ایہ صرف اک ضلعے دی کہانی اے

ایس گل نال اختلاف نہیں کہ مہنگائی مقامی ای نہیں عالمی مسئلہ وی اے تے ساری دنیا ایہدے توں متاثر ہوئی اے پر ساڈے ایتھے اک گل جو سب توں وکھری اے اوہ ایہہ وے کہ ساڈے ایتھے ہر عالمی مسئلے نال وی جس طرح لوکل پیداگیری کیتی جاندی اے ایہدی مثال ملنی اوکھی نہیں۔ کنک دا سرکاری ریٹ 33سو روپیے فی من اے پر مارکیٹ وچ کنک چار ہزار روپیے توں لے کے سنتالی سو روپیے فی من وک رہی اے یعنی اپنی سرکاری قیمت توں دوگنا توں وی ودھ قیمت تے۔ ایس دونی قیمت دا سارا بھار غریب لوک برداشت کر رہے نیں پر کنک دے سمگلراں’ فلور ملز مالکان’ سرکاری افسراں تے سیاسی کھڑپینچاں دی ایس سارے معاملے وچ جو دیہاڑی لگ رہی اے عام بندے نوں ایہدا اندازہ ای نہیں۔ کنک دے سرکاری تے مارکیٹ ریٹ دے وچکار فرق جناں زیادہ ہوندا اے عوام اوناں ای زیادہ لٹدے نیں پر چارے طبقے یعنی سمگلر’ ملز مالکان’ سرکاری افسر تے سیاسی زور آور ایس توں اوناں زیادہ مستفید ہو رہے نیں۔
اسیں اجہی کارگیر قوم آں کہ سیلاب وچوں امدادی رقم’ زلزلیاں وچوں خیمے’ وباء وچوں دوائیاں تے آفات وچوں کھان پین والیاں شیواں غتربود کر لینے آں۔ کنک دی سرکاری قیمت تے مارکیٹ قیمت وچ ودھدے ہوئے فرق توں اسیں لوک اپنا منافع انج کڈھنے آں کہ جے ساڈی تھاں کوئی صاحب ضمیر بندہ ہووے تے اوہ ایہ سوچ کے ای شرمندگی نال مر جاوے کہ اجہی صورتحال وچ وی جیب گرم کیتی جا سکدی اے جدوں عوام سستے آٹے لئی گھنٹوں قطاراں وچ کھڑے رہن تے غریب بندہ تندور توں روٹی خریدن دی تھاں مفت والے دسترخوان دے باہر منتظر کھڑا ہووے۔
اک زمانہ سی کہ ساڈے ایتھے آٹا سستا ترین اناج سی حالاں کہ فقیر وی گھراں چوں آٹا منگدے سن۔ ہن صورتحال ایہہ وے کہ پچھلے اک ورھے دے اندر اندر آٹے دی قیمت دونی ہو چکی اے۔ پنجاب وچ فلور ملز نوں سرکاری کنک تقریباً 33 سو روپیے فی من دتی جاندی اے تے فلور ملاں اج کل چار ہزار روپیے توں لے کے سنتالی سو روپیے فی من دے حساب نال آٹا ویچ رہیاں نیں۔ تندور تے روٹی دی قیمت اک ورھے اندر اندر ست روپیے توں ودھ کے پندراں روپیے فی روٹی تک اپڑ چکی اے تے ایہدے تے سہاگہ ایہ کہ روٹی دا وزن وی گھٹ چکیا اے۔
کسے اک شہر دا ذکر تے بے معنی ہو چکیا اے سارے پاکستان وچ ای لٹ مچی ہوئی اے تے ہر تھاں طلب تے رسد دے مطابق آٹے دی قیمت دا تعین کیتا جا رہیا اے تے ایسے حساب نال سرکاری قیمت تے مارکیٹ ریٹ دے آپسی فرق دے مطابق کھانچہ لایا جا رہیا اے۔ ایہ کھانچہ کوئی راکٹ سائنس تے ہے نہیں کہ ایہنوں سمجھنا اوکھا ہووے۔ بڑا سدھا جیہا معاملہ اے۔ ملز مالکان’ سرکاری افسران تے ایس معاملے دے زبردستی حصے دار بنن والے سیاستدان سرکاری ریٹ والی کنک توں حاصل ہون والے آٹے دے کوٹے نوں آپس وچ ونڈ کے کھا رہے نیں۔ کسے افسر نے چھ سو تھیلے روزانہ اپنے ناں کروا رکھے نیں تے کسے سیاستدان دے فرنٹ مین نے اٹھ سو تھیلیاں دا کلچہ لگا رکھیا اے ایس حصہ داری دے بدلے ملز مالکان اپنا کھانچہ وی فٹ کر رہے نیں۔ ایس انجمن امداد باہمی دا صرف ملتان ضلع وچ حساب لایا جاوے تے سرکار صرف ایس اک ضلعے وچ لوکاں نوں سستا آٹا دین دی غرض نال سرکاری ریٹ تے کنک فراہمی دی مد وچ روزانہ تن کروڑ روپیے دے نیڑے سبسڈی دیندی اے جہدے وچوں اک تہائی وی لوکاں تک نہیں اپڑ پاندی تے تقریباً روزانہ اک کروڑ روپیے دی سبسڈی ایہ تنے فریق آپس وچ ونڈ کے برابر کر رہے نیں۔
ہن ناں کیہ لکھنا؟ شہر وچ کنے لوک باقی بچے نیں جہناں نال ایس عاجز دی سلام دعا باقی رہ گئی ہووے ایس لئی ناں رہن ای دیو۔ موصوف نے فوڈ انسپکٹری توں ارب پتی ہون دا مرحلہ بڑی فنکاری نال طے کیتا سی تے فیر سیاست وچ وی اپنا لچ تل لیا۔ ہن اپنے پیسے’ کاروبار’ تعلقات تے سایسی کھڑپینچی پاروں ملتان دے واہوا معزز شخص سمجھے جاندے نیں۔ ملتان وچ حلقہ این اے 157 وچ ضمنی الیکشن سی جہدے وچ شاہ محمودقریشی دی صاحبزادی مہربانو قریشی تے سید یوسف رضا گیلانی دے صاحبزادے علی موسیٰ گیلانی دے وچکار مقابلہ سی۔ موصوف سابقہ فوڈ انسپکٹر دے حلقہ اثر دی اک ادھ یونین کونسل ایسے حلقے وچ سی۔ شاہ محمود قریشی نے موصوف نال رابطہ کیتا تے اوہنے اپنی سیاسی حمایت لئی شرط رکھ دتی کہ محکمہ فوڈ ملتان دا انتظامی افسر اوہدی مرضی دا لایا جاوے تے اوہ اپنا سیاسی وزن قریشیاں دے پلڑے وچ رکھ دین گے۔ میں تے اوہناں دیہاڑیاں پاکستان نہیں سی پر راوی جہڑا کہ بڑا معتبر اے دسدا اے کہ معاملہ اوہناں دی مرضی مطابق طے ہو گیا۔ ایس تعیناتی نال موصوف دے نال نال اک نیک نام سیاستدان دے بیٹے نے وی اپنا دال دلیہ بنایا۔ ملتان دے ایس نیک نام سیاستدان دا وی اوہو حال اے جو عمران خان صاحب دا اے کہ آپ تے نیک تے پارسا مشہور نیں پر آل دوالے سارے مال پانی بنان وچ مصروف نیں۔
ضلع ملتان دی فلور ملاں لئی کنک دا یومیہ سرکاری کوٹہ 8250 بوری یعنی ویہہ ہزار چھ سو پنجی من اے۔ ایس کنک وچوں فلور ملز چوداں ہزار من سستا آٹا دین دی پابند نیں۔ اسیں خوش گمانی کردے ہوئے صرف چوتھائی آٹے وچ کھانچے دا حساب لائیے تے روزانہ دس کلوگرام دے چوداں ہزار تھیلے غتربود ہو رہے نیں ایس یومیہ موج میلے وچ فرنٹ مین دے طور تے نیک نام سیاستدان توں لے کے صوبائی وزیر دے رشتے داراں دے ناں دی گونج سنائی دے رہی اے۔٭