پنجاب آرٹس کونسل گوجرانوالہ وچ ادبی بیٹھک آباد

ادبی بیٹھک آباد ہون نال شہر دے ادیباں‘ شاعراں تے لکھاریاں نوں رل بیٹھن دا موقع ملے گا۔ عتیق انور راجہ
گوجرانوالہ وچ ادبی و ثقافتی تقریباں منعقد کروان وچ عتیق انور راجہ باقی تنظیماں توں بہت اگے نیں۔ ادریس ناز گوجرانوالہ

علی بابر

سوموار نوں گوجرانوالہ دی فضاواں وچ اک عجیب بہار سی۔ ہلکی ہلکی بارش‘ ٹھنڈی ٹھنڈی ہوا تے پرندیاں دی شوخیاں اپنے عروج تے سن۔ سام نوں شہر دی ممتاز تنظیم سائبان ویلفیئر سوسائٹی رجسٹرڈ دے پربندھ ہیٹھ پنجاب آرٹس کونسل گوجرانوالہ وچ ادبی بیٹھک آباد کرن دے سلسلے وچ پہلا باقاعدہ مشاعرہ ترتیب دتا گیا سی۔ مشاعرے وچ ڈویژن بھر توں خواتین تے مرد شاعراں دی وڈی گنتی رلت لئی پہنچی ہوئی سی۔ جنے شاعر سن اوہناں توں کدھرے بہتے سامعین ادبی بیٹھک دے آباد ہون دی خوشی وچ آرٹس کونسل دے سوہنے ہال وچ براجمان سن۔ صدر سائبان عتیق انور راجہ دا کہنا سی کہ اوہناں دی اک مدت توں ایہہ خواہش سی کہ گوجرانوالہ شہر وچ لہور وانگوں ادبی بیٹھکاں دا احیا کیتا جا سکے جتھے ہر تنظیم مشاعرے‘ کتاباں اتے گل بات تے ادب دے دوجے پہلوواں اتے گل کرن لئی اکٹھے ہویا کریے۔

راجہ صاحب دا ہور کہنا سی کہ اوہناں دے خیال وچ شہر داسب توں معتبر ادبی چہرہ ادریس ناز ای نیں ایس لئی جدوں ڈائریکٹر غلام عباس فراست

صاحب نے ادبی بیٹھک شروع کرن دی نوید سنائی تے اسیں پہلے مشاعرے دی صدارت لئی اوہناں دا انتخاب کیتا۔ ایہہ ناز صاحب دی ادب نال محبت اے کہ اوہناں نے فوری آکھیا جناب میں حاضر ہو جاواں گا۔ صدر مشاعرہ ادریس ناز‘ مہمانان گرامی قدر سعید احمد تاج،ڈاکٹر سعید اقبال سعدی،سیف بھٹی،سجاد سردار وڑائچ، سرپرست سائبان چوہدری طاہر جاوید نمبردار،عاصم گجر،شیخ آصف،قیصر گھمن تے سلیم مرزادا کہنا سی کہ شہر نوں ادبی تے ثقافتی تقریب دی اج بہت لوڑ اے۔ عتیق انور راجہ پچھلے ست اٹھ ورھیاں توں مسلسل ادبی‘ ثقافتی تے تعلیمی سرگرمیاں منعقد کروا رہے نیں تے ادبی بیٹھک وچ پہلا مشاعرہ کروا کے اوہ ایہہ پیغام دے رہے نیں کہ آن والے کل نوں محفوظ تے روشن بنانا اے تے فنون لطیفہ نوں عام کرنا پووے گا۔

مشاعرے وچ رلت کرن والے شاعراں وچ عرفانہ امر،دلشاد احمد،ایوب صابر،آصف علی علو ی ، امین جان ، وحید احمد انصاری ، مطلوب حسن ، لیاقت قندیل ، جاوید ساغر ، رمضا ن تائب ، فرحانہ عنبر ، محمد صدیق ، زبیر حمزہ ، نوشین حسین نوشی ، روبینا ناز ، ملک ذلفی ناز ، زینت اشرف ، طارق فیاضی تے دوجے شامل سن۔ میاں احتشام‘ رفاقت حسین تے راجہ مشتاق مہمانداری دے فرائض ادا کردے رہے۔