زمان پارک اک علاقہ یا علاقہ غیر؟

ایہہ ایسی مرکزی جگہ اے کہ شہر دے اک حصے توں دوجی جگہ جان لئی ایتھوں لنگھنا پیندا اے

حسنین ناصر

پچھلے کجھ دناں توں لہور میدان جنگ بنیا ہویا اے۔زمان پارک جتھے عمران خان دی رہائش اے‘ اوہ کینال روڈ تے مال روڈ پل دے کول واقع اے۔ ایہہ ایسی مرکزی جگہ اے کہ شہر دے اک حصے توں دوجی جگہ جان لئی ایتھوں لنگھنا پیندا اے۔ جہڑے لوک لہور بارے نہیں جاندے‘ اوہ ایہہ سمجھ لین کہ لہور دی نہر شہر نوں وچوں وڈدی اے۔ ٹھوکر نیاز بیگ نوں کسی نے جوہر ٹائون‘ وفاقی کالونی‘ فیصل ٹائون‘ مسلم ٹائون موڑ‘گلبرگ‘ اقبال ٹائون تے اگے مال روڈ‘ جیل روڈ وغیرہ مگروں مغل پورہ‘ ہربنس پورہ‘ جلو پنڈ وغیرہ جانا ہووے تے سب توں آسان طریقہ نہر دی سڑک اتے سفر اے۔ زمان پارک تے پلس دے آپریشن دی وجہ نال دو دن شہریاں لئی جنی تکلیف دن اے اوہدا اندازہ نہیں لایا جا سکدا۔
سب توں پریشان کن معاملہ پلس دا شہریاں نال بڑے خطرناک انداز وچ براہ راست ٹکرائو سی۔ نو ورھیاں پہلاں ماڈل ٹائون وچ ڈاکٹر طاہر القادری دے دفتراں دے باہر بیرئیر ہٹان دے حوالے نال انج ای آپریشن ہویا سی جہڑا مگروں خونی شکل اختیار کر گیا۔ چودہ پندرہ لوک جاں بحق ہوئے جہناں وچ زنانیاں وی شامل سن۔ غالباً ایسے وجہ نال زمان پارک وچ آپریشن لئی پلس نوں انسو گیس شیلز دتے گئے۔ اوہناں نوں براہ راست فائرنگ دا نہیں کہیا گیا تے نہ ای ایس طرحاں وڈی تعداد وچ ہتھیار تقسیم کیتے گئے۔ ایہدے باوجود جدوں سینکڑاں پلس اہلکار کسی عمارت تے ٹٹ پئیاں تے نوجوان دفاع کرن والے ہون تے شیلنگ ‘ لاٹھی چارج وغیرہ توں وی لوک زخمی ہو سکدے نیں‘ خدانخواستہ کسی دی جان جا سکدی اے۔
ملین ڈالر سوال ایہہ اے کہ اخیر ایہدی نوبت کیویں آئی؟
عام طور تے ویکھیا ایہو گیا اے کہ حکومتاں کشیدگی گھٹ کرن دی کوشش کردیاں نیں جد کہ اپوزیشن درجہ حرارت ودھاندی اے کیوں جے اوہنوں گرما گرمی دا فیدہ پہنچدا اے۔ حکومت ہمیشہ استحکام تے امن وسکون چاہندی اے تاں جے کجھ کم کر سکے۔ ایس واری الٹ ہو رہیا اے۔ تحریک انصاف اج کل پرسکون ہو کے الیکشن کمپین ولوں متوجہ ہونا چاہندی اے۔ عمران خان ایس ویلے سیاسی سرگرمیاں کرنا چاہندے نیں۔
وفاقی حکومت تے اوہناں دی واضح طور تے غیر مشروط حامی (صوبائی نگران حکومت البتہ سیاسی درجہ حرارت ودھان دی خواہش مند اے۔اوہ عمران خان نوں ہر حال وچ گرفتار کرن دے درپے نیں۔ بظاہرایہدا اک ای مقصد نظر آ رہیا اے کہ عمران خان نوں الیکشن کمپین نہ چلان دتی جاوے۔ اصل مقصد شاید ایہہ ہووے کہ سیاسی کشیدگی اینی ودھ جاوے کہا لیکشن ملتوی کرن دا بہانہ مل جاوے۔
ایتھے دو سوال پیدا ہوندے نیں۔ اک سوال حکومت ولوں جد کہ دوجا اپوزیشن یعنی عمران خان دی جماعت ولوں پچھیا جا رہیا اے۔ پہلا سوال ایہہ اے کہ اخیر عمران خان گرفتاری کیوں نہیں دیندے۔ایہہ اہم سوال اے تے بظاہر وڈا منطقی وی لگ رہیا اے کہ خان صاحب گرفتاری کیوں نہیں دے رہے۔ایہدی حمایت وچ کئی دلائل پیش کیتے جا سکدے نیں جیویں ایہہ کہ قنون ساریاں لئی برابر اے۔ ہر ملزم دا اک ای درجہ اے جدوں دوجے ملزم عدالتاں دے سامنے پیش ہو سکدے نیں تے عمران خان کیوں نہیں؟ عمران خان وچ جرات اے تے اوہ ازخود گرفتاری دے دیوے وغیرہ وغیرہ۔
معقول سوالات نیں۔ میری ذاتی رائے وچ عمران خان نوں عدالتاں وچ پیش ہونا چاہیدا اے۔ ایس مقصد لئی اوہنوں گرفتاری وی دے دینی چاہیدی سی ایہدے لئی یقینی طور تے مشکل پیدا کیتی جا رہی اے۔ مختلف کیسزنیں۔ مختلف جگہ تے اوہدے لئی وارنٹ جاری ہون گے تاں جے اوہ ہر جگہ پہنچ نہیں سکے۔ ایہدے باوجود جس حد تک ممکن ہویا اوہنوں جانا چاہیدا اے۔ قنون دے اگے جھکن دا رویہ نہ صرف مستحسن اے بلکہ ایس توں اوہناں دا امیج بہتر ہووے گا۔
پی ٹی آئی والیاں دے کول ویسے سوال دا ایہہ جواب اے کہ عمران خان عدالتاں وچ پیش ہونا چاہندے نیں۔ اوہناں نے صرف زخمی ہون دی وجہ نال کجھ عرصہ پیشیاں لیتیاں تے اجے پچھلے ہفتے ای اوہ اسلام آباد جوڈیشل کمپلیکس وچ تن عدالتاں دے سامنے حاضر ہوئے۔ عمران خان خود کہہ رہے نیں کہ اوہ اٹھارہ مارچ نوں فیر عدالت وچ حاضر ہون گے۔تحریک انصاف دے وکلا دا ایہہ وی کہنا اے کہ عمران خان تے چونکہ اک قاتلانہ حملہ ہو چکیا اے۔ ہور حملیاں دا سیریس تھریٹ اے ایس لئی اوہناں دی کوشش اے کہ غیر محفوظ عمارت والی عدالت دے بجائے جوڈیشل کمپلیکس جیسی مناسب حفاظت والی بلڈنگ وچ موجود مختلف عدالتاں وچ کیس ٹرانسفر کرائے جان۔
دوجے لفظاں وچ تحریک انصاف دے مطابق سکیورٹی دی وجہ نال عمران خان دی حاضری وچ تاخیر ہوئی اے۔ جے عدالت ویڈیو لنک دے ذریعے حاضری تسلیم کر لوے تے فیر مسئلہ ای ختم ہو گیا لیکن جے انج نہ ہووے فیر وی عمران خان اگلی پیشیاں اتے عدالتجان نوں تیار اے۔
شروع وچ دو سوالاں دا ذکر کیتا۔اک ہو گیا‘ دوجا سوال تحریک انصاف دے حامی پچھدے نیں۔ اوہناں دا کہنا اے کہ اک ایڈیشنل سیشن جج دی عدالت توں جاری ہون والے وارنٹ نوں کدوں داد ریاست نے زندگی موت دا مسئلہ بنا لیتا؟ اوہناں دا ایہہ کہنا اے کہ ایہہ وارنٹ کسی قاتل‘ ڈاکو‘ ریپسٹ یا ات گرد لئی جاری کیتے گئے۔ ایہہ کیسز وچ حاضر نہ ہون تے روٹین وچ یاری ہون والے وارنٹ نیں۔ عام طور تے پلس جہناں وچ ہر گز مستعدی نہیں وکھاندی۔ ملزم دے وکلا ای اوہنوں نمٹاندے نیں۔ اوہ عدالت پیش ہو جاندے نیں تے عدالت دے مطالبہ تے ملزم نوں وی حاضر کرا دیندے نیں۔ انج وارنٹ ختم ہو جاندے نیں۔ روزانہ مختلف سول ججاں‘ سیشن ججاں دی عدالتاں توں ایسے وارنٹ جاری ہوندے رہندے نیں۔ بہت ساریاں اتے عملدرآمد دی نوبت ای نہیں آندی۔
تحریک انصاف دی قنونی ٹیم تے اوہناں دے حامی ایہہ سوال پچھدے نیں کہ آخر اسلام آباد پلس تے ایسی غیر معمولی مستعدی دا جنون کیویں سوار ہویا؟ اوہ کئی سو کلومیٹر دا سفر طے کر کے لہور آئے تے پنجاب پلس دے سینکڑاں اہلکاراں دی مدد نال زمان پارک اتے حملہ آور ہوئے۔ ایس کوشش وچ اپنی جان تے تحفظ دی وی پروا نہیں کیتی۔ آخر کیوں؟ کیہ صرف عدالتی حکم دی پابندی تے قنون دی سربلندی ای مقصد اے؟
تحریک انصاف دا ضمنی سوال ایہہ اے کہ پی ڈی ایم حکومت تے اوہدے گورنر صاحبان جہڑے ملک دی سب توں وڈی عدالت سپریم کورٹ دے فیصلیاں دی رتی برابر پرواہ نہیں کر رہے۔ سپریم کورٹ 90 دناں وچ صوبائی اسمبلیاں دے الیکشن دی آئینی پابندی دا کہہ چکیاں نیں۔ پنجاب وچ الیکشن کمیشن نے مجبوراً ڈیٹ دے دتی کیوں جے فائنل صدر نے کرنا سی۔ انج 30اپریل دی تریخ دا اعلان ہو گیا۔ کے پی وچ گورنرنے الیکشن کمیشن نال مشاورت دے نام تے دس بارہ دن ضائع کر دتے تے الیکشن کمیشن دے کن تے جوں تک نہیں رینگی۔ کیہ الیکشن کمیشن نوں علم نہیں کہ وقت تیزی نال لنگھیا جا رہیا اے اوہ گورنر نوں تاخیر نال روکن؟
ایہدے بجائے گورنر کے پی حاجی غلام علی نے پنج چھ دن مگروں مشاورت لئی الیکشن کمیشن نوں بلایا تے اوہ مزے نال من گئے۔ ایہہ تے آخر صدر مملکت نے مداخلت کیتی۔ گورنر نوں ملاقات لئی بلایا تے ڈیٹ دین دا کہیا تے گورنر نے 28مئی نوں کے پی اسمبلی دے الیکشن دا اعلان کیتا یعنی اج توں ڈھائی مہینے مگروں آخر کیوں؟ حالانکہ سپریم کورٹ دا حکم سی کہ آئینی مدت نال تجاوز کرنا پووے تے گھٹ توں گھٹ دناں لئی اگے جان۔
گل اوہو اے کہ جہڑی حکومت تے انتظامیہ سپریم کورٹ دے فیصلے نوں نہیں من رہی۔اوہ جے دعویٰ کرے کہا ک ضلعی عدالت دے فیصلے دی پابندی کران دا جذبہ اوہناں وچ پیدا ہو گیا اے تے سنن والے نوں ہسی آوے گی۔ اوہ متاثر نہیں ہووے گا۔
اوہناں دونوواں دا موقف اپنی جگہ مگر ساڈی ذاتی رائے وچ عمران خان نوں عدالتاں وچ پیش ہونا چاہیدا اے۔ گرفتاری دین توں گریز بوہتے مسائل پیدا کر رہیا اے۔ گرفتاری دا فیصلہ خود کرن مگر ہن کر گزرن۔ گلگت بلتستان حکومت دے پلس اہلکاراں دی زمان پارک عمران خان دے گھر موجودگی دی خبر جے درست اے تے اوہناں نوں واپس بھیج دینا چاہیدا اے۔ایہہ نامناسب اے۔ جی بی پلس دا لہور وچ کوئی کم نہیں۔ عمران خان دی حفاظت اوہناں دی ذمہ واری نہیں۔
جاندے جاندے اک دلچسپ نکتہ جو ساڈے اک سینئر صحافی تجزیہ نگار نوں لیگ نے پیش کیتا۔ کالم لکھن توں پہلے اوہ تشریف لیائے۔ گپ شپ ہوئی۔ کہن لگے کہ مینوں تے پلس دے ایس اچانک آپریشن دی اک ای وجہ سمجھ آندی اے اوہ ہے توشہ خانہ دی تفصیلات پبلک ہون مگروں پیدا ہون والی شرمندگی نال عوام دی توجہ ہٹانا۔ اوہناں نے کہیا تسیں خود سوچو کہ میڈیا توں اچانک ای توشہ خانے دا معاملہ غائب ہو گیا اے۔ ہر پاسے ایسے آپریشن دی خبراں چل رہیاں نیں۔ کیہہ ایہہ محض اتفاق اے؟
اوہناں دی ایس گل توں پہلاں مینوں زمان پارک دا آپریشن اک ہور گناہ بے لذت لگ رہیا سی۔ ہن سوچن لگیا واں کہ ایہہ گناہ بے لذت توں ودھ اک لوڑ توں ودھ چالاکی تے ہوشیاری دا مظاہرہ تے نہیں؟ ایہہ ہور گل کہ پی ڈی ایم دی ہر چالاکی تے ہوشیاری الٹ پے رہی اے۔ ویکھو ایس واری کیہ ہوندا اے؟