کشمیر شہ رگ اے

الحمرا دے وسیع لان وچ سینکڑوں کرسیاں تے بیٹھے تے چارے پاسے کھڑے ہزاراں لوکاں دے ہتھاں وچ آزادی دے جھنڈے تے لباں تے ترانے سن۔ دِلاں وچ جو تڑپ تے شدت سی اوہ اکھاں وچ جلدے عزم دے دیے نوں ہور جگمگا رہی سی۔ ایہ محفل کشمیر دے نہتے لوکاں تے ہون والے ظلم تے مودی سرکار دے بے رحمانہ رویاں توں پیدا ہون والی صورتحال پاروں یوم یکجہتی کشمیر لئی منعقد کیتی گئی۔ ایہ اوہ محفل سی جہدے وچ سب دِلوں شریک ہوئے‘ دل دے جذبیاں دا اظہار کیتا تے کشمیریاں لئی اپنی اپنی سطح تے کجھ کرن دا اعادہ کیتا۔ ایہ ساڈی اجتماعی سوچ دا اظہار سی جہنوں اسیں مشکلات وچ گھر کے وی کدی نظرانداز نہیں کیتا۔ ایس طرح لگا کہ ایس پروگرام دا مقصد عالمی ضمیر دی ستی ہوئی توجہ نوں جگانا سی۔ اطلاعات و ثقافت دے سارے اداریاں توں علاوہ ضلعی حکومت سگوں پنجاب حکومت دی نمائندگی ہر پاسے نظر آئی۔ گورنر پنجاب بلیغ الرحمن سنے دوجے علمی‘ ادبی تے ثقافتی شخصیات اوتھے موجود سن۔ کشمیری حریت پسند رہنما دی تقریر دا اک اک لفظ دِلاں وچ اتردا محسوس ہویا۔ ایہ لکھی ہوئی تقریر نہیں سی‘ جھیلے ہوئے درد دی کہانی سی جہنوں اہل دل تے اہل درد لہوریاں نے اوسے کیفیت نال محسوس کیتا۔
اسیں جہناں لئی کشمیر شہ رگ وانگوں اے تے ایہ صرف زبانی کلام نہیں سگوں حقیقی طور تے اے ساڈے دوہاں دی بقاء اک دوجے نال جڑی اے۔ ساڈے دریاواں دے کنٹرول بھارت دے کول نیں۔ اوہ جدوں چاہوے فالتو تے بے مہار پانی چھڈ کے سانوں خوفناک سیلاب نال ہمکنار کر دیوے تے جدوں چاہوے ساڈا پانی روک کے ساڈی زمین نوں پیاسا صحرا بنا دیوے۔ جس طرح اوہ وکھووکھ ڈیم بنا کے پہلے ای کر چکیا اے۔ اسیں ہمیشہ توں مقبوضہ کشمیر دی ماڑی حالت تے ماتم کناں آں۔ اوہناں دی جنگ لڑن نوں تیار آں پر وقت دا جبر ویکھو ساڈیاں کوتاہیاں تے دشمن دیاں چالاں پاروں اج ساڈا اپنا تحفظ تے بقاء داء تے لگ چکیا اے۔ کشمیریاں نوں اپنے نال ہن ساڈی وی فکر لگ گئی اے پر اسیں فکر کرن نوں تیار نہیں۔ ساڈے تے حملے کرن والیاں نے چارے نُکراں سانبھیاں ہوئیاں نیں تے اسیں آپس وچ جھگڑ رہے آں۔ حکومت کرن نوں بے تاب رہنماواں لئی غریب دی دو وقت دی روٹی تے سفید پوش دا بھرم اہم نہیں صرف انتخابات دا چھیتی پربندھ ضروری اے تاں جے اوہناں دا راج قائم ہو سکے اوہناں دی بادشاہت برقرار رہ سکے۔ حالات دی سنگینی نوں سنجیدہ نہ لینا سب توں خطرناک رجحان اے جہدا ایس ویلے سانوں ساریاں نوں سامنا اے۔ بے حسی نشے ورگے صورت اختیار کردی جا رہی اے۔ کشمیری رہنماواں نے دسیا کہ مقبوضہ کشمیر دے لوک ساڈے ہر دکھ سکھ وچ ساڈے نال کھڑے نیں اسیں کسے کھیڈ وچ جت جائیے تے اوہ فخر کردے نیں تے ساڈے تے کوئی انہونی ٹُٹ پوے تے اوہ ماتم کردے نیں۔ اوہ ساڈیاں اوکڑاں بارے جانوں نیں۔ ساڈے نال کسے جنگ دے خواہش مند نہیں صرف عالمی ضمیر دے بند بوہے نوں کھڑکان دی خواہش رکھدے نیں۔ اوہ گلاں کئی دیہاڑیاں توں کناں وچ گونج رہیاں نیں۔ اوہ گلاں نہیں مقبوضہ کشمیر دے لوکاں دے پیغامات سن اوہناں دی جدوجہد دی کہانی دے کجھ حصے سن۔ کاش اوہ وی اک روایتی تقریر ہوندی جہنوں نہ سنجیدگی نال سننا نہ یاد رکھنا ضروری ہوندا اے۔ وقت دے نال نہ چلن تے آل دوالے متحرک دشمن قوتاں نوںسمجھ سکن پاروں اسیں ڈونگھے ٹوئے وچ ڈگ چکے آں اوہدے چوں نکلن لئی غیر روایتی تے کٹھن جدوجہد چاہیدی اے۔ اسیں اوہ قوم آں جو نہ محنت مشقت توں گھبراندی اے تے نہ اوکڑاں توں ڈردی اے۔ طوفاناں دا سامنا کرن لئی جابر قوتاں دی اکھاں وچ اکھاں پا کے گل کرن دی ضرورت اے۔
کشمیریاں دا ایہ شکوہ تے مطالبہ وی ذہن وچ رکھنا چاہیدا اے کہ اوہناں دی رضا تے بقا نال جڑے مطالبیاں نوں دلیلاں دی میزتے زیربحث لیاندے ہوئے اوہناں نوں وی شریک کر لیا جاوے یاں اوہناں نال مشورہ ای کر لیا جاوے تے ایہدے چنگے نتیجے نکلن گے۔ ایہ لمحہ ایس گل دا متقاضی اے کہ سانوں ہن روایتی خط و کتابت توں اگے ودھ کے زیادہ موثر طریقے نال کشمیر دا مقدمہ پیش کرن دی ضرورت اے۔ ایس پروگرام دا پربندھ یقینا صوبائی تے مرکزی حکومت دی پالیسی نوں ظاہر کردا اے کہ اوہ کشمیر کاز نوں کنی اہمیت دیندی اے۔ عمران شوکت علی نے کشمیریاں لئی ترانے پیش کرکے جس عزم تے تڑپ دے اظہار نال دشمناں نوں للکاریا تے عالمی ضمیر نوں جھنجھوڑیا اوہ جذبہ ساڈے ساریاں دے کردار وچ نظر آنا چاہیدا اے۔ میں اپنا ای لکھیا ترانہ سن کے آبدیدہ ہو گئی۔
ممکن ہے میری ذات جدا ہو اس سے
میرا کشمیر لہو بن کے رگوں میں دوڑے