بائیکاٹ مہم
سانوں اپنی زندگیاں وچ رہن سہن ،لین دین تےویاہ وچ سادگی اپنانی ہووے گی
عتیق انور راجہ
بحیثیت مسلمان اسیں سارے ایہہ مننے آں کہ نبی پاکؐ دی حیاتی ساڈے لئی بہترین نمونہ سی۔ تے فیر سانوں آپؐ دی زندگی دا بغور مطالعہ کر کے اپنی زندگیاں نوں آسان بنان دی کوشش کرنی ہووے گی۔ سانوں اپنی زندگیاں وچ رہن سہن وچ لین دین وچ ویاہ وچ سادگی اپنانی ہووے گی۔ ہوٹلاں دے بجائے احباب لئی گھراں وچ افطاری دا پربندھ کیتا جانا چاہیدا اے۔ گھر دے کھان وچ ہوٹل جیا ذائقہ بھلے نہ ہووے لیکن برکت ضرور ہووے گی۔ ویسے تے مہنگائی ساڈا مقدر بن چکی اے۔ پاکستان وچ ہر سال رمضان دے دناں وچ مہنگائی ودھ جانا معمول بن چکیا اے۔
رمضان توں تن دن پہلے تک جو خربوزہ سو روپے کلو مل رہیا سی اوہو خربوزہ رمضان توں اک دن پہلے دو سو روپیہ کلو وکنا شروع ہو چکیا سی۔ سیب‘ امرود‘ کھجور تے دوجے پھلاں دا وی ایہو حال اے۔ سموسہ جہڑا 30توں 50 روپے وچ فروخت ہویا کردا سی اوہ 60توں 70 روپے تک ویچیا جا رہیا اے یعنی لوکاں نے رمضان نوں کمائی دا ذریعہ سمجھ لیتا ہویا اے۔ ایہہ اج توں نہیں ہو رہیا اے بلکہ ایہہ مصنوعی مہنگائی ہر دور وچ ہوندی چلی آ رہیا ے۔
انتظامیہ وی اوہانں دناں خوب دیہاڑیاں لاندی اے۔ قیمتاں اتے کنٹرول عام دناں وچ وی انتظامیہ نہیں کر پاندی اے۔ قیمت کنٹرول کرنا جیویں ناممکن جیا ہو چکیا اے۔ چنگا ہن ایہہ اک نویں ہوا چل پئی اے کہ ہر رمضان وچ جدوں کھجوراں‘پھل تے سموسے وغیرہ مہنگے ہوندے نیں تے یار لوک سوشل میڈیا تے ایس مہنگائی دے خلاف خوب آواز بلند کرن لگدے نیں۔ کوئی کہہ رہیا اے کہ تن دن پھل نہ خریدیا جاوے تے کدھروںمشورہ ملدا اے کہ سادہ غذا توں رمضان گزارن دی کوشش کیتی جانی چاہیدی اے۔ ساڈی بیگم پاک فرمان لگی راجہ صاحب! شہر گئے سی تے کجھ فروٹ شروٹ ای لے آنا سی۔
میں جواب دتا بلی لوکے اج کل مہنگائی پاروں پھلاں دا بائیکاٹ کرن دی مہم چل رہی اے۔ سوشل میڈیا اتے بیٹھے ماہرین فرما رہے نیں کہ کجھ دن جے پھل نہ خریداں گے تے منافع خوراں دی ہوا نکل جاوے گی تے ہر فروٹ مارکیٹ وچ سستے داماں دستیاب ہووے گا۔ بیگم نے مشہور زمانہ فقرہ بولیا تہانوں کجھ پتہ نہیں چلدا جو ایہہ مشورے فیس بک تے واٹس اپ تے دے رہے نیں اوہناں دے گھراں وچ جا کے ویکھو اوہناں دے فریج ہر قسم دے فروٹ نال بھرے پئے ہون گے۔ تسیں کتاباں اکٹھی کردے او۔ ہوں‘ جاوجا دے اپنے کمرے وچ بیٹھ کے مہنگائی اتے کالم لکھو۔ تہانوں بس ایہو تے کرنا آندا اے۔
صاحبو! رب دا کرم اے کہ پڑھے لکھے گھر نال تعلق اے جہدی وجہ نال سوچنا سمجھنا تھوڑا بہت لکھنا آندا اے۔ پڑھے لکھے دا مطلب صرف تعلیمی ڈگریاں نہیں بلکہ جہڑے گھر وچ اکھ گاوچی ایہدے وچ سکول جان تے تعلیم حاصل کرن دا مطلب ایہہ سمجھایا جاندا سی کہ پڑھو کہ تسیں رب ‘ رسولؐ دی پہچان کر سکو‘ پڑھو تاں جے تہانوں اپنی پہچان ہو سکے۔ اللہ بخشے مرحوم والد صاحب نے کدی نہیں کہیا سی کہ جا وڈی وڈی ڈگریاں حاصل کرو تاں جے تہانوں چنگا روزگار ملے۔ اباجی کہیا کردے سن کہ اللہ روزی دین والا اے۔ جو وی کم کرو یقین نال محنت نال تے اعتماد نال کرو۔
مسلمانوں جے واقعی بائیکاٹ کرنا اے تے پھلاں دے نال دوجی فضول خرچیاں دا وی بائیکاٹ کرو۔ جھوٹ دا بائیکاٹ‘ ذخیرہ اندوزی دا بائیکاٹ‘ ظاہری یاد کھاوے دی نمودونمائش دا بائیکاٹ‘ چوری دا بائیکاٹ‘ کرپشن دا بائیکاٹ‘ جہالت دا بائیکاٹ‘ عید تے چار چار سوٹ ساتھ میجنگ شوز خریدن دا بائیکاٹ تے پڑوسیاں رشتہ داراں دے نال دکھلاوے دا بائیکاٹ۔
قرض لے کے ملک چلان والے عوام لئی بہت کجھ چاہندے ہوئے وی بہتری نہیں کر پاندے نیں۔ عالمی مالیاتی اداریاں دے حکم تے صرف پیٹرولم مصنوعات دی قیمتاں ودھاندے نیں تے اک دم ہر جنس دی قیمت ودھ جاندی اے۔ ایہہ منیا جا رہیا اے کہ سفید پوش لئی دو ویلے دی روٹی دا حصول ناممکن ہو چکیا اے۔ غریب دی زندگی ابتر ہو چکی اے تے بہت سارے واقعات ایسے وی ویکھے سنے جا رہے نیں کہ شریف گھراں دے شہری بالاں دا ڈھڈ پالن لئی چوریاں کر رہے نیں۔ رمضان نوں رب دی رحمتاں دا مہینہ کہیا جاندا اے تے ایہہ مہینہ اوہ اے جہنوں پروردگار نے اپنا مہینہ کیا ہویا اے۔ مسلماناں لئی رمضان انعام دی شکل وچ اے۔
مسلمان سارا سال دعا کردے نیں کہ اللہ کرم کرے تے اوہناں نوں رمضان نصیب ہوندا کہ اوہ عبادت کر کے رب دی خوشنودی حاصل کر سکن۔ رمضان وچ عبادت دا ثواب کئی گنا ودھ جاندا اے۔ میرا ایہہ مننا اے کہ رب دی منشا ایہو اے کہ اوہ ہر کلمہ گو نوں روز حساب معاف کر دیوے۔ انسان نوں پیدا کرن والا رب جاندا اے کہ انسان عبادت وچ کیسی سستی کر سکدا اے ایسے لئی اوہ رمضان وچ نماز پڑھن دا ثواب کئی نمازیاں دے برابر عطا کرن دی نوید سناناد اے۔ رمضان وچ ای شب قدر اوہ رات اے جہنوں ہزار مہینیاں یعنی 86سال دے برابر کہیا گیا اے یعنی جہڑے بندے نوں ایہہ رات مل جاوے اوہنوں 86 سال دی عبادت دا ثواب حاصل ہو سکدا اے۔
