لوک فنکار

اوس محمد علی عر ف “ماہیا” نال نکاح کیتا جیہڑا گجرات وچ تانگہ چلاندا سی ۔ بعد وچ دونواں بمبئی وچ اک فلم وچ کم وی کیتا ۔
دکی(نشا ں عرف دکی) لوک سراں دی ملکہ : دکی دا اصل ناں نشاں سی ۔ پر لوکائی وچ اوہنوں محبت نال دکی آکھیا جاندا سی ۔ دکی جلال آباد وچ پیدا ہوئی ۔ اوس دی ماں دا ناں اللہ جوائی سی ۔ دکی دے ماں تے پیو ” سردار بلندا سنگھ بگھے کا ” دے کول نوکری کردے سن ۔ دکی دے ماں پیو دے مالی حالات بوہت چنگے نہیں سن۔ تاں ای اوس نکے ہوندیاں بکریاں چاریاں ۔
حلیہ: دکی دا رنگ سانولا سی ۔ اوس دے ہونٹ قدرے موٹے تے سر وچ رسولیاں سن۔
جوانی دی عمر وچ اک واری دکی نوں اغو ا کر لیا گیا ۔ اغوا دا کارن ایہہ ہویا جے اک سکھ اک تھاں تے دکی دیاں سراں سنیاں۔ اوس دکی نوں آپدے ڈیرے تے سراں سنان لئی منگوانا چاہیا۔ دکی ایہہ آکھ کے اوس دی محفل وچ جان توں انکار کر دتا جے اوہ کسے سکھ دی محفل وچ نہیں جاوے گی ۔ ایہہ سن کے اوس سکھ نوں بڑا رنج ہویا تے اوس اکبر دھندرو بدمعاش دے ہتھوں دکی نوں اغوا کروا لیا۔
اوس کئی دن دکی نوں آپدے کول رکھیا۔ اوس علاقے دے ڈوگر بلندا سنگھ “بگھے کا” دے آکھن تے دکی نوں رہائی ملی۔ دکی نے چار ویاہ کیتے سن ۔ دکی دا پہلا ویاہ سردار جیمل نال ہویا ، پر دکی دی اوس نال نہ بنی ۔ دکی اوس کولوں پچھا چھڈانا چاہندی سی۔ اک دن دکی سردار بلندا سنگھ بگھیکا دی مِنت کیتی جے سردار جیمل کولوں میرا پچھا چھڈا ۔ اوس آکھیا چنگا تھوڑا اڈیک ۔اک دن جدوں سردار جیمل گھر نہیں سی ۔ سردار بلندا سنگھ بگھے کا دکی نوں گھوڑی اتے آپدے مگر بہایا تے دریائے ستلج دے کنارے اپڑے ۔ اوتھے کانیاں دا تلہ (چھپر) بنھ کے دریا وچ سٹیا ۔ دریا چڑھیا ہویا سی ۔ دونواں تلھے اتے بہہ کے دریا پار کیتا۔ جدوں عین دریا دے وچکار جا رہے سن تاں سردار بلندا سنگھ آکھیا۔ دکی ! کوئی سر سنا ۔ (جاری اے)