خربوزے دے کھیت!

حناپرویزبٹ

خربوزے دے کھیتاں وچ گدڑ تے کیلے دے باغ وچ حملہ آور باندر اجاڑا ای کردے نیں۔ چوکیداراں نوں پتہ ہونا چاہیدا اے کہ گدڑ تے باندر پیار تے منت دی زبان نہیں سمجھدے اوہ تے قرار واقعی مرمت دے مستحق ہوندے نیں جے اوہناں نوں مسدود نہ کیتا جاوے تے کھیت کھلیان تے باغ ویران ہو جاندے نیں جہدے بعد اجیہا قحط پیندا اے جو انساناں دیاں جاناں لے جاندا اے۔ قہر خدا دا ہسدا وسدا چہکدا مہکدا ترقی و خوشحالی دیاں منزلاں طے کردا ملک برباد کر دتا گیا۔ دنیا حیران اے کہ کیویں اک اٹ لائے بناں ملک تے ستر ورھیاں دے برابر قرضہ چڑھایا جاندا اے عوامی پیسے دی چوری دا عالمی ریکارڈ بنان والے سینہ زوری کردے رہے تے عوام لٹدے رہے۔ کتھے نے اوہ جو 35 روپیے کلو آٹا ملن تے مہنگائی دا ڈبرو وجاندے سن‘ اوہناں نوں کیوں سپ سُنگھ گیا اے کہ اوہناں دیاں غلط پالیسیاں پاروں اج آٹا 170 روپیے کلو ہو گیا اے۔ غریب بھکھ نال مر گیا پر شاہ دولہ دے حمایتی تے شاہ دولہ دے چوہے اک ای دھن وچ دف وجا رہے نیں کہ بندہ ایماندار اے۔ سچ تے ایہہ وے کہ حقیقی کرپٹ نے گھڑی توں لے کے کشمیر تک کوڈیاں دے بھاء ویچ دتے جدوں تباہی دے حقیقی ذمہ دار شاہ دولہ نوں حراست وچ لے لیا گیا تے اوہنوں بچان والے فوراً آ گئے۔ اوہدی رہائی دے حکم تے لوک سمجھ چکے نیں جانبدارانہ فیصلے کیہ ہوندے نیں۔
چار دیواری وچ پیر پھڑن جد کہ میڈیا تے تڑھیاں لان والے شاہ محمود قریشی‘ اسد عمر تے فواد چوہدری نوں حراست وچ لے کے انتشار دا راہ بند کیتا گیا اے تنے مبینہ ٹکر دے لوکاں نے گرفتاری توں بچن دی پوری کوشش کیتی پر ایس واری گرفتاری دا حکم سی ڈران دا نہیں‘ وچارے شاہ محمود نے اجے پارٹی دا لائحہ عمل بذات خود طے کرن دا سوچیا ای سی کہ اسدعمر نے اعلان کر دتا کہ ایہ کم ست رکنی کمیٹی کرے گی۔ پرویزالٰہی بولے میں بانہہ فی سبیل اللہ نہیں سی تڑوائی ۔ ذریعاں دا کہنا اے کہ پرویزالٰہی نے سپین اڑان بھرن لئی سارے انتظامات مکمل کر لئے نیں ایس نازک صورتحال وچ وسیم اکرم پلس عثمان بزدار ای بچدے نیں پارٹی قیادت سنبھالن لئی‘ پی ٹی آئی والے خدشہ ظاہر کر رہے نیں کہ پارٹی تے پابندی لان دی منصوبہ بندی کر لئی گئی اے۔ اک صائب رائے وی زبان زد عام اے کہ ایس جماعت تے پابندی دی اُکا کوئی لوڑ نہیں بس ایہدے سر توں ہتھ چک لیا جاوے۔ اے ٹی ایم مشیناں بند کر دتیاں جان تے زکوۃ دے غلط استعمال تے پابندی لا دتی جاوے باقی دا کم اپنے آپ ای ہو جاوے گا۔ سونامی لیان دے دعویدار رہنما اینے بزدل نکلے کہ پارٹی نوں چاہن والے کارکناں توں لاتعلقی دا اعلان کر دتا فرط جنون وچ سرکاری عمارتاں تے حملہ کرکے ٹٹ بھن کرن والی قوم یوتھ سمجھ جاوے کہ اوہناں دی حیثیت کیڑے مکوڑیاں توں ودھ نہیں جے اوہ ایس احتجاج وچ مبینہ جان وی دے دین تے اوہناں دا کوئی نام لیوا وی نہیں ہووے گا۔
سوشل میڈیا تے دولے شاہ دے چوہے انتشار بھرے ٹرینڈ چلا کے انتشار پھیلان دی روش تے اترے ہوئے نیں۔ جلائو گھیرائو ہووے یاں تشدد‘ ٹٹ بھن ہووے یاں ٹریفک دی بندش‘ ہر انتشاری سرگرمی وچ ڈنڈا بردار شریک سن اسلام آباد وچ احتجاجی مظاہرے دوران للکاریا گیا کہ اسیں کسے قنون نوں نہیں من دے پر جیویں ای اک انسپکٹر نے اوہناں نوں ڈالے وچ پان لئی ساتھیاں نوں سدیا تے ایہ پیر سر تے رکھ کے نس گئے ایہ اوہو سن جو جیل بھرو تحریک وچ وی نس گئے سن۔ شاہ دولہ دے نائبین نے جارحانہ سرگرمیاں توں علیحدگی دا ڈرامہ رچایا اوہناں دے مکالمیاں تے اوہناں دی بدن بولی وچ بالکل وی میچ نہیں سی چنگے وقتاں وچ اوہ ریڈ لائن دی تکرار کردے سن دور حاضر دے شاہ دولہ اک رات حوالات وچ گزارن دے بعد رہا ہون تے یقینا فیر توں اوہو کجھ کرے گا جس کم لئی اوہ آیا اے جنہے تہانوں استعمال کیتا اوہ رہا ہو گیا پر تسیں اوہدے لئی جو ایس ملک دی املاک ساڑی تے قنون دیاں دھجیاں اڑائیاں ہن سڑو جیلاں وچ کئی کئی ورھے کوئی تہانوں پچھے گا وی نہیں۔ مرشد نے اپنے لوکاں دی غنڈہ گردی دی کھلی کچہری وچ وی بھرویں مذمت تے لاتعلقی نال اپنی بے مروتی دا ریکارڈ قائم رکھیا۔ اج ثابت ہو گیا کہ جے کوئی لاڈلا گھڑی توں لے کے کشمیر تک ویچ دیوے مڈل کلاس نوں خط غربت توں تھلے وی گرا دیوے تے کوئی قنون اوہدے تے ہتھ نہیں پا سکدا جے اوہنوں حراست وچ لیا جاوے گا تے اوہدے متوالے پورے ملک نوں اگ وچ سٹ دین گے تے انصاف کہوے کہ اجیہا ای ردعمل آوے گا۔ غضب خدا دا ملک وچ اگ تے خون دی ہولی کھیڈی گئی ذمہ دار نوں عدالت وچ پیش کیتا جاندا اے تے کہیا جاندا اے تہانوں ویکھ کے بڑی خوشی ہوئی۔