خالی گئی سگوں جھولی وی اوہ 186 ووٹ لے گئے۔ اوہناں دی مہربانی کہ اوہ زیادہ وی لے سکدے سن بس ای ہوندا اے ایہ معجزات سیاست نیں سگوں سیاست ایہنوں ای کہندے نیں کہ تسیں تلی تے سرہیوں جما کے وکھا دیو۔ ایس قضیے نوں چھنے آں تے معاملات زندگی تے آنے آں۔
پرویزالٰہی دی 1122 تے دوجے کماں دے اسیں معترف آں تے اوہ اک خاندانی بندے نیں۔ ساڈا سوال بن دا اے کہ آخر پنجاب وچ ہو کیہ رہیا اے پہلا مسئلہ تے آٹے دا اے کہ ایناں مہنگا ہو گیا اے کہ غریب دیاں چیکاں نکل گئیاں نیں۔ وفاق ایہ پراپیگنڈا کر رہیا اے کہ آٹا صوبائی معاملہ اے تے ایہ کہ ایہ مصنوعی انداز وچ آٹے دا بحران پیدا کیتا جا رہیا اے جد کہ آٹا کافی مقدار وچ موجود اے جے ایہ سچ مچ سیاست اے تے ایہ لوکاں نوں مدھ کے کیوں کیتی جا رہی اے۔ جناب پرویزالٰہی صاحب دوجے کم نہیں کر رہے کون ذمہ دار اے ظاہر اے اپنی گل دے ثبوت لئی میں اپنا مشاہدہ تے تجربہ پیش کراں گا مثلاً سردیاں وچ یقینا گیس دے مسئلے نیں کہ شارٹیج پیدا ہوندی اے تے ایہ مخصوص اوقات وچ آندی اے پر کیہ کیتا جاوے کہ ساڈے لوک وی انج ای نیں کہ کمپریسر لگا رکھے نیں۔ ایہ اک جرم اے’ پر تکلیف دہ گل ایہہ وے کہ میرے پُتراں نے اک دو نہیں پنج چھ کمپلینٹ کروائیاں کہ ساڈے گوانڈھیاں نے کمپریسر لا کے ساڈے نک وچ دم کر رکھیا اے ہر واری وعدہ کرن دے باوجود حرام اے کہ سوئی گیس دے محکمے چوں کوئی آیا ہووے ہر واری فرماندے نیں کہ تہاڈی کمپلینٹ اگے پا دتی گئی اے چوی گھنٹے وچ بندہ آوے گا پر سانوں ایہ تسلی سراسر جھوٹ لگن لگدی اے۔ دوجے پاسے گوانڈھیاں نوں سد کے وکھایا کہ جناب تہاڈا میٹر ویکھو کس رفتار نال چل رہیا اے تے ساڈا جامد و ساکت کھڑا اے اصل وچ اک کنکشن توں دو کنکشن بنائے جاندے نیں گوانڈھی تعجب دا اظہار کردے رہے پر اوہناں دی اکھاں اوہناں دی گل دا ساتھ نہیں سن دے رہیاں۔ ہن دسو اک تھاں رہنا اے تے کیہ تسیں جھگڑا کرن بہہ جائو۔ اسیں حکومت دی ترغیب تے سولر سسٹم لگوایا اوہنوں واپڈا دے نال اٹیج وی کر لیا اوہناں دی فیس وی ادا کر دتی تے ہن اہ میٹر جو آپ بجلی والے لا کے گئے نیں لائن مین کہندا اے کہ اوہنوں نیواں کرکے لگوائو تے لگان والے دی کجھ خدمت وی کر دیو۔ ذہن وچ رہے کہ میٹر آپ اوہناں نے لگوایا اے ساریاں توں اہم گل ایہہ وے کہ چار پنج مہینے توں ساڈی ریڈنگ ای نہیں آ رہی واپڈا دے دفتر جائیے تے متعلقہ بندہ نہیں ملدا ایہ وی پتہ نہیں لگدا کہ متعلقہ بندہ ہے کون۔ ایہ مرغزار کالونی دا ای واقعہ نہیں سگوں ہر تھاں انج ای معاملات نیں اصل گل ایہہ وے کہ حکومت دے کول ایناں وقت ای نہیں کہ اوہ اداریاں ول متوجہ ہووے۔ حکمران تے اقتدار دی کھینچا تانی وچ لگے ہوئے تے گل گل تے کہندے نیں کہ لوک فیصلہ کرن گے کہ کہدے نال نیں حالاں کہ نال بوٹ ایہ کسے ہور دے پالش کردے نیں۔
شہر کو برباد کر کے رکھ دیا اس نے منیر
شہر پر یہ ظلم میرے نام پر اس نے کیا
کیہ کریئے دل دکھدا اے کہ آخر اسیں کس تھاں اپڑ گئے آں۔ ساڈے نال ایہ کیہ ہو رہیا اے سب کجھ تباہ ہو چکیا۔ پتہ نہیں میں ایہ کہڑیاں گلاں لے کے بہہ گیا واں پر کیہ کراں کہ ایس ویلے لوکاں تے بڑا اوکھا ویلا آیا ہویا اے لوکاں دے کول پیسے نہیں کہ اوہ ودھدی مہنگائی دا مقابلہ کر سکن ایہدے نال جرم ودھ رہے نیں آخر ڈھڈ دی اگ تے بجھانی اے ناں۔ ویکھو فیر میں اپنا حوالا دے رہیا واں کہ رات گڈی باہر رہ گئی تے اوہدی بیٹری غایب پتہ لگا کہ کالونی وچ ایہ کم ہو رہیا اے کہ دھند تے ٹھنڈ دا فائدہ چکدے ہوئے بیٹری کڈھی جاندی اے چلو شکر کہ گڈی بچ گئی کہن دا مقصد ایہ کہ جرائم تے چوری چکاری ودھ گئی اے ہن تے بیمار ہونا وی کوئی افورڈ نہیں کر سکدا۔ سارے سیاست کرن وچ مصروف نیں تے ایہ ستم ظریف مشق ستم عوام نوں ای بناندے نیں۔ بحران پیدا کرن یاں غیریقینی صورتحال مزدور تے دیہاڑی دار وچارا ماریا جاندا اے۔ حکمراناں نوں اُکا کوئی خیال نہیں کہ اک دم آٹا کجھ مہینے وچ سو توں ڈیڑھ سو فی کلو تے اپڑ گیا یقینا روٹی تے نان ہن مہنگا ہووے گا۔ ایہ جنیوا کانفرنس وچ اپنی کامیابی تے تڑ رہے نیں کہ بڑا تیر مار لیا اے لوک اینے تھک چکے نیں کہ احتجاج کرن دی وی سکت نہیں یاںف یر ذلیل ہون وچ کوئی لذت آ گئی اے۔ اک وچارے سراج الحق ٹرائیکا دے بارے چیخ رہے نیں کہ اوہناں نوں لوکاں نال کوئی ہمدردی نہیں کہ اوہناں تے منکشف اے کہ لوکاں نوں کون پچھدا اے سارے کسے دے آسرے تے بیٹھے نیں ہر چند کوئی کہوے کہ اوہ نیوٹرل اے پر یقین کرن والیاں دے کول اپنا تجربہ تے تریخ اے۔٭