دنیادے کرکٹ دا ستارہ، پاکستان دی شان۔۔۔ بابر اعظم

پاکستان دے تناں فارمیٹ دے کپتان بابر اعظم دا شمار ایس ویلے تناں فارمیٹاں وچ دنیا دے بہترین بلے بازاں وچ ہوندا اے۔ پاکستان سنے دنیا بھر وچ اوہناں دے کروڑاں مداح اوہناں نوں کھیڈدا ویکھن لئی بے تاب نظر آندے نیں۔ جدوں اوہ میدان وچ ہوندے نیں تے اوہناں دی اک کور ڈرائیور دی تعریف وچ ہزاراں دی گنتی وچ ٹویٹاں کیتے جاندے نیں۔ پوری دنیا دے ریٹائرڈ تے موجودہ مایہ ناز کھیڈاری بابر اعظم دی تعریفاں دے پل بنھدے نہیں تھکدے۔ اوہ اوہناں نوں تناں فارمیٹ دے بہترین کھیڈاریاں وچ سمار کردے نیں لیکن پاکستان وچ اک طبقہ ایسا وی اے جہڑا ایس ہیرے جئے کھیڈاری دے خلاف بے مقصد محاذ کھولے بیٹھیا اے۔ کجھ صحافی جہڑے سوشل میڈیا اتے کجھ لائیکس تے فالورز حاصل کرن لئی بابراعظم اتے تنقید کردے نیں تے اوہناں نوں دے جھانسے وچ ان والے سادہ لوح عوام جہناں نوں شاید کرکٹ دا خود اینا علم نہیں اوہ وی تناں فارمیٹ دی رینکنگزوچ ٹاپ فائیو بلے بازاں دی فہرست وچ شامل واحد بلے باز اتے تنقید شروع کر دیندے نیں۔
انج دے لوکاں دا کہنا اے کہ جہڑے کھیڈاری ٹیم لئی نہیں بلکہ ذاتی ریکارڈز لئی کھیڈے اوہدے سکور دا کیہ فیدہ‘ جے کھیڈاری خود تے رینکنگز وچ ٹاپ فائیو وچ ہووے لیکن ٹیم ہاردی رہوے تے فیر ایہہ کھیڈاری ٹیم لئی مفید نہیں ایس گل وچ وزن وی اے کہ کھیڈاری دی پرفارمنس جے ٹیم نوں جتوا نہیں سکے تے فیر کیہ فیدہ۔آئو بابراعظم دے ست سالہ انٹرنیشنل کیرئیر پرسٹیٹس (اعدادوشمار) دے نال نظر پاندے نیں تے ویکھدے نیں کیہ واقعی بابراعظم صرف ذاتی ریکارڈز بنا رہے نیں تے اوہناں دے سکورز دا ٹیم نوں کوئی فیدہ نہیں ہو رہیا؟
سب توں پہلاں بابراعظم دے ٹیسٹ کیرئیر اتے نظر پاندے نیں تے ویکھدے نیں کہ سب توں اوکھا تے بہترین فارمیٹ وج بابر دا کیرئیر کیسا رہیا تے ٹیم لئی مفید رہیا۔
بابراعظم ہن تک 47 ٹیسٹ میچز وچ پاکستان دی نمائندگی کردے ہوئے 85 اننگز وچ 3696 سکور کر چکے نیں۔ ایہناں میچاں وچ اوہناں دی ایوریج (اوسط) 48رہی جد کہ 9سنچریاں تے 26 ففٹیاں سکور کر چکے نیں۔پاکستان ٹیم دی جت‘ ہار یا ڈرا میچز دی تفصیل ویکھی جاوے تے اوہناں وچ بابر دی کارکردگی کجھ انج اے۔
بابراعظم دے 47 میچاں اتے مشتمل ٹیسٹ کیرئیر وچ پاکستان ٹیم سترہ میچز جت چکی اے جہناں وچ بابراعظم 28 اننگز کھیڈدے ہوئے 61دی اوسط نال 1401رنز سکور کر چکے نیں۔47وچوں اٹھ میچز ڈرا ہوئے جہناں وچ بابر 13اننگز وچ 74 دی اوسط نال 749رنز جڑ چکے۔ بابر دے 47 میچاں اتے مشتمل ٹیسٹ کیرئیر وچ پاکستان 22میچز ہاریاجہناں وچ بابراعظم 44اننگز وچ 36دی اوسط نال 1546 رنز بنا پائے۔
ایہناں اعدادوشمار STATS دا بغور جائزہ لیتا جاوے تے صاف طاہر اے کہ جدوں بابراعظم پرفارم نہیں کر پائے اوہدوں ٹیم ہاردی رہی جد کہ جہڑے میچز پاکستان ٹیم جتی یا ڈرا کرن وچ کامیاب ہوئی اوہناں وچ بابر دی اوسط بالترتیب 61 تے 74 اے۔ ٹیسٹ کیرئیر دی 9سنچریاں وچ صرف دو سنچریاں پاکستان ٹیم دی ہار وچ بنی نیں یعنی جدوں جدوں بابراعظم تھری فگر سکور کردے نیں تے یا ٹیم جت جاندی اے یا میچ ڈرا ہوندا اے۔ ٹیسٹ میچز دے ایہناں سٹیٹس مگروں کوئی کیویں کہہ سکدا اے کہ بابر صرف ذاتی ریکارڈ لئی کھیڈرہے نیں؟ چیتا رہوے بابراعظم ٹیسٹ کرکٹ دی عالمی رینکنگ وچ نمبر دو‘ نمبر تن تے نمبر چار اتے رہن مگروں ہن نمبر پنج اتے موجود نیں۔
اک روزہ میچز (ون ڈے کرکٹ)
ہن آنے آں ون ڈے کرکٹ ول جہدے وچ بابراعظم دی کارکردگی دوجے دونویں فارمیٹاں توں ہور وی بوہتی بہتر نظر آندی اے۔ ایس فارمیٹ وچ بابراعظم ہن تک 95 میچاں وچ 59 دی اوسط نال 17سنچریاں تے 24نصف سنچریاں دی مدد نال چار ہزار اٹھ سو تیرہ رنز سکور کر چکے نیں۔ جو کہ ون ڈے کرکٹ وچ 95 اننگز کھیڈن مگروں کسی وی کھیڈاری توں ودھ رنز نیں۔ بابراعظم دے 95 میچاں اتے مشتمل ون ڈے کیرئیر وچ پاکستان ٹیم 49 میچز جتی‘ 42 ہاری جد کہ اک میچ برابر تے تن میچز بغیر کسی رزلٹ دے ختم ہوئے۔ اپنے کیرئیر وچ ٹیم دی جت وچ بابراعظم 49 میچز وچ 86 دی اوسط نال 3030 رنز سکور کر چکے نیں جہناں وچ تیرہ سنچریاں تے تیرہ نصف سنچریاں شامل نیں۔ ایسے طرحاں نو رزلٹ تے ٹائی میچز وچ مشترکہ طور تے چار میچز وچ 95دی اوسط نال 287رنز سکور کر چکے جد کہ 42 ہارن والے میچاں وچ صرف 35دی اوسط نال 1496رنز سکورکیتے نیں۔یعنی ون ڈے کرکٹ وچ وی جدوں جدوں بابراعظم وڈا سکور کرن وچ نکام ہوئے اوہدوں ادوہدوں ٹیم مشکل وچ نظر آئی۔ جے بابر صرف ذاتی ریکارڈ بنا رہے ہوندے تے تیرہ سنچریاں ٹیم دی جت نہیں بلکہ ٹیم دی ہار وچ ہونا چاہیدے سن۔ ایہناں سٹیٹس دے علاوہ ون ڈے کرکٹ وچ بابراعظم دے کجھ اہم کارنامے تھلے دتے نیں۔
ون ڈے کرکٹ وچ پچھلے ڈھائی سال توں ودھ عرصہ توں بابراعظم عالمی رینکنگ وچ پہلے نمبر تے براجمان نیں۔پچھلے دونویں سالاں 2021تے 2022وچ آئی سی سی دی ون ڈے تیم آف دی ائیر دے کپتان مقرر کیتے جا چکے نیں۔پچھلے دونویں سال ون ڈے کرکٹر آف دی ائیر دا اعزاز وی بابراعظم دے نام رہیا۔
ون ڈے کرکٹ دی 50ورھیاں توں ودھ تریخ وچ 50توں ودھ ون ڈے میچز کھیڈن والے بلے بازاں دی فہرست وچ سب توں ودھ اوسط 59 دا ریکارڈ وی بابراعظم دے کول اے۔ ون ڈے کرکٹ دی تریخ وچ دو مختلف موقعیاں اتے تن مسلسل سنچریاں سکور کرن والے واحد بلے باز بابراعظم نیں۔تن میچز دی کسی وی ون ڈے سیریز وچ سب توں ودھ رنز تن سو سٹھ سکور کرن دا ریکارڈ وی بابراعظم دے کول اے۔
ون ڈے کرکٹ وچ تیز ترین چار ہزار مکمل کرن دا اعزاز وی بابراعظم دے نام رہیا جہناں نے صرف 82 اننگز وچ ایہہ ہندسہ پار کیتا۔ون ڈے کرکٹ وچ رتیز ترین 17 سنچریاں سکور کرن دا ریکارڈ وی بابراعظم دے کول اے جو اوہناں نے صرف 85 اننگز وچ مکمل کیتیاں۔
بطور کپتان ون ڈے کرکٹ وچ تیز ترین اک ہزار مکمل کرن دا ریکارڈ وی بابراعظم دے کول اے جہڑا اوہناں نے تیرہ میچز وچ پورے کیتے جد کہ ایس توں پہلے ایہہ ریکارڈ ویرات کوہلی 17اننگز دے کول سی۔
ٹی ٹونٹی انٹرنیشنل کرکٹ
ہن واری اے ٹی ٹونٹی کرکٹ دی جہدے وچ بابراعظم دے سٹرایک ریٹ نوں لے کے تنقید دا نشانہ بنایا جاندا اے۔ ساڈے سوشل میڈیا دے کرکٹ ایکسپرٹس دا کہنا اے کہ بابراعظم چونکہ 127دے سٹرائیک ریٹ نال ٹی ٹونٹی انٹرنیشنلز کھیڈدے نیں ایس لئی اوہ ٹی ٹونٹی کرکٹ لئی فٹ نہیں نیں۔
اوہناں دے کیرئیر اتے نظر پائو تے بابراعظم ہن تک 99ٹی ٹونٹی انٹرنیشنلز وچ 41دی اوسط نال تن ہزار 355 رنز سکور کر چکے نیں جہناں وچ اوہناں دا مجموعی سٹرائیک ریٹ 127اے۔ 99میچاں وچوں بابراعظم دی موجودگی وچ ٹیم پاکستان 64وچ کامیاب رہی۔ پنج میچز بغیر کسی رزلٹ دے ختم ہوئے جد کہ صرف 30میچز وچ پاکستان نوں شکست دا سامنا کرنا پیا۔
جتن والے 64میچاں وچ بابراعظم 45دی اوسط تے 131دے سٹرائیک ریٹ نال 2353رنز سکور کر چکے نیں جہناں وچ دو سنچریاں تے 22نصف سنچریاں شامل نیں جد کہ ہارن والے 30میچاں وچ 32دی اوسط تے 119دے سٹرائیک نال 943رنز بنا چکے نیں یعنی ٹوٹل ٹی ٹونٹی انٹرنیشنل رنز دے 70فیصد رنز وننگ کاز وچ بنان والے پلیئر نوں صرف ذاتی پسند ناپسند دی بنا تے تنقید دا نشانہ بنایا جاندا اے۔ جے بابراعظم میچ دی صورتحال نوں سمجھے بغیر گھٹ سٹرائیک ریٹ نال سکور بنا رہے ہوندے تے اوہناں دے 33سو رنز وچوں ستر فیصد رنز یعنی 23سو رنز جت نہیں بلکہ ہار وچ ہونے چاہیدے سن۔
رہی گل سٹرائیک ریٹ دی تے پاکستان لئی ٹی ٹونٹی انٹرنیشنلز وچ 13کھیڈاری 550 توں ودھ سکور بنا چکے نیں جہناں وچوں سب توںودھ سٹرائیک ریٹ شاہد خان آفریدی دا 150اے جو 99میچز وچ اٹھارہ دی اوسط نال صرف 1400رنز بنان وچ کامیاب ہو سکے جد کہ دوجے نمبر تے سٹرائیک ریٹ دھواں دار اوپنر بلے باز فخر زمان دا 129اے جو بہتر72 میچاں وچ 22دی اوسط نال صرف 1369 رنز سکور کر سکے۔ تیجے نمبر تے سٹرائیک ریٹ بابراعظم دا اے جو کہ 127.90اے۔
پاکستان لئی دو ہزار توں ودھ رنز سکور کرن والے صرف چار کھیڈاری نیں اوہناں وچوں سب توں ودھ سٹرائیک ریٹ بابراعظم دا اے تے تن ہزار توں ودھ سکور کرن والے واحد بلے باز بابراعظم نیں۔ پاکستان لئی 30توں ودھ اوسط والے چار کھیڈاری نیں جہناں وچوں اک بابراعظم نیں تے اوہناں چاراں وچ وی سب توں ودھ سٹرائیک ریٹ بابراعظم دا اے۔ پاکستان لئی 10توں ودھ ففٹیاں سکور کرن والے تن کھیڈاری نیں جہناں وچوں اک بابراعظم نیں جد کہ بابراعظم 30ففٹیاں سکور کر چکے نیں۔ ایہناں تناں وچ وی سب توں ودھ سٹرائیک ریٹ بابراعظم دا اے یعنی پاکستان لئی تیجے بہترین سٹرائیک ریٹ دے نال سب توں ودھ سنچریاں‘ ففٹیاں تے رنز سکور کرن والے کھیڈاری نوں ای تنقید دا نشانہ بنایا جاندا اے۔
ٹی ٹونٹی انٹرنیشنلز وچ بابراعظم دے اہم کارنامیاں دی فہرست وی لمی اے جہناں وچ کجھ تھلے دتے نیں۔
پاکستان لئی اک توں ودھ سنچریاں بنان والے واحد بلے باز بابراعظم (2) نیں۔
200توں ودھ دے ہدف دے کامیاب حصول وچ دو سنچریاں بنان والے دنیا دے واحد بلے باز وی بابراعظم ای نیں۔
پاکستان دنیا دی واحد ٹیم اے جہنے دو سو دا ٹارگٹ بغیر کوئی وکٹ گوائے حاصل کیتا جہدے وچ بابراعظم سنچری بنا کے ناقابل شکست رہے۔
ٹی ٹونٹی کرکٹ وچ سب توں ودھ رنز سکور کرن والیاں دی لسٹ وچ ویرات کوہلی‘ روہت شرما تے مارٹن گپٹل مگروں بابراعظم دا چوتھا نمبر اے۔
ٹی ٹونٹی انٹرنیشنلز وچ سب توں ودھ ففٹی پلس سکور بنان والیاں وچ ویرات کوہلی (38) تے روہت شرما (33) مگروں تیجا نمبر بابراعظم دا اے جو صرف 99میچاں وچ (32) ففٹی پلس سکور زبنا چکے نیں جد کہ ویرات کوہلی 115تے روہت شرما 148میچز کھیڈ چکے نیں۔
آئی سی سی ولوں بابراعظم سال 2021دے ٹی ٹونٹی ورلڈکپ تے سال دی بہترین ٹیم دے کپتان نامزد کیتے گئے سن۔ ٹی ٹونٹی رینکنگز وچ نمبرون تے نمبر ٹو پوزیشن اتے رہن مگروں ہن نمبر تن تے موجود نیں۔
قارئین! ایہناں اعدادوشمار دا جائزہ لین مگروں کوئی وی ذی شعور کرکٹ شائق ایس گل دا اندازہ بخوبی لا سکدا اے کہ ایس ویلے بابراعظم تناں فارمیٹ وچ بہترین بلے باز نیں۔ سال 2022وچ انٹرنیشنل کرکٹ وچ مجموعی طور تے 2598رنز بنان تے بابراعظم نوں سرگار فیلڈ کرکٹ آف دی ائیر دے اعزاز نال وی نوازیا گیا جو کسی وی پلیئر نوں اک سال وچ تناں فارمیٹس دی کارکردگی دی بنا تے دتا جاندا اے۔ ایس دے علاوہ کجھ دناں پہلاں ای بابراعظم نوں صدر پاکستان ولوں ستارہ امتیاز نال وی نوازیا گیا۔ بابراعظم ایہہ اعزاز حاصل کرن والے گھٹ عمر پاکستانی کرکٹ بن گئے نیں۔ امید اے پاکستان دا ایہہ ستارہ ایسے طرحاں دنیائے کرکٹ اتے راج کردا رہوے گا تے پاکستان دا نام پوری دنیا وچ روشن کردا رہوے گا۔ پاکستان نوں بہت سارے بین الاقوامی ایونٹس وی جتوائے گا۔ پاکستان زندہ باد۔