داغ دار ماضی دے قصے

مظہر براس

90ء دی دہائی دے آخر وچ شہید محترمہ بینظیر بھٹو دی میڈیا نال کیتی گئی گل بات دلچسپی توں خالی نہیں۔ ایس گل بات وچ بیان کردہ حقائق توں پہلاں اک ہور قصہ سن لوو۔ ایہ نوازشریف دی وزارت عظمیٰ دا پہلا دور سی۔ محترمہ بینظیر بھٹو شہید نے انتخابی دھاندلیاں تے اک وائٹ پیپر چھاپیا۔ جدوں کدھرے کوئی شنوائی نہ ہوئی تے فیر احتجاج دا راہ اپنان دا فیصلہ کیتا۔ محترمہ نے حکومت دے خلاف ٹرین مارچ دا اعلان کیتا تے حکومتی صفاں وچ پریشانی دے آثار نمایاں ہوئے۔ ٹرین مارچ نوں نکام ثابت کرن لئی میڈیا نوں بطور ہتھیار استعمال کرن دا فیصلہ کیتا گیا۔ حاجی اکرم سیکرٹری اطلاعات سن۔ انور محمود غالباً پی آئی او تے اشفاق گوندل اوہناں دے جونیئر سن جد کہ عبدالستار لالیکا دے کول اطلاعات دی وزارت سی۔ حکومتی اکابر نے دسیا کہ ساڈے لئی سب توں پریشان کن حالات لہور دے اخبارات پیدا کر سکدے نیں۔ اجلاس وچ عبدالستار لالیکا نے اپنے کلاس فیلو اشفاق گوندل نوں کہیا حضور سامان بنھو تے لہور جائو۔ اشفاق گوندل لہور چلے گئے۔ چمبہ ہائوس لہور وچ ڈیرے لگ گئے۔ اشفاق گوندل نے پورا ٹل لایا اخبارات وچ ذاتی مراسم استعمال کیتے۔ اشتہارات دا قصہ وکھرا پر ذاتی مراسم نے کم کر وکھایا۔ ایس طرح لہور دے اخبارات نے ٹرین مارچ نکام ثابت کر دتا۔ لہور دے اک وڈے اخبار دے جیالے ایڈیٹر نے وی ٹرین مارچ دی نکامی دی سرخی جمائی۔ رات گئے اوہ کاپی گھل کے سدھا چمبہ ہائوس آیا تے اوہنے اشفاق گوندل نوں کہیا تسیں میرے توں ظلم کروا دتا اے فیر اوہ ایڈیٹر اشفاق گوندل نوں نہاری کھلان لئی لے گیا۔ ایس طرح چنگا بھلا ٹرین مارچ میڈیا دے زور تے نکام ثابت کر دتا گیا۔ اشفاق گوندل کم مکمل کرکے اسلام آباد آ گئے کہ اک دن عبدالستار لالیکا دا فون آیا کہ وزیراعظم بڑے خوش نیں تہانوں ملنا چاہندے نیں۔ وزیراعظم ہائوس تشریف لے آئو۔ اشفاق گوندل اپڑے تے نوازشریف واقعی بڑے خوش سن اوہ اشفاق گوندل نوں لان وچ لے گئے تے پچھن لگے کنے پیسے لگے نیں؟ اشفاق گوندل نے جواب سر! 88 ہزار۔
نوازشریف حیران ہوئے بس اٹھاسی ہزار‘ اینے گھٹ؟ اشفاق گوندل نے کہیا جی سر‘ تسیں ایہدے وچ دو ہزارہور شامل کر لوو 90 ہزار سمجھ لوو۔ ایہدے تے نوازشریف نے کہیا تسیں مینوں پنج کروڑ کہندے تے زیادہ خوشی ہوندی۔ تسیں ایناں وڈا کم اینے گھٹ پیسیاں وچ کیویں کر لیا؟ اشفاق گوندل نے جواباً کہیا سر میں ذاتی تعلقات نوں استعمال کیتا۔ نوازشریف ہور تفصیلاں سن دے رہے تے فیر کہن لگے تہانوں چاہیدا سی کہ جیالے ایڈیٹر دی جیب وچ پنجاہ لکھ پا دیندے۔ اگوں وی تے کم اے تے یاد رکھنا کسے لئی اپنے آپ نوں کدی نہیں ویچنا جے ویچنا ای پوے تے اپنے آپ نوں اپنے واسطے ویچ لوو۔
ایہ پرانا قصہ تہانوں ایس لئی سنایا اے کہ تہانوں پتہ لگ سکے کہ پاکستانی سیاست وچ کیہ کجھ ہوندا رہیا۔ ہن آ جائو شہید محترمہ بینظیر بھٹو دی گل بات ول۔ محترمہ کہندیاں نیں کہ کسے نے کہیا رائیونڈ وچ شفٹ ہون دے بعد شریف فیملی دا اک اجلاس ہویا جہدے وچ اوہناں طے کیتا کہ سانوں اقتدار لئی سہارتو ورگے ویہہ ورھے چاہیدے نیں نہ کہ ضیاء الحق ورگے 11 ورھے۔ تسیں لوک تے جان دے او کہ سیاست وچ سہارتو دے خاندان نے معیشت دے شعبے دیاں ساریاں کلیدی تھاواں تے قبضہ کیتی رکھیا۔ مقصد ایہ سی کہ اسیں ویہہ ورھے لئی سیاسی تے معاشی طاقت چاہنے آں۔ اجلاس وچ ایہ گل زیربحث آئی کہ منصوبے دی راہ وچ پنج رکاوٹاں ہو سکدیاں نیں۔ پہلی رکاوٹ اپوزیشن دی صورت وچ پیپلزپارٹی‘ دوجا خطرہ صدر مملکت کیوں جے اوس زمانے وچ اٹھویں ترمیم زندہ سی‘ تریجا خطرہ فوج‘ چوتھا عدیہ تے پنجواں خطرہ میڈیا نوں قرار دتا گیا۔ ایہ پنج نکاتی پروگرام ترتیب دتا گیاں تاں جے قائداعظم دے تصور پاکستا ننوں ختم کیتا جا سکے تے اپنا ویژن مسلط کیتا جا سکے۔ تسیں پچھلے ڈھائی ورھے نوں ویکھو تے اوہناں وچ اجہے قنون بنائے گئے جیویں چیف الیکشن کمشنر اوہو سنے گا جو سیف الرحمن کہوے گا۔ ساڈے نال جو ہویا اوہ تہاڈے سامنے اے۔ میرے سنے میرے خاندان تے مقدمے بنائے گئے۔ حالاں کہ گھر دے ملازماں نوں وی نہ بخشیا گیا۔ ایہ تے اللہ دا شکر اے کہ اوہنے سانوں مقابلے دی ہمت دتی۔
ایسے پنج نکاتی پروگرام دے تحت صدر دا اسمبلی توڑن دا اختیار ختم کر دتا گیا ایہدے بعد عدلیہ تے حملہ کیتا گیا۔ حملہ آوراں نوں نہ صرف لیاندا گیا سگوں ٹیلی ویژن تے وکھایا گیا۔ بساں بھر کے لیاندیاں گئیاں۔ حکومتی وزراء حملہ آوراں نوں شہہ دیندے رہے۔ حملے دے نتیجے وچ ججاں نوں نسنا پیا تے فیر نوازشریف نے اپنے اک لاڈلے جسٹس تارڑ نوں صدر پاکستان بنا دتا حالاں کہ چیف الیکشن کمشنر نے جسٹس تارڑ دے کاغذات نامزدگی ایس لئی رد کیتے سن کہ اوہناں نے تکبیر رسالے وچ جج نوں دہشت گرد کہیا سی فیر اوہدا اقرار وی کیتا سی۔ ایہدے نتیجے وچ چیف الیکشن کمشنر نوں جانا پیا جد کہ تارڑ صدر بن گیا جہانگیر کرامت نے نوازشریف نوں بچایا کیوں جے جدوں صدر تے وزیراعظم دے تنازعے وچ شدت سی تے اک ہفتے لئی معاملات نوں جہانگیر کرمت نے ٹھنڈا کر دتا ایسے اک ہفتے وچ نوازشریف دے بریف کیس چل گئے تے صورتحال بدل گئی۔ ایہدے بعد صرف تجویز دین تے آرمی چیف جنرل جہانگیر کرامت نوں برخاست کر دتا گیا۔ ایہدے بعد اخبارات وچ مسلم‘ جنگ‘ دی نیوز تے فرائیڈے ٹائمز نوں نشانہ بنایا گیا۔ خاص طور تے روزنامہ جنگ تے پریشر سی کہ چوداں صحافیاں نوں کڈھ دیو تے نوازشریف دی کرپشن تے کجھ نہ لکھو۔ ایس طرح اداریاں نوں یرغمال بنان دی کوشش کیتی گئی۔ میں اوورسیز پاکستانیاں نوں کہنی آں کہ اوہ اپنے اپنے ملکاں دے اراکین پارلیمنٹ نوں خط لکھن۔ حالات بارے دسن‘ نوازشریف دی کرپشن دا دسن آخر آئی ایم ایف توں ملن والے پنج ارب ڈالر کتھے گئے؟۔ ایہ بھاویں ماضی دے قصے نیں پر پیپلزپارٹی دی سینئر قیادت دی اکھاں کھولن لئی کافی نیں۔ اسیں تے آواز ای بلند کر سکنے آں بقول ڈاکٹر خورشید رضوی:
جس پھول کو دیکھوں یہی لگتا ہے کہ اس میں
اک رنج بھی رہتا ہے مسرت کے علاوہ