صوفی کانفرنس دی لوڑ

ڈاکٹر صغرا صدف

ہر ویلے اکوجہی رفتار تے روانی نال وگدا دریا کدی جوش وچ آ کے کنڈھیاں توں اُچھل پیندا اے تے کدی اوہدیاں سیلابی لہراں انج بپھر کے حملہ آور ہوندیاں نیں کہ آل دوالے موجود ہر شے تہس نہس کر دیندیاں نیں۔ سبزہ‘ عمارتاں تے زندگی پل بھر وچ ککھاں وانگوں روندیاں اکھاں توں اولھے ہو جاندے نیں۔ انسان دا من وی دریا وانگوں اے تے خیروشر یعنی دوہاں طاقتاں نوں دل کے میزان تے تھامے زندگی کردا اے۔ جدوں ایہدے وچ مثبت طاقت متحرک ہوندی اے تے معاشرے دی تعمیروتخلیق دی سوچ پنپدی اے۔ خوشحالی تے خوبصورتی دے نویں رنگ اجاگر ہوندے نیں پر جدوں اوہ منفی طاقت دا غلام ہو کے تخریب دے راہ دی چون کر لیندا اے تے اپنے نال نال دوجیاں لئی وی خطرناک ہو جاندا اے۔ کدی کدی اک لمحے دا غم و غصہ تے جلال وڈی تباہی دا کارن بن دا اے۔ ساریاں بے انصافیاں‘ ظلم‘ استحصال‘ تقسیم تے غیرانسانی رویاں دا کارن شر اے۔ ہن اصل مسئلہ ایہناں دوہاں وچوں خیر دا انتخاب‘ اوہدی پرورش‘ اوہدے نال دوستی تے اوہدی گل تے عمل کرنا اے۔ دنیا وچ گھٹ لوک ہوندے نیں جو اپنے آپ ایہ سب پچھان رکھدے ہون نہیں تے وڈیاں وڈیاں ڈگریاں والے اپنے اندر دے حال توں ناواقف ہون پاروں اپنی جبلی وحشت نوں کنٹرول کرن وچ نکام رہندے نیں۔
لوکاں نوں ٹھیک سمت دے انتخاب وچ مدد دینا سب توں وڈی اچھائی اے فیر انسان مثبت سوچ نوں اپنا کے تعمیری رستے تے اگے ودھدا رہندا اے۔ قدرت انسان دی رہنما اے اوہنے انسان دی تخلیق دے ویلے جو امتحان تے آزمائشاں اوہدے نصیب وچ لکھیاں اوہدے چوں نکلن دے کارن وی پیدا کیتے۔ ہر دور وچ‘ ہر معاشرے وچ ادیباں‘ دانشوراں تے فنکاراں دے روپ وچ صوفی ولی گھلے تاں جے اپنی تحریر‘ گل بات تے فن دے راہیں اوہ لوکاں نوں اپنا آپ لبھن وچ اوہناں دی مدد کرن تے اوہناں دے جمالیاتی پہلو نوں اجاگر کرن۔ پاکستان سنے دنیا ایس ویلے مادیت دی طاقتور جکڑ وچ اے۔ ہر شے تے قبضے دی خواہش نے دنیا دے انساناں نوں تقسیم تے تفریق دی اذیت وچ مبتلا کر رکھیا اے۔ ہر بندہ اکلا تے دکھی اے کیوں جے نہ اوہ دوجیاں تے اعتبار کردا اے نہ دوجے اوہدے تے۔ اجہی صورت وچ صوفی ازم دی اہمیت بڑی ودھ جاندی اے خاص کر پاکستان ورگے ملک وچ جتھے فرقہ پرستی تے استحصال زوراں اُتے اے۔ قاسم علی شاہ نوں وی اللہ نے لوکاں دی دلجوئی تے ہمنوائی دا منصب عطا کر رکھیا اے۔ ورھیاں پہلے اوہناں نے اپنی ایس صلاحیت دا پہلا اظہار کیتا تے سماج نے اوہناں نوں خیر دی تحریک دین والا مقرر کہہ کے پکاریا‘ اوہ ایس رستے تے چلدے رہے‘ اوہناں دے من دی سچائی تے درمندی نے لفظاں نوں اجہی تاثیر عطا کیتی کہ اوہناں دا دائرہ وسیع ہوندا گیا۔ فیر قاسم علی شاہ فائونڈیشن وجود وچ آئی جنہے نوجواناں دی تعلیم و تربیت لئی عملی کم دا مڈھ بنھیا۔ مستحق طلباء لئی وظیفے تے دوجیاں سہولتاں ممکن بنائیاں۔ سماج وچ رواداری تے برداشت دی فضا دے قیام لئی قاسم علی شاہ نے تصوف دا بوہا کھڑکایا تے اوہناں نے حال دیاں بہت ساریاں قدآور ہستیاں نے جی آیاں کہیا۔
لہور وچ اوہناں نے پہلی صوفی کانفرنس منعقد کیتی جہدے وچ بابا جی عرفان الحق‘ ڈاکٹر طاہر رضا بخاری‘ ڈاکٹر محمدعلی‘ محمدانوارالحق‘ طارق بلوچ صحرائی تے راقم نے گل بات کیتی۔ علی عباس تے ڈاکٹر طاہر شہیر انتظامات وچ شامل سن۔ ساریاں نے بڑے ودھیا تے وکھووکھ خیالات دا اظہار کیتا۔ بابا جی عرفان نے رسول اللہؐ ہوراں دے رُکھ لان دی تلقین والے فرمان دا حوالا دیندے ہوئے آکھیا کہ رُکھ بن جائو‘ دوجیاں نوں چھاں دیو‘ اوہناں دی بھکھ مٹائو۔ قاسم علی شاہ نے صوفی نوں کالک زدہ برتن قرار دتا جہنوں باہروں گھٹ پر اندروں زیادہ دھوتا جاندا اے کیوں جے اوہنوں پتہ ہوندا اے کہ اندر دی صفائی زیادہ اہمیت رکھدی اے۔ ڈاکٹرمحمدعلی وی سی قائداعظم یونیورسٹی نے پاکستان وچ صوفی ازم دی طاقتور روایت تے ورثے نوں نوجوان نسل وچ منتقل کرن دی لوڑ تے زور دتا۔ ڈاکٹر رضا بخاری سیکرٹری اوقاف نے اسلام دے تصور مساوات نوں عملی طور تے اپنا کے معاشرے وچ ہم آہنگی دی فضا قائم کرن وچ صوفیا دے بھرویں کردار تے کاوشاں نوں سراہیا۔ ایس کانفرنس وچ نوجواناں دی بھرویں نمائندگی ویکھ کے بڑی خوشی تے اطمینان ہویا۔ ایہو ایہدی کامیابی وی سی۔ صوفی ساڈا ثقافتی ہیرو اے۔ صدیاں پہلے اوہدا ڈیرہ ثقافتی مرکز دی حیثیت رکھدا سی۔ اوتھے محفل حمد و نعت‘ محفل سماع‘ محفل غزل‘ دھمال‘ مشاعرے تے تھیٹر ہوندے سن جو لوکاں دی جمالیاتی تربیت کردے تے اوہناں نوں اظہار دے موقعے دیندے سن۔ ثقافتی سرگرمیاں دے راہیں انسان دی شخصیت نوں متوازن رکھیا جا سکدا اے۔ قاسم علی شاہ نوں وی شاید ایسے جذبے پاروں الحمرا آرٹ کونسل دا چیئرمین بنایا گیا۔ ایہ اک اعزازی عہدہ اے۔ امید کیتی جا سکدی اے کہ آن والے دیہاڑیاں وچ ثقافت وچ شامل کثافت نوں حذف کرن تے دھیان دتا جاوے گا۔
ہے۔قاسم علی شاہ کو بھی شاید اسی جذبے کے پیش نظر الحمرا آرٹ کونسل کا چیئرمین بنایا گیا۔یہ ایک اعزازی عہدہ ہے۔امید کی جاسکتی ہے کہ آنے والے دنوں میں ثقافت میں شامل کثافت کوحذف کرنے پر توجہ مرکوز کی جائے گی۔٭