پنجاب وچ جشن بہاراں دے رنگ

عائزہ شاہد

جشن بہاراں جو کہ عوام دی توجہ حاصل کرن وچ ہمیشہ صف اول تے رہیا اے۔ جشن بہاراں عوام دی تفریح دا ہمیشہ اک بہترین ذریعہ رہیا اے۔ لہور شہر جو کہ اپنی زندہ دلی دی وجہ نال مشہور اے۔ ایسے وجہ نال لہور کوئی وی ثقافتی تہوار منان وچ پچھے نہیں رہیا۔ لہور شہر نوں ڈھول دے نشان دی وجہ نال پہچانیا جاندا اے۔ ڈھول دے نال بھنگڑے دی رتھاپ لہور دی پہچان اے۔ لہور دے اندر موجود دیدزیب قدیم عمارتاں‘ باغ‘ شاعراں دی مجلساں تے اپنی زندہ دلی دی وجہ نال لہور شہر دے ایہہ ثقافتی میلے دنیا بھر وچ مشہور نیں۔ دنیا بھر توں لوک جشن بہاراں دی آمد دے نال ای لہور ول پیش قدمی شروع کر دیندے نیں۔ جشن بہاراں دے آن توں شہر نوں برقی قمقمیاں نال سجادتا جاندا اے۔میلے دا آغاز آتش بازی نال کیتا جاندا اے۔ موسم بہار دے آندے ای شہر پھلاں دی دلکش خوشبو تے رنگاں نال بھر جاندا اے۔ اج کل دے دور وچ ایس قسم دے ثقافتی میلیاں نے سانوں ساریاں نوں جوڑے رکھیا اے ورنہ اج کل دی مصروف زندگی وچ ہر کوئی اپنے کماں تے ایس ڈیجیٹل دنیا وچ گواچیا اے۔ ہر انسان موبائل فون دی مستیاں وچ اینا گم اے کہ اوہنوں نال بیٹھے اگلے بندے دا ہوش نہیں تے اج کل دی نسل ویسے ای اپنی تہذیب تے ثقافت توں بہت دور جاندی جا رہی اے لیکن اوہناں میلاں نے ساڈی ثقافت نوں جوڑے رکھیا اے۔ ورھیاں توں منایا جان والا ایہہ جشن بہاراں دا تہوار لوکاں نوں نال جوڑے رکھن وچ اپنی مثال آپ اے جیویں کورونا دے دناں وچ سارے لوکی گھراں وچ بند سن۔ ملک بھر وچ مکمل لاک ڈائون سی۔ ہرانسان پریشان سی تے ایس وجہ نال میلے وی نہیں سج رہے سن۔ نگران وزیراعلیٰ پنجاب محسن نقوی ولوں لیتا جان والا ایہہ اک نہایت خوش آئند قدم اے۔ اوہناں دے ایس فیصلے توں ہر لہوری دے چہرے اتے خوشیاں بکھر رہیاں نیں۔ ایہناں میلیاں دی خاص گل ایہہ ہوندی اے کہ ایہناں میلیاں وچ ہر طرحاں دے لوک شامل ہوندے نیں۔ ایہناں میلاں وچ آن والے امیر غریب سارے برابر ہوندے نیں۔ ایہناں میلیاں وچ داخلہ ٹکٹ فری رکھی جاندی اے تے ایتھے موجود ہر قسم دی تفریحی سرگرمی دی رقم اینی گھٹ رکھی جاندی اے کہ اک غریب بندے وی آرام توں ایتھے آ کے اپنے بالاں دے نال لطف اندوز ہو سکدا اے۔ نگران وزیراعلیٰ پنجاب ولوں سجائے جان والے ایس میلے وچ میراتھن ریس‘ آتش بازی‘نیزہ بازی وغیرہ شامل ہووے گا۔ ایسے طرحاں جیلانی پارک وچ پہلواناں دے جلوے وی ویکھن نوں ملن گے۔ کبڈی دا پربندھ وی کیتا گیا اے۔ ایہدے الٹ داتا دربار کمپلیکس تے ست روزہ محفل سماع دا پربندھ کیتا گیااے۔ ایہدے وچ دنیا بھر توں نعت خواں شامل ہون گے۔ ایہدے نال نال نیشنل ہسٹری میوزیم وچ پاکستان دی دیدہ دلیریاں‘ دلربا تے ملکی آزادی دی کہانیاں ڈیجیٹلی عوام نوں وکھائی جان گئیاں۔ لہور دی شاہراہ نوں برقی قمقمیاں نال سجا کے ایس خوبصورتی وچ ہور وادھا کردتا گیا اے۔ لہور تے فیصل آباد وچ منعقد کیتے جان والے ایس تہوار وچ کھیڈ‘ ثقافت‘ سیاحت‘ موسیقی‘ برڈ تے پٹ شو تے آتش بازی وغیرہ شامل ہون گئیاں۔ ایسے طرحاں 5توں 12مارچ تک مینار پاکستان وچ لکی ایرانی سرکس جوش و خروش نال جاری رہوے گی ۔ لکی ایرانی سرکس وچ موت دا کھوں‘جھولے‘ کھانے‘ سپ گھر وغیرہ دا پربندھ کیتا گیا اے۔ ایس دے علاوہ سرکس وچ مختلف جانوراں دے سرکس پیش کیتے جان گے۔ ایس دے علاوہ 12مارچ نوں لبرٹی گول چکر توں جیلانی پارک تک میراتھن ریس ہووے گی۔ ایتھے جشن بہاراں دا انعقاد جیلانی پارک‘ مین بلیوارڈ‘ گلبرگ‘ نیشنل ہسٹری میوزیم‘ لبرٹی گول چکر‘ مال روڈ تے شاہی قلعہ وچ کیتا گیا اے۔ ایس میلے وچ موسیقی دا وی انتظام کیتا گیا اے۔ گلوکار راحت فتح علی خان تے ساحر علی بگا اپنی آواز دا جادو چلان گے۔ 12توں 15مارچ تک اقبال پارک وچ داستان گوئی تے لائٹ سائونڈ شو دا انعقاد کیتا جاوے گا۔ 11توں 12مارچ تک اوپن ائیر تھیٹر الحمرا وچ صوفی شو دا پربندھ کیتا گیا اے۔ 7توں 12مارچ تک جیلانی پارک وچ کھانیاں دے سٹالز لگائے گئے نیں۔ ایہناں کھانیاں وچ لہور دے روایتی کھانے شامل نیں۔ مثال دے طور تے مکئی دی روٹی‘ ساگ‘ اندرسے‘ جلیبی سجی وغیرہ۔ نگران وزیراعلیٰ پنجاب دے ایس خوش آئند اقدام نال عوام دلوں اوہناں نوں سلام پیش کردی اے۔ خاص طورتے اوہناں نے جس بہترین طریقے نال ایس روایتی میلیاں دی سکیورٹی دا خیال رکھیا ہویا اے‘ محسن نقوی نے پریس کانفرنس دا انعقاد کر کے اک اک چیز اتے نظر ثانی کیتی۔ ایہناں چیزاں نوں بہترین طریقے نال سرانجام دین دی تاکید کیتی۔ محسن نقوی دی ایس بہترین کارکردگی نے عوام نوں ناصرف خوش ہون دا موقع فراہم کیتا بلکہ بہت سارے لوکاں نوں رزوگار وی فراہم ہویا۔ ایس میلے دے منعقد ہون دی وجہ نال نگران وزیراعلیٰ پنجاب محسن نقوی نے لہور دے نال نال فیصل آباد وچ وی جشن بہاراں پروگرامز منعقد کروائے نیں۔ نگران وزیراعلیٰ پنجاب محسن نقوی دی زیر صدارت اجلاس وچ لہور تے فیصل آباد وچ جشن بہاراں دے انتظامات تے پروگرامز بارے دسیا گیا کہ جشن بہاراں 5توں 12مارچ تک ہووے گا تے ایہناں تقریباں وچ کیہ کیہ انتظامات کیتے جان گے تے محسن نقوی نے سکیورٹی الرٹ بارے وی اپنی پریس کانفرنس وچ ذکر کیتا۔ میراتھن ریس دے نال نال اتھلیٹ دے مقابلے کروائے جان گے۔ قذافی سٹیڈیم وچ قائداعظم سپورٹس کمپلیکس وچ کھیڈاں دے مقابلے ہون گے جتن والے کھیڈاریاں وچ وزیراعلیٰ ولوں انعامات تقسیم کیتے جان گے۔ایہدے نال سائیکلنگ دے مقابلے وی ہون گے۔ میراتھن ریس وچ بچے‘ خواتین‘ سپیشل پرسن تے اتھلیٹ حصہ لین گے۔ محفل سماع توں وی لوکاں نوں لطف اندوز کیتا جاوے گا۔ ضلعی انتظامیہ ایس واری جشن بہار نوں لہور دی ثقافت دے فروغ تے عام شہریاں تک ایہدے ثمرات پہنچان لئی ہرممکن اقدامات کر رہی اے۔ نگران پنجاب حکومت ولوں عوام نوں یکجا کرن تے خوشیاں ونڈن دا ایہہ اک نہایت اہم قدم اے تے عوام تہہ دل توں پنجاب حکومت دی مشکور اے۔