موجودہ صورتحال دا ذمہ دار کون؟
ساڈے ملک پاکستان دی
محمد افضل طاہر وزیرآبادی
ساڈے ملک پاکستان دی موجودہ صورتحال دا ذمہ دار کون اے اسیں عوام آپ یا ساڈے سیاسی لیڈر ملکی صورتحال دے جنے ذمہ دار ساڈے حکمران نیں اونی ای ذمہ دار ساڈی عوام وی اے اسیں ایہو ویکھیا سنیا تے پڑھیا اے کہ جیڑی وی سیاسی جماعت اقتدار وچ آئی اے اوہنے ملک دا کٹ تے اپنا زیادہ سوچیا اے ہر کوئی اپنے مفاد تے اپنے فائدے لئی سوچدا ریا اے تے ہن وی اوہو کجھ ای ہو ریا اے کدی وی کسے وی سیاسی لیڈر نے عام عوام دا تیملک دا نہیں سوچیا جیکر کسے سوچیا ہندا تے اج پاکستان دے ایہو جے حالات نہ ہندے جے ملک بارے چنگا سوچیا ہندا تے اج ساڈہ ملک ترقی پذیر ملکاں وچ شامل ہندا ساڈی عوام وی حوشحال ہندی ۔
میں سمجھناں کہ ساڈے ملک دے ایہو جے حالات دے ذمہ دار صرف سیاستدان یا حکمران ای نہیں بلکہ اسیں عوام وی اونے ای ذمہ دار ہاں کیونکہ جدوں وی کوئی سیاسی حکمران اقتدار وچ آندا اے او ساڈے ووٹاں نال ای آندا اے اوہدی حکومت بنان وچ اوہدا گھٹ تے عوام دا کردار زیادہ ہندا اے اساں کدی وی ایہ نہیں سوچیا کہ اسیں جس سیاسی لیڈر پچھے لگے ہاں کیا او عوام نال یا ملک پاکستان نال مخلص وی ہے کہ نہیں اسیں عوام سوچے سمجھے بغیر ہر اک سیاسی لیڈر دے پچھے لگ جانیں آں حالانکہ سانوں پتہ وی ہندا کہ جیدے پچھے اسیں اپنا سب کجھ چھڈ کے رشتے داراں نال لڑ کے اپنے پیار کرن والیاں نوں اپنے خلاف کر کے اپنا کاروبار چھڈ کے لگے آں جدوں سانوں اوہناں نال کوئی کم پے جاندا اے تے فیر او ساڈا کم کرنا تے دور دی گل اے جدوں اسیں اوہنوں ملنے آں تے او سانوں جاندا وی نہیں ہندا تیسانوں یعنی عام عوام نوں اوس لیڈر دے دفتر دے اندر جان دی اجازت وی نہیں دتی جاندی سانوں ڈب کے مر جانا چاہیدا اے کہ جدے پچھے اسیں سب کجھ چھڈ کے لگے آں او سانوں جاندا وی نہیں۔
جدوں وی کسے سیاسی حکمران تے اوکھا ویلا آندا اے فیر او عام عوام نوں اگے کر دیندا اے فیر اسیں بیوقوف عوام پاگلاں آر اپنے سیاسی لیڈر نوں سچیاں ثابت کرن لئی چوٹھیاں دلیلاں دینیاں شروع کر دینے آں حالانکہ سانوں پتہ وی ہندا اے کہ اے سیاسی لیڈر چوٹھا اے بے ایمان اے پر اسیں فیر وی اوہنوں ڈیفینڈ کرن دی کوشش کرنے آں جدوں کسے سیاسی حکمران تے اوہدی کرپشن تے دو نمبریاں پاروں کوئی کیس ہندا تے او قانون دی گرفت وچ آندا اے تے اوہدے چاہن والیاں دا اک طبقہ او وی اے جیڑا اپنے لیڈر لئی روڈ بلاک کر دیندے نیں اپنے ای املاک دا نقصان کردے نیں عام راہگیراں دیاں گڈیاں نوں آگ لا دیندے نیں سرکاری بلڈنگاں تے حملہ کردے نیں ہزاراں لکھاں مسافراں نوں پریشان کردے نیں مین روڈاں نوں بند کر دیندے نیں مریض وچارے ہسپتال پہنچن توں پہلاں ای ایمبولینس وچ ای مر جاندے نیں ہر سیاسی پارٹی دے جیالے متوالے اپنیاوس لیڈر ہچھے جیڑا اوہناں نوں جاندا وی نہیں اوہدے پچھے ہر حد نوں پار کر جاندے نیں ایتھوں تک کے قیمتی جاناں دا نقصان وی کر جاندے نیں تے اے سب کجھ ایناں دی جہالت پاروں ہندا اے چوکھا افسوس تے اودوں ہندا اے جدوں پڑھے لکھے تے سمجھدار لوک وی ایہو سارہ کجھ کردے نیں جیکر پڑھے لکھے لوک وی جاہلاں والے کم کرن گے تے فیر ساڈے ملک دا اللہ ای حافظ اے کیوں کہ گورنمنٹ وچ تے پہلے ای سارے وزیر مشیر سفارشاں تے رشوتاں دے کے آندے نیں جیڑی وی سیاسی پارٹی اقتدار وچ آندی ایاو اپنی مرضی دے بندیاں نوں اگے لیاندی اے او پانویں اہل ہون یو نہ ہون تانیوں تے ساڈے ملک دا سارہ سسٹم تباہ ہویا اے۔
پاکستانی عوام نوں ایہ سوچنا پوے گا کہ ساڈے جنے وی سیاسی لیڈر نیں جدوں اوہناں تے کوئی اوکھا ویلا آندا یا پاکستان تے کوئی اوکھا ویلا ہندا تے او پاکستان چھڈ کے دوسرے ملکاں وچ کیوں نس جاندے نیں چاہیدا تے اے وے کہ اوکھے ویلے وی حکمران عوام دے وچ رہن اپنے ملک پاکستان وچ رہ کہ ہر اوکھے ویلے دا سامنا کرن تے سانوں عوام نوں وی چاہیدا اے کہ جیڑا لیڈر اوکھے ویلے عوام دا ساتھ نہیں دے سکدا کم ازکم عوام وی اوہدے حق لئی چوٹھے نعرے نہ مارے تے تے سڑکاں نوبند کر کے اپنا ای نقصان نہ کرے ۔
پاکستان دا سب توں وڈا اثاثہ پاک فوج اے تے پاکستانی ہون دے ناطے ہر پاکستانی نوں پاک فوج دی عزت تے احترام کرنا چاہیدا اے کیونکہ پاک فوج دی وجہ توں ای اسیں اپنے ملک وچ آزادی دی تے سکون دی زندگی گزار رہے ہاں پاک فوج پاکستان وچ ہر اوکھے ویلے وچ عوام دا ساتھ دیندی اے پر بڑے افسوس والی گل اے کہ اساں لوکاں پاک فوج نوں سیاست دی نذر کر چھڈیا اے اسیں اپنے چوٹھے تے بے ایمان سیاسی لیڈراں پچھے اپنی فوج نوں وی برا بھلا آکھنے ہاں اسیں پاک فوج دے خلاف نعرے وی لانے آں تے اے ساڈی سب توں وڈی بیوقوفی اے کیونکہ سانوں اے نہیں پتہ کہ اسیں اپنے محافظاں دے خلاف ای نعرے لا رہے آں۔
جیکر اسیں چاہنے آں کے ساڈے ملک پاکستان دا بظام ٹھیک ہووے تے فیر سانوں اپنا آپ بدلنا پوے گا جدوں اسیں عوام اپنے آپ نوں ٹھیک کر لواں گے فیر سارے سیاسی لیڈر وی ٹھیک ہو جان گے جدوں وی کوئی سیاسی لیڈر کسے وی کیس وچ قانون دی گرفت وچ آ جاے تے فیر اوہدے حق وچ نعرے لان دی بجاے اوہدا احتساب ہون دیو جدوں عوام اپنے لیڈراں دیاں غلطیاں تے بھیڑے کماں تے اوہناں دے خلاف کھلو جاآے گئی تے فیر سب کجھ اپنے آپ ای ٹھیک ہو جاے گا اللہ پاک سانوں تے ساڈے لیڈراں نوں نیک ہدائیت دی توفیق عطا فرماے تے ساڈے ملک پاکستان تے اپناکرم فرماے آمین!
