کوئی نہ کوئی…!

چوہدری شہبازحسین مشرف دور دے اوہ واحد وزیر سن جہناں دے مراسم مخالفین نال وی اینے تے ہے سن کہ اوہ سارے ایہناں دی عزت کردے سن۔ ایہ گل وی اوہناں دی پارٹی نوں چنگی نہیں سی لگدی پر اوہ ہمیشہ خندہ پیشانی توں کم لیندے ہوئے اگے ودھ جاندے۔ حکومتی پارٹی وچ ہون دے باوجود اوہناں دے نال عجیب و غریب واقعات پیش آئے مثلاً الیکشن 2002ء دے بعد جدوں حکومت سازی ہو رہی سی کابینہ لئی ناں فائنل ہو رہے سن تے چوہدری شہبازحسین دے راہ دی رکاوٹ جہلم دے نال جڑے ہوئے اک ضلع دی کجھ شخصیات بن گئیاں حالات نے پلٹا ماریا تے حکومتی مجبوریاں سامنے آ گئیاں‘ مجبوریاں دے ایس سفر وچ حکومت نے اپنے لئی چوہدری شہبازحسین نوں کابینہ دا حصہ بنایا۔ کابینہ دا حصہ بنن دے بعد وی چوہدری شہبازحسین مخالف سیاسی پارٹیاں‘ صحافیاں تے دوجے طبقات وچ مقبول رہے۔ ایہ وی بڑی عجیب گل سی کہ اک غیرمقبول حکومت دا اک وزیر مقبول سی۔ ایہ وزیر ایوان وچ اکثر اک دیانتدار سیاستدان حامد ناصر چٹھہ دے کول جا کے بہہ جاندا جتھے پہلے ای عمران خان کوئی نہ کوئی سیاسی تجربہ سکھ رہے ہوندے۔ ایہناں تناں دے اکٹھے بیٹھن دی سب توں وڈی وجہ دیانتداری سی‘ تنے ملک لٹن دے خلاف سن تے ملکی بہتری دے خواہشمند سن۔
2007ء دے بعد سیاسی حالات نے تناں نوں اک ایوان وچ نہ بیٹھن دتا سگوں 2008ء دے الیکشن وچ حامدناصر چٹھہ تے چوہدری شہبازحسین نے جس جماعت دے ٹکٹ تے الیکشن لڑیا اوہ جماعت ہار گئی جد کہ عمران خان‘ نوازشریف دے دھوکھے پاروں الیکشن نہ لڑ سکے کیوں جے تحریک انصاف تے جماعت اسلامی‘ مسلم لیگ ن دے نال اک اتحاد وچ سن اک چال دے تحت جماعت اسلامی تے تحریک انصاف نوں الیکشن چوں باہر کر دتا گیا۔ 2013ء دے الیکشن بارے آصف علی زرداری نے کہیا کہ ایہ آراوز دا الیکشن سی‘ آصف علی زرداری الیکشن دے وقت صدر پاکستان سن جدوں صدر پاکستان ای ایہ کہہ دیوے کہ ایہ الیکشن آر اوز دا الیکشن سی تے فیر پچھے کہڑی گل رہ جاندی اے۔
2018ء دے الیکشن وچ پی ٹی آئی جتی تے ہارن والیاں نے روایتی الزام دھاندلی دا لا دتا۔ ایہ الزام لان والیاں وچ اوہ جماعت وی شامل سی جہدے اک رہنما نوں کسے دی فرمائش تے جتوایا گیا حالاں کہ عثمان ڈار جت چکیا سی‘ نال والے حلقے وی جتے ہوئے غلام عباس نوں ہروایا گیا۔ مثال لئی ایہ دو سیٹاں ای کافی نیں۔ انج تے دیگ وچوں اک چاول ای چکھنا چاہیدا اے۔ 2002ء وچ بنن والی اسمبلی وچ حامدناصر چٹھہ‘ چوہدری شہبازحسین تے عمران خان اکٹھے بیٹھدے سن پر 2018ء وچ انج نہیں سی۔ 2018ء وچ حامدناصر چٹھہ دے صاحبزادے احمد چٹھہ تے چوہدری شہبازحسین دے بھانجے فواد چوہدری نے پی ٹی آئی دے ٹکٹ تے الیکشن لڑیا‘ جہلم توں فواد چوہدری تے جت گئے پر وزیرآباد وچ احمدچٹھہ دے نال اوہو ہویا جو عثمان ڈار دے نال سیالکوٹ وچ ہویا۔
2018ء وچ پنجاب‘ خیبرپختونخوا تے وفاق وچ پی ٹی آئی دی حکومت قائم ہوئی۔ صوبیاں وچ تے مسئلہ نہ ہویا پر وفاق وچ ہمیشہ مینڈک تولنے پئے تہانوں پتہ ہے کہ مینڈک تولنا بڑا اوکھا کم اے ایس مشکل کم تے عمران خان نوں لا دتا گیا جے سنٹرل پنجاب توں پی ٹی آئی دے لوکاں نوں ہروایا جاندا تے مینڈک تولن دی ضرورت ای پیش نہ آندی پر کوئی نہ کوئی تے چاہندا سی کہ حکومت عدم استحکام دا شکار رہے۔ خیر عمران خان نے ساڑھے تن ورھے حکومت کیتی ایہناں ساڑھے تن ورھیاں وچ تقریباً تن ورھے کرونا وی رہیا تے کرون نے اوہ بہت کجھ نہ کرن دتا جو دنیا کرنا چاہندی سی۔ کرونا نال جس طرح حکومت پاکستان نبڑی ایہدی دنیا نے تعریف کیتی۔ ایہناں اوکڑاں دے باوجود عمران خان دی حکومت زرمبادلہ دے ذخائر ودھان وچ کامیاب رہی۔ بند فیکٹریاں کھل گئیاں‘ کسان خشحالی دے راہ تے گامزن ہو گئے‘ برآمدات ودھ گئیاں‘ ساڈا گروتھ ریٹ چھ فیصد تے اپڑ گیا۔ پاورلومز لئی دو لکھ بندے گھٹ پے گئے۔ پاکستان دا عالمی سطح تے قد وی ودھ رہیا سی تے اجہے وچ کوئی نہ کوئی اجیہا سی جنہے منصوبہ بندی کیتی اگ تے پانی نوں اکٹھا کرکے عمران خان دی حکومت گرا دتی حکومت دی رخصتی دے وقت جذباتی مناظر سن جیویں کہ عام طور تے رخصتی دے ویلے ہوندے نیں پر ایس واری حالات ای کجھ ہور سن انداز ای کجھ ہور سی۔ پہلے حکومتاں جاندیاں سن تے لوک مٹھائیاں ونڈدے سن پر ایس واری لوکاں دی اکھاں وچ اتھرو سن اوہ تے اک ڈائری چک کے گھر جا کے سوں گیا سی پر ایس واری لوک نہیں سوئے ساڈے منصوبہ ساز 1980ء تے 1990ء دی سیاست ذہن وچ رکھ کے 2022ء وچ چکر چلانا چاہندے سن تے ہر کسے نوں چکر دین والے نے ایتھے وی چکر دینا چاہیا پر ایتھے چکر الٹ ہو گیا۔
ایس مختصر جہے عرصے وچ ایہ ہویا کہ پاکستانی فوج تے لوکاں وچ وِتھاں ودھیاں‘ فوج دی سابقہ قیادت نوں خیال نہ آیا پر موجودہ قیادت نوں ایہ سوچنا چاہیدا اے کہ پاک فوج تے قوم وچ وِتھاں ختم ہونیاں چاہیدیاں نیں ایہدی نشاندہی ٹھیک طور تے سابق سیکرٹری خارجہ شمشاداحمد خان نے کیتی اے۔ شمشاداحمد خان دے اک حالیہ انٹرویو وچ وڈے وڈے انکشافات ہوئے نیں ایہناں انکشافات دا بغور جائزہ لیا جاوے تے اک ای گل کہی جا سکدی اے کہ پاکستان وچ ہر ویلے کوئی نہ کوئی ایس وطن نوں نقصان اپڑان دی چال چلدا اے تے عین اوس ویلے ایس وطن نوں بچان لئی کوئی نہ کوئی اپنا کردار نبھاندا اے: بقول نوشی گیلانی
وقت کے سانپ کھا گئے اس کو
میرے آنگن میں ایک چنبیلی تھی